AN KASANGKAYAN amo an mga tawo nga karuyag naton makaistorya ngan makaupod. Kondi importante an pagkaada husto nga klase hin kasangkayan. Ha hunahuna mo, hin-o an mahimo naton magin pinakaduok nga sangkay?— Oo, hi Jehova nga Dios.

Mahimo gud ba kita magin mga sangkay han Dios?— An Biblia nasiring nga hi Abraham, usa ka tawo nga nabuhi maiha na nga panahon an naglabay, ‘sangkay ni Jehova.’ (Jakobo 2:23) Maaram ka ba kon kay ano nga sangkay hiya ni Jehova?— An Biblia nabaton nga hi Abraham sinugot ha Dios. Sinugot hiya bisan kon makuri an iginpabuhat ha iya. Salit basi magin sangkay ni Jehova, kinahanglan buhaton naton an nakakalipay ha iya, sugad la han ginbuhat ni Abraham ngan sugad la han ginbubuhat pirme han Bantogan nga Magturutdo.​—Genesis 22:1-14; Juan 8:​28, 29; Hebreo 11:​8, 17-19.

 Hi Jesus nagsiring ha iya mga apostol: “Kamo amo an akon mga kasangkayan, kon iyo buhaton an akon iginsusugo ha iyo.” (Juan 15:14) Tungod kay an ngatanan nga ginsiring ni Jesus ha mga tawo nagtikang kan Jehova, karuyag ipasabot ni Jesus nga an iya kasangkayan amo an mga tawo nga nagbuhat han iginsugo han Dios ha ira. Oo, an ngatanan nga kasangkayan ni Jesus nahigugma ha Dios.

An iba han pinakaduok nga kasangkayan han Bantogan nga Magturutdo amo an iya mga apostol, nga an ira mga retrato makikita mo ha pahina 75 hini nga libro. Nagbiyahe hira kaupod niya ngan binulig ha iya ha pagsangyaw nga buruhaton. Ginamit ni Jesus an kadak-an han iya panahon nga kaupod ini nga kalalakin-an. Nangaon hira nga tarampo. Nag-iristorya hira mahitungod ha Dios nga tarampo. Ngan ira ginbuhat an iba nga mga butang nga tarampo. Kondi hi Jesus may-ada damu nga iba pa nga kasangkayan. Batasan na niya an pag-ukoy kaupod nira, ngan nagkaada hira malipayon nga mga panahon nga tarampo.

An usa nga pamilya nga karuyag ni Jesus nga makaupod nag-ukoy ha gutiay nga bungto han Betania, hirani la ha daku nga siyudad han Jerusalem.  Nahinunumdom ka ba ha ira?— Hira hi Maria ngan Marta ngan an ira bugto nga lalaki, hi Lasaro. Tinawag ni Jesus hi Lasaro nga iya sangkay. (Juan 11:​1, 5, 11) Hinigugma ni Jesus ini nga pamilya ngan nalipay hiya nga makaupod hira tungod kay hira nahigugma kan Jehova ngan nag-aalagad ha Iya.

Diri ini nangangahulogan nga hi Jesus diri buotan ha mga tawo nga diri nag-aalagad ha Dios. Buotan liwat hiya ha ira. Kinadto pa ngani hiya ha ira mga balay ngan kinaon kaupod nira. Ini an hinungdan nga an iba nga mga tawo nasiring nga hi Jesus “sangkay han mga manurukot hin buhis, ngan mga magpakasasala.” (Mateo 11:19) An totoo, hi Jesus napakadto ha mga balay hini nga mga tawo diri tungod kay naruyagan niya an paagi han ira pagkinabuhi. Binisita hiya ha ira basi isumat ha ira an mahitungod kan Jehova. Nangalimbasog hiya ha pagbulig ha ira nga magbag-o tikang ha ira maraot nga mga buhat ngan mag-alagad ha Dios.

Nahitabo ini usa ka adlaw ha siyudad han Jeriko. Naagi la hi Jesus hito nga siyudad han tikadto hiya ha Jerusalem. Damu an mga tawo, ngan usa hiton nga mga tawo amo hi Sakeo. Karuyag niya nga makita hi Jesus. Kondi habubo hi Sakeo, ngan diri hiya makakita tungod kay damu an mga tawo ha iya atubangan. Salit dinalagan hiya ha unhan han dalan ngan sinaka ha usa nga kahoy basi makita hin maopay hi Jesus kon umagi.

Han inabot hi Jesus hiton nga kahoy, nagkita hiya ha igbaw ngan nagsiring: ‘Dagmit ngan lusad, kay yana nga adlaw makadto ako ha imo balay.’ Kondi hi Sakeo usa ka riko nga tawo  nga nagbuhat hin maraot. Kay ano nga karuyag ni Jesus kumadto ha balay han sugad nga klase hin tawo?—

Diri tungod kay naruyagan ni Jesus an paagi han pagkinabuhi hiton nga tawo. Kinadto hiya ha iya balay basi isumat kan Sakeo an mahitungod ha Dios. Nakita niya kon paonan-o nangalimbasog gud iton nga tawo nga makita hiya. Salit maaram hiya nga hi Sakeo posible nga mamamati. Ini an maopay nga panahon ha pag-istorya ha iya mahitungod han ginsisiring han Dios nga paagi han pagkinabuhi nga sadang buhaton han mga tawo.

Salit, ano an nakikita naton nga nahitatabo yana?— Naruyagan ni Sakeo an mga katutdoan ni Jesus. Nasubo gud hiya nga ginlimbongan niya an mga tawo, ngan nagsaad hiya nga iya ibabalik an kwarta nga waray hiya katungod nga kuhaon. Katapos, nagin sumurunod hiya ni Jesus. Katapos la hito nga hi Jesus ngan Sakeo nagin magsangkay.​—Lukas 19:1-10.

Kon aton sundon an susbaranan han Bantogan nga Magturutdo, bibisitahon ba naton an mga tawo nga diri naton kasangkayan?— Oo. Kondi diri kita makadto ha ira balay tungod kay karuyag naton an paagi han ira pagkinabuhi. Ngan diri kita maupod ha ira ha pagbuhat hin sayop. Bibisitahon naton hira basi makaistorya naton hira mahitungod ha Dios.

 Kondi an aton duok nga kasangkayan amo an labi na nga karuyag naton makaupod. Basi magin husto nga klase hin kasangkayan, kinahanglan hira an klase nga naruruyagan han Dios. An iba bangin diri ngani nakilala kan Jehova. Kondi kon karuyag nira nga mahibaro mahitungod ha iya, mahimo naton buligan hira. Ngan kon umabot an panahon nga hira nahigugma na kan Jehova sugad han aton paghigugma ha iya, niyan mahimo na kita makigsangkay hin duok ha ira.

May-ada usa pa nga paagi han paghibaro kon an usa ka tawo mahimo magin maopay nga sangkay. Obserbahi an iya ginbubuhat. Nagbubuhat ba hiya hin diri maopay ha iba nga mga tawo ngan katapos nagtatawa tungod hito? Diri ito husto, diri ba?— Naghihimo ba hiya pirme hin problema para ha iya kalugaringon? Diri naton karuyag nga magkaproblema tungod kay kaupod naton hiya, diri ba?— O tinuyo ba nga nagbubuhat hiya hin maraot ngan katapos naghuhunahuna nga maabtik hiya tungod kay waray usa nga nahibaro han iya ginbuhat? Bisan kon waray hibaroi han iba an ginbuhat hiton nga tawo, nakita han Dios an iya ginbuhat, diri ba?— Ha hunahuna mo, an mga tawo ba nga nagbubuhat hin sugad nga mga butang maopay nga magin kasangkayan naton?—

Kay ano nga diri kuhaon an imo Biblia? Aton kitaon kon ano an ginsisiring hito mahitungod han kon paonan-o nakakaapekto ha aton kinabuhi an aton mga kaupod. An teksto makikita ha 1 Korinto kapitulo 15, bersikulo 33. Nakita mo na ba?— Ito mababasa: “Ayaw kamo palimbong: An magraot nga mga kaupod nakakadunot ha mga mag-opay nga batasan.” Nangangahulogan ini nga kon nakikig-upod kita ha magraot nga mga tawo, mahimo kita magin maraot. Ngan totoo liwat nga an mag-opay nga mga kaupod nabulig ha aton nga mapatubo an mag-opay nga mga batasan.

Diri gud naton hingalimtan nga hi Jehova an pinakaimportante nga Persona ha aton kinabuhi. Diri naton karuyag nga madaot an aton pakigsangkay ha iya, diri ba?— Tungod hito, kinahanglan siguruhon naton nga makikigsangkay la kita hadton nahigugma ha Dios.