UN AMIGU ta un hende ku nos gusta papia kuné i pasa tempu kuné. Pero ta importante pa nos tin amigu ku ta bon. Ken bo ta kere ku ta e mihó amigu ku nos por tin?— Sí, Yehova Dios.

Pero, nos por ta amigu di Dios?— Wèl, Beibel ta bisa ku Abraham, un hòmber ku a biba hopi tempu pasá, tabata “amigu di Dios.” (Santiago 2:23) Bo sa dikon e tabata su amigu?— Beibel ta bisa nos dikon. E ta bisa ku Abraham a obedesé Dios. El a obedesé asta ora Dios a pidié hasi kos ku tabata difísil p’e. Kier men, si nos ke ta amigu di Yehova, nos mester hasi kos ku e ta keda kontentu kuné, meskos ku Abraham a hasi, i meskos ku e Gran Maestro tambe a hasi semper.—Génesis 22:1-14; Juan 8:28, 29; Hebreonan 11:8, 17-19.

 Hesus a bisa su apòstelnan: “Boso ta mi amigu, si boso hasi loke mi ordená boso.” (Juan 15:14) Tur loke Hesus a bisa hende hasi a bini di Yehova. P’esei, loke Hesus tabata kier men ta, ku ta hende ku hasi loke Dios bisa ta su amigu. Sí, tur su amigunan tabata stima Dios.

E apòstelnan di e Gran Maestro tabata algun di su mihó amigunan. Na página 75 di e buki aki bo por mira nan riba e plachi. Nan tabata kana tur kaminda kuné i yud’é prediká. Hesus a pasa hopi tempu ku e hòmbernan ei. Nan tabata kome huntu, papia ku otro tokante Dios i hasi otro kos huntu. Pero Hesus tabatin hopi amigu mas. E tabata keda na nan kas i nan tabata pasa bon huntu.

Un di e famianan ku Hesus tabata gusta keda serka dje tabata biba na un pueblo chikitu ku yama Betania. E pueblo ei tabata keda nèt banda di e stat grandi Yerusalèm. Bo ta kòrda e famia ei?— Nan ta Maria, Marta i nan ruman hòmber Lázaro. Hesus a bisa ku Lázaro ta su amigu. (Juan 11:1, 5, 11) El a stima e famia aki i e tabata gusta pasa tempu ku nan, dor ku nan tabata stima Yehova i sirbié.

 Esei no kier men ku Hesus no tabata bondadoso ku hende ku no ta sirbi Dios. E tabata trata nan tambe bon. E tabata asta bai nan kas i kome ku nan. Dor di esei, tin hende a bisa ku Hesus ta ‘amigu di kobradó di belasting i pekadó.’ (Mateo 11:19) Pero Hesus no tabata bai kas di e hendenan ei dor ku e gusta e manera ku nan ta biba. E tabata bishitá nan pa e por papia ku nan tokante Yehova. El a purba yuda nan kita for di mal kaminda i sirbi Dios.

Un di e biahanan ku el a hasi e kos ei ta ora e tabata na e stat ku yama Jeriko. Hesus tabata djis pasando eibanda riba kaminda pa bai Yerusalèm. Tabatin yen di hende, i un di nan tabata un hòmber ku yama Zakeo. Zakeo kier a haña un chèns di mira Hesus. Pero e tabata un hòmber kòrtiku, i e no por a mira Hesus pasobra tabatin yen di hende rònt di dje. P’esei, el a kore bai un lugá mas dilanti riba e kaminda, anto a subi un palu pa e por a mira Hesus mihó ora e pasa eibanda.

Ora Hesus a yega na e palu, el a hisa kara i bisa: ‘Baha abou lihé, pasobra awe mi ta bin bo kas.’ Pero Zakeo tabata un hòmber riku ku a yega  di hasi kos malu. Dikon Hesus kier a bai kas di un hòmber asina?—

No ta dor ku Hesus a gusta e manera ku e hòmber ei a biba. El a bai kas di Zakeo pa e papia kuné tokante Dios. Hesus a mira kon e hòmber a hasi su bèst pa mir’é. P’esei, e tabata sa ku kasi sigur Zakeo lo skuch’é. Tabata un bon chèns pa papia kuné tokante kon Dios ta bisa ku hende mester biba.

Anto awor, kiko ta pasando riba e plachi?— Zakeo a gusta e kosnan ku Hesus a siñ’é. El a sinti duele, pasobra el a yega di nèk hopi hende, i awor el a primintí di paga nan bèk e sènnan ku e no tabatin mag di kohe for di nan. Anto e ora ei, el a bira siguidó di Hesus. Ta te despues ku el a hasi tur e kosnan ei, Zakeo ku Hesus a bira amigu.—Lukas 19:1-10.

Si nos ta hende ku ta siña for di e Gran Maestro, bo ta kere ku nos lo bishitá hende ku no ta nos amigu?— Sí. Pero si nos bai nan kas, nos no ta bai pasobra nos gusta e manera ku nan ta biba. I nos lo no hasi kos malu huntu ku nan tampoko. Nos lo bishitá nan pa nos por papia ku nan tokante Dios.

 Pero nos bon amigunan ta e hendenan ku mas nos gusta pasa tempu kuné. Ma pa nan ta e sorto di amigu ku ta bon pa nos tin, nan mester ta e sorto di amigu ku Dios ta gusta. Tin hende ku no sa mes ken Yehova ta. Pero si nan ke siña tokante Dios, nos por yuda nan. I ora nan bin stima Yehova manera nos ta stim’é, e ora ei nan por bira nos bon amigu.

Tin un otro manera pa bo haña sa si ta un bon idea pa bo bira bon amigu di un hende. Bo tin ku paga tinu kiko e ta hasi. E ta hasi malu kontra otro hende, anto hari tambe? E kos ei no ta bon, tòg?— E ta hañ’é den problema tur ora? Nos no ke haña nos den problema huntu kuné, no ta bèrdat?— Òf, e ta hasi kos pa malu anto pensa ku e ta sabí pasobra niun hende no a gar’é? Asta si niun hende no gar’é, Dios sí a mira kiko el a hasi, no ta asina?— Bo ta kere ku ta bon pa nos tin un amigu asina?—

Bo por kohe bo Beibel? Laga nos wak kiko Beibel ta bisa tokante kon hende ku nos ta anda kuné ta afektá nos bida. E teksto ta 1 Korintionan kapítulo 15, versíkulo 33. B’a hañ’é?— E ta bisa: “No laga hende gaña boso: ‘Mal kompania ta daña bon kustumber.’” Esei kier men ku si nos anda ku mal hende, nos tambe ta bira mal hende. I meskos ta konta si nos anda ku bon hende; nan ta yuda nos haña bon kustumber.

Laga nos no lubidá nunka ku Esun mas importante den nos bida ta Yehova. Nos no ke pa nada pasa ku e amistat ku nos tin kuné, tòg?— P’esei nos mester paga tinu pa tur nos amigunan ta hende ku ta stima Dios.