KAPU 45

Kimfumu ya Nzambi Kele Inki? Mpila ya Kusonga Nde Beto Kezolaka Yo

KETI nge mezaba kisambu yina Yezu kulongaka balongoki na yandi?— Kana nge mezaba yo ve, beto le tanga yo kumosi na Biblia, na Matayo 6:9-13. Kisambu yai, ya bantu mingi kebingaka nde Tata na Beto, ketuba nde: “Kimfumu na nge kwisa.” Keti nge mezaba kana Kimfumu ya Nzambi kele inki?—

Bika mu tendudila nge: muntu ya bo kebingaka nde ntotila kele muntu yina ke mfumu ya nsi to ya teritware mosi. Mpi bo kebingaka guvernema na yandi nde kimfumu. Na bansi mingi, bo kebingaka muntu yina ke na ntu ya guvernema nde presida. Inki mutindu bo kebingaka Mfumu ya guvernema ya Nzambi?— Bo kebingaka yandi Ntotila. Yo yina bo kebingaka guvernema ya Nzambi nde Kimfumu.

Keti nge mezaba kana nani Yehowa Nzambi meponaka na kuvanda Ntotila na guvernema na Yandi?— Mwana na Yandi, Yezu Kristu. Sambu na nki Yezu mefwana kibeni kuluta bamfumu yonso yina bantu le pona?—  Sambu Yezu kezolaka mpenza Tata na yandi, Yehowa. Yo yina yandi kesalaka ntangu yonso mambu ya mbote.

Bamvula mingi na ntwala nde Yezu kubutuka na Betelemi, Biblia kutubilaka dezia kubutuka na yandi mpi yo tubaka nde yandi takuma Mfumu yina Nzambi kuponaka. Beto tanga mambu yango na Yezaya 9:5, 6. Yo ketuba nde: “Mwana me butuka na beto! Nzambi me pesa beto mwana ya bakala! Yandi yina muntu ta yalaka beto. Bo ta bingaka yandi . . . [Mwana-Ntotila, NW] ya Ngemba. Kimfumu na yandi ta yela, yo ta kwenda kaka na ntwala; yo ta vandaka kaka na ngemba tii kuna.”—Beto bantu metengimisa bisono.

Keti nge mezaba kikuma bo kebingila Mfumu ya Kimfumu ya Nzambi awa nde “Mwana-Ntotila”?— Bo kebinga yandi mutindu yina sambu yandi kele mwana ya ntotila. Yezu kele Mwana ya Ntotila ya Nene, Yehowa. Kansi Yehowa metulaka mpi Yezu Ntotila ya guvernema na Yandi yina tayala ntoto bamvula funda mosi. (Kusonga 20:6) Na nima ya kubaka mbotika, Yezu yantikaka “kulonga nde: ‘Beno balula ntima sambu Kimfumu ya Nzambi me kuma penepene!’”—Matayo 4:17.

Nge keyindula nde sambu na nki Yezu kutubaka nde Kimfumu mekuma penepene?— Sambu Ntotila, yina zolaka kuyala ntama mingi ve na zulu, kuvandaka pana ti bo! Yo yina Yezu kusongaka bantu nde: “Kimfumu ya Nzambi kele na kati na beno.” (Luka 17:21) Keti nge zolaka ve kusepela na kuvanda penepene ya Ntotila ya Yehowa na mpila nde nge kuka nkutu kusimba yandi?—

Songa mono ntete, inki kisalu ya mfunu Yezu kwisaka kusala na ntoto?— Yezu kupesaka mvutu na ngyufula yina, ntangu yandi tubaka nde: “Mono fweti zabisa Nsangu ya Mbote ya Kimfumu ya Nzambi na babwala ya nkaka mpi, sambu yina kele kisina ya mambu ya Nzambi tindilaka mono.” (Luka 4:43) Yezu kuzabaka nde yandi lendaka ve kusala kisalu yonso ya kusamuna yandi mosi. Yo yina, nge keyindula nde yandi salaka inki?—

Yezu kubakaka bantu mpi yandi longaka bo mutindu ya kusala kisalu ya kusamuna. Bantu ya  ntete ya yandi longaka kuvandaka bantu 12 ya yandi ponaka sambu na kuvanda bantumwa na yandi. (Matayo 10:5, 7) Kansi, keti Yezu kulongaka kaka bantumwa na yandi na kusala kisalu yina? Ve, Biblia ketuba nde Yezu kulongaka dyaka bantu mingi yankaka sambu na kusamuna. Na nima, yandi tindaka na ntwala na yandi balongoki yankaka 70 na bimvuka ya bantu zole-zole. Inki mambu bo vandaka kulonga bantu?— Yezu kutubaka nde: “Beno tubila bo nde: ‘Kimfumu ya Nzambi me kuma penepene na beno.’” (Luka 10:9) Kele na mutindu yina bantu kulongukaka mambu ya metala guvernema ya Nzambi.

Na ntangu ya ntama na Izraele, bantotila ya mpa vandaka kumata na zulu ya bana-mpunda mpi kutambula na bwala ya mvimba sambu na kudimonisa na bantu. Yo yina, Yezu kusalaka mpi mutindu yina ntangu yandi kwendaka na Yeruzalemi mbala ya nsuka. Yezu kwendaka sambu na kukuma Mfumu ya Kimfumu ya Nzambi. Keti bantu kuzolaka nde yandi vanda Ntotila na bo?—

Ntangu yandi vandaka kukwenda, bantu mingi yantikaka na kutandula bilele na bo ya zulu na nzila na ntwala na yandi. Bankaka vandaka kuzenga balutangu na banti mpi kutandula yo na nzila. Mambu ya bo salaka kesonga nde bo zolaka nde Yezu kuvanda Ntotila na bo. Bo vandaka kutuba na ndinga ya ngolo nde: “Mfumu Nzambi kusakumuna ntotila ya nene ke kwisa na zina na yandi!” Kansi, bantu yonso kuvandaka ve na kyese. Nkutu, bamfumu mingi ya mabundu kusongaka Yezu nde, “Tubila balonguki na nge bo vanda pima.”—Luka 19:28-40.

Bilumbu tanu na nima, bo kangaka Yezu mpi bo kotisaka yandi na nzo ya guvernere, Ponse Pilate, sambu bo sambisa yandi. Bambeni ya Yezu kutubaka nde Yezu vandaka kutuba nde yandi kele mfumu mpi nde yandi kele kontre guvernema ya Roma. Yo yina Pilate kuyulaka Yezu mambu yango. Yezu kuvutulaka nde yandi vandaka ve kusosa kubaka luyalu na ngolo. Yandi kusongaka Pilate nde: “Kimfumu na mono kele ya nsi-ntoto yai ve.”—Yoane 18:36.

Ebuna Pilate kukwendaka na nganda mpi kuzabisaka bantu nde yandi monaka ve kima ya mbi na Yezu. Kansi, ntangu yai bantu kezola dyaka ve nde Yezu kuvanda Ntotila na bo. Bo buyaka nde Pilate kubikisa yandi. (Yoane 18:37-40) Na nima ya kusolula dyaka ti Yezu, Pilate kundimaka  mpenza nde Yezu kusalaka ve ata kima mosi ya mbi. Nsukansuka, ntangu Pilate nataka Yezu na nganda sambu na mbala ya nsuka, yandi tubaka nde: “Tala mfumu na beno yandi yai!” Kansi bantu kutubaka na ndinga ya ngolo nde: “Fwa yandi! Fwa yandi! Tula yandi na [nti, NW]!”

Pilate kuyulaka nde: “Beno zola nde mono tula mfumu na beno na [nti, NW]?” Bamfumu ya banganga-Nzambi kuvutulaka nde: “Beto ke na mfumu ya nkaka ve, mfumu na beto kele kaka ntotila ya Roma!” Yindula ntete! Banganga-Nzambi yina ya mbi kukukaka mpenza kupusa bantu na kubuya Yezu!—Yoane 19:1-16.

Bubu yai mpi mambu kesalamaka mpenza kaka mutindu mosi bonso na ntangu ya Yezu. Bantu mingi  kezolaka mpenza ve nde Yezu kuvanda Ntotila na bo. Bo le tuba nde bo kekwikilaka na Nzambi, kansi bo kezolaka ve nde Nzambi to Kristu kusonga bo nki bo fwe sala. Bo kezolaka kaka baguvernema na bo mosi awa na ntoto.

Inki beto keyindula sambu na dyambu yai? Ntangu beto kelongukaka mambu ya metala Kimfumu ya Nzambi mpi mambu yonso ya kitoko yina yo tasala, yo kepusaka beto na kudiwa nki mutindu sambu na Nzambi?— Beto kezolaka yandi, mpidina ve?— Ebuna, inki mutindu beto le songa Nzambi nde beto kezolaka yandi mpi beto kezolaka nde Kimfumu na yandi kuyala beto?—

Beto le songa Nzambi mutindu beto kekudiwa kana beto kelanda mbandu ya Yezu. Yezu kusalaka nki sambu na kusonga nde yandi vandaka kuzola Yehowa?— Yandi tendulaka nde: “Ntangu yonso mono ke salaka mambu yina ke pesaka yandi kiese.” (Yoane 8:29) Ee, Yezu kwisaka na ntoto ‘sambu na kusala luzolo ya Nzambi’ mpi ‘kumanisa kisalu na yandi.’ (Baebreo 10:7; Yoane 4:34) Beto tadila mambu yina Yezu salaka na ntwala nde yandi yantika kisalu na yandi ya kusamuna.

Yezu kwendaka na Yoane-Mbotiki na Nzadi ya Yordani. Ntangu bo kotaka na masa, bo pusanaka tii kisika masa kuvandaka mudindu, Yoane kudindisaka Yezu ya mvimba na kati ya masa mpi na nima yandi tedimisaka yandi dyaka. Keti nge mezaba sambu na nki Yoane kubotikaka Yezu?—

Yezu muntu kulombaka nde Yoane kubotika yandi. Kansi, inki mutindu beto kebakisa nde Nzambi kuzolaka nde  Yezu kubaka mbotika?— Beto kebakisa yo sambu ntangu Yezu kubasikaka na masa, yandi waka ndinga ya Nzambi yina katukaka na zulu ketuba nde: “Nge kele Mwana na mono ya mono ke zolaka mingi. Mono ke na kiese mingi sambu na nge.” Nkutu Nzambi kutindaka mpeve santu na yandi yina kukulumukaka bonso pizio na zulu ya ntu ya Yezu. Ntangu yandi bakaka mbotika, Yezu kumonisaka nde yandi zolaka kusadila Yehowa luzingu na yandi yonso, disongidila, kimakulu.—Marko 1:9-11.

Ntangu yai nge ke ntete mwana. Kansi, inki nge tasala ntangu nge takuma mbuta?— Keti nge tabaka mbotika mutindu Yezu kusalaka?— Nge fwe landa mbandu na yandi, sambu Biblia ketuba nde yandi bikilaka nge ‘mbandu sambu nge landa yo mbote mpenza.’ (1 Piere 2:21) Ntangu nge tabaka mbotika, nge tasonga mpenza nde nge kezola nde Kimfumu ya Nzambi kuyala nge. Kansi, kubaka mbotika yo mosi mefwana ve.

Beto fwe lemfuka na mambu yonso ya Yezu kulongaka. Yezu kutubaka nde beto fwe vanda “bantu ya nsi-ntoto yai ve.” Keti beto talemfukila yandi kana beto kekota na mambu ya nsi-ntoto? Yezu ti bantumwa na yandi kukotaka ve na mambu ya nsi-ntoto. (Yoane 17:14) Kansi nki mambu bo vandaka kusala?— Bo vandaka kuzabisa bantu yankaka mambu ya metala Kimfumu ya Nzambi. Yo yina kuvandaka kisalu ya mfunu na luzingu na bo. Keti beto mpi le sala yo?— Ee, mpi beto tasala yo kana beto ketuba masonga na mambu yina beto ketubaka ntangu beto kesambaka sambu Kimfumu ya Nzambi kukwisa.

Tala baverse yai yankaka ya kesonga beto mambu ya beto le sala sambu na kumonisa nde beto kezola Kimfumu ya Nzambi kukwisa: Matayo 6:24-33; 24:14; 1 Yoane 2:15-17 mpi 5:3.

[Kifwanisu ya kele na lutiti 232, 233]

Inki kisalu Yezu kwisaka kusala na ntoto?

[Bifwanisu ya kele na lutiti 235]

Sambu na nki bantu kuzolaka ntete nde Yezu kuvanda Ntotila na bo kansi na nima bo buyaka nde yandi vanda ntotila na bo?

[Kifwanisu ya kele na lutiti 236]

Sambu na nki Yezu kubakaka mbotika, mpi nki mutindu Nzambi kumonisaka nde yandi ndimaka mbotika na yandi?

[Bifwanisu ya kele na lutiti 237]

Inki kisika beto le zabisa bankaka mambu ya metala Kimfumu ya Nzambi?