LI KAMIGOTAKTIKE jaʼ krixchanoetik ti lek chkaʼitik chi jloʼilajutik xchiʼuk te oyukutik xchiʼukike. Pe tsots skʼoplal ti lekuk jtʼujtik li kamigotaktike. ¿Buchʼu van jaʼ xa naʼ li mas lekil kamigotik ti xuʼ oyuk kuʼuntike?... Jaʼ, jaʼ li Jeova Diose.

Pe ¿mi xuʼ chi jkʼot ta yamigo ta melel li Diose?... Li Vivliae ta xal kaʼitik ti «lec laj yil sbaic xchiʼuc Dios» li Abrahame, jun vinik ti ikuxi ta voʼnee (Santiago 2:23). ¿Mi xa naʼ kʼu yuʼun?... Li Vivliae ta stakʼ ti yuʼun la xchʼunbe smantal Dios li Abrahame. Manchuk mi tsots ta pasel li kʼusi albat yuʼun li Diose, li stuke la xchʼun. Jech un chaʼa, sventa chkamigointik li Jeovae, skʼan ta jpastik li kʼusi lek chile, jech kʼuchaʼal la spas li Abrahame xchiʼuk jech kʼuchaʼal spasoj onoʼox li Mukʼta Jchanubtasvaneje (Génesis 22:1-14; Juan 8:28, 29; Hebreos 11:8, 17-19).

 Li Jesuse xi laj yalbe li yajtakboltake: «Voʼoxuc lec jcʼopan jbatic me jaʼ chapasic scotol li cʼusitic laj calboxuque», xi (Juan 15:14). Skotol li kʼusitik laj yal li Jesuse likem tal ta stojolal Jeova, taje jaʼ skʼan chal ti yamigotake jaʼ krixchanoetik ti chchʼunbeik smantaltak li Diose. Skotol li yamigotake skʼanojik li Diose.

Junantik slekil yamigotak li Mukʼta Jchanubtasvaneje jaʼ li yajtakboltake, ti buchʼutik xuʼ xa kʼelbe slokʼolik ta pajina 75. Jmoj ixanavik xchiʼuk li Jesuse, xchiʼuk la skoltaik li ta chol mantale. Li Jesuse jal te xchiʼukan li yajtakboltake. Jmoj iveʼik. Loʼilajik ta sventa Dios. Xchiʼuk ep kʼusitik jmoj la spasik. Pe li Jesuse oy to mas ep yamigotak. Bakʼintike te chkom li ta snaike, xchiʼuk jmoj te jun yoʼonton chloʼilajik.

Li Jesuse lek chaʼi te chkom ta sna jun utsʼ-alalil ti te nakalik ta Betaniae, jun jteklum ti te oy ta xokon smukʼta teklumal Jerusalene. ¿Mi xvul ta ajol buchʼutik jaʼ?... Jaʼ li María, Marta xchiʼuk Lázaro ti jaʼ xchiʼilik ta vokʼele. Li Jesuse laj yal ti jaʼ yamigo li Lazaroe (Juan 11: 1, 5, 11). Li Jesuse skʼanoj li utsʼ-alalil taje xchiʼuk lek chaʼi ti te oy xchiʼukike, yuʼun liʼike skʼanojik li Jeovae xchiʼuk chtunik ta stojolal.

Taje maʼuk tskʼan xal ti yuʼun muʼyuk lek yoʼonton li Jesús ta stojolal li buchʼutik muʼyuk chtunik ta stojolal li Diose. Lek yoʼonton ta stojolalik. Bat ta snaik xchiʼuk jmoj iveʼik. Ta skoj taje, li junantik krixchanoetike laj yalik ti «lec chil sbaic xchiʼuc jtsobpatanetic xchiʼuc yan jpasmuliletic» li Jesuse (Mateo 11:19). Pe li Jesuse mu yuʼunuk tskʼupin ti kʼuyelan kuxulik ti chbat ta snaike, moʼoj. La svulaʼanan sventa xuʼ ta skʼoponan ta sventa li Jeovae. La skʼan la skoltaan sventa chiktaik li xchopol kuxlejalike xchiʼuk akʼo tunikuk ta stojolal li Diose.

Jaʼ jech kʼot ta pasel jun kʼakʼal ta steklumal Jericó. Li Jesuse te yakal xanav batel li ta be ti chbat ta Jerusalene. Toj ep tajmek krixchanoetik, ta yoʼlol epal krixchanoetike te oy jun vinik ti Zaqueo sbie. Liʼe tskʼan tajmek tskʼel li Jesuse. Pe mu sta ta kʼelel ta skoj li epal krixchanoetike, yuʼun pekʼex vinik li Zaqueoe. Jech un chaʼa, jelav batel ta anil li ta bee, imuy ta jtekʼ teʼ sventa xuʼ tskʼel lek kʼalal chjelav li Jesuse.

Kʼalal kʼot yoʼ bu oy li jtekʼ teʼ li Jesuse, la skʼel muyel xchiʼuk xi laj yale: Yalan tal ta anil, yuʼun te chi  bat ta ana li avie, xi. Pe li Zaqueoe jaʼ jun jkʼulej vinik ti spasoj kʼusitik chopole. ¿Kʼu yuʼun tskʼan chbat Jesús ta sna jun vinik ti jech kʼuchaʼal taje?...

Li Jesuse mu yuʼunuk tskʼupin ti kʼuyelan kuxul li Zaqueoe, moʼoj, yuʼun li stuke tskʼan chchiʼin ta loʼil ta sventa li Diose. Li Jesuse laj yil ti laj yakʼ svokol li Zaqueo sventa ch-ilat li Jesuse, jaʼ yuʼun la snaʼ ti tskʼan ch-aʼibat li sloʼile. Jaʼ toʼox jun lekil yorail sventa chalbe kʼusi chal Dios ti kʼu yelan skʼan chkuxi li krixchanoetike.

Vaʼun chaʼa, ¿kʼusi kʼot ta pasel jech kʼuchaʼal chkiltik li ta lokʼole?... Li Zaqueoe lek laj yaʼi li chanubtaseletik yuʼun li Jesuse. La sutes yoʼonton ti la sloʼla li krixchanoetike xchiʼuk laj yal ta melel ti tsutes li takʼin ti la tsak ta jech noʼoxe. Vaʼun la spas sba ta yajtsʼaklom li Jesuse, jaʼ noʼox jech xuʼ ipas ta yamigo li Jesuse (Lucas 19:1-10).

Mi ta jchanbetik stalelal li Mukʼta Jchanubtasvaneje, ¿mi ta van jvulaʼantik li krixchanoetik ti maʼuk kamigotaktike?... Tana. Pe mu yuʼunuk ta jkʼupintik ti kʼuyelan kuxulik ti chi jbat ta snaike mi jaʼuk yuʼun chbat jpastik kʼusitik chopol xchiʼukik. Chbat jvulaʼantik sventa ta jkʼopontik ta sventa Dios.

 Pe li jlekil amigotaktike jaʼik li buchʼutik lek chkaʼitik te oyutik xchiʼukike. Jech oxal, sventa jaʼuk lekil amigoetike, skʼan ta slekubtasbeik yoʼonton li Diose. Li junantike oyikʼal van mi jaʼuk snaʼik buchʼu jaʼ li Jeovae. Pe mi tskʼan chchanik ta stojolale, xuʼ ta jkoltatik. Kʼalal chkʼot skʼakʼalil tskʼanik Jeova jech kʼuchaʼal li voʼotike, vaʼun xuʼ ta spasik ta kamigotaktik.

Oy yan yelan kʼuxi xuʼ ta jnaʼtik mi xuʼ tspas ta lekil kamigotik li jun krixchanoe. Kʼelo li kʼusitik tspase. ¿Mi lek chaʼi spasbel kʼusitik chopol li yantike? Taje muʼyuk lek, ¿mi mu jechuk?... ¿Mi toj echʼem stikʼ sba ta kʼop? Li voʼotike mu jkʼan ta jtatik kʼop ta skoj ti ta jchiʼintike, ¿mi mu jechuk?... ¿O mi yalel tspas kʼusitik chopol xchiʼuk tsnop ti toj pʼij ta skoj ti yuʼun muʼyuk buchʼu ch-ilate? Manchuk mi muʼyuk buchʼu chkʼot snaʼ, li Diose laj yil li kʼusitik la spase, ¿mi mu jechuk?... ¿Mi skʼan ta xkamigointik krixchanoetik ti tspasik kʼusitik kʼuchaʼal taje?...

¿Kʼu yuʼun mu xa lokʼes tal aVivlia? Jkʼeltik kʼusi chal ta sventa ti kʼu yelan xuʼ tsjel jtalelaltik li kamigotaktike. Li tekstoe te oy ta 1 Corintios, kapitulo 15, versikulo 33. ¿Mi laj xa ata?... Xi ta xale: «Mu me xalajic ta loʼlael. Muc me loʼiluc ti oy jech chalique: “Me ta jchiʼintic li bochʼotic chopolique, chisoquesbutic li jlequil taleltique”», xi. Taje jaʼ tskʼan xal ti mi ta jchiʼintik chopol krixchanoetike, xuʼ chi jpasutik ta chopol krixchano ek. Pe, jech xtok li lekil amigoetike xuʼ ta skoltautik sventa lekuk jtalelaltik.

Pe mu me jchʼay ta joltik ti Buchʼu mas tsots skʼoplal ta jkuxlejaltike jaʼ li Jeovae. Mu jkʼan ta jsokestik ti kʼuyelan oyutik ta stojolale, ¿mi mu jechuk?... Jaʼ yuʼun skʼan chkakʼbetik yipal sventa jaʼuk noʼox kamigotik li buchʼutik skʼanojik li Diose.