Ibuot 45

Nso Idi Obio Ubọn̄ Abasi? Nte Ikpowụtde ke Nnyịn Imoyom Enye

NTE afo ọmọfiọk akam oro Jesus ekekpepde mme anditiene enye?— Edieke afo mûfiọkke, nnyịn imekeme ndikot enye ọtọkiet ke Bible, ke Matthew 6:9-13. Akam oro, emi ediwak owo ẹkotde Akam Ọbọn̄, esịne mme ikọ emi: ‘Yak Obio Ubọn̄ Fo edi.’ Ndi afo ọmọfiọk se Obio Ubọn̄ Abasi edide?—

Ọfọn, obio ubọn̄ edi orụk ukara. Ndusụk idụt ẹnyene orụk ukara emi ẹkotde andikara mmọ adaibuot ukara, edi ẹkot ukara emi Abasi ọn̄wọn̄ọde Obio Ubọn̄ ẹnyụn̄ ẹkot andikara Edidem.

Nte afo ọmọfiọk owo emi Jehovah Abasi emekde ndidi Edidem ke ukara Esie?— Eyen esie, Jesus Christ. Ntak emi enye ọfọnde akan andikara ekededi oro mme owo ẹmekde?— Koro Jesus enen̄ede ama Ete esie, Jehovah. Ntre enye esinam se inende kpukpru ini.

Anyan ini mbemiso Jesus akamanade ke Bethlehem, Bible ama  etịn̄ aban̄a emana esie onyụn̄ ọdọhọ nte ke enye ayakabade edi Andikara emi Abasi emekde. Yak ikot emi ke Isaiah 9:6, 7. Enye ọdọhọ ete: ‘Eyen amana ọnọ nnyịn, ẹnọ nnyịn eyen-eren: ubọn̄ onyụn̄ odoro enye ke afara; ẹnyụn̄ ẹsio enye enyịn̄, Ọbọn̄ Emem. Ubọn̄ esie ye emem ididopke ndikọri.’

Nte afo ọmọfiọk ntak emi ẹkotde Andikara Obio Ubọn̄ Abasi “Ọbọn̄”?— Ọfọn, ọbọn̄ emi edi eyen edidem. Ndien Jesus edi Eyen Akwa Edidem, kpa Jehovah. Edi Jehovah n̄ko anam Jesus edi Edidem ke ukara Esie, emi edikarade isọn̄ ke tọsịn isua. (Ediyarade 20:6) Ke Jesus ama akana baptism, enye ama ọtọn̄ọ “ndikwọrọ, ndinyụn̄ ndọhọ, ete, Ẹkabade esịt; koro Ubọn̄ Heaven ke ekpere.”—Matthew 4:17.

Afo ekere ke nso ikanam Jesus ọdọhọ ke Obio Ubọn̄ ekpere?— Koro Edidem emi edikarade ke heaven nte ini akade, okodu do ye mmọ! Ntak edi oro Jesus ọkọdọhọde mme owo ete: “Ubọn̄ Abasi odu ke otu mbufo.” (Luke 17:21) Ndi afo ukpumaha Edidem emi Jehovah emekde enen̄ede ekpere fi tutu afo akam ekeme nditụk enye?—

Ntre tịn̄ nọ mi, nso akpan utom ke Jesus ekedi isọn̄ ndinam?— Jesus ama ọbọrọ mbụme oro, ọdọhọde ete: ‘Mmenyene ndikwọrọ eti mbụk Ubọn̄ Abasi nnọ mme obio en̄wen n̄ko: koro ẹkedọn̄ Mi ẹte ndinam oro.’ (Luke 4:43) Jesus ama ọfiọk ete ke imọ ikemeke ndikwọrọ ikọ ikpọn̄. Ntre, afo ekere ke enye akanam nso?—

Jesus ama esida mme owo asan̄a onyụn̄ owụt mmọ nte ẹkemede ndinam utom ukwọrọikọ. Akpa mbon oro enye ọkọnọde ukpep ẹkedi owo 12 emi enye ekemekde nte mme apostle. (Matthew 10:5, 7) Edi nte Jesus ekekpep mme apostle esie kpọt ndinam utom emi? Baba, Bible ọdọhọ ke Jesus n̄ko ama  ekpep ediwak mbon en̄wen ndikwọrọ ikọ. Nte ini akakade, enye ama osio mbet 70 efen ọdọn̄ ẹsan̄a iba iba. Ndien nso ke mmọ ẹkekpep mme owo?— Jesus ọkọdọhọ ete: “Ẹsian mmọ ẹte, Ubọn̄ Abasi ama asan̄a ekpere mbufo.” (Luke 10:9) Ke usụn̄ emi mme owo ẹma ẹkpep ẹban̄a ukara Abasi.

Anyan ini ko ke Israel, mbufa ndidem ẹma ẹsiwat enan̄ mbakara ẹdụk obio man mme owo ẹkụt mmọ. Idahaemi, emi edi se Jesus anamde nte enye akade Jerusalem akpatre ini. Kamse, Jesus ọmọn̄ edi Andikara Obio Ubọn̄ Abasi. Nte mme owo ẹyom enye edi Edidem?—

Ọfọn, nte enye awatde aka iso, ediwak owo ẹtọn̄ọ ndibri ọfọn̄ mmọ ke ọkpọusụn̄ ke iso esie. Mbon eken ẹsịbe n̄kọk eto ẹbri ke ọkpọusụn̄. Ke ndinam emi mmọ ẹwụt ke mmimọ imoyom Jesus edi Edidem mmimọ. Mmọ ẹfiori ẹte: “Itoro enyene Edidem emi edide ke enyịn̄ Jehovah.” Edi idịghe kpukpru owo ẹnem esịt. Ke akpanikọ, ndusụk mme adaiso ido ukpono ẹkam ẹdọhọ Jesus ẹte, ‘Dọhọ mbet fo ẹkịbi inua.’—Luke 19:28-40.

Ẹmụm Jesus ke usen ition ẹbede ẹnyụn̄ ẹmen enye ẹka ufọkubọn̄ edidem man ada ke iso Pontius Pilate. Mme asua Jesus ẹdọhọ ke Jesus ọdọhọ ke imọ idi edidem ye nte ke enye ọbiọn̄ọ ukara Rome. Ntre Pilate obụp Jesus aban̄a emi. Jesus ọdọhọ nte ke imọ idomoke ndibọ ukara nda. Enye ọdọhọ Pilate ete: “Obio Ubọn̄ Mi idịghe eke ererimbot emi.”—John 18:36.

Ekem Pilate ọwọrọ edidọhọ mme owo ete ke imọ ikwe ndudue ndomokiet ke idem Jesus. Edi idahaemi mme owo iyomke Jesus edi Edidem mmọ. Mmọ iyomke ẹsana enye ẹyak. (John 18:37-40) Ke ama akafiak etịn̄ ikọ ye Jesus, Pilate etịm ọfiọk ete ke enye inamke idiọkn̄kpọ ndomokiet. Ntre, ke ama ekemen Jesus ọwọrọ edi an̄wa ke akpatre ini, Pilate ọdọhọ ete: “Sese, Edidem mbufo do.” Edi mme owo ẹfiori ẹte: ‘Men Enye fep, men Enye fep, wot Enye ke eto.’

 Pilate obụp ete: ‘Nte n̄wot Edidem mbufo ke eto?’ Ikpọ oku ẹbọrọ ẹte: “Nnyịn inyeneke edidem efen ibe Caesar.” Didie ke afo ese edinam mmọ? Ndiọi oku oro ẹma ẹwọn̄ọde mme owo ẹkpọn̄ Jesus!—John 19:1-16.

Mfịn n̄kpọ ẹtie nte ẹketiede ke ini oro. Ata ediwak owo inen̄ekede iyom Jesus edi Edidem mmọ. Mmọ ẹkeme ndidọhọ ke mmimọ imenịm Abasi ke akpanikọ, edi mmọ iyomke Abasi m̀mê Christ asian mmọ se mmọ ẹkpenamde. Mmọ ẹyom ukara mmọ mi ke isọn̄.

Nso kaban̄a nnyịn? Ke ini nnyịn ikpepde n̄kpọ  iban̄a Obio Ubọn̄ Abasi ye kpukpru utịbe n̄kpọ oro enye edinamde, oro esinam nnyịn ikere nso iban̄a Abasi?— Nnyịn imama enye, ndi nnyịn imaha?— Didie ndien ke nnyịn ikeme ndiwụt Abasi nte ke nnyịn imama enye ye nte ke imoyom Obio Ubọn̄ esie akara nnyịn?—

Nnyịn imekeme ndiwụt Abasi nte etiede nnyịn ke idem ebe ke nditiene uwụtn̄kpọ Jesus. Ndien nso ke Jesus akanam ndiwụt nte ke imọ imama Jehovah?— Jesus ama anam an̄wan̄a ete: ‘Ami nnanam se inemde Enye esịt kpukpru ini.’ (John 8:29) Ih, Jesus ekedi isọn̄ ‘ndinam uduak Abasi’ nnyụn̄ “mma utom Esie.” (Mme Hebrew 10:7; John 4:34) Kere ban̄a se Jesus akanamde mbemiso enye ọkọtọn̄ọde utom ukwọrọikọ esie.

Jesus ama aka ebịne John Andinịm owo Baptism ke Akpa Jordan. Ke mmọ ẹma ẹkesụhọde ẹdụk mmọn̄, John obụk Jesus ofụri ofụri ke mmọn̄ ndien ekem afiak emenede enye osio. Nte afo ọmọfiọk ntak emi John ekenịmde Jesus baptism?—

Jesus ọkọdọhọ John enịm imọ baptism. Edi didie ke nnyịn ifiọk ite ke Abasi okoyom Jesus ana baptism?— Nnyịn ifiọk emi koro ke ini Jesus ọkọwọrọde ke mmọn̄, enye ama okop uyo Abasi otode heaven ete: “Afo edi edima Eyen mi; mmenem esịt eti-eti ye Afo.” Abasi ama akam  ọdọn̄ edisana spirit esie ke uduot ibiom edidoro Jesus ke idem. Ntre ke ndina baptism, Jesus okowụt ke imọ iyom ndinam n̄kpọ Jehovah ke ofụri uwem imọ, ih, ke nsinsi.—Mark 1:9-11.

Idahaemi afo osụk edi eyenọwọn̄. Edi nso ke afo edinam nte ini akade?— Ndi afo eyetie nte Jesus onyụn̄ ana baptism?— Afo ekpenyene ndikpebe enye, koro Bible ọdọhọ ke enye ama ọkpọn̄ ‘uwụtn̄kpọ ọnọ fi, ete, afo ekpetiene asan̄a ke nde ikpat Imọ.’ (1 Peter 2:21) Ke ini afo anade baptism, afo ediwụt nte ke imọ imenen̄ede iyom Obio Ubọn̄ Abasi akara imọ. Edi ikụreke ke ndikam nna baptism.

Oyom nnyịn inam kpukpru n̄kpọ oro Jesus ekekpepde. Jesus ọkọdọhọ ke nnyịn ikpenyeneke ‘ndidi eke ererimbot.’ Ndi nnyịn iyosụk ibuot inọ enye edieke nnyịn itienede ibuana ke mme mbubehe ererimbot? Jesus ye mme apostle esie ikabuanake ke mme utọ n̄kpọ oro. (John 17:14) Utu ke oro, nso ke mmọ ẹkenam?— Mmọ ẹketịn̄ ẹnọ mbon en̄wen ẹban̄a Obio Ubọn̄ Abasi. Oro ekedi ata akpan utom ke uwem mmọ. Nte nnyịn imekeme ndinam oro n̄ko?— Ih, nnyịn iyanam ukem utom oro edieke nnyịn ibuọtde idem ke akam oro nnyịn isibọn̄de iben̄e Obio Ubọn̄ Abasi edi.

Mbọk se mme itie N̄wed Abasi en̄wen emi ẹsiande nnyịn se ikemede ndinam man iwụt ke imoyom Obio Ubọn̄ Abasi: Matthew 6:24-33; 24:14; 1 John 2:15-17; ye 1 John 5:3.

[Mme ndise ke page 232, 233]

Nso utom ke Jesus ekedi ndinam ke isọn̄?

[Ndise ke page 235]

Ntak emi mme owo mîyomke Jesus edi Edidem aba?

[Ndise ke page 236]

Ntak emi Jesus akanade baptism, ndien didie ke Abasi okowụt ke imọ imenyịme?

[Mme ndise ke page 237]

M̀mọ̀n̄ ke nnyịn ikeme nditịn̄ nnọ mbon en̄wen mban̄a Obio Ubọn̄ Abasi?