ជំពូកទី៤៥
តើរាជាណាចក្ររបស់ព្រះជាអ្វី? តើអ្វីបង្ហាញថាយើងចង់បានរាជាណាចក្រព្រះ?
លោកយេស៊ូបានបង្រៀនអ្នកកាន់តាមលោកឲ្យអធិដ្ឋាន តើកូនស្គាល់សេចក្ដីអធិដ្ឋាននោះទេ?— បើកូនមិនទាន់ស្គាល់ទេ យើងអាចអានសេចក្ដីអធិដ្ឋាននោះជាមួយគ្នាពីគម្ពីរ នៅសៀវភៅម៉ាថាយ ៦:៩-១៣។ មនុស្សជាច្រើនហៅសេចក្ដីអធិដ្ឋាននោះថា សេចក្ដីអធិដ្ឋានរបស់លោកម្ចាស់។ សេចក្ដីអធិដ្ឋាននោះមានពាក្យដែលថា៖ «សូមឲ្យរាជាណាចក្ររបស់លោកបានមកដល់»។ តើរាជាណាចក្ររបស់ព្រះជាអ្វី? តើកូនដឹងទេ?—
ខ្ញុំសូមពន្យល់កូនអំពីរឿងនេះ។ ស្ដេចគឺជាអ្នកគ្រប់គ្រងប្រទេសណាមួយឬតំបន់ណាមួយ។ រដ្ឋាភិបាលដែលមានស្ដេចគ្រប់គ្រង គេហៅថារាជាណាចក្រ។ នៅប្រទេសខ្លះអ្នកដឹកនាំរដ្ឋាភិបាល គេហៅថាប្រធានាធិបតី។ ចុះអ្នកគ្រប់គ្រងរដ្ឋាភិបាលរបស់ព្រះវិញ គេហៅថាអ្វី?— គេហៅថាស្ដេច។ នោះជាមូលហេតុដែលគេហៅរដ្ឋាភិបាលរបស់ព្រះថា រាជាណាចក្រ។
តើព្រះយេហូវ៉ាបានជ្រើសរើសអ្នកណាឲ្យធ្វើជាស្ដេចនៃរាជាណាចក្ររបស់លោក? តើកូនដឹងទេ?— គឺលោកយេស៊ូគ្រិស្ដដែលជាបុត្ររបស់លោក។ ហេតុអ្វីលោកយេស៊ូជាអ្នកគ្រប់គ្រងដែលប្រសើរជាងអ្នកគ្រប់គ្រងផ្សេងទៀតរបស់មនុស្ស?— នេះគឺដោយសារលោកយេស៊ូពិតជាស្រឡាញ់ព្រះយេហូវ៉ាដែលជាបិតារបស់លោក។ ដូច្នេះហើយ លោកយេស៊ូតែងតែធ្វើអ្វីដែលត្រឹមត្រូវជានិច្ច។
ជាយូរមុនដែលលោកយេស៊ូបានកើតនៅក្រុងបេថ្លេហិម គម្ពីរបានប្រាប់ទុកជាមុនអំពីកំណើតរបស់លោក ហើយថាលោកនឹងក្លាយទៅជាអ្នកគ្រប់គ្រងដែលព្រះបានជ្រើសរើស។ សូមយើងអានអំពីរឿងនេះ នៅសៀវភៅអេសាយ ៩:៦, ៧ ដកស្រង់ពីព្រះគម្ពីរភាសាខ្មែរសម្រាយចែងថា៖ ‹ដ្បិតមានព្រះរាជបុត្រមួយអង្គប្រសូតមកសំរាប់យើង ព្រះជាម្ចាស់បានប្រទានព្រះបុត្រាមួយអង្គមកយើងហើយ។ បុត្រនោះទទួលអំណាចគ្រប់គ្រង គេនឹងថ្វាយព្រះនាមថា ព្រះអង្គម្ចាស់នៃសេចក្ដីសុខសាន្ត។ ព្រះរាជបុត្រនោះនឹងលាតសន្ធឹងអំណាចព្រះអង្គ និងមានសេចក្ដីសុខសាន្តរហូតតទៅ› (យើងកែជាអក្សរទ្រេត)។
ហេតុអ្វីក្នុងខនេះអ្នកគ្រប់គ្រងរាជាណាចក្ររបស់ព្រះបានត្រូវហៅថា«ព្រះអង្គម្ចាស់»? តើកូនដឹងទេ?— ព្រះអង្គម្ចាស់នេះគឺជាបុត្ររបស់ស្ដេច។ បន្ថែមទៅទៀត លោកយេស៊ូជាបុត្ររបស់ស្ដេចដ៏ខ្ពស់បំផុត គឺព្រះយេហូវ៉ា។ ប៉ុន្តែ ព្រះយេហូវ៉ាក៏បានតែងតាំងលោកយេស៊ូឲ្យធ្វើជាស្ដេចក្នុងរដ្ឋាភិបាលរបស់លោកដែរ។ រដ្ឋាភិបាលនោះនឹងគ្រប់គ្រងមកលើផែនដីសម្រាប់រយៈពេល១.០០០ឆ្នាំ។ (ការបើកបង្ហាញ ២០:៦) ក្រោយពីលោកយេស៊ូបានទទួលការជ្រមុជទឹក លោកបានចាប់ផ្ដើម«ផ្សព្វផ្សាយថា៖ ‹ចូរអ្នករាល់គ្នាប្រែចិត្ត ព្រោះរាជាណាចក្រស្ថានសួគ៌គឺជិតដល់ហើយ›»។—ម៉ាថាយ ៤:១៧
ហេតុអ្វីបានជាលោកយេស៊ូនិយាយថារាជាណាចក្រគឺជិតដល់ហើយ? តើកូនគិតយ៉ាងណា?— លោកយេស៊ូនិយាយដូច្នោះ ពីព្រោះលោកកំពុងនៅជិតពួកគេ ហើយលោកនឹងទៅជាស្ដេចគ្រប់គ្រងនៅស្ថានសួគ៌ពេលក្រោយមក។ ហេតុនេះ លោកយេស៊ូប្រាប់អ្នកឯទៀតថា៖ «រាជាណាចក្ររបស់ព្រះនៅកណ្ដាលចំណោមអ្នករាល់គ្នាហើយ»។ (លូកា ១៧:២១) បើកូនបាននៅជិតស្ដេចដែលព្រះយេហូវ៉ាបានតែងតាំង ហើយនិយាយជាមួយនឹងលោកដោយផ្ទាល់ នោះពិតជាអស្ចារ្យណាស់ មែនទេ?—
ដូច្នេះ តើកិច្ចការដ៏សំខាន់អ្វីដែលលោកយេស៊ូបានធ្វើពេលលោកនៅផែនដី? តើកូនគិតយ៉ាងណា?— លោកយេស៊ូប្រាប់ថា៖ «ខ្ញុំត្រូវប្រកាសដំណឹងល្អអំពីរាជាណាចក្ររបស់ព្រះនៅក្រុងផ្សេងទៀតដែរ ពីព្រោះនេះជាមូលហេតុដែលខ្ញុំបានត្រូវចាត់ឲ្យមក»។ (លូកា ៤:៤៣) លោកយេស៊ូបានដឹងថា លោកមិនអាចបំពេញកិច្ចការផ្សព្វផ្សាយទាំងអស់តែម្នាក់លោកបានទេ។ ដូច្នេះ តើកូនគិតថាលោកបានធ្វើអ្វី?—
តើលោកយេស៊ូបានធ្វើកិច្ចការអ្វីពេលលោកនៅផែនដី?
លោកយេស៊ូបាននាំមនុស្សខ្លះទៅជាមួយ ហើយបង្ហាញពួកគាត់អំពីរបៀបធ្វើកិច្ចការផ្សព្វផ្សាយ។ មុនដំបូង លោកបានបង្ហាត់បង្រៀនពួកសាវ័ក១២នាក់ដែលលោកបានជ្រើសរើស។ (ម៉ាថាយ ១០:៥, ៧) ប៉ុន្តែ តើលោកយេស៊ូបានបង្ហាត់បង្រៀនតែពួកសាវ័កប៉ុណ្ណោះឲ្យធ្វើកិច្ចការនោះឬ? មិនមែនទេ។ គម្ពីរប្រាប់ថា លោកយេស៊ូក៏បានបង្ហាត់បង្រៀនមនុស្សជាច្រើនទៀតឲ្យចេះផ្សព្វផ្សាយដែរ។ នៅពេលក្រោយមក លោកបានចាត់មនុស្ស៧០នាក់ឲ្យទៅមុនលោក ដោយឲ្យពួកគាត់ផ្សព្វផ្សាយជាគូៗ។ តើពួកគាត់បានបង្រៀនបណ្ដាជនអំពីអ្វី?— លោកយេស៊ូនិយាយថា ចូរ«បន្តប្រាប់ពួកគេថា៖ ‹រាជាណាចក្ររបស់ព្រះបានចូលមកជិតអ្នករាល់គ្នាហើយ›»។ (លូកា ១០:៩) តាមរយៈការផ្សព្វផ្សាយនេះ មនុស្សបានស្គាល់អំពីរដ្ឋាភិបាលរបស់ព្រះ។
នៅស្រុកអ៊ីស្រាអែលសម័យបុរាណ តាមធម្មតាអ្នកដែលឡើងធ្វើជាស្ដេចនឹងជិះសត្វលាចូលក្នុងក្រុងដើម្បីឲ្យបណ្ដាជនឃើញ។ ដូចគ្នាដែរ នៅពេលលោកយេស៊ូចូលទៅក្នុងក្រុងយេរូសាឡិមជាលើកចុងក្រោយ លោកក៏បានជិះសត្វលាដើម្បីឲ្យបណ្ដាជនឃើញលោកដែរ។ ដូច្នេះ លោកយេស៊ូនឹងទៅជាអ្នកគ្រប់គ្រងក្នុងរាជាណាចក្ររបស់ព្រះ។ ប៉ុន្តែ តើបណ្ដាជនទាំងនោះចង់ឲ្យលោកយេស៊ូធ្វើជាស្ដេចរបស់ពួកគេទេ?—
ពេលដែលលោកជិះសត្វលាចូលទៅក្នុងក្រុងនោះ បណ្ដាជនភាគច្រើនបានក្រាលសម្លៀកបំពាក់ក្រៅរបស់ពួកគេនៅលើផ្លូវដែលលោកកំពុងធ្វើដំណើរ។ អ្នកខ្លះទៀតក៏បានកាត់មែកឈើ ហើយដាក់នៅលើផ្លូវនោះដែរ។ ដោយធ្វើដូច្នេះ នោះបង្ហាញថាពួកគេចង់ឲ្យលោកយេស៊ូធ្វើជាស្ដេចរបស់ពួកគេ។ ពួកគេបន្លឺសំឡេងថា៖ «អ្នកដែលមកជាស្ដេចក្នុងនាមព្រះយេហូវ៉ា មានពរហើយ!»។ ប៉ុន្តែ មិនមែនមនុស្សទាំងអស់សប្បាយចិត្តនោះទេ។ អ្នកដឹកនាំសាសនាខ្លះរហូតដល់បាននិយាយទៅកាន់លោកយេស៊ូថា៖ ‹សូមប្រាប់ពួកអ្នកកាន់តាមលោកឲ្យស្ងៀមទៅ›។—លូកា ១៩:២៨-៤០
ហេតុអ្វីមនុស្សទាំងនេះផ្លាស់ប្ដូរគំនិតមិនចង់ឲ្យលោកយេស៊ូធ្វើជាស្ដេចរបស់ពួកគេ?
ប្រាំថ្ងៃក្រោយមក គេបានចាប់លោកយេស៊ូ ហើយនាំលោកទៅវិមានរបស់ប៉ុនទាសពីឡាត ដែលជាអភិបាលរ៉ូម។ រួចមក ពួកសត្រូវរបស់លោកយេស៊ូបានចោទប្រកាន់ថា លោកបានអះអាងថាខ្លួនជាស្ដេច ហើយថាលោកជាអ្នកប្រឆាំងនឹងរដ្ឋាភិបាលរ៉ូម។ ដូច្នេះ ពីឡាតក៏សួរលោកយេស៊ូអំពីរឿងនោះ។ ប៉ុន្តែ លោកយេស៊ូបានបញ្ជាក់ថា លោកមិនព្យាយាមផ្ដួលរំលំរដ្ឋាភិបាលឡើយ។ លោកប្រាប់ពីឡាតថា៖ «រាជាណាចក្ររបស់ខ្ញុំមិនមែនជារបស់ពិភពលោកនេះទេ»។—យ៉ូហាន ១៨:៣៦
ពីឡាតបានចេញទៅខាងក្រៅវិមាន ហើយប្រាប់បណ្ដាជនថា គាត់មិនឃើញថាបុរសនេះមានកំហុសអ្វីទេ។ ប៉ុន្តែ បណ្ដាជនមិនចង់ឲ្យលោកយេស៊ូធ្វើជាស្ដេចរបស់ពួកគេទេ។ ពួកគេមិនចង់ឲ្យគេដោះលែងលោកយេស៊ូឡើយ។ (យ៉ូហាន ១៨:៣៧-៤០) បន្ទាប់ពី ពីឡាតបាននិយាយជាមួយនឹងលោកយេស៊ូម្ដងទៀត ពីឡាតនៅតែជឿជាក់ថា លោកយេស៊ូគ្មានកំហុសអ្វីឡើយ។ ដូច្នេះ នៅទីបំផុត ពីឡាតនាំលោកយេស៊ូចេញទៅខាងក្រៅ រួចមកគាត់ប្រាប់បណ្ដាជនជាលើកចុងក្រោយថា៖ «មើល! ស្ដេចរបស់អ្នករាល់គ្នា!»។ ប៉ុន្តែ បណ្ដាជនស្រែកឡើងថា៖ «យកគាត់ចេញ! យកគាត់ចេញ! ព្យួរគាត់ទៅ!»។
ពីឡាតសួរពួកគេថា៖ «តើឲ្យខ្ញុំព្យួរស្ដេចរបស់អ្នករាល់គ្នាឬ?»។ ពួកសង្ឃនាយកឆ្លើយថា៖ «យើងគ្មានស្ដេចក្រៅពីសេសារទេ»។ កូនច្បាស់ជាមិននឹកស្មានថាពួកគេនិយាយដូច្នោះទេ មែនទេ? ពួកសង្ឃអាក្រក់ទាំងនោះបានញុះញង់បណ្ដាជនឲ្យបដិសេធលោកយេស៊ូ!—យ៉ូហាន ១៩:១-១៦
ស្ថានភាពនៅសព្វថ្ងៃនេះគឺដូចគ្នានឹងស្ថានភាពនៅសម័យរបស់លោកយេស៊ូ។ មនុស្សភាគច្រើនប្រាកដជាមិនចង់ឲ្យលោកយេស៊ូធ្វើជាស្ដេចរបស់ពួកគេទេ។ ពួកគេប្រហែលជានិយាយថា ពួកគេជឿទៅលើព្រះ ប៉ុន្តែពួកគេមិនចង់ឲ្យព្រះ ឬគ្រិស្ដប្រាប់ពួកគេនូវអ្វីដែលពួកគេត្រូវធ្វើនោះទេ។ ពួកគេចង់បានរដ្ឋាភិបាលដែលពួកគេជ្រើសរើសដោយផ្ទាល់នៅផែនដីនេះ។
ចុះយើងវិញ? ពេលយើងរៀនអំពីរាជាណាចក្ររបស់ព្រះ និងអ្វីៗដ៏អស្ចារ្យទាំងអស់ដែលរាជាណាចក្រនោះនឹងសម្រេច តើនេះធ្វើឲ្យយើងមានអារម្មណ៍យ៉ាងណាចំពោះព្រះ?— យើងស្រឡាញ់លោក មែនទេ?— ដូច្នេះ តើតាមរបៀបណាយើងអាចបង្ហាញថាយើងស្រឡាញ់ព្រះ និងចង់ឲ្យរាជាណាចក្ររបស់លោកគ្រប់គ្រងមកលើយើង?—
ហេតុអ្វីលោកយេស៊ូទទួលការជ្រមុជទឹក? ហើយតើព្រះបានបង្ហាញយ៉ាងណាថា លោកពេញចិត្តចំពោះលោកយេស៊ូ?
យើងអាចបង្ហាញអារម្មណ៍របស់យើង ដោយធ្វើតាមគំរូរបស់លោកយេស៊ូ។ ចុះតើលោកយេស៊ូបានធ្វើអ្វី ដើម្បីបង្ហាញថាលោកស្រឡាញ់ព្រះយេហូវ៉ា?— លោកយេស៊ូពន្យល់ថា៖ «ខ្ញុំតែងតែធ្វើអ្វីដែលលោកពេញចិត្ត»។ (យ៉ូហាន ៨:២៩) មែនហើយ លោកយេស៊ូបានមកផែនដីនេះ‹ដើម្បីធ្វើតាមបំណងប្រាថ្នារបស់ព្រះ› ព្រមទាំង«បង្ហើយកិច្ចការដែលលោកបានផ្ដល់ឲ្យ»។ (ហេប្រឺ ១០:៧; យ៉ូហាន ៤:៣៤) សូមគិតអំពីអ្វីដែលលោកយេស៊ូបានធ្វើ មុនពេលលោកចាប់ផ្ដើមកិច្ចការផ្សព្វផ្សាយ។
លោកយេស៊ូបានទៅជួបយ៉ូហានដែលជាអ្នកជ្រមុជទឹក នៅឯទន្លេយ៉ូដាន់។ ពួកគាត់ទាំងពីរនាក់ដើរចូលទៅក្នុងទឹក ក្រោយមកយ៉ូហានបានពន្លិចលោកយេស៊ូទៅក្នុងទឹក រួចមកបានលើកលោកឡើងពីទឹកវិញ។ ហេតុអ្វីយ៉ូហានបានជ្រមុជទឹកឲ្យលោកយេស៊ូ? តើកូនដឹងទេ?—
តើយើងអាចប្រាប់អ្នកឯទៀតអំពីរាជាណាចក្ររបស់ព្រះនៅកន្លែងណាខ្លះ?
លោកយេស៊ូបានសុំយ៉ូហានជ្រមុជទឹកឲ្យលោក។ ប៉ុន្តែ តើយើងដឹងយ៉ាងដូចម្ដេចថា ព្រះចង់ឲ្យលោកយេស៊ូទទួលការជ្រមុជទឹក?— យើងដឹងដូច្នោះ ដោយសារពេលលោកយេស៊ូងើបឡើងពីទឹកវិញ លោកបានឮសំឡេងរបស់ព្រះពីស្ថានសួគ៌ថា៖ «អ្នកជាបុត្រដ៏ជាទីស្រឡាញ់របស់ខ្ញុំ។ ខ្ញុំពេញចិត្តនឹងអ្នកណាស់»។ ព្រះថែមទាំងបានចាក់សកម្មពលបរិសុទ្ធរបស់លោកដែលមានរាងដូចជាសត្វព្រាបមកលើលោកយេស៊ូទៀតផង។ ដូច្នេះ តាមរយៈការទទួលការជ្រមុជទឹកនោះ លោកយេស៊ូបានបង្ហាញថា លោកចង់បម្រើព្រះយេហូវ៉ាអស់មួយជីវិត គឺជារៀងរហូត។—ម៉ាកុស ១:៩-១១
ឥឡូវកូននៅតូចនៅឡើយ។ ប៉ុន្តែពេលកូនធំឡើង តើកូនចង់ធ្វើអ្វី?— តើកូនចង់ទទួលការជ្រមុជទឹកដូចលោកយេស៊ូដែរទេ?— មែនហើយ កូនគួរធ្វើតាមគំរូរបស់លោកយេស៊ូ។ គម្ពីរបានប្រាប់ថា លោកបានទុក«គំរូដើម្បីឲ្យអ្នករាល់គ្នាខំដើរតាមលំអានដានរបស់លោកឲ្យបានដិតដល់»។ (ពេត្រុសទី១ ២:២១) ពេលកូនទទួលការជ្រមុជទឹក កូននឹងបង្ហាញថា កូនពិតជាចង់ឲ្យរាជាណាចក្ររបស់ព្រះគ្រប់គ្រងមែន។ ប៉ុន្តែ យើងមិនគ្រាន់តែទទួលការជ្រមុជទឹកប៉ុណ្ណោះទេ យើងក៏ត្រូវធ្វើអ្វីថែមទៀតដែរ។
យើងត្រូវធ្វើតាមអ្វីទាំងអស់ដែលលោកយេស៊ូបានបង្រៀន។ លោកយេស៊ូបង្រៀនថា យើងមិនគួរ«រួមចំណែកក្នុងពិភពលោកទេ»។ បើយើងរួមចំណែកក្នុងពិភពលោកនេះ តើនោះបង្ហាញថាយើងស្តាប់បង្គាប់លោកដែរទេ? លោកយេស៊ូនិងពួកសាវ័ករបស់លោកមិនបានរួមចំណែកក្នុងពិភពលោកនេះទេ។ (យ៉ូហាន ១៧:១៤) បើដូច្នេះ តើពួកគាត់បានធ្វើអ្វី?— ពួកគាត់បានប្រាប់មនុស្សឯទៀតអំពីរាជាណាចក្ររបស់ព្រះ។ នោះគឺជាកិច្ចការសំខាន់បំផុតក្នុងជីវិតរបស់ពួកគាត់។ តើយើងអាចធ្វើដូច្នោះដែរបានទេ?— យើងអាចធ្វើបាន បើយើងពិតជាចង់ឲ្យរាជាណាចក្ររបស់ព្រះមកដល់ ដូចយើងអធិដ្ឋានសុំនោះ។
សូមមើលបទគម្ពីរទាំងនេះដែលប្រាប់យើងអំពីអ្វីដែលយើងអាចធ្វើដើម្បីបង្ហាញថា យើងចង់ឲ្យរាជាណាចក្ររបស់ព្រះមកដល់នៅ ម៉ាថាយ ៦:២៤-៣៣; ២៤:១៤ យ៉ូហានទី១ ២:១៥-១៧ និង៥:៣។
លោកអ្នកក៏ប្រហែលជាចូលចិត្តដែរ
ចូរបង្រៀនកូនរបស់អ្នក
រាជាណាចក្រមួយដែលនឹងគ្រប់គ្រងផែនដីទាំងមូល
ពេលលោកយេស៊ូគ្រប់គ្រងផែនដី តើនឹងមានស្ថានភាពបែបណា? តើអ្នកចង់រស់នៅពេលនោះទេ?
