MATI na sma di wi lobi fu taki nanga den èn di wi lobi fu de nanga den. Ma a de prenspari fu abi den yoisti sortu mati. Suma yu denki na a moro bun mati di wi kan abi?— Iya, Yehovah Gado.

Wi kan de mati fu Gado trutru?— We, Bijbel e taki dati Abraham, wan man di ben libi wan langa ten pasa, ben de „Yehovah mati” (Yakobus 2:23). Yu sabi fu san ede?— Bijbel e piki taki Abraham ben e gi yesi na Gado. A ben e gi yesi srefi te Gado ben aksi en fu du wan muilek sani. Sobun, fu man de wan mati fu Yehovah, dan wi musu du san e gi en prisiri, neleki fa Abraham ben du dati èn neleki fa a Bigi Leriman du dati ala ten.​—Genesis 22:1-14; Yohanes 8:28, 29; Hebrewsma 11:8, 17-19.

 Yesus ben taigi den apostel fu en: „Unu na mi mati te unu e du san mi e taigi unu” (Yohanes 15:14). Ala sani di Yesus ben taigi sma ben komoto fu Yehovah. Sobun te yu luku en bun, dan Yesus ben e taki dati den mati fu en ben de sma di ben e du san Gado ben taigi den fu du. Iya, ala den mati fu en ben lobi Gado.

Wan tu fu den moro bun mati fu a Bigi Leriman ben de den apostel fu en, èn yu kan si den prenki fu den na tapu bladzijde 75 fu a buku disi. Den ben e teki waka go na presi nanga en èn den ben e yepi en fu du a preikiwroko. Yesus ben gwenti fu de nanga den man disi. Den ben e nyan nanga makandra. Den ben e taki nanga makandra fu Gado. Èn den ben e du tra sani nanga makandra. Ma Yesus ben abi furu tra mati tu. A ben gwenti fu tan na den oso, èn den ben e prisiri nanga makandra.

Wan famiri pe Yesus ben lobi fu tan, ben e libi na ini a pikin foto Betania, krosibei fu a bigi foto Yerusalem. Yu e memre  den?— Den ben de Maria nanga Marta, èn sosrefi Lasarus, a brada fu den. Yesus ben taki dati Lasarus ben de en mati (Yohanes 11:1, 5, 11). Yesus ben lobi a famiri disi èn a ben lobi fu de nanga den, fu di den ben lobi Yehovah èn fu di den ben e dini En.

Disi no wani taki dati Yesus no ben e sori switifasi gi sma di no ben e dini Gado. A ben e du dati. A ben e go srefi na den oso fu den, èn a ben e nyan nanga den. A sani disi ben meki taki son sma ben taki dati Yesus ben de ’wan mati fu den sma di e piki moni gi lanti, èn fu sondari’ (Mateyus 11:19). Ma Yesus no ben e go na den oso fu den sma disi fu di a ben lobi a fasi fa den ben e libi. A ben e go na den so taki a ben kan taki nanga den fu Yehovah. A ben pruberi fu yepi den kenki den takru fasi fu den, so taki den ben kan dini Gado.

Na disi ben pasa wan dei na ini a foto Yeriko. Yesus ben pasa na ini a foto dati di a ben de na pasi fu go na Yerusalem. Wan ipi sma ben de drape, èn wan man ben de na den mindri di ben nen Sakeyus. A ben wani si Yesus. Ma Sakeyus ben syatu, èn fu di so furu sma ben de na en fesi, meki a no ben man si Yesus. Fu dati ede a lon go na fesi èn a kren go na ini wan bon fu  man si bun te Yesus ben o pasa.

Di Yesus doro a bon dati, dan a luku go na loktu èn a taki: ’Saka kon na gron esi-esi, bika tide mi sa kon na yu oso.’ Ma Sakeyus ben de wan guduman di ben du takru sani. Fu san ede Yesus ben wani go na a oso fu so wan man?—

A no fu di Yesus ben lobi a fasi fa a man ben e libi. A ben go drape fu taki nanga Sakeyus fu Gado. A ben si omeni muiti a man dati du fu si en. Fu dati ede a ben sabi taki Sakeyus ben o arki. Disi ben de wan bun ten fu taki nanga en fu a fasi fa Gado wani taki sma musu libi.

Sobun, san wi e si e pasa now?— Sakeyus lobi den leri fu Yesus. A e firi sari taki a bedrigi sma, èn a e pramisi fu gi sma a moni baka di a ben teki fu den sondro taki a ben abi reti fu du so. Baka dati, a e tron wan bakaman fu Yesus. Dan fosi, Yesus nanga Sakeyus e tron mati.​—Lukas 19:1-10.

Efu wi wani de leki a Bigi Leriman, dan oiti wi sa go na sma  di no de wi mati?— Iya. Ma wi no sa go na den oso fu di wi lobi a fasi fa den e libi. Èn wi no sa du takru sani makandra nanga den. Wi sa go na den fu taki nanga den fu Gado.

Ma den bun mati fu wi na den sma di wi lobi fu de nanga den. Fu man de den yoisti sortu mati, dan den musu de sma di Gado lobi. Kande sonwan fu den no sabi srefi suma na Yehovah. Ma efu den wani kon sabi fu en, dan wi kan yepi den. Èn te den lobi Yehovah soleki fa wi e du dati, dan wi kan tron bun mati fu den.

Wan tra fasi de fa wi kan kon sabi efu wan sma ben o de wan bun mati. Luku den sani di a e du. A e du hati sani nanga sma èn a e lafu fu dati? A sani dati no bun, a no so?— A e kon na ini problema ala ten? Wi no ben o wani kon na ini problema fu di wi de nanga en, a no so?— Noso a e du takru sani fu espresi èn a e denki bakaten taki a koni fu di nowan sma no si san a du? Srefi efu nowan sma no si, Gado si san a du, a no so?— Yu denki taki sma di e du den sortu sani dati ben o de bun mati gi wi?—

Grantangi, teki yu Bijbel. Meki wi luku san a e taki fu a krakti di mati abi tapu a libi fu wi. A tekst dati na 1 Korentesma kapitel 15, vers 33. Yu feni en?— A e taki: „No kori unsrefi. Takru kompe e pori bun gwenti.” Disi wani taki dati te wi abi demakandra nanga takru sma, dan wisrefi kan kon takru. Èn a tru sosrefi taki bun mati e yepi wi fu kon abi bun gwenti.

Meki wi no frigiti noiti taki a moro prenspari Sma na ini wi libi na Yehovah. Wi no wani pori a matifasi di wi abi nanga en, a no so?— Fu dati ede, wi musu sorgu taki wi e tron mati soso fu sma di lobi Gado.