HIHI nĩ ũĩ ihoya rĩrĩa Jesu aarutire arũmĩrĩri ake?— Angĩkorũo ndũrĩũĩ, no tũrĩthome thĩinĩ wa Mathayo 6:9-13. Ihoya rĩu, rĩrĩa andũ aingĩ metaga Ihoya rĩa Mwathani, riugaga ũũ: “Ũthamaki waku ũũke.” Nĩ ũĩ Ũthamaki wa Ngai nĩ kĩĩ?—

Ta reke ngũtaarĩrie. Mũthamaki nĩ mũtongoria wa bũrũri. Nayo thirikari yake ĩtagwo ũthamaki. Thĩinĩ wa mabũrũri mamwe, mũtongoria wa bũrũri etagwo presidenti. Hihi Mũtongoria wa thirikari ya Ngai etagwo atĩa?— Etagwo Mũthamaki. Nĩkĩo thirikari ya Ngai ĩtagwo Ũthamaki.

Nĩ ũĩ nũũ ũthuurĩtwo nĩ Jehova Ngai atuĩke Mũthamaki wa thirikari ya Ngai?— Nĩ Mũrũwe, Jesu Kristo. Nĩ kĩĩ kĩngĩtũma tuuge atĩ Jesu nĩ mũtongoria mwega gũkĩra arĩa mathuuragwo nĩ andũ?—  Nĩ tondũ nĩ endete Ithe, Jehova. Kwoguo hingo ciothe Jesu ekaga maũndũ marĩa mega.

Mĩaka mĩingĩ mbere ya Jesu gũciarũo thĩinĩ wa itũũra rĩa Bethilehemu, Bibilia nĩ yoigĩte atĩ nĩ agaaciarũo, na atĩ nĩ angĩgathuurũo nĩ Ngai atuĩke Mũtongoria wa andũ. Reke tũthome ũhoro ũcio thĩinĩ wa Isaia 9:6, 7. Rĩandĩko rĩu riugaga ũũ: ‘Nĩ tũciarĩirũo kaana, tũkaheo kahĩĩ, naguo wathani ũkagĩa ciande-inĩ ciako; nako gageetagwo Mũnene wa Thayũ. Naguo wathani wake ũgaaikara ũkĩnenehaga.’

Rĩandĩko-inĩ rĩu Jesu etĩtwo ‘Mũnene wa Thayũ.’ Ningĩ Jesu nĩ Mũrũ wa Jehova, Mũthamaki Ũrĩa Mũnene. Ũndũ ũngĩ nĩ atĩ Jehova nĩ atuĩte Jesu Mũthamaki wa thirikari ya Ngai ĩrĩa ĩgaatha thĩ yothe mĩaka ngiri ĩmwe. (Kũguũrĩrio 20:6) Thutha wa Jesu kũbatithio, aambĩrĩirie ‘kũhunjia akiugaga ũũ: “Mwĩrirei, inyuĩ andũ aya, tondũ Ũthamaki wa igũrũ nĩ ũkuhĩrĩirie.”’—Mathayo 4:17.

Ũgwĩciria nĩ kĩĩ gĩatũmaga Jesu oige atĩ Ũthamaki nĩ ũkuhĩrĩirie?— Oigaga ũguo tondũ aarĩ hamwe na andũ acio, na nĩ aamenyaga atĩ thutha-inĩ nĩ agaatuĩka Mũthamaki kũũrĩa igũrũ. Nĩkĩo Jesu eeraga andũ ũũ: “Ũthamaki wa Ngai ũrĩ gatagatĩ-inĩ kanyu.” (Luka 17:21) Korũo nĩwe warĩ hakuhĩ na Mũthamaki ũcio wathuurĩtwo nĩ Jehova ũndũ ũngĩahotire kwaranĩria nake-rĩ, ũngĩaiguire atĩa?—

Hihi nĩ wĩra ũrĩkũ Jesu okĩte kũruta gũkũ thĩ?— Jesu aacokirie ũũ: “No mũhaka hunjie ũhoro ũrĩa mwega wa Ũthamaki wa Ngai matũũra-inĩ marĩa mangĩ o namo, tondũ nĩkĩo ndaatũmirũo.” (Luka 4:43) No Jesu nĩ aamenyaga atĩ ndangĩahotire kũhunjia kũndũ guothe arĩ wiki. Kwoguo-rĩ, ũgwĩciria eekire atĩa?—

Jesu aathuurire andũ maigana ũna akĩmonia kũhunjia. Andũ arĩa Jesu aambire kuonia kũhunjia nĩ  arĩa 12, arĩa aathuurire magĩtuĩka atũmwo ake. (Mathayo 10:5, 7) No hihi no atũmwo tu aarutire kũhunjia? Aca, Bibilia yugaga atĩ Jesu nĩ aarutire andũ angĩ aingĩ kũhunjia. Thutha wa ihinda, nĩ aacokire agĩtũma arutwo 70 makahunjie marĩ erĩ erĩ. Hihi maahunjagĩria andũ ũhoro ũrĩkũ?— Jesu aameerire atĩrĩ: ‘Thiĩi mwĩre andũ ũũ: “Ũthamaki wa Ngai nĩ ũmũkuhĩrĩirie.”’ (Luka 10:9) Na njĩra ĩyo, andũ nĩ maarutagwo ũhoro wa thirikari ya Ngai.

Tene hĩndĩ ya Aisiraeli, mũndũ angĩatuĩkire mũthamaki aahaicagio bunda igũrũ agathiũrũrũka itũũra nĩguo onwo nĩ andũ. Ũguo noguo Jesu eekire rĩrĩa aathiire Jerusalemu riita rĩa mũico. Ririkana atĩ Jesu nĩwe ũngĩacokire gũtuĩka Mũthamaki wa Ũthamaki wa Ngai. Hihi andũ nĩ meendaga atuĩke Mũthamaki wao?—

Rĩrĩa Jesu okire akuuĩtwo nĩ bunda, andũ maambĩrĩirie kwara nguo ciao cia igũrũ barabara-inĩ ĩrĩa aahĩtũkagĩra. Nao angĩ maatuaga mathĩgĩ ma mĩtĩ, na makaara mathĩgĩ macio barabara-inĩ. Ũndũ ũcio wonanirie atĩ nĩ meendaga Jesu atuĩke Mũthamaki wao. Maanĩrĩire makiuga ũũ: “Kũrathimwo nĩ ũrĩa ũroka arĩ Mũthamaki na rĩĩtwa rĩa Jehova!” No ti andũ othe maakenirio nĩ ũhoro ũcio. Atongoria amwe a ndini o na nĩ meeraga Jesu atĩrĩ, ‘Ĩra arutwo aku makire.’—Luka 19:28-40

Thutha wa thikũ ithano Jesu akĩnyitwo na agĩtwarũo kũrĩ ngavana ũrĩa wetagwo Pontio Pilato. Thũ cia Jesu ikiuga atĩ nĩ aretua mũthamaki na agakararia thirikari ya Roma. Kwoguo Pilato akĩũria Jesu ũhoro ũcio. No Jesu akiuga atĩ we ndarenda kũgarũra thirikari. Eerire Pilato atĩrĩ, ‘Ũthamaki wakwa ti wa gũkũ thĩ.’—Johana 18:36.

Pilato akiuma nja akĩra andũ atĩ ndarona Jesu arĩ na mahĩtia. No hĩndĩ ĩyo andũ matiendaga Jesu akorũo arĩ Mũthamaki wao. Matiendaga Jesu arekererio. (Johana 18:37-40) Thutha wa Pilato kwaria na Jesu rĩngĩ, nĩ onire biũ atĩ Jesu ndaarĩ na mahĩtia.  Kwoguo akĩruta Jesu nja riita rĩa mũico, akiuga atĩrĩ, “Onei mũthamaki wanyu!” No andũ makĩanĩrĩra makiuga ũũ: “Mũũrage! Mũũrage! Nĩ acuurio mũtĩ igũrũ!”

Pilato akĩmoria atĩrĩ: “Mũrenda njũrage mũthamaki wanyu?” Athĩnjĩri-Ngai arĩa anene magĩcokia ũũ: “Tũtirĩ mũthamaki ũngĩ tiga Kaisari.” Ta wĩcirie ũndũ ũcio! Athĩnjĩri-Ngai acio oru nĩ maahotire gũtũma andũ marege Jesu.—Johana 19:1-16.

O na ũmũthĩ noguo kũhaana. Andũ aingĩ matiendaga Jesu akorũo arĩ Mũthamaki wao. Moigaga atĩ nĩ metĩkĩtie Ngai, no matiendaga kwĩrũo nĩ  Ngai kana Jesu ũrĩa magĩrĩirũo nĩ gwĩka. Mendaga gwathwo nĩ thirikari ciao cia gũkũ thĩ.

Ĩ ithuĩ na ithuĩ? Rĩrĩa tweruta ũhoro wa Ũthamaki wa Ngai na maũndũ marĩa ũgeeka-rĩ, hihi tũiguaga atĩa?— Wendo witũ harĩ Ngai nĩ wongererekaga, githĩ tiguo?— No twagĩrĩirũo gwĩka atĩa nĩguo tuonanie atĩ nĩ twendete Ngai, na atĩ nĩ tũrenda gũthamakĩrũo nĩ Ũthamaki wake?—

No tuonie Ngai ũrĩa tũiguaga na njĩra ya kwĩgerekania na Jesu. Hihi nĩ maũndũ marĩkũ Jesu eekaga nĩguo onanie wendo wake harĩ Jehova?— Jesu oigire ũũ: ‘Hingo ciothe njĩkaga maũndũ marĩa makenagia Ngai.’ (Johana 8:29) Jesu okire gũkũ thĩ ‘gwĩka wendi wa Ngai’ na “kũrĩkia wĩra wake.” (Ahibirania 10:7; Johana 4:34) Ta reke tuone ũrĩa Jesu eekire atanambĩrĩria wĩra wake wa kũhunjia.

Jesu aambire agĩthiĩ kũrĩ Johana Mũbatithania rũĩ-inĩ rwa Jorodani. Makĩingĩra maĩ-inĩ marĩ hamwe, Johana akĩbatithia Jesu na njĩra ya kũmũrikia thĩinĩ wa maĩ, agĩcoka akĩmũruta. Nĩ ũĩ Johana aabatithirie Jesu nĩkĩ?—

Jesu nĩwe werire Johana amũbatithie. No tũmenyaga atĩa atĩ Ngai nĩ eendaga Jesu abatithio?— Nĩ tondũ rĩrĩa Jesu oimire maĩ-inĩ, nĩ aaiguire mũgambo wa Ngai kuuma igũrũ ũkiuga  ũũ: “Wee nĩwe Mũrũ wakwa, ũrĩa nyendete mũno; nĩ ngwĩtĩkĩrĩte.” Ningĩ Ngai nĩ aatũmire roho mũtheru ũhaana ta ndutura ũgĩũka ĩgũrũ rĩa Jesu. Kwoguo rĩrĩa Jesu aabatithirio, onanirie atĩ nĩ arenda gũtungatĩra Ngai ũtũũro-inĩ wake wothe, tene na tene.—Mariko 1:9-11.

Ihinda-inĩ rĩrĩ wee ũrĩ o mũnini. No hihi waneneha ũkenda gwĩka atĩa?— Hihi wee nĩ ũkaabatithio ta ũrĩa Jesu eekire?— Wagĩrĩirũo kwĩgerekania na Jesu, tondũ Bibilia yugaga atĩ Jesu nĩ ‘aagũtigĩire kĩonereria nĩguo ũrũmagĩrĩre makinya make.’ (1 Petero 2:21) Rĩrĩa ũkaabatithio, ũgaakorũo ũkĩonania atĩ no wende gũthamakĩrũo nĩ Ũthamaki wa Ngai. No kũbatithio gwiki ti kũiganu.

Nĩ twagĩrĩirũo kũrũmĩrĩra maũndũ marĩa mothe Jesu aarutanire. Jesu oigire atĩ ‘tũtirĩ a gũkũ thĩ.’ Tũngĩingĩria maũndũ-inĩ ma thĩ-rĩ, hihi no tũkorũo tũgĩathĩkĩra Jesu? Jesu na atũmwo ake matieingĩririe maũndũ-inĩ ma thĩ. (Johana 17:14) Handũ ha ũguo-rĩ, nĩ ũĩ ũrĩa meekaga?— Maahunjagĩria andũ ũhoro wa Ũthamaki wa Ngai. Ũcio nĩguo warĩ wĩra wao ũrĩa wa bata makĩria. Hihi ithuĩ no tũhote kũruta wĩra ũcio?— Ĩĩ no tũhote, tũngĩrũmĩrĩra ciugo iria tũgwetaga rĩrĩa tũkũhoya Ũthamaki wa Ngai ũũke.