ជំពូកទី៤៤
មិត្តភក្ដិរបស់យើងគួរជាអ្នកដែលស្រឡាញ់ព្រះ
មិត្តគឺជាអ្នកដែលយើងចូលចិត្តនិយាយជាមួយ និងចំណាយពេលជាមួយ។ ប៉ុន្តែ ជាការសំខាន់បុគ្គលដែលយើងរាប់អាននោះ ត្រូវជាអ្នកដែលសមនឹងយកមកធ្វើជាមិត្ត។ តើកូនគិតថា អ្នកណាជាមិត្តល្អបំផុតរបស់យើង?— មែនហើយ គឺព្រះយេហូវ៉ា។
តើយើងពិតជាអាចទៅជាមិត្តរបស់ព្រះបានទេ?— សូមគិតអំពីអាប្រាហាំជាបុរសម្នាក់ដែលធ្លាប់រស់នៅសម័យបុរាណ។ គម្ពីរប្រាប់ថា អាប្រាហាំជា«សម្លាញ់របស់ព្រះយេហូវ៉ា»។ (យ៉ាកុប ២:២៣) ហេតុអ្វីព្រះយេហូវ៉ារាប់គាត់ជាមិត្តសម្លាញ់របស់លោក? តើកូនដឹងទេ?— គម្ពីរប្រាប់ថា អាប្រាហាំបានស្តាប់បង្គាប់ព្រះ។ គាត់បានស្តាប់បង្គាប់ព្រះ សូម្បីតែពេលដែលលោកសុំគាត់ឲ្យធ្វើកិច្ចការដ៏សែនពិបាក ក៏គាត់ស្តាប់បង្គាប់ដែរ។ ដូច្នេះ ដើម្បីធ្វើជាមិត្តសម្លាញ់របស់ព្រះ យើងក៏ត្រូវធ្វើអ្វីដែលព្រះពេញចិត្ត ដូចអាប្រាហាំបានធ្វើ និងដូចគ្រូដ៏ល្អប្រសើរតែងតែធ្វើជានិច្ចដែរ។—លោកុប្បត្តិ ២២:១-១៤; យ៉ូហាន ៨:២៨, ២៩; ហេប្រឺ ១១:៨, ១៧-១៩
ហេតុអ្វីអាប្រាហាំបានត្រូវហៅថា «សម្លាញ់របស់ព្រះយេហូវ៉ា»?
លោកយេស៊ូបានប្រាប់ពួកសាវ័កថា៖ «អ្នករាល់គ្នាជាមិត្តសម្លាញ់របស់ខ្ញុំ ប្រសិនបើអ្នករាល់យ៉ូហាន ១៥:១៤) បង្គាប់របស់លោកយេស៊ូ គឺមកពីព្រះយេហូវ៉ា។ ដូច្នេះ លោកយេស៊ូចង់មានន័យថា មិត្តរបស់លោក គឺជាមនុស្សដែលធ្វើតាមបង្គាប់របស់ព្រះ។ នេះមានន័យថាមិត្តភក្ដិទាំងអស់របស់លោកយេស៊ូជាអ្នកដែលស្រឡាញ់ព្រះ។
គ្នាធ្វើតាមបង្គាប់របស់ខ្ញុំ»។ (ក្នុងចំណោមមិត្តជិតស្និទ្ធបំផុតរបស់គ្រូដ៏ល្អប្រសើរ មានពួកសាវ័ក កូនអាចមើលរូបភាពពួកគាត់នៅទំព័រ៧៥ក្នុងសៀវភៅនេះ។ ពួកគាត់បានធ្វើដំណើរជាមួយនឹងលោក ហើយជួយលោកក្នុងកិច្ចការផ្សព្វផ្សាយ។ លោកយេស៊ូចំណាយពេលជាមួយនឹងពួកគាត់ ពិសាអាហារជាមួយនឹងពួកគាត់ ហើយនិយាយជាមួយនឹងពួកគាត់អំពីព្រះ។ ម្យ៉ាងទៀត លោកក៏បានធ្វើអ្វីផ្សេងទៀតជាមួយនឹងពួកគាត់ដែរ។ ប៉ុន្តែ លោកយេស៊ូមានមិត្តភក្ដិជាច្រើនទៀត។ លោកធ្លាប់ស្នាក់នៅជាមួយមិត្តភក្ដិទាំងនោះ ហើយពួកគាត់រីករាយពេលនៅជាមួយនឹងលោក។
លោកយេស៊ូចូលចិត្តស្នាក់នៅជាមួយក្រុមគ្រួសារមួយដែលរស់នៅភូមិបេថានី ដែលជាភូមិតូចមួយនៅជិតក្រុងធំមួយ ហៅថាយេរូសាឡិម។ តើកូននៅចាំក្រុមគ្រួសារនោះទេ?— ក្រុមគ្រួសារនោះមានបងប្អូនបីនាក់ ឈ្មោះម៉ាថា ម៉ារៀ និងប្អូនប្រុសរបស់ពួកគាត់ឈ្មោះឡាសា។ លោកយេស៊ូបានហៅឡាសាថា សម្លាញ់របស់លោក។ (យ៉ូហាន ១១:១, ៥, ) មូលហេតុដែលលោកយេស៊ូស្រឡាញ់ក្រុមគ្រួសារនេះ ហើយចូលចិត្តនៅជាមួយនឹងពួកគាត់ ដោយសារពួកគាត់ស្រឡាញ់និងបម្រើព្រះយេហូវ៉ា។ ១១
ពេលលោកយេស៊ូទៅក្រុងយេរូសាឡិម ហេតុអ្វីលោកច្រើនតែស្នាក់នៅជាមួយនឹងក្រុមគ្រួសារនេះ? តើកូនស្គាល់ឈ្មោះរបស់ពួកគេទេ?
ប៉ុន្តែ នេះមិនមានន័យថា លោកយេស៊ូមិនរាប់អានអ្នកដែលមិនបម្រើព្រះនោះទេ។ ផ្ទុយទៅវិញ លោកបានរាប់អានពួកគេ ថែមទាំងបានទៅផ្ទះរបស់ពួកគេ ហើយបរិភោគអាហារជាមួយនឹងពួកគេទៀតផង។ នេះបានធ្វើឲ្យមនុស្សខ្លះនិយាយថា លោកយេស៊ូជា«មិត្តភក្ដិរបស់អ្នកយកពន្ធនិងអ្នកប្រព្រឹត្តអំពើខុសឆ្គង»។ (ម៉ាថាយ ១១:១៩) តាមពិតមូលហេតុដែលលោកយេស៊ូទៅផ្ទះរបស់មនុស្សទាំងនេះ មិនមែនដោយសារលោកចូលចិត្តរបៀបរស់នៅរបស់ពួកគេឡើយ។ លោកបានទៅជួបពួកគេ ដើម្បីលោកអាចប្រាប់ពួកគេអំពីព្រះយេហូវ៉ា។ លោកព្យាយាមជួយពួកគេឲ្យឈប់ប្រព្រឹត្តអំពើអាក្រក់ទៀត ហើយមកបម្រើព្រះវិញ។
ហេតុអ្វីសាខេបានឡើងដើមឈើនេះ?
រឿងដូចនេះបានកើតឡើងនៅក្រុងយេរីខូ។ នៅថ្ងៃមួយ លោកយេស៊ូកំពុងធ្វើដំណើរកាត់ក្រុងនោះឆ្ពោះទៅក្រុងយេរូសាឡិម។ នៅទីនោះមានមនុស្សច្រើនកកកុញ ហើយក្នុងចំណោមនោះមានបុរសម្នាក់ឈ្មោះសាខេ។ គាត់ចង់ឃើញលោកយេស៊ូឲ្យបានច្បាស់។ ប៉ុន្តែ ដោយសារគាត់ទាប ហើយមានមនុស្សជាច្រើនឈរបាំងគាត់ ដូច្នេះគាត់មិនអាចមើលឃើញលោកយេស៊ូទេ។ ហេតុនេះ សាខេរត់ទៅខាងមុខផ្លូវ ហើយឡើងដើមឈើ ដើម្បីមើលឃើញលោកយេស៊ូឲ្យបានច្បាស់ ពេលលោកឆ្លងកាត់ទីនោះ។
ពេលលោកយេស៊ូមកដល់ដើមឈើនោះ លោកមើលទៅលើ រួចនិយាយថា៖ ‹សូមប្រញាប់ចុះមក ព្រោះថ្ងៃនេះខ្ញុំនឹងទៅផ្ទះរបស់អ្នក›។ ប៉ុន្តែ
សាខេជាបុរសអ្នកមានម្នាក់ដែលធ្វើអំពើអាក្រក់ជាច្រើន។ ដូច្នេះ ហេតុអ្វីបានជាលោកយេស៊ូចង់ទៅផ្ទះរបស់បុរសបែបនោះ?—មូលហេតុដែលលោកយេស៊ូទៅផ្ទះរបស់គាត់ មិនមែនដោយសារលោកចូលចិត្តរបៀបរស់នៅរបស់គាត់នោះទេ។ លោកទៅផ្ទះរបស់សាខេដើម្បីប្រាប់គាត់អំពីព្រះ។ លោកបានឃើញថា បុរសនេះបានព្យាយាមយ៉ាងខ្លាំងដើម្បីមើលឃើញលោក។ ដូច្នេះ លោកដឹងថាសាខេប្រហែលជានឹងស្តាប់លោក។ លោកប្រើឱកាសល្អនេះដើម្បីនិយាយជាមួយនឹងគាត់អំពីរបៀបរស់នៅដែលព្រះពេញចិត្ត។
តើមូលហេតុអ្វីបានជាលោកយេស៊ូទៅជួបសាខេ? ហើយតើសាខេសន្យាថាគាត់នឹងធ្វើអ្វី?
រួចមក តើមានលទ្ធផលយ៉ាងណា?— សាខេចូលចិត្តសេចក្ដីបង្រៀនរបស់លោកយេស៊ូ។ ក្រោយពីស្តាប់សេចក្ដីបង្រៀនរបស់លោកយេស៊ូហើយ សាខេសោកស្តាយណាស់ដែលគាត់បានកេងប្រវ័ញ្ចប្រាក់ពីអ្នកឯទៀត។ ដូច្នេះហើយ គាត់សន្យាថានឹងប្រគល់ប្រាក់ទាំងនោះដល់ពួកគេវិញ ព្រោះនេះជាប្រាក់ដែលគាត់គ្មានសិទ្ធិនឹងយកទេ។ ក្រោយមកគាត់បានទៅជាអ្នកកាន់តាមលោកយេស៊ូ។ ចាប់ពីពេលនោះមក លោកយេស៊ូនិងសាខេបានទៅជាមិត្តភក្ដិនឹងគ្នា។—លូកា ១៩:១-១០
បើយើងធ្វើតាមគំរូរបស់គ្រូដ៏ល្អប្រសើរ តើយើងនឹងទៅផ្ទះអ្នកដែលមិនមែនជាមិត្តភក្ដិរបស់យើងទេ?— យើងនឹងទៅ ប៉ុន្តែ តើដោយសារយើងចូលចិត្តរបៀបរស់នៅរបស់ពួកគេ ឬ
យើងចង់រួមធ្វើអាក្រក់ជាមួយពួកគេទេ? មិនមែនទេ មូលហេតុដែលយើងទៅផ្ទះពួកគេ គឺដើម្បីយើងអាចប្រាប់ពួកគេអំពីព្រះ។មនុស្សខ្លះប្រហែលជាមិនស្គាល់ថាព្រះយេហូវ៉ាជាអ្នកណាទេ។ ប៉ុន្តែ បើពួកគេចង់រៀនអំពីលោក យើងអាចជួយពួកគេបាន។ ក្រោយមក ពេលពួកគេស្រឡាញ់ព្រះយេហូវ៉ាដូចយើងដែរ ពេលនោះទើបយើងអាចធ្វើជាមិត្តភក្ដិជិតស្និទ្ធជាមួយនឹងពួកគេ។ តើមិត្តភក្ដិជិតស្និទ្ធជាអ្នកណា? មិត្តភក្ដិជិតស្និទ្ធគឺជាអ្នកដែលយើងចូលចិត្តចំណាយពេលជាមួយ ហើយជាមនុស្សដែលព្រះពេញចិត្ត។
ម្យ៉ាងទៀត ដើម្បីដឹងថាបុគ្គលណាម្នាក់សមនឹងធ្វើជាមិត្តភក្ដិជិតស្និទ្ធរបស់យើង យើងត្រូវមើលអ្វីដែលគាត់ធ្វើ។ តើគាត់ធ្វើអ្វីដែលមិនល្អចំពោះអ្នកឯទៀត រួចមកសើចទេ? ការធ្វើដូចនោះមិនត្រឹមត្រូវឡើយ មែនទេ?— តើគាត់តែងតែធ្វើឲ្យមានបញ្ហាឬ? យើងច្បាស់ជាមិនចង់មានបញ្ហាដោយសារសេពគប់ជាមួយនឹងគាត់ទេ មែនទេ?— ម្យ៉ាងទៀត តើគាត់ចេះតែធ្វើអាក្រក់ រួចមកគិតថាខ្លួនឆ្លាត ដោយសារគ្មានអ្នកណាចាប់កំហុសគាត់បានឬ? ទោះជាគ្មានអ្នកណាចាប់កំហុសបានក៏ដោយ តែព្រះមើលឃើញអ្វីដែលគាត់បានធ្វើ មែនទេ?— តើបុគ្គលដែលធ្វើបែបនោះ សមនឹងធ្វើជាមិត្តភក្ដិជិតស្និទ្ធរបស់យើងទេ? តើកូនគិតយ៉ាងណា?—
សូមកូនយកគម្ពីរ ហើយមើលអ្វីដែលគម្ពីរចែងអំពីរបៀបដែលការសេពគប់មានឥទ្ធិពលមកលើជីវិតយើង។ សូមបើកសៀវភៅកូរិនថូសទី១ ជំពូកទី១៥ ខ៣៣។ តើកូនរកឃើញខគម្ពីរនេះហើយឬនៅ?— ខគម្ពីរនោះថា៖ «កុំឲ្យអ្នកណាបំភាន់អ្នកឡើយ។ ការសេពគប់អាក្រក់បង្ខូចការប្រព្រឹត្តល្អ»។ នេះមានន័យថា បើយើងចំណាយពេលជាមួយមនុស្សអាក្រក់ យើងក៏អាចទៅជាអាក្រក់ដែរ។ ផ្ទុយទៅវិញ ការសេពគប់ល្អជួយយើងឲ្យមានទម្លាប់ល្អ។
សូមចាំថា បុគ្គលសំខាន់បំផុតក្នុងជីវិតរបស់យើងគឺ ព្រះយេហូវ៉ា។ ដូច្នេះ យើងមិនចង់បង្ខូចចំណងមិត្តភាពដែលយើងមានជាមួយនឹងលោកឡើយ មែនទេ?— ហេតុនេះ យើងត្រូវគិតឲ្យបានហ្មត់ចត់ ពេលជ្រើសរើសអ្នកណាម្នាក់ធ្វើជាមិត្តភក្ដិ។ យើងចង់ធ្វើជាមិត្តភក្ដិជាមួយតែអ្នកដែលស្រឡាញ់ព្រះយេហូវ៉ាប៉ុណ្ណោះ។
សារៈសំខាន់នៃការសេពគប់ល្អត្រូវរៀបរាប់នៅក្នុងបទគម្ពីរដូចជា ទំនុកតម្កើង ១១៩:១១៥ សុភាសិត ១៣:២០ ធីម៉ូថេទី២ ២:២២ និងយ៉ូហានទី១ ២:១៥។