MBELA ou shii eilikano olo Jesus a li a honga ovashikuli vaye? — Ngeenge ku li shii, ohatu dulu okulesha kombinga yalo mOmbibeli, muMateus 6:9-13. Eilikano olo ovanhu vahapu have li ifana kutya Eilikano lOmwene, ola kwatela mo eendjovo edi tadi ti: “Ouhamba woye nau uye.” Mbela ou shii kutya Ouhamba waKalunga oshike? — 

Ohamba oyo omupangeli woshilongo ile woshitukulwa shonhumba. Epangelo lohamba ohali ifanwa ouhamba. Moilongo imwe, omupangeli woshilongo oha ifanwa omupresidende. Omupangeli wepangelo laKalunga oha ifanwa shike? —  Oha ifanwa Ohamba. Hano omolwaasho epangelo laKalunga hali ifanwa Ouhamba.

Mbela ou shi shii kutya olyelye a nangekwa po kuJehova a ninge Ohamba yepangelo laYe? —  Okwa nangeka po Omona waYe, Jesus Kristus.  Omolwashike Jesus e li omupangeli muwa e dule ovapangeli ovo hava hoololwa kovanhu? —  Omolwaashi Jesus oku hole shili Xe, Jehova. Onghee hano, oha longo alushe osho sha yuka.

Fimbo Jesus a li ina dalelwa muBetlehem, Ombibeli oya li ya xunganeka kombinga yedalo laye nosho yo kutya okwa li ta ka nangekwa po kuKalunga a ninge Omupangeli. Natu leshe kombinga yaasho muJesaja 9:5, 6, taku ti: ‘Okaana ke tu dalelwa, Omona omumati e tu yandjelwa, nepangelo oli li komapepe aye, ndee ta ifanwa Ohamba yombili. Epangelo laye otali ningi linene nombili itai xulu po.’

Momushangwa omo, Jesus oo e li Omupangeli wOuhamba waKalunga okwa popiwa kutya oku li “Ohamba,” noku li yo Omona wOhamba Inenenene Jehova. Ndele Jehova okwa ninga yo Jesus Ohamba yepangelo laYe, oyo tai ka pangela kombada yedu okudja meulu oule womido eyovi. (Ehololo 20:6) Konima eshi Jesus a li a ninginifwa, okwa li a hovela ‘okuudifa ta ti: lidilululeni, osheshi ouhamba weulu owa ehena popepi.’ — Mateus 4:17.

Mbela oto diladila kutya omolwashike Jesus a li a popya kutya Ouhamba owa ehena popepi? —  Omolwaashi Ohamba oyo ya li tai ka pangela mafiku meulu oya li pamwe novanhu kombada yedu. Nomolwaasho Jesus okwa li a lombwela ovanhu a ti: “Ouhamba waKalunga ou li [mokati keni, NW].” (Lukas 17:21) Mbela ino hala Ohamba yOuhamba waJehova i kale popepi elela naave, to dulu nokuli noku i kuma? — 

Lombwele nge kutya oilonga ya fimana ilipi Jesus a li e uya okulonga kombada yedu? —  Jesus okwa li a nyamukula epulo olo a ti: ‘Ondi na okuudifila oilando imwe yo evangeli louhamba waKalunga, osheshi olo tuu eli nde li tuminwa.’ (Lukas 4:43) Jesus okwa li e shi shii kutya ka li ta dulu okulonga oilonga yokuudifa oye aeke. Mbela oto diladila kutya okwa li a ninga po shike? — 

Jesus okwa li a kufa ovanhu vonhumba ndele te va deula va kale hava longo oilonga yokuudifa. Okwa li a deula tete ovanhu ve li 12, ovo a li a hoolola va ninge ovayapostoli vaye. (Mateus  10:5, 7) Ndele mbela Jesus okwa li a deula ovayapostoli vaye ovo aveke va longe oilonga ya tya ngaho? Ahowe, Ombibeli otai ti kutya Jesus okwa li yo a deula ovanhu vamwe vahapu va kale tava udifa. Konima yefimbo, okwa li a tuma ovahongwa vamwe 70, va ka longe oovavali noovavali. Mbela ovahongwa ovo ova li va honga ovanhu shike? —  Jesus okwa ti: ‘Va lombweleni kutya ouhamba waKalunga owa ehena popepi nanye.’ (Lukas 10:9) Kungaho, ovanhu ova li ve lihonga kombinga yepangelo laKalunga.

Nale muIsrael, ohamba ipe oya li hai i moshilando ya londa kokandongi opo ovanhu ve i mone. Efiku limwe Jesus naye osho a li a ninga ngaho eshi a li ta ka talela po Jerusalem oshikando shaxuuninwa. Jesus oye a li ta ka ninga Omupangeli wOuhamba waKalunga. Mbela ovanhu ova li ngoo va hala Jesus a ninge Ohamba yavo? — 

Eshi Jesus a li a fika moshilando, ovanhu vahapu ova li va hovela okuyala oikutu yavo yokombada mondjila komesho yaye. Vamwe ova li va teta oivale yomilunga ndele tave i yale mondjila. Kungaho, ova li tava ulike kutya ova hala Jesus a kale Ohamba yavo. Ovanhu ova li tava ingida tava ti: “Na nangekwe noupuna ohamba, ou te uya medina lOmwene.” Ashike ovanhu aveshe kava li va hafa. Ovawiliki vamwe vomalongelokalunga ova li va lombwela Jesus va ti: ‘Hanyena ovahongwa voye va mwene.’ — Lukas 19:28-40.

Omafiku atano konima yaasho, Jesus okwa li a kwatwa po ndele ta twalwa kombala opo a ka holoke koshipala shomupangeli Pontius Pilatus. Ovatondi vaJesus ova li tava ti kutya Jesus ote liti kutya ohamba nonokutya oku li omhinge nepangelo laRoma. Pilatus okwa li a pula Jesus kutya ota ti ngahelipi kombinga yaasho ovanhu va li tava popi. Jesus okwa li a popya kutya ye ita kendabala okukufa ko epangelo, eshi a li a lombwela Pilatus a ti: “Ouhamba wange kau fi womounyuni ou.” — Johannes 18:36.

Pilatus okwa li a ya pondje ndele ta lombwele ovanhu kutya ina mona Jesus etimba. Ashike ovanhu ovo kava li va hala Jesus a mangululwe molwaashi kava li va hala a ninge Ohamba yavo. (Johannes 18:37-40) Konima eshi Pilatus a li a popya vali naJesus, Pilatus okwa li e na oushili  kutya Jesus ina ninga sha sha puka. Opo nee, Pilatus okwa li a twala Jesus pondje oshikando shaxuuninwa, ndele Pilatus ta ti: “Taleni ohamba yeni. Opo nee vo ova ingida: Na dje po, na dje po, mu valela”!

Pilatus okwa li a pula ovanhu a ti: “Nandi valele ohamba yeni [komuti womahepeko, NW]?” Ovapristeri ovakulunhu ova li va nyamukula va ti: “Fye katu na ohamba imwe, omukesari aeke.” Diladila ashike koshinima sha tya ngaho! Ovapristeri ovo ovakolokoshi ova li va nwefa mo ovanhu va kale inava hala Jesus. — Johannes 19:1-16.

Onghalo kunena oya faafana naayo yopefimbo laJesus. Ovanhu vahapu kunena inava hala Jesus a ninge Ohamba yavo. Otashi dulika va tye ova itavela Kalunga,  ndele inava hala okudulika kwaasho Kalunga ile Kristus te va lombwele. Ova hala va kale ve na omapangelo avo vene kombada yedu.

Ove oto diladila ngahelipi shi na sha naasho? —  Ohatu kala tu udite ngahelipi shi na sha naKalunga, eshi twe lihonga kombinga yOuhamba waYe nosho yo oinima ikumwifi aishe oyo tau ka ninga? —  Ohashi tu linyengifa tu kale tu mu hole, hasho mbela? —  Ongahelipi hatu dulu okuulikila Kalunga kutya otu mu hole nonokutya otwa hala okupangelwa kOuhamba waye? — 

Ohatu dulu okuulikila Kalunga kutya otu udite ngahelipi mokulandula oshihopaenenwa shaJesus. Mbela Jesus okwa li a ninga po shike opo a ulike kutya oku hole Jehova? —  Jesus okwa ti: “Ohandi longo ashishe eshi she mu wapalela.” (Johannes 8:29) Jesus okwa li e uya kombada yedu opo a ‘longe ehalo laKalunga’ ‘nokuwanife oshilonga shaye.’ (Ovaheberi 10:7; Johannes 4:34) Tala kwaasho Jesus a li a ninga fimbo ina hovela oilonga yaye yokuudifa.

Jesus okwa li a ya kuJohannes Omuninginifi komulonga waJordan. Eshi va li va ya momeva, Johannes okwa li a tula Jesus koshi yomeva ndele te mu kufa ko. Mbela ou shi shii kutya omolwashike Johannes a li a ninginifa Jesus? — 

Jesus okwa li a pula Johannes e mu ninginife. Ndele mbela otu shi shii ngahelipi kutya Kalunga okwa li a hala Jesus a ninginifwe? —  Otu shi shii molwaashi eshi Jesus a dja momeva, okwa li a uda ondaka yaKalunga ya dja meulu ya ti: “Oove Omona wange omuholike, onde ku hokwa.” Kalunga okwa li nokuli a tuma omhepo yaye iyapuki kuJesus, i li molupe longhuti. Onghee hano, eshi Jesus a li a ninginifwa, okwa li ta ulike kutya okwa hala okulongela Jehova fiyo alushe. — Markus 1:9-11.

Ove ino kula natango. Ndele oshike to ka ninga po ngeenge wa kulu? —  Mbela oto ka hopaenena Jesus ndele to ninginifwa? — Ou na okuhopaenena Jesus, molwaashi Ombibeli oya ti okwe tu fiila ‘oshihopaenenwa tu shikule oshikoti shaye.’ (1 Petrus 2:21) Ngeenge owa ninginifwa, oto ka ulika kutya owa hala shili okupangelwa kOuhamba waKalunga. Ndele owa pumbwa okuninga shihapu shihe fi ashike okuninginifwa.

Otwa pumbwa okukala hatu dulika koinima oyo Jesus a honga. Jesus okwa ti kutya katu na okukala oshitukulwa ‘shounyuni.’ Mbela ohatu ka dulika ngoo kuJesus ngeenge otwa kufa ombinga moinima younyuni? Jesus novayapostoli vaye kava li hava kufa ombinga moinima yomounyuni. (Johannes 17:14) Mbela Jesus novayapostoli vaye ova li ashike hava ningi shike? — Ova li hava lombwele ovanhu kombinga yOuhamba waKalunga. Oilonga ya tya ngaho oya li ya fimanenena monghalamwenyo yavo. Mbela nafye ohatu dulu okuninga ngaho? —  Heeno, ohatu dulu ngeenge otwa mana mo shili eshi hatu ilikana kutya Ouhamba waKalunga nau uye.