¿REIKUAÁPA pe ñemboʼe Jesús omboʼe vaʼekue idisipulokuérape?... Ndereikuaáiramo, ikatu jalee la Bíbliape. Jatopáta Mateo kapítulo 6, versíkulo 9 guive 13 peve. Ko ñemboʼépe heta hénte ohenói padrenuéstro, ha peteĩ pártepe heʼi: “Tou ne Rréino”. ¿Ndépa reikuaa mbaʼépa Ñandejára Rréino?...

La Bíbliape pe ñeʼẽ Rréino heʼise goviérno. Koʼág̃arupi oĩ opaichagua goviérno. Heta tetãme pe ogovernávape oñehenói presidénte. Péro pe ogovernátava Ñandejára Rréinope haʼe hína peteĩ Rréi.

¿Reikuaápa mávapepa Jehová oiporavo ogoverna hag̃ua Irréinope?... Itaʼýra Jesucrístope. ¿Mbaʼérepa jaʼekuaa Jesús ogoverna  porãvetaha yvyporakuéragui?... Jesús ningo ohayhu Itúva Jehovápe ha upévare siémpre ojapo iporãva.

Heta tiémpo Jesús onase mboyve Belénpe, la Biblia heʼíma vaʼekue haʼe outaha ko yvy ape ári ha Ñandejára oiporavoha chupe ogoverna hag̃ua. Jahechami upéva Isaías 9:6, 7-pe (NM). Upépe heʼi: ‘Onase peteĩ mitã, chupe oñemeʼẽta podér ogoverna hag̃ua. Ha oñehenóita chupe Governánte oguerúva pyʼaguapy. Ogovernáta opa árare ha pyʼaguapy ndopamoʼãi’.

Jehová ningo pe Rréi omanda guasuvéva ha haʼe omoĩ itaʼýrape ‘ogoverna’ hag̃ua Irréinope. Upéicharõ Jesús hína pe ogovernátava mil áño aja yvága guive ko yvy ape ári (Apocalipsis 20:6). Ojevautisa rire, Jesús “oñepyrũ opredika ha heʼi: ‘Peñarrepentíke. Cháke pe Rréino yvagapegua hiʼag̃uimbaitéma’” (Mateo 4:17).

¿Mbaʼérepa Jesús heʼi vaʼekue umi héntepe pe Rréino hiʼag̃uimbaitemaha?... Oĩ rupi hendivekuéra pe ogovernátava Ñandejára Rréinope. Upévare Jesús heʼi umi héntepe: “Ñandejára Rréino oĩ hína pende apytépe” (Lucas 17:21). ¿Revyʼánepa reñeʼẽramo pe governánte Jehová voi oiporavo vaʼekue ndive?...

Eremína chéve, ¿mbaʼe tembiapo iñimportántevapa ou vaʼekue ojapo Jesús ko yvy ape ári?... Haʼe voi heʼi: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore. Upearã ningo añembou vaʼekue” (Lucas 4:43). Péro haʼe oikuaa ndaikatumoʼãiha ojapopa haʼeño upe tembiapo. Upévare, ¿mbaʼépa nde ere ojapo hague?...

Jesús omboʼe avei ótrope ojapo hag̃ua ko tembiapo. Ñepyrũrã ombokatupyry umi 12 apóstol oiporavo vaʼekuépe (Mateo  10:5, 7). Péro, ¿chupekuéra añóntepa omboʼe? Nahániri, la Biblia heʼi ombokatupyry hague avei hetavépe ojapo hag̃ua upe tembiapo. Haʼe oiporavo seténtape ha omondo mokõi mokõime. ¿Mbaʼépa omboʼe hikuái umi héntepe?... Jesús heʼi vaʼekue: “Peje meme chupekuéra: ‘Ñandejára Rréino hiʼag̃uimbaitéma’” (Lucas 10:9). Upéicha rupi umi hénte oaprende Ñandejára goviérnogui.

Yma ningo Israélpe umi oñepyrũtava ogoverna oikémi vaʼerã pe siudápe peteĩ vúrro ári umi hénte ohecha hag̃ua chupe. Upéicha ojapo vaʼekue avei Jesús ohórõ guare última ves Jerusalénpe. Jaikuaaháicha, Jesúspe ojeporavo ogoverna hag̃ua Ñandejára Rréinope, péro ¿oipotápa umi hénte haʼe ogoverna?...

Jesús oikévo pe siudápe, heta hénte omoĩ ijao ha palméra rogue pe tapére orresivi hag̃ua chupe. Péicha haʼekuéra ohechauka oipotaha Jesús ogoverna chupekuéra. Umi hénte osapukaijoa ha heʼi: ‘¡Tojehovasa pe governánte oúva Jehová rérape!’. Péro oĩ vaʼekue nopensáiva upéicha. Por ehémplo, umi omoakãva rrelihión ndochaʼéi Jesús rehe ha heʼi chupe: ‘Ere nde disipulokuérape tokirirĩ’ (Lucas 19:28-40).

Cinco día haguépe Jesús enemigokuéra ojagarra chupe ha ogueraha governadór Poncio Pilato rendápe. Haʼekuéra heʼi Pilátope Jesús opuʼãha Roma goviérnore ha heʼi hague ogovernataha. Upémarõ Pilato oñeʼẽ hendive. Jesús omombeʼu porã chupe ndoipeʼaseiha chugui igoviérno. Haʼe heʼi Pilátope: “Che Rréino ndahaʼéi ko mundopegua” (Juan 18:36).

Upéi Pilato heʼi umi héntepe Jesús ndojapói hague mbaʼeve ivaíva. Péro haʼekuéra ndoipotái Jesús ogoverna ni ndoipotái ojepoi chugui (Juan 18:37-40). Upémarõ Pilato oñeʼẽ jey Jesús ndive ha ohechakuaa japu memeha la ojeʼéva hese. Upévare oguenohẽ  chupe okápe ha heʼi: “¡Pemañami! ¡Pende Rréi!”. Péro umi hénte osapukaijoa: “¡Ejuka chupe! ¡Ejuka chupe! ¡Emosaingo yvyráre!”.

Pilato oporandu jey: “¿Pende Rréipe piko peipota amosaingo yvyráre?”. Ha umi saserdóte heʼi: “César añoite la ore rréi”. Epensamíntena, umi saserdóte aña la omboligáva umi héntepe oñemoĩ hag̃ua Jesús kóntrape (Juan 19:1-16).

Koʼág̃arupi avei heta hénte ndoipotái Jesús ogoverna chupekuéra. Ikatu heʼi ojeroviaha Ñandejárare péro ndoipotái ni Ñandejára ni Cristo  heʼi chupekuéra mbaʼépa ojapo vaʼerã. Haʼekuérante oiporavose igovernanterã.

¿Ha ñande? Jaikuaávo mbaʼépa hína Ñandejára Rréino ha umi mbaʼe porã ojapótava, ¿mbaʼépa ñañandu?... Jahayhuve Ñandejárape, ¿ajépa?... Péro, ¿mbaʼéichapa ikatu jahechauka jahayhuha chupe ha jaipotaha Irréino ñanegoverna?...

Upearã jajapo vaʼerã umi mbaʼe Jesús ojapo vaʼekue. ¿Mbaʼépa ojapo haʼe ohechauka hag̃ua ohayhuha Jehovápe?... Jesús heʼi vaʼekue: ‘Che akóinte ajapo umi mbaʼe haʼe oguerohorýva’ (Juan 8:29). Jesús ou vaʼekue ko yvy ape ári ‘ojapo hag̃ua Ñandejára rembipota’ ha ‘omog̃uahẽ hag̃ua huʼãme pe tembiapo’ Itúva omeʼẽva chupe (Hebreos 10:7; Juan 4:34). Péro jahechamína mbaʼépa ojapo vaʼekue oñepyrũ mboyve oporomboʼe opárupi.

Jesús oho Juan el Bautista rendápe rrío Jordánpe. Upépe haʼe omoñapymi Jesúspe ha oguenohẽ jey, péicha ovautisa chupe. ¿Ndépa reikuaa mbaʼérepa Juan ovautisa Jesúspe?...

Jesús ojerure rupi chupe. Péro, ¿mbaʼéichapa jaikuaa Jehová oipota hague Jesús ojevautisa?... Osẽrõ guare pe ýgui, oñehendu  yvágagui Ñandejára heʼiha: “Nde hína che Raʼy ahayhuetéva ha aguerohorýva”. Ha upéi Ñandejára ombou hiʼári ijespíritu sánto peteĩ palómaicha. Ojevautisárõ guare, Jesús ohechauka iñeʼẽrenduseha Itúvape opa ára g̃uarã (Marcos 1:9-11).

Nde ningo nemitã gueteri, péro ¿mbaʼépa rejapóta ndetuichave vove?... ¿Rejapótapa Jesús ojapo haguéicha ha rejevautisáta avei?... Iporãta rejapóramo upéva, la Biblia heʼi voi Jesús ‘oheja hague iñehémplo jaguata hag̃ua hekoitépe ipyporére’ (1 Pedro 2:21). Rejevautisáramo rehechaukáta reipotaha Ñandejára Rréino negoverna. Péro ndahaʼéi hína jajevautisa ha ja ovalémava.

Tekotevẽ avei jajapo umi mbaʼe Jesús omboʼe vaʼekue. Haʼe heʼi ndovaleiha ‘jajeheʼa ko múndore’. ¿Iporãtapa upéicharõ jaiko umi hénte oikoháicha ko múndope? Jesús ha ijapostolkuéra ndoikói vaʼekue upéicha (Juan 17:14). ¿Mbaʼépa ojapo meme vaʼekue haʼekuéra?... Omboʼe hapichakuérape mbaʼépa Ñandejára Rréino. Upe tembiapo la iñimportanteve vaʼekue chupekuéra g̃uarã. ¿Ikatúpa ñande avei jahechauka ñamombaʼeha Ñandejára Rréino?... Ikatu, ha upéva jajapóta jajeruréramo ñande pyʼaite guive Ñandejárape tou Irréino.