BANYWANI baitu n’abantu abu turikukunda kugaaniira nabo kandi tukakunda kuba nabo. Kwonka ni kikuru okugira abanywani abarungi. Noogira ngu omunywani orikukirayo oburungi ou turikubaasa kugira n’oha?— Buzima ni Yehova Ruhanga.

Kwonka shi buzima nitubaasa kuba banywani ba Ruhanga?— Baibuli neegira ngu Abrahamu, omushaija owaabaire ariho ira akaba ari ‘munywani wa Yehova.’ (Yakobo 2:23) Noomanya ahabw’enki yaabaire ari munywani we?— Baibuli neegira ngu Abrahamu akoorobera Ruhanga. N’obu yaagambiirwe okukora ekintu ekyabaire kitoorobi, akooroba. N’ahabw’ekyo, okuba banywani ba Yehova, twine kukora ebirikumushemeza, nk’oku Abrahamu yaakozire hamwe n’oku Omwegyesa Mukuru butoosha akora.​—Okutandika 22:1-14; Yohaana 8:28, 29; Abaheburaayo 11:8, 17-19.

 Yesu akagambira entumwa ze ati: ‘Imwe muri banywani bangye, ku muraabe nimukora ebi ndikubaragiira.’ (Yohaana 15:14) Obu ebintu byona ebi Yesu yaagambiire abantu byabaire nibiruga ahari Yehova, Yesu akaba naamanyisa ngu banywani be bakaba bari abo abaabaire nibakora ebi Ruhanga yaabaire naabaragiira. Buzima banywani ba Yesu boona bakaba nibakunda Ruhanga.

Banywani b’Omwegyesa Mukuru ab’aha mara abamwe bakaba bari abeegi be, abu ebishushani byabo biri aha rupapura 75 orw’ekitabo eki. Bakaba bagyenda nawe bamuhwera kukora omurimo gw’okubuurira. Yesu akaba akira kuba ari n’abashaija abo. Bakaba barya kumwe. Bakaba bagaaniira hamwe ebirikukwata ahari Ruhanga. Kandi n’ebintu ebindi bakaba babikora kumwe. Kwonka Yesu akaba aine abanywani abandi baingi. Akaba akira kuba nabo, kandi akaba ashemererwa nabo.

Eka emwe ei Yesu yaabaire akunda kutaayaayira ekaba eri omu tauni nkye erikwetwa Besania, aheeru y’orurembo ruhango Yerusaalemu. Noijuka abaabaire bari omu ka egyo?— Akaba ari Mariamu, Mariza na munyaanyabo Laazaaro. Yesu akagira ngu Laazaaro akaba ari munywani we.  (Yohaana 11:1, 5, 11) Enshonga ahabw’enki Yesu yaabaire naakunda ab’omu ka egyo kandi yaabaire naakunda kuba nabo n’ahabw’okugira ngu bakaba nibakunda Yehova kandi bamuheereza.

Eki tikirikumanyisa ngu Yesu akaba ataine mbabazi aha bantu abaabaire batarikuheereza Ruhanga. Akaba abainiire embabazi. Akaba aza omu maka gaabo kandi arya nabo. Ekyo kikareetera bamwe kugira ngu Yesu akaba ari “munywani w’abahooza n’abasiisi.” (Matayo 11:19) Amazima gari ngu Yesu akaba ataza omu maka g’abantu nk’abo ahabw’okugira ngu akaba naasiima emitwarize yaabo. Akaba abataayaayira aine ekigyendererwa ky’okubeegyesa ebirikukwata ahari Yehova. Akaba ateeraho kubahwera kuhinduka bakareka emitwarize yaabo mibi bakaheereza Ruhanga.

Eizooba rimwe ekyo kikabaho omu rurembo rwa Yeriko. Yesu akaba naaraba omu rurembo orwo arikuza Yerusaalemu. Hakaba harimu abantu baingi, kandi omu bantu nyamwingi abo hakaba harimu omushaija owaabaire naayetwa Zakaayo. Akaba naayenda kureeba Yesu. Kwonka Zakaayo akaba ari mugufu n’ahabw’ekyo akaba atarikubaasa kureeba Yesu ahabw’abantu baingi abaabaire bamuri omu maisho. N’ahabw’ekyo akairuka yaaza omu maisho yaatemba omuti kubaasa kureeba gye Yesu yaaba naahingura.

Yesu ku yaahikire aha muti ogwo, yaareeba ahaiguru omu  muti yaagira ati: ‘Rahuka, temburuka; ahabw’okuba eri izooba ninza kuza omu nju yaawe.’ Kwonka Zakaayo akaba ari omutungi owaabaire akozire ebintu bibi. Ahabw’enki Yesu yaabaire naayenda kuza omu nju y’omushaija mubi nk’ogwo?—

Ti kugira ngu Yesu akaba naakunda omuringo ogu omushaija ogwo yaabaire naatwazamu. Akazayo kugambira Zakaayo ebirikukwata ahari Ruhanga. Akareeba oku omushaija ogwo yaateireho kumureeba. N’ahabw’ekyo akaba naamanya ngu Zakaayo akaba naabaasa kuhurikiza. Obwo nibwo bwabaire buri obwire burungi bw’okugamba nawe aha ku Ruhanga arikwenda ngu abantu batwaze.

Niki ekyabaireho?— Zakaayo akakunda ebi Yesu yaamwegyeise. Akahurira kubi omu mutima ahabw’okugira ngu akaba naiba abantu, kandi yaaraganisa kugarurira abantu esente zaabo ezi yaabaire atashemereire kutwara. Bwanyima akahinduka omukuratsi wa Yesu. Obwo nibwo Zakaayo na Yesu baahinduka abanywani.—Luka 19:1-10.

Mbwenu twaba nitukuratira eky’okureeberaho kya Omwegyesa Mukuru, nitubaasa kutaayaayira abantu abatari banywani baitu?— Eego. Kwonka titurikwija kubataayaayira ahabw’okugira ngu nitukunda emitwarize yaabo. Titurikwija kukora ebitahikire ebi barikukora. Kureka  nitwija kubataayaayira twine ekigyendererwa ky’okubagambira ebirikukwata ahari Ruhanga.

Kwonka banywani baitu ab’aha mara n’abo abu turikukunda kuba nabo munonga. Okubaasa kuba abanywani barungi, baine kuba nibakora ebi Ruhanga arikusiima. Abamwe nibabaasa kuba batarikumanya Yehova. Kwonka baaba nibenda kwega ebirikumukwataho, nitubaasa kubahwera. Reero baaheza kuhika aha kukunda Yehova nk’oku turikumukunda, obwo nitubaasa kubahindura banywani baitu abaabuzima.

Hariho omuringo ogundi ogu turikubaasa kumanyamu yaaba omuntu naija kuba omunywani murungi. Oine kureeba ebintu ebi arikukora. Naatwariza kubi abandi kandi ekyo kimushemeza? Ekyo buzima nikiba kitahikire, tikwo?— Butoosha naaba naayeta omu buremeezi? Titwakwenzire kwereetera oburemeezi ahabw’okumunywana, tikwo?— Nari naakora ebintu bibi akigyendereire reero agira ngu aine obwengye ahabw’okugira ngu tibamukwatsire? N’obu omuntu ogwo yaakuba atakwatsirwe, Ruhanga naaba yaareeba eki yaakora, tikwo?— Nooteekateeka ngu abantu abarikukora ebintu bibi nk’ebyo nibaba bari barungi b’okunywana?—

Ninkushaba oshuuruure Baibuli yaawe. Ka tureebe eki erikugamba aha ku banywani baitu barikutureetera kutwaza. Ka tushome 1 Abakorinso eshuura 15, orunyiriri 33. Waareeba orunyiriri orwo?— Nirugira ruti: “Mutabeihwabeihwa; ekigombe kibi kishiisha emicwe mirungi.” Eki nikimanyisa ngu twagyenda n’abantu babi, nitubaasa kuba babi. Kandi n’eky’amazima ngu abanywani barungi nibatuhwera kugira emitwarize mirungi.

Titushemereire kwebwa ngu Omunywani omukuru ahariitwe ni Yehova. Titurikwenda kushiisha omukago gwaitu nawe, tikwo?— N’ahabw’ekyo, tushemereire kuteeraho kunywana abo bonka abarikukunda Ruhanga.