TAUGASOA ko tino kolā e fia sau‵tala tatou ki ei kae fakamāumāu taimi fakatasi mo latou. Kae se mea tāua ke maua a taugasoa ‵lei. Ko oi e mafaufau koe me ko te ‵toe tino ‵lei ke taugasoa ki ei?— Ao, ko Ieova te Atua.

E mata, e mafai eiloa o fai tatou mo taugasoa o te Atua?— Ia, e fai mai te Tusi Tapu me i a Apelaamo, se tagata telā ne ola i aso mua loa, ne fai mo “taugasoa o Ieova.” (Iakopo 2:23) E iloa ne koe me kaia?— E tali mai te Tusi Tapu me ne fakalogo a Apelaamo ki te Atua. Ne fakalogo a ia ke oko foki eiloa ki te taimi ne fakatonu atu ei ke fai ne ia se mea faigata ‵ki. Tela la, ke fai mo fai se taugasoa o Ieova, e ‵tau o fakafiafia ne tatou a ia, e pelā eiloa mo te mea ne fai ne Apelaamo mo te mea foki telā ne fai faeloa ne te Faiakoga Sili.—Kenese 22:1-14; Ioane 8:28, 29; Epelu 11:8, 17-19.

 Ne fai atu a Iesu ki ana apositolo: “A koutou ko oku taugasoa māfai e fai ne koutou a mea kolā e fakatonu atu ne au ki a koutou.” (Ioane 15:14) Ona ko te mea ne aumai mai i a Ieova a mea katoa kolā ne fai atu ne Iesu ki tino, ne fai mai a Iesu me i ana taugasoa ko tino kolā e fai ne latou a mea kolā ne fai mai te Atua me e ‵tau o fai ne latou. Ao, e a‵lofa ana taugasoa katoa ki te Atua.

A nisi taugasoa ‵pili o te Faiakoga Sili ko ana apositolo, kolā e mafai o lavea atu ne koe olotou ata i te itulau e 75 o te tusi tenei. Ne faima‵laga fakatasi latou mo ia kae ne fesoasoani atu foki ki te faiga o te galuega talai. Ne fakamāumāu ne Iesu a te ukega o ana taimi mo tāgata konei. Ne ‵kai fakatasi latou. Ne sau‵tala fakatasi latou e uiga ki te Atua. Kae ne fai fakatasi foki ne latou a nisi mea. Kae e uke aka foki a nisi taugasoa o Iesu. Ne ‵nofo fakatasi a ia mo latou, kae ne fia‵fia malosi latou i taimi penā.

E tasi te kāiga telā e fia nofo sāle a Iesu i a latou e ‵nofo i te tamā fa‵kai o Petania, mai tua fua o te fa‵kai lasi o Ielusalema. E masaua ne koe a latou?— Ko Malia mo Maleta mo te lā tuagane, ko Lasalo. Ne  taku ne Iesu a Lasalo ki tena taugasoa. (Ioane 11:1, 5, 11) A te pogai ne alofa kae ne fiafia foki a Iesu ke ‵nofo fakatasi mo te kāiga tenei me ne a‵lofa kae tavini atu latou ki a Ieova.

E se fakauiga a te mea tenei me ne seki atafai atu a Iesu ki tino kolā ne seki tavini atu ki te Atua. Ne atafai foki a ia ki a latou. Ne fanatu foki a ia ki olotou fale kae ‵kai fakatasi mo latou. Ne fai ne te mea tenei a nisi tino ke fai me i a Iesu “se taugasoa o tino ao lafoga mo tino agasala.” (Mataio 11:19) A te ‵tonuga loa, ne seki fanatu a Iesu ki fale o tino konei ona ko te mea ne fiafia a ia ki olotou vaegā olaga. Ne āsi atu ko te mea ke mafai o faipati atu a ia ki a latou e uiga ki a Ieova. Ne taumafai a ia ke fesoasoani atu ki a latou ke ‵fuli mai i olotou auala ma‵sei kae tavini atu ki te Atua.

Ne tupu te mea tenei i te aso e tasi i te fa‵kai o Ieliko. Ne fakasili atu a Iesu i ei i tena auala ki Ielusalema. Ne ‵nofo atu i ei se vaitino, kae ne nofo atu foki i ei se tagata e igoa ki a Sakaio. Ne manako tou tagata ke kilo faka‵lei atu ki a Iesu. A ko Sakaio e toetoe, kae ne seki mafai o lavea ne ia ona ko te vaitino. Tela la, ne tele atu a ia ki mua i te auala kae ne kake aka i se lakau ko te mea ke lavea ‵lei ne ia a Iesu i te taimi ne fanatu ei.

I te taimi ne oko atu ei a Iesu ki te lakau tenā, ne kilo aka a ia ki luga kae fai atu: ‘Fakavave kae fanaifo ki lalo, me ka fanatu au ki tou fale i te  aso nei.’ Kae ko Sakaio se tagata maumea telā ne fai ne ia a mea ma‵sei. Kaia ne fia fanatu ei a Iesu ki te fale o se vaegā tagata penā?—

Ne seki fai penā ona ko te mea ne fiafia a Iesu ki te olaga o te tagata tenā. Ne fanatu a ia o faipati ki a Sakaio e uiga ki te Atua. Ne lavea ne ia a te auala ne taumafai malosi ei a te tagata tenā ke lavea ne ia a Ia. Tela la, ne iloa ne ia me kāti e fia fakalogologo eiloa a Sakaio. Tenei eiloa te taimi ‵lei ke faipati atu ki a ia e uiga ki te auala e fai mai te Atua me e ‵tau o ola i ei a tino.

 

Tela la, e lavea ne koe a te mea ko tupu nei?— Ko fiafia eiloa a Sakaio ki akoakoga a Iesu. Ne salamō malosi a ia mō te fakaloiloiga ne ia o tino, kae ne tauto a ia me ka toe faka‵foki atu ne ia a tupe kolā e seki ‵tau o puke ne ia. Mai tuai ifo i konā, ne fai ei a ia mo soko o Iesu. Mai konā ne fatoa fai ei a Iesu mo Sakaio mo fai ne taugasoa.—Luka 19:1-10.

Kafai e fakaakoako tatou ki te Faiakoga Sili, e mata, ka āsi atu tatou ki tino kolā e se ko ‵tou taugasoa?— Ao. Kae e se olo atu tatou ki olotou fale ona ko te mea e fia‵fia tatou ki olotou vaegā olaga. Kae e se aofia foki tatou i mea ma‵sei e fai ne latou. Ka āsi atu tatou ki a latou ko te mea ke mafai o fai‵pati atu ki a latou e uiga ki te Atua.

 Kae ko ‵tou taugasoa ‵pili ko tino kolā e ma‵nako malosi tatou ke fakamāumāu taimi mo latou. Ke maua a vaegā taugasoa ‵lei penā, e ‵tau o fai latou mo fai ne vaegā tino kolā e fiafia ki ei te Atua. Kāti e se iloa foki ne nisi tino me ko oi a Ieova. Kae kafai e fia tauloto latou e uiga ki a ia, e mafai o fesoasoani atu tatou ki a latou. Kae kafai e oko mai te taimi e a‵lofa ei latou ki a Ieova e pelā mo tatou, ko mafai ei o fai latou mo fai ‵tou taugasoa ‵pili.

E isi foki se auala e mafai ei o iloa ne tatou a te tino telā e mafai o fai mo fai se taugasoa ‵lei. Onoono ki ana mea kolā e fai. E mata, e fai ne ia a mea sē ‵lei ki nisi tino kae oti aka ko katakata ki ei? E se ‵lei te mea tenā, ne?— E mata, e aofia faeloa a ia i fakalavelave? E se ma‵nako tatou ke aofia i fakalavelave ona ko te ‵kau fakatasi mo ia, ne?— Io me e fai ne ia a mea ma‵sei mo te iloa tonu kae mafaufau me e sili atu tena poto ona ko te mea e seki ‵po aka eiloa a ia? Kafai foki loa e seki ‵po aka a te tino tenā, ne lavea ne te Atua ana mea ne fai, ne?— E mata, e mafaufau koe me i tino kolā e fai ne latou a vaegā mea konei ne tino ‵lei ke fai taugasoa tatou ki ei?—

Kaia e se puke mai tau Tusi Tapu? Ke onoono aka tatou ki pati i ei e uiga ki te auala e pokotia ei ‵tou olaga i ‵tou taugasoa. A te tusi faitau ko te 1 Kolinito mataupu e 15, te fuaiupu e 33. Ko maua ne koe?— E faitau penei: “A taugasoa ma‵sei e fakama‵sei ne latou a amioga ‵lei.” E fakauiga te mea tenei me kafai e fakamāumāu ne tatou a taimi fakatasi mo latou, ka fai ei ke gasolo o ma‵sei tatou. Kae se mea tonu foki me e fesoasoani mai a taugasoa ‵lei ke ati aka ne tatou a faifaiga ‵lei.

Ke mo a eiloa ma puli i a tatou me i te ‵toe Tino tāua eiloa i ‵tou olaga ko Ieova. E se ma‵nako tatou o fakamasei ‵tou va fakataugasoa mo ia, ne?— Tela la, e ‵tau o fakaeteete tatou ko te mea ke fai taugasoa fua tatou mo latou kolā e a‵lofa ki te Atua.