LE AMIGOʼOBOʼ letiʼe máaxoʼob yéetel uts t-tʼaan k-tsikbal yéetel k-máansik tiempooʼ. Baʼaleʼ unaj k-kanik k-yéey maʼalob amigoʼob. ¿Máax a tuklik le maas maʼalob amigo jeʼel u páajtal u yantaltoʼonoʼ?... Beyoʼ, Jéeoba Dios.

² Baʼaleʼ ¿jach wa tu jaajil jeʼel u páajtal k-amigotik Dioseʼ?... Le Bibliaoʼ ku yaʼalikeʼ Abrahán, juntúul máak kuxlaj úuchjeakileʼ, kʼuch u beetuba «u amigo Jéeoba» (Santiago 2:23). ¿A wojel wa baʼaxten?... Le Bibliaoʼ ku yaʼalikeʼ Abrahaneʼ tu beetaj baʼax aʼalaʼabtiʼ tumen Dios, tak le baʼaxoʼob talamtak aʼalaʼabtiʼ ka u beetoʼ. Bey túunoʼ, utiaʼal k-amigotik Jéeobaeʼ, kʼaʼabéet k-beetik baʼax uts tu tʼaan, jeʼex úuchik u beetik Abrahán yéetel Jesús, le Maʼalob j-Kaʼansajoʼ (Génesis 22:1-14; Juan 8:28, 29; Hebreoʼob 11:8, 17-19).

 ³ Jesuseʼ tu yaʼalaj tiʼ u apostoloʼob: «Teʼexeʼ in amigoʼex wa ka beetkeʼex baʼax kin waʼalikteʼex» (Juan 15:14). Tumen tuláakal le baʼaxoʼob tu yaʼalaj Jesús tiʼ Jéeoba u taaloʼ, ku tsʼáaik k-naʼateʼ u amigoʼobeʼ letiʼe máaxoʼob beetik le baʼaxoʼob ku yaʼalik Diosoʼ. Tuláakal u amigoʼob kaʼacheʼ u yaabiltmoʼob Dios.

⁴ Jujuntúul tiʼ u amigoʼob Jesuseʼ u apostoloʼob, jeʼex a wilik teʼ táan juʼun 75. Letiʼobeʼ máanoʼob tu yéetel, tsʼoʼoleʼ tu yáantoʼob teʼ kʼaʼaytajoʼ. Jesuseʼ tu máansaj yaʼab tiempo tu yéeteloʼob. Múul jaanoʼob, tʼaanajoʼob tiʼ Dios, yéetel tu múul beetoʼob uláakʼ baʼaloʼob. Baʼaleʼ Jesuseʼ yaʼab uláakʼ u amigoʼob yaan kaʼachi. Yaan kʼiineʼ ku pʼáatal tu yotochoʼob utiaʼal u máansik tiempo tu yéeteloʼob.

⁵ Jesuseʼ uts tu tʼaan u pʼáatal kaʼach yiknal junpʼéel familia yaan tu chan kaajil Betania, yaan maʼ náach tiʼ u noj kaajil Jerusaleniʼ. ¿Kʼajaʼan wa tech máaxoʼobiʼ?... María, Marta yéetel Lázaro, u yíitsʼinoʼob. Jesuseʼ tu yaʼaleʼ u amigo Lázaro (Juan 11:1, 5, 11). Letiʼobeʼ  yaabiltaʼanoʼob tumen Jesús yéetel jatsʼuts u yilik u yantal tu yéeteloʼob, tumen letiʼobeʼ u yaabiltmoʼob Jéeoba yéetel ku beetkoʼob baʼax ku yaʼalik.

⁶ Baʼaleʼ lelaʼ maʼ u kʼáat u yaʼal wa maʼatech u yeʼesik u yutsil tiʼ le máaxoʼob maʼatech u meyajtikoʼob Diosoʼ. Baʼaxeʼ ku bin kaʼach tu yotochoʼob yéetel ku janal tu yéeteloʼob. Le oʼolal yaan máaxoʼob aʼaleʼ Jesuseʼ «ku biskuba yéetel le j-kʼam impuestoʼoboʼ bey xan yéetel j-kʼeban máakoʼob» (Mateo 11:19). Baʼaleʼ Jesuseʼ maʼ bin tu yotochoʼob tumen maʼalob u yilik baʼaxoʼob ku beetkoʼobiʼ. Ku xíimbaltikoʼob utiaʼal u kaʼansiktiʼob yoʼolal Jéeoba. Ku yáantkoʼob utiaʼal u kʼexik u kuxtaloʼob yéetel utiaʼal ka u meyajtoʼob Dios.

⁷ Lelaʼ bey úuchik le táan u kʼáat máan Jesús tu kaajil Jericó utiaʼal u bin Jerusalenoʼ. Juntúul máak ku kʼaabaʼtik Zaqueoeʼ u kʼáat kaʼach u yil Jesús, baʼaleʼ maʼ tu páajtal tumen ich yaʼab máakoʼob ku bin, tsʼoʼoleʼ letiʼeʼ kabal u baakel. Ka bin u yáalkab táanil utiaʼal u naʼakal tu kʼab junkúul cheʼ utiaʼal u yilik Jesús ken máanak.

⁸ Ka kʼuch Jesús yiknal le cheʼoʼ, tu líiʼsaj u yicheʼ ka tu yaʼalaj: «Éemen, tumen bejlaʼeʼ yaan in pʼáatal ta wotoch». Baʼaleʼ Zaqueoeʼ  juntúul ayikʼal máak u beetmaj baʼaloʼob kʼaastak. ¿Baʼaxten taak kaʼach u bin Jesús tu yotoch juntúul máak beyaʼ?...

⁹ Maʼ tumen wa maʼalob u yilik Jesús le baʼaxoʼob ku beetik kaʼachoʼ, baʼaxeʼ tumen u kʼáat u kaʼanstiʼ baʼax uts tu tʼaan Dios. Tu yilaj baʼax tu beetaj Zaqueo utiaʼal u páajtal u yilik, bey úuchik u tsʼáaik cuenta u kʼáat u yuʼub baʼax ku yaʼalikoʼ. Le oʼolal tu yilaj yaan tuʼux u tsikbaltiktiʼ bix u kʼáat Dios ka kuxlak máak.

¹⁰ ¿Baʼax úuch jeʼex k-ilik teʼ dibujooʼ?... Zaqueoeʼ utschaj tu yich le baʼaxoʼob tu kaʼansaj Jesusoʼ. Arrepentirnaj úuchik u yoklik le máakoʼoboʼ ka tu yaʼalaj yaan u sutik le bajux u chʼaʼamaj tiʼoboʼ. Ka tsʼoʼokeʼ tu beetuba disipuloil tiʼ Jesús, bey úuchik u kʼuchul u beetuba amigoil tiʼ Jesusoʼ (Lucas 19:1-10).

¹¹ Wa k-beetik jeʼex Jesús, le Maʼalob j-Kaʼansajoʼ, ¿yaan wa k-xíimbaltik tak le máaxoʼob maʼ k-amigoʼoboʼ?... Yaan. Baʼaleʼ maʼ ken k-bin tu yotochoʼob chéen tumen maʼalob k-ilik baʼaxoʼob ku beetkoʼob mix utiaʼal k-beetik baʼaloʼob kʼaastak tu yéeteloʼob.  Baʼaxeʼ yaan k-xíimbaltikoʼob utiaʼal k-kaʼansiktiʼob baʼax u kʼáat Dios.

¹² Le maʼalob amigoʼoboʼ letiʼe máaxoʼob yéetel maas uts t-tʼaan k-máansik tiempooʼ. Baʼaleʼ utiaʼal k-ilik wa maʼalob amigoʼobeʼ kʼaʼabéet k-ilik wa ku beetkoʼob baʼax ku yaʼalik Dios. Maʼ xaaneʼ, yanoʼobeʼ maʼ u yojloʼob máax Jéeobaiʼ, baʼaleʼ wa u kʼáat u kʼaj óoltoʼobeʼ, jeʼel u páajtal k-áantkoʼobeʼ. Ken u yaabiltoʼob Jéeoba xaneʼ, jeʼel u páajtal k-amigotikoʼobeʼ.

¹³ Yaan uláakʼ baʼax jeʼel u yáantkoʼob k-il wa maʼalob amigo wa máaxeʼ. Ilawil baʼaxoʼob ku beetik. ¿Uts tu tʼaan wa u beetik kʼaas tiʼ u maasil? ¿Máasaʼ leloʼ maʼ maʼalobiʼ?... ¿Mantatsʼ wa ku yoksikuba tiʼ talamiloʼob? ¿Máasaʼ maʼ k-kʼáat ka yanaktoʼon talamil ikil k-bisikba tu yéeteliʼ?... ¿Ku beetik wa baʼaloʼob kʼaastak yéetel ku tuklik jach yaan u naʼat tumen maʼatech u tsʼaʼabal cuenta baʼax ku beetik? ¿Máasaʼ kex mix máak ilkeʼ, Dioseʼ ku yilik?... A tuklikeʼ, ¿unaj wa k-amigotik le máaxoʼob beetik baʼaloʼob beyoʼ?...

¹⁴ Taas a Biblia utiaʼal ka k-xoke. Koʼox ilik baʼax ku yaʼalik yoʼolal le baʼax jeʼel u péeksikoʼon k-beet le máaxoʼob yéetel k-bisikbaoʼ. Kaxt Yáax tiʼ Corintoiloʼob, capítulo 15, versículo 33. ¿Ta kaxtaj?... Ku yaʼalik: «Maʼ a tuskabaʼex. U biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak». Leloʼ ku yeʼesikeʼ wa k-bisikba yéetel máaxoʼob beetik baʼaloʼob kʼaastakeʼ, jeʼel u kʼastal baʼaxoʼob k-beetkeʼ. Baʼaleʼ wa k-bisikba yéetel máaxoʼob beetik baʼaxoʼob maʼalobtakeʼ jeʼel u yáantkoʼoneʼ.

¹⁵ Maʼ u tuʼubultoʼoneʼ, le Máax maas kʼaʼanaʼan ichil k-kuxtaloʼ Jéeoba. Maʼ k-kʼáat ka xuʼuluk k-bisikba tu yéeteliʼ, ¿máasaʼ?... Le oʼolal unaj k-amigotik chéen le máaxoʼob yaabiltmil Diosoʼ.