ARATA nĩ andũ arĩa twendete gũkorũo hamwe nao na kwaria nao. No nĩ harĩ bata gũkorũo na arata arĩa magĩrĩire. Hihi ũgwĩciria nũũ ũngĩtuĩka mũrata witũ ũrĩa mwega makĩria?— Nĩ Jehova Ngai.

Hihi no tũhote gũtuĩka arata a Ngai?— Bibilia yugaga atĩ mũthuri ũmwe watũũraga tene, wetagwo Iburahimu, aarĩ “mũrata wa Jehova.” (Jakubu 2:23) Hihi Iburahimu eekire atĩa nĩguo atuĩke mũrata wa Ngai?— Bibilia yugaga atĩ nĩ aathĩkagĩra Ngai. Aathĩkagĩra Ngai o na hĩndĩ ĩrĩa erũo eke ũndũ mũritũ. Kwoguo nĩguo tũtuĩke arata a Jehova, no mũhaka twĩkage maũndũ marĩa mamũkenagia, o ta Iburahimu, na o ta ũrĩa Mũrutani Ũrĩa Mũnene ekaga hĩndĩ ciothe.—Kĩambĩrĩria 22:1-14; Johana 8:28, 29; Ahibirania 11:8, 17-19.

 Jesu eerire atũmwo ake ũũ: “Mũrĩ arata akwa mũngĩka maũndũ marĩa ndĩramwatha.” (Johana 15:14) Na tondũ maũndũ marĩa Jesu aaragia moimĩte kũrĩ Jehova, Jesu eendaga kuonania atĩ arata ake nĩ andũ arĩa meekaga ũrĩa Ngai endaga. Arata ake othe nĩ meendete Ngai.

Arata amwe a Mũrutani Ũrĩa Mũnene maarĩ atũmwo ake, na nĩo marĩ mbica-inĩ ĩrĩa ĩrĩ karatathi-inĩ ka 75 ka ibuku rĩrĩ. Nĩ maathiaga hamwe nake na makamũteithia wĩra wa kũhunjia. Maita maingĩ Jesu aakoragwo hamwe na atũmwo acio. Maarĩaga hamwe. Makaaria ũhoro wa Ngai marĩ hamwe. Na mageka maũndũ mangĩ hamwe. No Jesu nĩ aarĩ na arata angĩ aingĩ. Rĩmwe nĩ aaceeraga kwao, na makagĩa na mahinda ma gũkenanĩra hamwe.

Nĩ harĩ famĩlĩ ĩmwe Jesu aaceeragĩra kaingĩ yatũũraga taũni ya Bethania, hakuhĩ na Jerusalemu. Hihi nĩ ũraririkana andũ a famĩlĩ ĩyo?— Maarĩ Mariamu na Maritha na Lazaro mũrũ wa  nyina nao. Jesu nĩ oigire atĩ Lazaro aarĩ mũrata wake. (Johana 11:1, 5, 11) Jesu nĩ eendete andũ a famĩlĩ ĩyo, na nĩ aakenagĩra gũikara hamwe nao tondũ nĩ meendete Jehova na makamũtungatĩra.

No ũguo ti kuuga atĩ Jesu eekagĩra o arata ake maũndũ mega. O na andũ arĩa mataatungatagĩra Ngai nĩ aamekagĩra maũndũ mega. O na nĩ aathiaga kwao mĩciĩ na akarĩanĩra nao. No ũndũ ũcio nĩ watũmaga andũ amwe moige atĩ Jesu aarĩ ‘mũrata wa etia a mbeca cia igooti na ehia.’ (Mathayo 11:19) Ma nĩ atĩ, Jesu ndaaceeragĩra andũ acio atĩ tondũ nĩ aakenagio nĩ maũndũ marĩa meekaga. Aamaceeragĩra nĩguo amahe ũhoro wĩgiĩ Jehova. Aageragia kũmateithia nĩguo matige gwĩka ũũru matungatĩre Ngai.

Mũthenya ũmwe Jesu nĩ eekire ũndũ ta ũcio itũũra-inĩ rĩa Jeriko. Jesu nĩ gũthiĩ aathiaga Jerusalemu. Rĩrĩa aakinyire Jeriko agĩkora andũ aingĩ mũno, na haarĩ mũndũ ũmwe wetagwo Zakayo. Mũndũ ũcio nĩ eendaga kuona Jesu akĩhĩtũka. No tondũ aarĩ mũkuhĩ, ndangĩahotire kuona Jesu nĩ ũndũ wa gũthiĩkwo nĩ andũ. Kwoguo agĩteng’era mbere na akĩhaica mũtĩ igũrũ nĩguo ahote kuona Jesu.

 Rĩrĩa Jesu aakinyire mũtĩ-inĩ ũcio, akĩmũrora akiuga ũũ: ‘Harũrũka narua, nĩ gũkorũo ũmũthĩ nĩ ngũka gwaku mũciĩ.’ No Zakayo aarĩ mũndũ mũtongu wekĩte maũndũ moru. Nĩ kĩĩ gĩatũmire Jesu aceerere mũndũ ta ũcio mũru?—

Jesu aaceereire Zakayo nĩguo amũhe ũhoro wa Ngai. No ti gũkenio aakenagio nĩ maũndũ marĩa eekaga. Nĩ onire ũrĩa Zakayo eerutanĩirie nĩguo amuone. Kwoguo nĩ aamenyaga atĩ Zakayo no amũthikĩrĩrie. Akĩhũthĩra mweke ũcio kũmwĩra ũrĩa Ngai endaga andũ meke.

Hihi Zakayo eekire atĩa?— Nĩ aakenirio mũno nĩ ũrutani wa Jesu. Na akĩĩrira mũno tondũ nĩ aaheenetie andũ akamatunya mbeca, na kwoguo akiuga nĩ egũcokia mbeca icio. Agĩcoka agĩtuĩka mũrũmĩrĩri wa Jesu. Hĩndĩ ĩyo nĩrĩo Jesu na Zakayo maatuĩkire arata.—Luka 19:1-10.

Angĩkorũo nĩ twĩgerekanagia na Mũrutani Ũrĩa Mũnene-rĩ, hihi nĩ twagĩrĩirũo gũceerera andũ arĩa matarĩ arata aitũ?— Ĩĩ. No tũtirĩmaceeragĩra nĩ ũndũ wa gũkenio nĩ ũrĩa mekaga. Na tũtirĩkaga  maũndũ moru hamwe nao. Tũrĩmaceeragĩra nĩguo tũmahe ũhoro wa Ngai.

No arata aitũ a hakuhĩ nĩo twendaga gũkorũo hamwe nao kaingĩ. Arata arĩa ega nĩ arĩa Ngai akenagio nĩo. Andũ amwe o na no makorũo matoĩ Jehova. No mangĩenda kwĩruta ũhoro wake, no tũmateithie kũmũmenya. Na thutha wa kuonania nĩ mendete Jehova, no tũmatue arata aitũ a hakuhĩ.

Nĩ harĩ ũndũ ũngĩ ũngĩtũteithia kũmenya kana mũndũ no atuĩke mũrata mwega. Nĩ twagĩrĩirũo kũrora maũndũ marĩa mũndũ ũcio ekaga. Hihi nĩ ekaga andũ angĩ maũndũ moru agacoka akamathekerera? Githĩ ũcio ti mũtugo mũru mũno?— Hihi nĩ eingĩragia mathĩna-inĩ? Tũtingĩenda mũrata ũrĩtũingĩragia mathĩna-inĩ, kana tiguo?— Hihi nĩ ekaga maũndũ moru, agacoka akeyona ta arĩ mũũgĩ tondũ ndanamenyeka? O na angĩaga kuonwo nĩ andũ-rĩ, Ngai nĩ onaga ũrĩa areka, githĩ tiguo?— Hihi nĩ ũkuona ta twagĩrĩirũo gũtua mũndũ ta ũcio mũrata witũ?—

Rĩu oya Bibilia yaku. Reke tuone ũrĩa arata amwe arĩa tũgĩaga nao mangĩtũthũkia. Tũgũthoma rĩandĩko rĩa 1 Akorintho 15 mũhari wa 33. Riugaga ũũ: ‘Mũtikanaheeneke. Arata oru nĩ mathũkagia mĩtugo mĩega.’ Ũguo nĩ kuuga atĩ arata aitũ mangĩkorũo marĩ andũ oru, o na ithuĩ no tũtuĩke oru. No angĩkorũo nĩ andũ ega, no matũme tũgĩe na mĩtugo mĩega.

Tũtiagĩrĩirũo nĩ kũriganĩrũo atĩ Jehova nĩwe Mũrata ũrĩa mwega makĩria. Na tũtingĩenda gũthũkia ũrata witũ nake, kana tiguo?— Nĩ ũndũ ũcio twagĩrĩirũo gũcaria arata arĩa tu mendete Ngai.