OU KONN sa lapriyer ki Zezi ti ansenny son bann disip?— Si ou pa konnen, annou lir li ansanm dan Labib, dan Matye 6:9-13. Sa lapriyer, ki bokou dimoun i apel Notreper, i dir: “Ki ou Renny i ganny etabli.” Ou konnen kisisa Renny oubyen Rwayonm Bondye?—

Serten pei i ganny dirize par en lerwa e serten par en prezidan. Si en lerwa ki diriz en pei, son gouvernman i ganny apele en rwayonm. Be ki mannyer i apele sa enn ki diriz gouvernman Bondye?— Lerwa. Sanmenm gouvernman Bondye i apel Rwayonm.

Ou konnen lekel ki Zeova in swazir pour vin Lerwa dan Son gouvernman?— Son Garson, Zezi Kri. Akoz napa pli bon dirizan  ki Zezi?— Akoz Zezi i vreman kontan son Papa, Zeova. Alor, i toultan fer sa ki byen.

En bon pe letan avan Zezi ti ne Betleenm, Labib ti koz lo son nesans e dir ki Bondye pou swazir li konman Dirizan. Sa i dan Izai 9:6, 7, kot i dir: ‘En zanfan in ne pour nou, en garson in ganny donnen avek nou. Gouvernman pou lo son zepol e i pou ganny apele . . . Prens Lape. Pou napa en lafen avek son gouvernman e avek lape.’—King James Version.

Ou konnen akoz Dirizan Rwayonm Bondye i ganny apele “Prens” la?— Akoz en prens i garson en lerwa. E Zezi i Garson sa pli Gran Lerwa, Zeova. Me Zeova in osi fer Zezi vin Lerwa dan Son rwayonm, ki pou diriz later pour mil an. (Revelasyon 20:6) Apre ki Zezi ti batize, i ti “konmans prese an dizan ‘Sanz zot lavi, akoz Rwayonm Lesyel i pros!’”—Matye 4:17.

Akoz Zezi ti dir Rwayonm lesyel i pros?— Akoz sa Lerwa ki ti pou dirize dan lesyel, ti la avek zot! Sanmenm Zezi ti dir bann dimoun: “Rwayonm Bondye i deza parmi zot.” (Lik 17:21) Pa ou ti pou kontan si sa Lerwa ki Zeova in swazir ti lanmenm obor ou, ki menm ou ti pou kapab tous li?—

Be dir mwan, ki travay enportan Zezi ti vin fer lo later?— Zezi li menm ti reponn sa kestyon, ler i ti dir: ‘Mon bezwen anons Bonn Nouvel konsernan Rwayonm Bondye dan bann lezot lavil osi, parski se pour sa, ki Bondye in anvoy mwan.’ (Lik 4:43) Zezi ti konnen i pa ti pou kapab fer sa travay zis li tousel. Ki i ti fer alor?—

 Zezi ti anmenn en pe dimoun avek li e montre zot ki mannyer pour prese. I ti konmans avek son 12 zapot. (Matye 10:5, 7) Me eski Zezi ti montre zis son bann zapot prese? Non, Labib i dir ki i ti osi montre bokou lezot dimoun konman pour prese. En zour, i ti anvoy 70 lezot disip devan li, de par de. Ki zot ti al dir bann dimoun?— Zezi ti dir: “Dir zot: ‘Rwayonm Bondye in ariv pre avek zot.’” (Lik 10:9) Dan sa fason, bann dimoun ti aprann konsernan gouvernman Bondye.

Lontan bann nouvo lerwa Izrael ti antre dan lavil lo en pti bourik pour tou dimoun vwar zot. Zezi ti fer sa ler i ti vizit Zerizalenm pour dernyen fwa, akoz li ki ti pou vin Lerwa dan Rwayonm Bondye. Me eski bann dimoun ti anvi i vin Lerwa?—

Anmezir ki i ti antre dan lavil, laplipar dimoun ti tal zot lenz ater lo semen devan li. Lezot dimoun ti koup bann brans dibwa e tal ater lo semen. Zot ti fer sa pour montre ki zot anvi Zezi vin zot Lerwa. Zot ti kriye: “Ki Bondye i beni sa Lerwa ki vin o non Senyer!” Me pa tou dimoun ki ti kontan. Serten sef larelizyon ti menm dir Zezi, ‘Dir ou bann disip ferm zot labous.’—Lik 19:28-40.

Senk zour plitar, Zezi ti ganny arete e anmennen dan pale pour gouverner Pons Pilat ziz li. Bann lennmi Zezi ti dir ki Zezi pe dir i en lerwa e ki i kont gouvernman Romen. Alors Pilat ti demann Zezi si sa i vre. Zezi ti fer vwar ki i pa pe sey pran pouvwar. I ti dir Pilat: “Mon Rwayonm pa sorti lo sa later.”—Zan 18:36.

Apre Pilat ti sorti e dir bann dimoun ki i pa vwar nanryen mal avek Zezi. Me bann dimoun ti nepli anvi Zezi vin zot Lerwa. Zot pa ni ti anvi i ganny large osi. (Zan 18:37-40) Pilat ti koz  ankor avek Zezi. Apre sa, i ti asire ki Zezi pa ti’n fer nanryen mal. I ti anmenn li deor pour en dernyen fwa e dir: “La zot lerwa.” Me bann dimoun ti kriye: “Touy li! Touy li!”

Pilat ti demande: ‘Eski mon a touy zot lerwa?’ Sef pret ti reponn: “Nou napa okenn lot lerwa ki Sezar.” Ou kapab krwar sa! Sa bann move pret ti’n fer sa bann dimoun vir kont Zezi!—Zan 19:1-16.

I parey ozordi. Laplipar dimoun pa vreman anvi Zezi vin zot Lerwa. Petet zot dir zot krwar dan Bondye, me zot pa anvi Bondye oubyen  Kris dir zot ki pour fer. Zot anvi zot prop gouvernman isi lo later.

Be nou ki konn Rwayonm Bondye e tou sa bann bon keksoz ki i pou fer, ki mannyer nou santi anver Bondye?— Nou kontan li, pa i vre?— Be ki mannyer nou kapab montre Bondye ki nou kontan li e ki nou anvi son Rwayonm diriz nou?—

Nou kapab montre Bondye ki mannyer nou santi par swiv legzanp Zezi. E ki Zezi ti fer pour montre ki i kontan Zeova?— Zezi li menm ti dir, “Mon touzour fer sa ki fer li plezir.” (Zan 8:29) Wi, Zezi ti vin lo later ‘pour fer sa ki Bondye ti oule i fer’ e pour “fini travay ki i’n donn” li. (Ebre 10:7; Zan 4:34) Annou vwar ki Zezi ti fer avan i ti konmans prese.

Zezi ti al vwar Zan-Batis kot Larivyer Zourden. Zot ti desann dan delo e Zan-Batis ti plonz Zezi dan delo e apre relev li. Ou konnen akoz Zan-Batis ti batiz Zezi?—

Zezi ki ti demann li pour batiz li. Be ki mannyer nou konnen Bondye ti anvi Zezi batize?— Nou konn sa akoz ler  Zezi ti sorti dan delo, i ti tann lavwa Bondye dan lesyel dir: “Oumenm mon Garson byenneme, ou donn mwan bokou lazwa.” Bondye ti menm anvoy son lespri sen lo Zezi dan laform en kolonm. Par son batenm, Zezi ti montre ki i anvi servi Zeova son lavi antye, wi pour touzour.—Mark 1:9-11.

Ou ou ankor pti. Me ki ou pou fer ler ou pli gran?— Ou pou batize parey Zezi?— Ou devret fer parey li akoz Labib i dir i’n kit ‘en legzanp pour ou swiv.’ (1 Pyer 2:21) Ler ou batize, ou pou montre ki ou vreman anvi ganny dirize par Rwayonm Bondye. Me nou pa zis bezwen batize.

Nou bezwen obeir tou sa ki Zezi in ansennyen. Par egzanp, Zezi ti dir nou pa devret “fer parti lemonn.” Eski nou pe obeir li si nou fer bann keksoz ki dimoun dan lemonn i fer? Zezi ek son bann zapot pa ti fer sa bann keksoz. (Zan 17:14) Okontrer, ki zot ti fer?— Zot ti koz avek lezot dimoun lo Rwayonm Bondye. Sa ti travay pli enportan dan zot lavi. Eski nou kapab fer sa nou osi?— Wi. Nou pou fer li si nou vreman serye ler nou demann Bondye dan lapriyer pour son Rwayonm vini.