OOKAUME ketu ovo ovanhu ovo tu hole okupopya navo nokuhafela pamwe navo. Ndele osha fimana okukala tu na ookaume vawa. Mbela oto diladila kutya olyelye ta dulu okukala kaume ketu a denga mbada? —  OJehova Kalunga.

Mbela ohatu dulu ngoo shili okukala ookaume kaKalunga? —  Ombibeli oya ti kutya Abraham, omulumenhu oo a li ko nale, okwa li “kaume kaKalunga.” (Jakob 2:23) Mbela ou shi shii kutya omolwashike Abraham a li kaume kaKalunga? —  Ombibeli otai ti kutya Abraham okwa li ha dulika kuKalunga. Okwa li ha dulika kuKalunga nokuli nongeenge a li a pulwa a ninge oshinima shonhumba shidjuu. Onghee hano, opo tu kale ookaume kaJehova, otu na okukala hatu mu hafifa, ngaashi ashike Abraham a li a ninga nosho yo Omuhongi Munene. — Genesis 22:1-14; Johannes 8:28, 29; Ovaheberi 11:8, 17-19.

Jesus okwa li a lombwela ovayapostoli vaye a ti: ‘Onye ookaume kange,  ngenge tamu ningi eshi handi shi mu lombwele.’ (Johannes 15:14) Molwaashi oinima aishe oyo Jesus a li a lombwela ovanhu oya dja kuJehova, Jesus okwa li a hala okutya ookaume kaye ovanhu ovo hava ningi osho Kalunga te va lombwele. Onghee hano, ookaume kaJesus aveshe ove hole Kalunga.

Ookaume vamwe kopofingo vOmuhongi Munene ova li ovayapostoli vaye, ovo ve li mefano pepandja 75 lembo eli. Ova li hava ende pamwe naye noku mu kwafela moilonga yokuudifa. Jesus okwa li ha kala pamwe novalumenhu ovo efimbo lihapu. Ova li hava li pamwe, nova li hava kundafana pamwe kombinga yaKalunga. Ova li yo hava ningi oinima imwe i lili pamwe. Ashike nande ongaho, Jesus okwa li e na ookaume vamwe vali vahapu. Okwa li yo ha kala pamwe nookaume kaye va tya ngaho nokuhafela pamwe navo.

Jesus okwa li e hole oukwaneumbo umwe oo wa li hau kala mokadoolopa kanini kedina Betania, kondje yoshilando shinene Jerusalem. Mbela oto dimbuluka kutya moukwaneumbo omo omwa li oolyelye? —  Omwa li Maria, Marta nosho yo omumwaina wavo Lasarus. Jesus okwa li a popya  kutya Lasarus okaume kaye. (Johannes 11:1, 5, 11) Jesus okwa li e hole oukwaneumbo oo nokwa li ha hafele okukala pamwe nao molwaashi owa li u hole Jehova nowa li hau mu longele.

Osho inashi hala okutya Jesus ka li e na ko nasha novanhu ovo va li ihava longele Kalunga, ndele okwa li yo e na ko nasha navo. Okwa li nokuli ha i komaumbo ovanhu va tya ngaho ndele ta li pamwe navo. Osho osha li sha ningifa ovanhu vamwe va tye kutya Jesus okwa li ‘kaume kovafutifi novalunde.’ (Mateus 11:19) Ashike Jesus ka li ha i komaumbo ovanhu va tya ngaho molwaashi a li e hole ngeno onghedi yavo yokukalamwenyo. Ponhele yaasho, okwa li he va talele po opo a dule okupopya navo kombinga yaJehova. Jesus okwa li a kendabala okukwafela ovanhu ovo va efe po okulonga owii opo va longele Kalunga.

Osho osha li sha ningwa efiku limwe moshilando Jeriko. Jesus okwa li a hangwa ta ende muJeriko a yuka kuJerusalem. Okwa li ta ende pamwe nongudu yovanhu, nomongudu yovanhu omo omwa li omulumenhu wedina Sakeus. Sakeus okwa li a hala okutala Jesus, ndele Sakeus okwa li muxupi noka li ta dulu okumona Jesus molwaashi opa li ovanhu vahapu. Onghee hano, Sakeus okwa li a tondokela komesho ndele ta londo komuti opo a dule okutala nawa Jesus eshi a li ta piti po.

Eshi Jesus a li a fika pomuti oko kwa li kwa londa Sakeus, okwa tala pombada yao ndele ta ti: “Londoloka ko diva, osheshi nena eli ondi nokuuhala meumbo loye.” Sakeus okwa li  omulumenhu oshipuna oo a li a longa oilonga ihapu ii. Omolwashike Jesus a li a hala okuya keumbo lomulumenhu a tya ngaho? — 

Jesus ka li ta i keumbo laSakeus molwaashi ngeno a hokwa onghedi yaye yokukalamwenyo, ndele okwa li ta i ko opo e ke mu lombwele kombinga yaKalunga. Jesus okwa li a mona nghee Sakeus a li a kendabala noudiinini opo e mu mone, onghee hano, okwa li e shi shii kutya otashi dulika a ka pwilikine osho te ke mu lombwela. Osho osha li omhito iwa okupopya naye kombinga yaasho Kalunga a hala ovanhu va ninge.

Mbela oshike sha li sha ningwa po eshi Jesus a li a ya keumbo laSakeus? —  Sakeus okwa li a hokwa omahongo aJesus. Okwa li yo e livela ombedi eshi a li a nyokoma ovanhu, nokwa li a udaneka okushunifa oimaliwa yovanhu oyo a li e va nyokoma. Opo nee, Sakeus okwa li a ninga omushikuli waJesus. Konima yaasho, Jesus naSakeus ova li va panga oukaume. — Lukas 19:1-10.

Ngeenge ohatu hopaenene Omuhongi Munene, mbela ohatu ka talela po ngoo ovanhu ovo vehe fi ookaume ketu? —  Heeno, ohatu ke va talela po. Ndele itatu ka ya komaumbo avo molwaashi twa hokwa onghedi yavo yokukalamwenyo noitatu ka longa oilonga ii pamwe navo. Ponhele yaasho, ohatu ke va talela po opo tu dule okupopya navo kombinga yaKalunga.

 Ookaume ketu kopofingo ovo ovanhu ovo tu hole okukala pamwe navo. Ndele opo va kale ookaume vawa, ove na okukala va hokiwa kuKalunga. Ovanhu vamwe otashi dulika nokuli va kale vehe shii kutya Jehova oye lyelye. Ndele ngeenge ova hala okulihonga kombinga yaJehova, ohatu dulu oku va kwafela. Nongeenge ova ka ulika kutya ove hole Jehova mokweendela ko kwefimbo, opo nee, ohatu dulu okupanga oukaume wopofingo navo.

Ope na vali onghedi imwe omo hatu dulu okumona kutya omunhu wonhumba oku li kaume muwa ile hasho. Tala kutya omunhu oo oha ningi oinima ya tya ngahelipi. Mbela oha ningile vamwe owii ndele ta yolo shi na sha nasho? Omunhu a tya ngaho ke fi kaume muwa, hasho mbela? — Mbela omunhu oo oha i alushe momaupyakadi? Inatu hala okuya momaupyakadi nomunhu a tya ngaho, hasho mbela? —  Ile mbela omunhu a tya ngaho oha longo oilonga ii owina ndele ta diladila kutya oku na eendunge eshi pehe na omunhu oo e mu mona? Nokuli nonande omunhu a tya ngaho kape na oo a mona osho a ninga, Kalunga okwe mu mona, hasho mbela? —  Mbela oto diladila kutya ovanhu ovo hava longo oilonga ya tya ngaho otava ka kala ookaume ketu vawa? — 

Kufa Ombibeli yoye, ndele hatu tale osho tai ti shi na sha nanghee ookaume ketu hava nwefa mo onghalamwenyo yetu. Natu pandje kOvakorinto votete 15:33. Owa mona po? —  Ovelishe oyo otai ti: “Inamu puka: Ookaume [vai] otava nyono po eenghedi diwa.” Omushangwa oo owa hala okutya, ngeenge otwa kala tu na ookaume vai, nafye ohatu ka kala twe va fa. Mepingafano naasho, ookaume vawa otave ke tu kwafela tu kale tu na eenghedi diwa.

Inatu dimbwa nandenande kutya Jehova oye Omunhu a fimanenena monghalamwenyo yetu. Inatu hala okunyona po oukaume wetu naye, hasho mbela? —  Onghee hano, otu na okukala twa lungama opo tu pange ashike oukaume novanhu ovo ve hole Kalunga.