AKAMARADE ayeke azo so e ye ti sala tënë na ti tambela na ala. Me a yeke kota ye ti wara anzoni kamarade. Ti mo, zo wa la ayeke tâ nzoni kamarade ahon akamarade kue so e lingbi ti wara?— A yeke Jéhovah Nzapa.

E lingbi biani ti ga akamarade ti Nzapa?— Bible atene so Abraham, mbeni zo ti giriri, ayeke lani ‘kamarade ti Jéhovah.’ (Jacques 2:23). Mo hinga ye so asala si lo ga kamarade ti Nzapa?— Bible afa so a yeke ndali ti so lo mä yanga ti Nzapa. Même tongana ye so a hunda na lo ti sala ayeke ngangu, lo sala ni. Tongaso, ti ga kamarade ti Jéhovah, a lingbi e sala ye so anzere na lê ti lo, legeoko tongana ti so lani Abraham na Kota Wafango ye asala lakue.​—Genèse 22:1-14; Jean 8:28, 29; aHébreu 11:8, 17-19.

 Jésus atene na abazengele ti lo: ‘I yeke akamarade ti Mbi tongana i sala ye so Mbi komande i.’ (Jean 15:14). Ye kue so Jésus atene na azo alondo na yanga ti Jéhovah. Ni la, lo yeke tene lani so akamarade ti lo ayeke azo so ayeke sala ye so Nzapa ahunda na ala ti sala. Biani, akamarade ti lo kue aye Nzapa.

Ambeni kota kamarade ti Kota Wafango ye ayeke lani abazengele ti lo. Mo lingbi ti bâ afoto ti ala na lembeti 75 ti buku so. Ndo so lo gue dä, ala nga kue ague dä, na ala mû maboko na lo ti fa tënë. Jésus aduti mingi na tele ti akoli so. Ala te lani ye legeoko. Ala sala tënë ti Nzapa legeoko. Na ala sala ambeni ye nde legeoko. Me Jésus ayeke nga na gbâ ti ambeni kamarade. Lo yeke gue ka na ndo ti ala na ala yeke sala lisoro na popo ti ala.

Mbeni sewa so Jésus aye lani ti gue na ndo ti ala ayeke na kete kodoro ti Béthanie, na gigi ti Jérusalem. Mo dabe ti mo na ala?— A yeke Marie, Marthe na ita ti ala ti koli Lazare. Jésus  atene Lazare ayeke kamarade ti lo (Jean 11:1, 5, 11). Ye so asala si Jésus aye lani sewa so na lo ye ti duti na ala ayeke so ala ye Jéhovah na ala yeke sala kusala ti Lo.

A ye ti tene pëpe so Jésus ake lani azo so ayeke pëpe awakua ti Nzapa. Nde na so, lo ye ala. Lo gue même na ndo ti ala na lo te kobe na ala. Ye so asala si ambeni zo atene so Jésus ayeke kamarade ti “azo ti kamata lampo na ti awasiokpari.” (Matthieu 11:19). A yeke pëpe ngbanga ti so lo ye salango ye ti ala si Jésus ague lani na da ti ala. Me a yeke ti sala tënë ti Jéhovah na ala. Lo gi lani ti mû maboko na ala ti zia sioni salango ye ti ala na ti sala kusala ti Nzapa.

A yeke ye so asi mbeni lâ na yâ kodoro ti Jéricho. Jésus ayeke fâ yâ ti kodoro ni ti gue na Jérusalem. Gbâ ti azo amû peko ti lo. Na popo ti azo ni so, mbeni koli ayeke dä, iri ti lo ayeke Zachée. Lo ye ti bâ lê ti Jésus. Me Zachée ayeke ndulu koli, na lo lingbi ti bâ Jésus pëpe ngbanga ti gbâ ti azo so. Tongaso, lo kpe loro lo gue lo luti na li ti mbeni keke si tongana Jésus ahon na lege ni so, lo lingbi ti bâ lo.

Tongana Jésus asi ndulu na keke ni so, lo mû lê ti lo na nduzu na lo tene: ‘Ga na  sese hio, teti laso mbi yeke gue na da ti mo.’ Me Zachée ayeke mbeni zo ti nginza, na lo sala ye ti sioni mingi. Ngbanga ti nyen Jésus aye ti gue na da ti mara ti zo tongaso?—

A yeke pëpe ngbanga ti so Jésus aye dutingo ti koli so. Lo gue na da ti lo ti sala tënë ti Nzapa na lo. Lo bâ tongana nyen koli so asala kue ti bâ lo. Tongaso, lo hinga so peut-être Zachée ayeke mä lo. A yeke mbeni nzoni ngoi ti fa na lo ye so Nzapa ahunda na azo ti sala na yâ fini ti ala.

Nyen la asi na pekoni?— Fango ye ti Jésus anzere na Zachée. Bê ti lo aso mingi ndali ti nzi so lo nzi na azo, na lo mû yanga ti kiri na nginza so ayeke ti lo pëpe na amveni ni. Na pekoni, lo ga mbeni disciple ti Jésus. A yeke gi ge si Jésus na Zachée aga akamarade.​—Luc 19:1-10.

Tongana e mä Kota Wafango ye, azo so ayeke akamarade ti e pëpe, e yeke gue ti bâ ala?— E yeke gue. Me a yeke pëpe ngbanga ti so e ye dutingo ti ala si e gue na ndo ti ala. E yeke sala ande ye ti sioni legeoko na ala pëpe. E yeke gue na ndo ti ala ti sala tënë ti Nzapa na ala.

 Me akota kamarade ti e ayeke mbilimbili azo so e ye ti duti na ala mingi. Ti duti anzoni kamarade ni, a lingbi ala duti mara ti azo so Nzapa aye ala. Ambeni ade ahinga peut-être Jéhovah pëpe. Me tongana ala ye ti manda ye na ndo ti lo, e lingbi ti mû maboko na ala. Na tongana ala ye Jéhovah tongana ti so e ye na lo, e lingbi ti ga akota kamarade.

Mbeni lege nde ayeke dä ti hinga wala zo tongaso ayeke duti ande mbeni nzoni kamarade. Bâ aye so lo yeke sala. Lo yeke sala sioni na azo si na pekoni lo he ala? A yeke na lege ni?— Lo yeke gi lakue tënë ti ga na ni na tele ti lo? E ye pëpe ti wara tënë ndali ti lo, ni la ape?— Wala lo yeke sala aye ti sioni na mbana, si na pekoni lo tene so lo hinga ndo mingi ngbanga ti so a gbu lo dä pëpe? Même tongana a gbu lo dä pëpe, Nzapa abâ ye so lo sala ape?— Ti mo, mara ti azo so asala aye tongaso ayeke duti anzoni kamarade teti e?—

Mo lingbi ti mû Bible ti mo? Zia e bâ ye so a tene na ndo ngangu so akamarade ayeke sala na ndo ti e. E zi Bible ni na 1 aCorinthien chapitre 15, versê 33. Mo wara ni awe?— A tene: “I handa tele ti i pëpe: Zo ti nzoni so atambela na azo ti sioni afuti lege ti lo.” So ti tene, tongana e yeke fono na azo ti sioni, e lingbi ti ga sioni. Na nga anzoni kamarade ayeke mû maboko na e ti duti na anzoni salango ye.

Zia e girisa lâ oko pëpe so Zo so ayeke kota mingi na yâ fini ti e ahon azo kue ayeke Jéhovah. E ye ti buba yâ ti kamarade ti e na lo pëpe, ni la ape?— Tongaso, a lingbi e sala hange si akamarade ti e aduti gi ala so aye Nzapa.