MABWEZI ni ŵantu awo tikutemwa kuyowoya na kucezga nawo. Kweni ncakuzirwa kuŵa na mabwezi ghakwenerera. Kasi ukughanaghana kuti ni njani uyo wangaŵa mubwezi withu muweme comene?— Enya, ni Yehova Ciuta.

Kasi tingaŵa nadi mabwezi gha Ciuta?— Baibolo likuyowoya kuti Abrahamu, mwanarumi uyo wakaŵako virimika vinandi ivyo vyajumpa, wakaŵa ‘mubwezi wa Ciuta.’ (Yakobe 2:23) Kasi ukumanya cifukwa ico wakaŵira mubwezi wa Yehova?— Baibolo likuzgora kuti Abrahamu wakapulikiranga Ciuta. Wakapulikira nanga ni apo wakapempeka kuti wacite cintu cinyake cakusuzga. Nteura kuti tiŵe mubwezi wa Yehova, tikwenera kucita vintu ivyo vikumukondweska, nga ni umo Abrahamu wakacitira ndiposo nga ni umo Msambizgi Waluso wakacitiranga nyengo zose.— Genesis 22:1-14; Yohane 8:28, 29; Ŵahebere 11:8, 17-19.

 Yesu wakaphalira ŵasambiri ŵake kuti: ‘Imwe muli mabwezi ghane usange mukucita vyeneivyo nkumulangulirani.’ (Yohane 15:14) Cifukwa cakuti vilivyose ivyo Yesu wakaphaliranga ŵantu vikafumiranga kwa Yehova, Yesu wakang’anamuranga kuti mabwezi ghake ghakaŵa awo ŵakacitanga vintu ivyo Ciuta waŵaphalira kuti ŵacite. Enya, mabwezi ghose gha Yesu ghakutemwa Ciuta.

Mabwezi ghake ghanyake gha Msambizgi Waluso ghakaŵa ŵapostole ŵake, awo vithuzithuzi vyawo ungaviwona pa peji 75 la buku lino. Ŵakendanga nayo ndipo ŵakamovwiranga kupharazga. Yesu wakamalira nyengo yake yinandi na ŵanarumi aŵa. Ŵakaryeranga pamoza. Ŵakayowoyanga za Ciuta pamoza. Ndiposo ŵakacitirananga pamoza vintu vinyake. Kweni Yesu wakaŵaso na mabwezi ghanyake ghanandi. Nyengo zinyake wakarutanga kukakhala nawo na kusangwa nawo limoza.

Mbumba yimoza iyo Yesu wakatemwanga kukhala nayo yikakhalanga mu tawuni yicoko ya Betaniya, iyo yikaŵa pafupi na msumba ukuru wa Yerusalemu. Kasi ŵantu ŵa mu mbumba iyi ukuŵakumbuka?— Ŵakaŵa Marita, Mariya na Lazaro. Yesu wakacema Lazaro kuti mubwezi  wake. (Yohane 11:1, 5, 11) Cifukwa ico Yesu wakatemwera mbumba iyi cikaŵa cakuti yikatemwanga Yehova na kumuteŵetera Iye.

Ici kuti cikung’anamura kuti Yesu wakatinkanga ŵantu awo ŵakarekanga kuteŵetera Ciuta yayi. Nawo wakaŵatemwanga. Nyengo zinyake wakarutanga nanga nkunyumba zawo na kuryera nawo pamoza. Ici cikapangiskanga ŵanji kuyowoya kuti Yesu wakaŵa “bwezi la ŵamisonko na ŵakwananga!” (Mateyu 11:19) Fundo njakuti, Yesu kuti wakarutanga kunyumba za ŵantu aŵa cifukwa cakuti wakatemwanga ivyo ŵakacitanga yayi. Wakarutanga kuti wakaŵaphalire za Yehova. Wakakhumbanga kuŵawovwira kuti ŵareke kucita vintu viheni na kwamba kuteŵetera Ciuta.

Ici ndico cikacitika zuŵa linyake mu msumba wa Yeriko. Yesu wakendera mu msumba uwu peneapo wakarutanga ku Yerusalemu. Pakaŵa wumba wa ŵantu, ndipo mu wumba uwu mukaŵa mwanarumi munyake zina lake Zakeyu. Iye wakakhumbanga kuti wawone Yesu. Kweni Zakeyu wakaŵa mufupi, ndipo cifukwa ca wumba wakatenge wamuwonenge Yesu yayi. Anteura wakacimbira mu mpepete mwa msewu na kukwera mu khuni mwakuti wamuwone makora Yesu para wakujumpa.

Yesu wakati wafika pa khuni lira, wakalaŵiska kucanya na kuyowoya kuti: ‘Khira mwaluŵiro, cifukwa muhanya uno  nkuruta ku nyumba yako.’ Kweni Zakeyu wakaŵa muntu musambazi uyo wakacita vintu viheni vinandi. Ncifukwa wuli Yesu wakakhumbanga kuruta ku nyumba ya muntu muheni uyu?—

Cikaŵa cifukwa cakuti Yesu wakatemwanga kakhaliro ka muntu yura yayi. Wakaruta ku nyumba kwa Zakeyu kuti wakamuphalire za Ciuta. Wakawona kuyezgayezga uko mwanarumi yura wakacita kuti wamuwone. Nteura wakamanya kuti Zakeyu wangategherezga. Uwu ukaŵa mwaŵi uweme wakuti wamuphalire umo Ciuta wakukhumbira kuti ŵantu ŵakhalirenge.

Kasi ncivici ico cikaŵa cakufumapo cake?— Zakeyu wakatemwa ivyo Yesu wakamusambizga. Wakacita citima cifukwa ca kupusika ŵantu, ndipo wakalayizga kuti wawezgenge ndarama zose izo wakapoka mwambura kwenerera. Pamanyuma pake wakaŵa murondezgi wa Yesu. Apa ndipo Zakeyu na Yesu ŵakaŵa paubwezi.—Luka 19:1-10.

Usange tirondezgenge Msambizgi Waluso, kasi tirutenge ku nyumba za ŵantu awo ni mabwezi ghithu yayi?— Enya. Kweni tirutenge cifukwa cakuti tikutemwa ivyo ŵakucita yayi. Ndiposo kuti tamucita nawo vintu viheni yayi. Tirutenge kuti tikayowoye nawo za Ciuta.

 Kweni mabwezi ghithu gha pamtima ni ŵantu awo tikutemwa kucezga nawo nyengo zinandi. Kuti ŵaŵe mabwezi ghakwenerera, iwo ŵakwenera kuŵa ŵantu awo Ciuta wakukondweskeka nawo. Ŵanji ŵangaŵa kuti ŵakumanya na kumumanya yayi Yehova. Kweni usange ŵakukhumba kusambira za iye, tingaŵawovwira. Ndipo para ŵayamba kutemwa Yehova nga ni umo ise tikucitira, apo ndipo ŵangaŵa mabwezi ghithu gha pamtima.

Paliso ntowa yinyake yakumanyira muntu usange wangaŵa bwezi liweme. Tingawona vintu ivyo wakucita. Kasi wakucitira ŵanyake nkaza na kuŵaseka pamanyuma pake? Kucita nteura mbuweme yayi, asi ntena?— Kasi wakujiŵika mu masuzgo nyengo zose? Tingatemwa yayi kuŵa nayo mu masuzgo, asi ntena?— Panji kasi wakucitira dala vintu viheni na kughanaghana kuti ngwamahara cifukwa cakuti wandakoreke? Nangauli muntu uyo wangaŵa kuti wandakoreke, kweni Ciuta wakawona ivyo wakacita, kasi ni ntena yayi?— Kasi ukughanaghana kuti awo ŵakucita vintu ivi ŵangaŵa ŵantu ŵaweme kuŵa nawo paubwezi?—

Kasi warekeraci kutora Baibolo lako? Tiye tiwone ivyo likuyowoya vyakukhwaskana na umo mabwezi ghithu ghakukhwaskira umoyo withu. Lemba ili likusangika pa 1 Ŵakorinte cipaturo 15, vesi 33. Kasi walisanga?— Ilo likuti: “Mungapusikikanga: Kwendezgana na ŵaheni kukwananga makhaliro ghaweme.” Ici cikung’anamura kuti usange tikwenda na ŵantu ŵaheni, mbwenu nase tiŵenge ŵaheni. Kweniso mbunenesko kuti kwenda na ŵantu ŵaweme kukutovwira kuŵa na mikhaliro yiweme.

Tingaruwanga yayi kuti muntu wakuzirwa comene mu umoyo withu ni Yehova. Tikukhumba yayi kunanga ubwezi withu na iye, asi ntena?— Nteura tikwenera kukorana ubwezi na ŵantu ŵekha awo ŵakutemwa Ciuta.