Cibalo 44

Ibeenzuma Beelede Kumuyanda Leza

IBEENZUMA mbantu mbotubandika akweenda limwi lyoonse. Pele cilayandika kapati ikubaa beenzuma ibali kabotu. Ino uyeeya kuti nguni mweenzuma mubotu kwiinda boonse ngotunga twabaanguwe?— Inzya, ngu Jehova Leza.

Sena ncobeni tulakonzya kuba beenzinyina a Leza?— Ibbaibbele lyaamba kuti Abrahamu, imwaalumi iwakali kupona kaindi wakali “mulongwaakwe Leza.” (Jakobo 2:23) Sena ulizyi ncaakali mulongwe wa Jehova?— Ibbaibbele liingula kuti nkaambo wakamvwida Leza. Wakamumvwida neliba leelyo naakaambilwa kucita cintu cakamuyumina. Aboobo, ikutegwa tube balongwe ba Jehova, tweelede kucita zintu nzyakkomanina mbubwenya Abrahamu mbwaakacita ambwaali kucita lyoonse Mwiiyi Mupati.—Matalikilo 22:1-14; Johane 8:28, 29; Ba-Hebrayo 11:8, 17-19.

 Jesu wakaambila baapostolo bakwe kuti: “Munooli beenzuma mwanoozicita nzemwaambila.” (Johane 15:14) Mbwaanga zyoonse Jesu nzyaakaambila bantu zyakazwa kuli Jehova, Jesu wakali kwaamba kuti ibeenzinyina bakali bantu ibakali kucita eezyo Leza nzyaakaamba kuti zyeelede kucitwa. Ncobeni, ibeenzinyina boonse bakali kumuyanda Leza.

Bamwi ibakali beenzinyina mbaakali kuyandisya Mwiiyi Mupati bakali baapostolo bakwe, ibali mucifwanikiso cili apeeji 75 mubbuku eeli. Bakali kweenda limwi anguwe alimwi bakamugwasya kucita mulimo wakukambauka. Ibunji bwaziindi Jesu wakali kujanika abaalumi aaba. Bakali kulida antoomwe. Bakali kubandika limwi makani aajatikizya Leza alimwi bakacita azintu zimbi antoomwe. Pele Jesu wakalijisi abeenzinyina bambi banji. Wakali kunga ulakkala ambabo lyoonse alimwi ziindi eezyo zyakali kukkomanisya kapati.

Imukwasyi umwi Jesu nkwaakali kuyanda kukkala-kkala wakali kukkala mumunzi musyoonto wa Betaniya, kunze aamunzi mupati wa Jerusalemu.  Sena ulabayeeya banamukwasyi ooyu?— Bakali ba Mariya, Marta alimwi amunyina Lazaro. Jesu wakali kwiita Lazaro kuti mmweenzinyina. (Johane 11:1, 5, 11) Wakali kuuyanda mukwasyi ooyu Jesu alimwi wakali kukkomana kubaa mbabo akaambo kakuti bakali kumuyanda Jehova alimwi bakali kumubelekela.

Eeci tacaambi kuti Jesu wakali silunya kubantu ibatakali kubelekela Leza. Wakali silubomba akulimbabo. Mane wakali kuunka kumaanda aabo alimwi akulya zilyo ambabo. Eeci cakapa kuti bamwi baambe kuti Jesu wakali “mulongwe wabo basimutelo abasizibi.” (Matayo 11:19) Ibwini mbwakuti Jesu tanaakaunka kumaanda aabantu aaba akaambo kakuti wakalikkomene ambobakali kukkala. Wakali kubaswaya ikutegwa abaambile makani aajatikizya Jehova. Wakasoleka kubagwasya kuleka kucita zintu zibyaabi akutalika kubelekela Leza.

Eeci cakacitika bumwi buzuba mumunzi wa Jeriko. Jesu wakali sikwiinda buyo mumunzi ooyo kaya ku Jerusalemu. Kwakali nkamu yabantu, alimwi munkamu eeyo kwakali mwaalumi wazina lya Zakayu. Wakali kuyanda kuti amubone Jesu. Pele Zakayu wakali mufwaafwi, aboobo kunyina naakali kukonzya kumubona akaambo kabantu banji bakali kumbele lyakwe. Aboobo wakabalikila kumbele mumugwagwa  akutanta mucisamu ikutegwa amubone kabotu Jesu naakali kunooyinda.

Eelyo Jesu naakasika acisamu eeco, wakalanga mujulu akwaamba kuti: ‘Fwambaana seluka, nkaambo sunu ndiyookkala kuŋanda yako.’ Pele Zakayu wakali muntu muvwubi iwakacitide zintu zibyaabi. Ino nkaambo nzi Jesu ncaakayanda kuunka kuŋanda yamuntu uuli boobo?—

Takuli kuti Jesu wakalikkomene ambwaakali kukkala muntu ooyo. Wakaunka kuŋanda yakwe kutegwa akaambile Zakayu makani aajatikizya Leza. Wakabona mbuli mwaalumi ooyo mbwaakasoleka kapati kuti amubone. Aboobo wakalizyi kuti Zakayu wakali kukonzya kuswiilila. Eeci cakali ciindi cibotu cakumwaambila bukkale mbwayanda Leza kuti bantu kabapona.

Aboobo, ino ncinzi cakacitika?— Zakayu wakakukkomanina kuyiisya kwa Jesu. Wakausa kapati kuti wakeena bantu, alimwi wakasyomezya kubweedezya mali ngaatakeelede kubweza kubantu. Mpoonya wakaba sikutobela wa Jesu. Lilikke naakamana kucita boobo, Jesu a Zakayu nobakaba balongwe.—Luka 19:1-10.

Ikuti naa twatobela cikozyanyo ca Mwiiyi Mupati, sena kuli notuyoobaswaya bantu ibatali beenzuma?— Inzya tuyoobaswaya. Pele tatukaunki  kumunzi wabo akaambo kakuti tulabukkomanina bukkale bwabo. Alimwi tatukaciti zintu zibyaabi ambabo. Tuyoobaswaya ikutegwa tukabandike ambabo kujatikizya Leza.

Pele ibeenzuma mbotuyandisya mbaabo mbotwiizya limwi lyoonse. Ikutegwa babe beenzuma beelede, bayandika kuti kabali baabo mbayanda Leza. Ibamwi akati kabo tabamuzyi Jehova pe. Pele ikuti kabayanda kwiiya kujatikizya nguwe, tulakonzya kubagwasya. Alimwi eelyo baakumuyanda Jehova mbubwenya mbotumuyanda swebo, ndendilyo notuyooba balongwe babo beni-beni.

Kuli nzila iimbi njonga wabelesya kuzyiba naa muntu umwi inga waba mulongwe mubotu. Bikkila maanu kuzintu nzyacita. Sena ucitila bambi zintu zibyaabi amane wabaseka? Eeci ncibi, tee kayi?— Sena lyoonse uliletela mapenzi? Inga tiitwayanda kunjila mumapenzi aakwe, tee kayi?— Naa sena lyoonse ucita zintu zibyaabi acaali mpoonya akuyeeya kuti ulicenjede akaambo kakuti kunyina wamubona? Nokuba kuti kunyina muntu wakamubona, Leza wakacibona ncaakacita, tee kayi?— Sena uyeeya kuti ibantu bacita zintu zibyaabi zili boobo inga baba beenzuma bali kabotu?—

Bweza Bbaibbele lyako. Atubone ncolyaamba kujatikizya bantu mbotweenda limwi mbobabujatikizya bukkale bwesu. Ilugwalo luli ku 1 Ba-Korinto caandaano 15, kapango ka 33. Sena walubona lugwalo oolo?— Tubala kuti: “Mutalyeeni. Mweenda abamineme, anywebo mulaminama.” Eeci caamba kuti ikuti katujanikaa bantu babi, aswebo tulakonzya kubija. Alimwi ncamasimpe kuti ibeenzuma babotu batugwasya kubaa zilengwa zibotu.

Tutalubi pe kuti Muntu uuyandika kapati mubuumi bwesu ngu Jehova. Tatuyandi pe ikunyonganya cilongwe cesu anguwe, tee kayi?— Aboobo lyoonse tweelede kubona kuti balikke aabo ibamuyanda Leza mbobeenzuma.

Mbokuyandika kubaa beenzuma bali kabotu kulatondezyegwa kubbuku lya Intembauzyo 119:115; Tusimpi 13:20; 2 Timoteo 2:22 alimwi a 1 Johane 2:15.

[Cifwanikiso icili apeeji 227]

Ino nkaambo nzi Abrahamu ncaakali “mulongwaakwe Leza”?

[Cifwanikiso icili apeeji 228]

Nkaambo nzi Jesu bunji bwaziindi ncaakali kukkala-kkala amukwasyi ooyu lyoonse naakali kuswaya munzi wa Jerusalemu? Sena ulibazyi mazina banamukwasyi ooyu?

[Cifwanikiso icili apeeji 229]

Ino nkaambo nzi Zakayu ncaatantila cisamu eeci?

[Cifwanikiso icili apeeji 230]

Ino nkaambo nzi Jesu ncaaswaya Zakayu, alimwi ino ncinzi Zakayu ncali mukusyomezya kuti uyoocita?