AMMOM kadi daydiay kararag nga insuro ni Jesus kadagiti pasurotna?— No dimo ammo, basaenta dayta iti Biblia iti Mateo 6:​9-​13. Iti dayta a kararag, nga aw-awagan ti adu kas Amami, kastoy ti maysa a nadakamat: “Umay koma ti pagariam.” Ammom kadi no ania ti Pagarian ti Dios?—

Kastoy. Ti ari isu ti agturay iti maysa a pagilian wenno teritoria. Ket ti gobiernona maawagan iti pagarian. Iti dadduma a pagilian, presidente ti awag iti pangulo. Ania ti awag iti Agturay iti gobierno ti Dios?— Ari. Dayta ti gapuna a maawagan ti gobierno ti Dios iti Pagarian.

Ammom kadi no siasino ti pinili ni Jehova a Dios nga agbalin nga Ari iti gobiernona?— Ti Anakna a ni Jesu-Kristo. Apay a nasaysayaat ni Jesus ngem iti asinoman nga agturay a pilien dagiti tattao?— Agsipud ta pudno nga ay-ayaten ni Jesus ti Amana a ni Jehova. Dayta ti gapuna no apay a kanayon a nalinteg ti ar-aramiden ni Jesus.

 Mabayag pay sakbay a mayanak ni Jesus idiay Betlehem, imbaga ti Biblia ti maipapan iti pannakaipasngayna ket kinunana nga isu ti pilien ti Dios nga Agturay. Basaenta ti maipapan iti daytoy iti Isaias 9:​6, 7. Kunana: “Adda maysa nga ubing a nayanak kadatayo, adda maysa nga anak a lalaki a naited kadatayo; ket ti naprinsipean a panagturay maiparabawto iti abagana. Ket mapanagananto iti . . . Prinsipe ti Kappia. Ti kinaruay ti naprinsipean a panagturay ken ti kappia awanto ti ngudona.”​—Dakami ti nangitaliko.

Ammom kadi no apay a ti Agturay iti Pagarian ti Dios ket naawagan ditoy a “Ti Prinsipe”?— Ngamin, daytoy a prinsipe ket anak ti maysa nga ari. Ket ni Jesus ti Anak ti Naindaklan nga Ari a ni Jehova. Ngem ni Jehova pinagbalinna met ni Jesus nga Ari iti gobiernona, nga iturayannanto ti daga iti sangaribu a tawen. (Apocalipsis 20:6) Kalpasan ti pannakabautisar ni Jesus, rinugianna ti “nangaskasaba ket kunkunana: ‘Agbabawikayo, ta ti pagarian ti langlangit asidegen.’”​​—Mateo 4:17.

Panagkunam apay a kinuna ni Jesus nga asidegen ti Pagarian?— Agsipud ta ti Ari nga agturayto idiay langit ket addan a mismo iti sibayda! Dayta ti gapuna nga imbaga ni Jesus kadagiti tattao: “Ti pagarian ti Dios adda iti tengngayo.” (Lucas 17:21) Dika kadi maragsakan no adda iti asidegmo ti Ari a dinutokan ni Jehova, a mabalinmo pay ketdi a sagiden?—

No kasta, ibagam man no ania ti napateg a trabaho nga immayan ni Jesus ditoy daga?— Sinungbatan ni Jesus dayta a saludsod, a kunkunana: “Kasta met nga iti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Lucas 4:43) Ammo ni Jesus a dina mairingpas a bukbukodna ti panangasaba. Isu nga ammom kadi no ania ti inaramidna?—

Nangala ni Jesus iti kakaduana sa impakitana kadakuada no kasano ti mangasaba. Dagidi 12 a pinilina nga  apostol ti immuna a sinanayna. (Mateo 10:​5, 7) Ngem dagidi laeng kadi apostolna ti sinanay ni Jesus a mangaramid iti daytoy a trabaho? Saan, kuna ti Biblia nga adu dagiti dadduma pay a sinanay ni Jesus a mangasaba. Idi agangay, imbaonna a sinagdudua ti 70 a sabsabali pay nga adalan. Ket ania ti insuroda kadagiti tattao?— Kinuna ni Jesus: “Itultuloyyo nga ibaga kadakuada, ‘Ti pagarian ti Dios immasidegen kadakayo.’” (Lucas 10:9) Iti kastoy a wagas, naammuan dagiti tattao ti maipapan iti gobierno ti Dios.

Nakaugalian idiay Israel idi un-unana a dagiti baro nga ari agsakayda iti asno a sumrek iti siudad tapno agparangda kadagiti tattao. Kasta ti inaramid ni Jesus iti maudi nga isasarungkarna idiay Jerusalem. Ni Jesus ngamin ti Agturayto iti Pagarian ti Dios. Kayat kadi dagiti tattao nga isu ti agbalin nga Arida?—

Bayat a sisasakay ni Jesus iti asno, kaaduan kadagiti tattao ti nangiyaplag kadagiti makinruar a kawesda iti pagnaanna. Dagiti dadduma nangputedda kadagiti sanga ti kayo sada impan iti dalan. Iti kasta impakitada a kayatda ni Jesus nga agbalin nga Arida. Impukkawda: “Bendito ti Maysa nga um-umay kas Ari iti nagan ni Jehova!” Ngem adda dagiti tattao a saan a naragsakan. Kinapudnona, adda pay ketdi dagiti panguluen ti relihion a nagkuna ken Jesus, ‘Ibagam kadagiti adalam nga agulimekda.’​​—Lucas 19:28-​40.

Kalpasan ti lima nga aldaw, tiniliwda ni Jesus sada impan iti palasio iti saklang ni Gobernador Poncio Pilato. Kuna dagiti kabusor ni Jesus a busbusoren kano ni Jesus ti gobierno ti Roma gapu ta ibagbagana nga isu ket maysa nga ari. Gapuna, nagsalsaludsod ni Pilato ken Jesus maipapan iti daytoy. Imbaga ni Jesus a dina kalikaguman nga agawen ti gobierno. Kunana ken Pilato: “Ti pagariak saan a paset daytoy a lubong.”​​—Juan 18:36.

Kalpasanna, rimmuar ni Pilato sa imbagana kadagiti tattao nga awan ti nasarakanna a basol ni Jesus. Ngem saan a kayat dagiti tattao a ni Jesus ti agbalin nga Arida. Dida kayat a mawayawayaan ni Jesus. (Juan  18:37-​40) Kalpasan ti pannakisaritana manen ken Jesus, masigurado ni Pilato nga awan basol ni Jesus. Kamaudiananna, kalpasan ti panangiruarna ken Jesus iti maudin a gundaway, kuna ni Pilato: “Kitaenyo! Ti ariyo!” Ngem impukkaw dagiti tattao: “Ikkatem! Ikkatem! Ilansam!”

Dinamag ni Pilato: “Ilansak aya ti ariyo?” Simmungbat dagiti panguluen a papadi: “Awan ti arimi no di ni Cesar.” Agasem dayta! Dagidiay a nadangkes a papadi napagtallikudda ken Jesus dagiti tattao!​​—Juan 19:​1-​16.

Kasta met laeng ti kasasaad kadagitoy a tiempo. Kaaduan a tattao dida kayat a ni Jesus ti agbalin nga  Arida. Mabalin a kunada a mamatida iti Dios, ngem dida kayat ti agtulnog iti Dios wenno ken Kristo. Kaykayatda dagiti mismo a gobiernoda ditoy daga.

Datayo met ngay? Idi naammuantayo ti maipapan iti Pagarian ti Dios ken amin dagiti nakaskasdaaw nga aramidenna, ania ti nariknatayo iti Dios?— Nariknatayo nga ay-ayatentayo ti Dios, di ngamin?— No kasta, kasanotayo a maipakita nga ay-ayatentayo ti Dios ken kayattayo ti agpaituray iti Pagarianna?—

Maipakitatayo dayta no tuladentayo ti ulidan ni Jesus. Ket ania ti inaramid ni Jesus tapno maipakitana nga ay-ayatenna ni Jehova?— “Kankanayon nga aramidek ti bambanag a makaay-ayo kenkuana,” kuna ni Jesus. (Juan 8:29) Wen, immay ni Jesus ditoy daga ‘tapno aramidenna ti pagayatan ti Dios’ ken tapno ‘turposenna ti trabahona.’ (Hebreo 10:7; Juan 4:34) Panunotem ti inaramid ni Jesus sakbay nga inrugina ti nangasaba.

Napan ni Jesus ken ni Juan Bautista idiay Karayan Jordan. Idi nakatapogdan iti danum, intaneb ni Juan ni Jesus sana inrukuas. Ammom kadi no apay a binautisaran ni Juan ni Jesus?—

Ni Jesus ti nangkiddaw iti dayta ken Juan. Ngem kasanotayo nga ammo a kayat ti Dios a mabautisaran ni Jesus?— Ammotayo a kasta gapu ta idi apaman a nakasang-at ni Jesus  iti danum, nangngegna ti timek ti Dios manipud langit a kunkunana: “Sika ti Anakko, ti dungdungnguen; inanamonganka.” Imbaon pay ketdi ti Dios ti nasantuan nga espirituna a nagbalin a kasla kalapati sa nagdisso ken Jesus. No kasta, babaen ti pannakabautisarna, impakita ni Jesus a kayatna ti agserbi ken Jehova iti intero a panagbiagna, wenno iti agnanayon.​​—Marcos 1:​9-​11.

Ita ubingka pay. Ngem anianto ti aramidem inton dumakkelka?— Tulademto kadi ni Jesus ket agpabautisarka?— Masapul a tuladem gapu ta kuna ti Biblia nga impakitaannaka iti ‘pagwadan tapno sisisinged a surotem dagiti addangna.’ (1 Pedro 2:21) Inton mabautisaranka, maipakitamto a talaga a kayatmo ti agpaituray iti Pagarian ti Dios. Ngem saan nga umdas ti basta agpabautisar.

Nasken a tungpalentayo amin nga insuro ni Jesus. Kinuna ni Jesus a nasken a saantayo nga agbalin a “paset ti lubong.” Agtultulnogtayo ngata kenkuana no makiramantayo kadagiti nailubongan nga aramid? Liniklikan ni Jesus ken dagiti apostolna ti kakasta nga ar-aramid. (Juan 17:14) Imbes ketdi, ania ti inaramidda?— Impakaammoda kadagiti sabsabali ti maipapan iti Pagarian ti Dios. Impategda unay dayta a trabaho. Maaramidtayo met kadi dayta?— Wen, maaramidtayo dayta no talaga a napasnektayo iti kararagtayo nga umay koma ti Pagarian ti Dios.