BANGANI ngulabo lesitsandza kucoca nabo siphindze sicitse sikhatsi nabo. Kepha kubalulekile kutsi sibe nebangani labakahle. Ucabanga kutsi ngubani umngani lomuhle kakhulu lesingase sibe naye?— NguJehova Nkulunkulu.

Kungenteka mbamba yini kutsi sibe bangani baNkulunkulu?— LiBhayibheli litsi Abrahama indvodza leyaphila kadzeni ‘bekangumngani waJehova.’ (Jakobe 2:23) Uyati yini kutsi kungani aba ngumngani waJehova?— LiBhayibheli litsi kungobe Abrahama wamlalela Nkulunkulu. Bekalalela ngisho nobe loko bekacelwa kutsi akwente bekumatima. Ngako kuze sibe bangani baJehova, kufanele sente lokumjabulisako, njengobe kwenta Abrahama nanjengobe nje uMfundzisi Lomuhle Kakhulu bekasolo enta.​—Genesisi 22:1-14; Johane 8:28, 29; Hebheru 11:8, 17-19.

 Jesu watsi kubaphostoli bakhe: “Nangabe nigcina imiyalo yami nitawuba bangani bami.” (Johane 15:14) Ngenca yekutsi tonkhe tintfo Jesu labekatitjela bantfu betivela kuJehova, Jesu bekasho kutsi bangani bakhe bekubantfu labebakwenta loko Nkulunkulu labekatsi kufanele bakwente. Liciniso, bonkhe bangani bakhe bebamtsandza Nkulunkulu.

Labanye bebangani uMfundzisi Lomuhle Kakhulu labesondzelane nabo kakhulu bekubaphostoli bakhe, futsi titfombe tabo ungatibona ekhasini 75 kulencwadzi. Labaphostoli bahamba naye baphindze bamsita emsebentini wekushumayela. Jesu wacitsa sikhatsi lesinengi nalamadvodza. Bebadla ndzawonye. Bebakhuluma ngaNkulunkulu ndzawonye. Futsi bebenta naletinye tintfo ndzawonye. Jesu bekanabo nalabanye bangani labanengi. Bekahlala nabo futsi bebaba netikhatsi letimnandzi ndzawonye.

Lomunye umndeni Jesu labekatsandza kuwuvakashela bewuhlala edolobheni lelincane laseBhetani, lebelingephandle kwelidolobha lelikhulu  iJerusalema. Bekabobani emagama alamalunga alomndeni?— BekunguMariya, Mata kanye naLazaro umnakabo. Jesu wabita Lazaro ngekutsi ngumngani wakhe. (Johane 11:1, 5, 11) Lokwabangela kutsi Jesu atsandze lomndeni futsi akujabulele kuba nawo kutsi bewutsandza futsi ukhonta Jehova.

Loku akusho kutsi Jesu bekangabaphatsi ngemusa bantfu lebebangamkhonti Nkulunkulu. Bekanemusa kubo. Bekaze abavakashele emakhaya abo aphindze adle nabo. Loku kwabangela kutsi labanye bantfu batsi Jesu “ungumngani webatselisi netoni.” (Matewu 11:19) Loku akusho kutsi Jesu waya emakhaya alabo bantfu ngobe bekayitsandza indlela lebebaphila ngayo. Kunaloko, bekabavakashela kuze acoce nabo ngaJehova. Beketama kubasita bayekele kwenta imikhuba lemibi futsi bakhonte Nkulunkulu.

Loku kwenteka ngalelinye lilanga edolobheni laseJerikho. Jesu bekengca lapho aya eJerusalema. Bekunesicumbi sebantfu, futsi kuleso sicumbi bekunendvodza ligama layo kunguZakewu. Bekafuna kubona Jesu. Kodvwa Zakewu bekamfisha kangangekutsi wehluleka kubona Jesu njengobe bekugcwele bantfu. Ngako wagijimela embili wefike wakhwela esihlahleni kute ambone kahle Jesu nakendlula ngalapho.

 Ngalesikhatsi Jesu efika kulesihlahla wabuka etulu wase utsi: ‘Zakewu, yehla masinyane ngobe lamuhla ngiya endlini yakho ngiyokuvakashela.’ Zakewu bekuyindvodza lenjingile lebeyente tintfo letimbi. Yini leyenta Jesu wafuna kuya endlini yendvodza lenjalo?—

Sizatfu saloko bekungasiko kutsi Jesu bekayitsandza indlela lendvodza lebeyiphila ngayo. Waya lapho kuze acoce naZakewu ngaNkulunkulu. Wayibona imetamo lemikhulu lebeyentiwe ngulendvodza kuze imbone. Ngako bekati kutsi kungenteka Zakewu alalele. Lesi bekusikhatsi lesikahle sekutsi akhulume ngendlela Nkulunkulu latsi bantfu kufanele baphile ngayo.

Uba yini umphumela waloku?— Zakewu uyatitsandza timfundziso taJesu. Uyatisola ngekweba imali yebantfu futsi wetsembisa kuyibuyisela kubo ngobe uyitsetse ngendlela lengasiyo. Ngemuva kwaloko uba ngumlandzeli waJesu. Bacala lapho-ke boJesu naZakewu kuba bangani.​—Lukha 19:1-10.

Nangabe silandzela sibonelo seMfundzisi Lomuhle Kakhulu sitabavakashela yini bantfu labangasibo bangani betfu?— Yebo sitabavakashela.  Kodvwa angeke siye lapho bahlala khona ngobe sitsandza indlela labaphila ngayo. Ngeke sente tintfo letimbi nabo. Sitabavakashela kuze sicoce nabo ngaNkulunkulu.

Bangani betfu lesisondzelene nabo ngulabo lesitsandza kucitsa sikhatsi lesinyenti sinabo. Kuze babe bangani labakahle kufanele batsandze Nkulunkulu. Labanye babo kungenteka abamati Jehova. Kodvwa nangabe bafisa kufundza ngaye, singabasita. Nakufika sikhatsi sekutsi batsandze Jehova njengatsi, singaba bangani babo labakhulu.

Ikhona lenye indlela lesingayisebentisa kuze sitfole kutsi umuntfu angaba yini ngumngani lokahle. Buka tintfo latentako. Uyatenta yini tintfo letivisa labanye bantfu buhlungu aphindze ahleke ngaloko lakwentile? Loko akusiyo intfo lenhle, angitsi?— Uhlale angena etinkingeni yini? Angeke sifune kutifaka etinkingeni naye, angitsi?— Wenta tintfo letimbi ngemabomu futsi acabange kutsi uhlakaniphile yini ngobe akabanjwa? Nome lomuntfu angakabanjwa, Nkulunkulu ukubonile lakwentile, angitsi kunjalo?— Ucabanga kutsi bantfu labenta tintfo letinjalo bangalunga yini kutsi babe bangani betfu?—

Ngicela utsatse liBhayibheli lakho. Ase sifundze loko lelikushoko ngekutsi bangani betfu bakutsintsa njani kuphila kwetfu. Lombhalo uku-1 Khorinte sehluko 15 livesi 33. Sewuwutfolile yini lombhalo?— Utsi: “Ningadukiswa. Kutihlanganisa nebantfu lababi kona imikhuba lemihle.” Loku kusho kutsi nasicitsa sikhatsi nebantfu lababi kungenteka natsi sibe babi. Kuliciniso nekutsi bangani labakahle bayasisita kutsi sibe nemikhuba lemihle.

Asingakhohlwa kutsi umuntfu lobaluleke kakhulu ekuphileni kwetfu nguJehova. Asifuni kulahlekelwa buhlobo lobuhle naye, angitsi kunjalo?— Ngenca yaloko, kufanele siciniseke kutsi bangani betfu ngulabo kuphela labatsandza Nkulunkulu.