44 تاراۋ
قۇدايدى جاقسى كورەتىن ادامدارمەن دوس بول
دوستار دەپ ٴبىر-بىرىمەن اڭگىمەلەسۋدى جانە بىرگە ۋاقىت وتكىزۋدى ۇناتاتىن ادامداردى ايتادى. الايدا دوستاردى دۇرىس تاڭداۋ ماڭىزدى. سەنىڭشە، كىم بىزگە ەڭ جاقسى دوس بولا الادى؟ ~ ٴيا، ەحوبا قۇداي.
ٴبىز شىنىمەن قۇدايدىڭ دوسى بولا الامىز با؟ ~ كيەلى كىتاپتا ەجەلدە ٶمىر سۇرگەن ىبىرايىم «ەحوبانىڭ دوسى» دەپ اتالعان (جاقىپ 2:23). قالايشا ول ەحوبانىڭ دوسى بولا العانىن بىلەسىڭ بە؟ ~ كيەلى كىتاپتىڭ ايتۋىنشا، ىبىرايىم قۇدايعا مويىنسۇنعان. ٴتىپتى ايتقانىن ورىنداۋ قيىن بولسا دا، ول قۇدايدىڭ ٴتىلىن العان. دەمەك، ەحوبامەن دوس بولۋ ٷشىن، ىبىرايىم جانە ۇلى ۇستازىمىز سياقتى، ۇنەمى وعان ۇنامدى نارسەلەردى ىستەۋىمىز كەرەك (جاراتىلىس 22:1—14؛ جوحان 8:28، 29؛ ەۆرەيلەرگە 11:8، 17—19).
نەگە ىبىرايىم «ەحوبانىڭ دوسى» دەپ اتالعان؟
يسا ەلشىلەرىنە: «ەگەر وسيەت ەتكەندەرىمدى ورىنداساڭدار، وندا مەنىڭ دوستارىمسىڭدار»،— دەپ ايتقان (جوحان 15:14). يسانىڭ ايتقان وسيەتتەرى ەحوبانىكى ەدى. سوندىقتان ونىڭ ايتقىسى كەلگەنى مىناۋ: وزىمەن دوس بولعىسى كەلگەن ادامدار ەحوبانىڭ وسيەتتەرىن ورىنداۋ كەرەك. راسىندا دا، يسانىڭ دوستارىنىڭ ٴبارى قۇدايدى جاقسى كورگەن.
ۇلى ۇستازدىڭ ەڭ جاقىن دوستارى ەلشىلەر ەدى. سەن ولاردى 75-بەتتەگى سۋرەتتەن كورە الاسىڭ. يسا ەلشىلەرىمەن كوپ ۋاقىت وتكىزگەن. ەلشىلەر ونىمەن بىرگە ساپار شەككەن جانە ۋاعىزداۋ ىسىندە كومەك بەرگەن. ولار بىرگە تاماقتانعان، ەحوبا جايىندا سويلەسكەن جانە ٴتۇرلى ىستەر اتقارعان. الايدا يسانىڭ باسقا دا كوپتەگەن دوستارى بولعان. ول سولاردىڭ ۇيلەرىنە ٴجيى توقتايتىن جانە ولارمەن ارالاسقاندى جاقسى كورەتىن.
سونداي دوستارىنىڭ ٴبىرى يەرۋساليمگە جاقىن جەردە ورنالاسقان بەتانيا قالاشىعىندا تۇراتىن. ولاردىڭ كىم ەكەنى ەسىڭدە مە؟ ~ ٴماريام، مارتا جانە ىنىلەرى ەلازار. يسا ەلازاردى دوسىم دەپ اتاعان (جوحان 11:1، 5، 11). يسانىڭ وسى دوستارى ەحوبانى جاقسى كورىپ، وعان قىزمەت ەتكەن. سوندىقتان يسا بۇل وتباسىن جاقسى كورگەن جانە ولارمەن بىرگە بولعاندى ۇناتقان.
يسا يەرۋساليمگە بارا جاتقان جولدا نەگە وسى وتباسىنىڭ ۇيىنە ٴجيى توقتايتىن؟ ولاردىڭ اتتارى كىم؟
سونىمەن قاتار يسا قۇدايعا قىزمەت ەتپەيتىن ادامدارعا دا مەيىرىمدىلىك تانىتقان. ول مۇنداي ادامداردىڭ ۇيىنە بارىپ، داستارقانداس بولعان. سوندىقتان كەيبىرەۋلەر يسانى «سالىقشىلار مەن كۇناكارلاردىڭ دوسى» دەپ اتاعان (ماتاي 11:19). ٴبىراق يسا ولاردىڭ ۇيلەرىنە ٶمىر سالتتارى ۇناعاندىقتان ەمەس، ەحوبا تۋرالى ايتۋ ٷشىن باراتىن. يسا ولارعا جامان ىستەرىن تاستاپ، قۇدايعا بەت بۇرۋلارىنا كومەكتەسكىسى كەلگەن.
زاقاي نەگە اعاشقا شىعىپ الدى؟
بىردە يەريحون قالاسىندا وسىنداي جاعداي بولدى. يەرۋساليمگە بارا جاتقان جولدا يسا يەريحونعا كىرەدى. بۇل قالادا زاقاي دەگەن كىسى تۇراتىن. ول يسانى قاتتى كورگىسى كەلدى، ٴبىراق قالىڭ جۇرتتىڭ اراسىنان ونى كورە المادى. ويتكەنى زاقايدىڭ بويى الاسا بولاتىن. سودان ول العا جۇگىرىپ بارىپ، اعاشتىڭ باسىنا شىعىپ الادى. وسىلايشا جانىنان وتەتىن يسانى انىعىراق كورمەكشى بولادى.
يسا سول اعاشتىڭ جانىنا كەلگەندە، جوعارىعا قاراپ: «زاقاي، تەز تومەن ٴتۇس! بۇگىن سەنىڭ ۇيىڭدە توقتاۋىم كەرەك»،— دەدى. زاقاي دۇرىس ەمەس ىستەرمەن اينالىساتىن باي كىسى ەدى. نەلىكتەن يسا وسىنداي ادامنىڭ ۇيىنە بارماق بولدى؟ ~
يسا ونىڭ ۇيىنە بۇرىس ىستەرىن قۇپتاعاندىقتان بارايىن دەپ جاتقان جوق. وعان قۇداي تۋرالى ايتقىسى كەلدى. ويتكەنى زاقاي يسانى كورۋ ٷشىن اعاش باسىنا شىققان ەدى. ونىڭ مۇنداي ارەكەتى قۇداي تۋرالى تىڭداۋعا بەيىم ەكەنىن كورسەتتى. سوندىقتان يسا قولايلى ٴساتتى پايدالانىپ، قۇدايعا ۇنامدى بولۋ ٷشىن قالاي ٶمىر ٴسۇرۋ كەرەكتىگىن زاقايعا ايتپاق بولدى.
يسا زاقايدىڭ ۇيىنە نە ٷشىن باردى جانە زاقاي قانداي ۋادە بەردى؟
سونىمەن، بۇل وقيعا نەمەن اياقتالدى دەپ ويلايسىڭ؟ ~ زاقايعا يسانىڭ بەرگەن ٴتالىمى ۇنادى. ول ادامداردى الداعانىنا قاتتى وكىندى. ٴسۇيتىپ، زاڭسىز جولمەن العان اقشالاردىڭ ٴبارىن قايتارامىن دەپ ۋادە بەردى. سوسىن، ول يسانىڭ ٸزباسارى بولدى. تەك سودان كەيىن عانا يسا مەن زاقاي دوس بولدى (لۇقا 19:1—10).
ۇلى ۇستازعا ەلىكتەپ، دوسىمىز ەمەس ادامداردىڭ ۇيىنە بارامىز با؟ ~ ٴيا، بارامىز. ٴبىراق ولاردىڭ جامان ىستەرىن قۇپتامايمىز ٵرى قايتالامايمىز. ٴبىز ولاردىڭ ۇيىنە قۇداي تۋرالى ايتۋ ٷشىن بارامىز.
الايدا جاقىن دوستار دەپ كوبىنەسە بىرگە ۋاقىت وتكىزگەندى ۇناتاتىن ادامداردى ايتادى. ٴبىز قۇدايعا ۇنايتىن ادامدارمەن عانا جاقسى دوس بولامىز. ٴبىراق كەيبىرەۋلەر ەحوبانى تانىمايدى. ەگەر ولار قۇداي تۋرالى بىلگىسى كەلسە، قۋانا كومەكتەسەمىز. ۋاقىت وتە كەلە ولار دا ەحوبانى ٴبىز سياقتى جاقسى كورەتىن بولسا، سوندا عانا ٴبىز ولارمەن جاقىن دوس بولا الامىز.
ادامنىڭ جاقسى دوس بولا الاتىنىن انىقتاۋ ٷشىن، ونىڭ ٸس-ارەكەتىنە قاراۋ كەرەك. ول بىرەۋگە قيانات جاساپ، ارتىنان ونى مازاقتاپ كۇلە مە؟ ارينە، بۇل دۇرىس ەمەس، كەلىسەسىڭ بە؟ ~ ول ٵر نارسەگە ۇرىنىپ جۇرە مە؟ ونىڭ قاسىندا ٴجۇرىپ، ٴبىز دە ٴبىر پالەگە ۇشىراعىمىز كەلمەيدى، سولاي عوي؟ ~ الدە ول ەشكىمگە بايقاتپاي جاماندىق جاساي الاتىندىقتان، ٶزىن اقىلدى ساناي ما؟ ونىڭ نە ىستەگەنىن ادامدار كورمەسە دە، قۇداي كورىپ تۇر، سولاي ەمەس پە؟ ~ قالاي ويلايسىڭ، وسىنداي ادامدار بىزگە جاقسى دوس بولا الا ما؟ ~
ەندى قولىڭا كيەلى كىتابىڭدى الشى. دوستار ومىرىمىزگە قالاي اسەر ەتەتىنى جايلى وقىپ كورەيىك. قورىنتتىقتارعا ارنالعان 1-حاتتىڭ 15 تاراۋىنىڭ 33 تارماعىن اش. تاپتىڭ با؟ ~ وندا: «الدانباڭدار، جامان ورتا جاقسى ادەتتەن ايىرادى»،— دەلىنگەن. بۇل دەگەنىمىز — ەگەر جامان ادامدارمەن ارالاسساق، ٶزىمىز دە جامان بولىپ كەتەمىز. ال ەگەر جاقسى ادامدارمەن دوس بولساق، ولار بىزگە جاقسى ادەتتەر دامىتۋعا كومەكتەسەدى.
ٴبىزدىڭ ەڭ جاقسى دوسىمىز ەحوبا ەكەنىن ەشقاشان ۇمىتپايىق. ونىمەن دوستىعىمىزدى جوعالتقىمىز كەلمەيدى عوي، ٴيا؟ ~ سوندىقتان تەك ەحوبانى جاقسى كورەتىن ادامدارمەن عانا دوس بولىپ جۇرەيىك!
جاقسى دوس تاڭداۋدىڭ ماڭىزدىلىعىن كەلەسى تارماقتاردان كورۋگە بولادى: زابۋر 118:115؛ ناقىل سوزدەر 13:20؛ تىموتەگە 2-حات 2:22 جانە جوحاننىڭ 1-حاتى 2:15.
قىزىقتى بولار مالىمەتتەر
يسا پايعامبار — جول، شىندىق، ٶمىر
يسا ەكى زاعيپتى ساۋىقتىردى جانە زاقايعا كومەكتەستى
يسانىڭ يەريحون ماڭىندا ەكى زاعيپتى ساۋىقتىرۋعا قاتىستى كيەلى كىتاپتاعى قايشى بولىپ كورىنگەن مالىمەتتەر ٴبىر-بىرىمەن قالاي ۇيلەسەدى؟
