WUNASI omusabe owa Yesu akangiriraya abigha biwe?— Wamabya isiwasi gho, thwangana soma gho omwa Biblia, omu Matayo 6:9-13. Omusabe ow’abangyi bakahulha mw’owa Thatha Wethu, muli ebinywe bino: ‘Obwami bwawu bwase.’ Wunasi Obwami bwa Nyamuhanga nga niki?—

Leka nga kusoborere, omwami ni mundu oyukathabalha ekihugho kutse ekitsweka kirebe. Neryo obuthabali bwiwe bukahulhawa mw’obwami. Omwa bindi bihugho oyukathabalha ekihugho kirebe akahulhawa mwa prezidenti. Omuthabali ow’obuthabali bwa Nyamuhanga akahulhawa mwa ndi?— Mw’Omwami. Kya kikaleka obuthabali bwa Nyamuhanga ibwa hulhwa mw’Obwami.

Wunasi Yehova Nyamuhanga nga mwasombolha ndi eribya Mwami w’obuthabali Bwiwe?— Mughalha wiwe Yesu Kristo. Busana naki alengire  omuthabali wosi-wosi oyo abandu banga sombolha?— Kundi Yesu anzire Thatha wiwe Yehova ya kutsibu. Busana n’ekyo akabera erikolha ebithunganene.

Emyaka mingyi enyuma Yesu athe abuthirwa e Betelehemu, e Biblia muyakania okw’ibuthwa liwe kandi muyabugha yithi angabere Muthabali oyo Nyamuhanga abirisombolha. Thusome okwa mwatsi oyu omwa Isaya 9:6, 7. Hakabugha hathi: ‘Omwana asyabuthwa busana nethu, thwasyahebwa omughalha, n’obuthabale bwasyabya okwa bithigho biwe. Erina liwe lyasyahulhwa mw’Omunya-mwami w’Obuholho. Erikanya ly’erithabalha liwe ly’obuholho siryendi syayira nduli.’

Wunasi ekikaleka Omuthabali w’Obwami bwa Nyamuhanga iniahulhwa mwa “Omunya-mwami”?— Wunasi, omunya-mwami akabya ini mughalha w’omwami. Neryo Yesu ni Mughalha w’Omwami Mukulhu, Yehova. Aliriryo Yehova abiriyira Yesu mw’Omwami ow’obuthabali Bwiwe, obukendi syathabalha ekihugho ahabw’emyaka rukumi. (Eribisulirwa 20:6) Yesu abere abiribatizibwa, mwatsuka ‘erithulhughania athi, Mubindule emithima yenyu erireka ebibi, kusangwa obwami bw’elhubulha buli hakuhi.’—Matayo 4:17.

Wukalengekanaya ni kyahi ekyaleka Yesu iniabugha athi Obwami buli hakuhi?— Kundi Omwami, oyuwangabere muthabali elhubulha enyuma waho, abya iniane nabu! Ky’ekyaleka Yesu iniabwira abandu athi: ‘Obwami bwa Nyamuhanga buli omwa kathi-kathi kenyu.’ (Luka 17:21) Mbwino sikyanga kutsemesya eribya hakuhi n’Omwami wa Yehova erihika n’okwa kiika indi iwangana muthulhako?—

Neryo thambwira, ni mubiiri wahi mukulhu owa Yesu asyakolha okwa kihugho?— Yesu mwasubirya ekibulyo ekyo, athi: ‘Litholere inathulha engulhu yuwene y’obwami bwa Nyamuhanga oko yindi miyi nibya, kusangwa Nyamuhanga mwanyithuma erikolha omwatsi oyu.’ (Luka 4:43)  Yesu abya inianasi ngoku athe angakolire omubiiri w’erithulira w’eyuwene. Neryo, wukalengekanaya ni kyahi ekyabya akolire?—

Yesu mwaghenda n’abandi neryo amabakangania ngoku banga kolha omubiiri w’erithulira. Abo atsuka erikangirirya babya ib’abandu 12 abo asombolha ng’abakwenda. (Matayo 10:5, 7) Mbwino Yesu mwakangirirya abakwenda biwe basa? Eyihi, e Biblia yikabugha yithi Yesu mwakangirirya n’abandi bandu bangyi erithulhughania. Obuthuku bune mulhaba, mwathuma abandi bigha biwe 70 mu babiri-babiri. Mubakangirirya abandu baki?— Yesu mwabugha athi: ‘Mubwire abandu muthi, Obwami bwa Nyamuhanga bwa mahika hakuhi nenyu.’ (Luka 10:9) Omwa nzira eyi, abandu mubigha okwa buthabali bwa Nyamuhanga.

Kera omwa Israeli, abami ibakaghenda okwa kyana ky’epunda bakaghenda omwa muyi eriyikangania okw’abandu. Eki kya Yesu akakolha akabungira e Yerusalemu omurundi w’erighunzerera. Yesu akendi syabya Muthabali w’Obwami bwa Nyamuhanga. Mbwino abandu bananzire iniabya Mwami wabu?—

Akabya anemwasa, abandu bangyi bakatsuka erisanza esyongimba syabu sy’omwa nzira. Abandi bakathwa amasanze n’erihira w’omwa nzira. Erikolha eki likakanganaya ngoku banzire Yesu iniabya Mwami wabu. Bakabirikira bathi: ‘Nyamuhanga atsumule Omwami, oyukasa omwa lina lya Yehova!’ Aliriryo abosi sibatsemire. Erithwalira haghuma, abandi basondoli b’edini nibya bakabwira Yesu bathi, ‘Bwira abigha bawu wuthi bahune.’—Luka 19:28-40.

Hakabya hahwa biro bithanu, Yesu akahambawa n’erithwalhwa omwa kikale embere sy’omuthabali, Pontio Pilato. Esyonzighu sya Yesu sikabugha sithi Yesu akayahulha mw’omwami kandi sithi akahakanisaya obuthabali bwe Roma. Neryo Pilato akabulhaya Yesu okw’omwatsi oyu. Yesu akakanganaya ngoku syali hakanisaya obuthabali. Akabwira Pilato athi: ‘Obwami bwaghe si bw’ekihugho kino.’—Yoane 18:36.

Pilato akahulhukira eyihya n’eribwira abandu athi syathabana oku Yesu kw’omusango. Aliriryo abandu sibanzire Yesu akabya Mwami wabu. Kandi  sibanzire akalhwikwa. (Yoane 18:37-40) Akabya abirithasya kania na Yesu, Pilato akaminya ndeke-ndeke ngoku Yesu syathakolha ekibi kyosi-kyosi. Erighunzerera, Pilato akabya abiriletha Yesu y’eyihya omurundi w’erighunzerera, akabugha athi: ‘Mulebaye, omwami wenyu y’oyu!’ Aliriryo abandu bakabirikira bathi: ‘Ithawe! Ithawe! Ahanikawe!’

Pilato akabulhaya athi: ‘Nyihanike omwami wenyu?’ Abahereri bakulhu bakasubiraya bathi: ‘Sithuwithe omwami nina Kaisari.’ Thalengekania okwa kindu ekiri ng’eki! Abahereri babi abo bakaleka abandu ibaghana Yesu!—Yoane 19:1-16.

 Kwa bine bithya na munabwire. Abandu bangyi sibanzire Yesu akabya Mwami wabu. Bangana bugha bathi bikirirye Nyamuhanga, aliriryo isibanzire Nyamuhanga kutse Kristo akababwira eky’erikolha. Banzire amathabali wabu aw’okwa kihugho kino.

Kandi ibbwa ithwe? Thukabya thuk’igha okw’Obwami bwa Nyamuhanga n’ebibuya ebyosi ebyo bukendi syakolha, eki kikaleka ithwa lhangira Nyamuhanga ya thuthi?— Kikaleka ithwa mwanza, kwa bithe?— Ibbwa kwesi, thwanga kangania thuthi ngoku thumwanzire kandi ngoku thwanzire Obwami bwiwe buthuthabaleko?—

Thwangana kangania Nyamuhanga ngoku thukayowa omw’ikwama-kwamania eky’erileberyako kya Yesu. Neryo Yesu mwakolha ki erikangania ngoku anzire Yehova?— Yesu mwasoborera athi, ‘Ngakolha ebiro byosi emyatsi eyikamutsemesaya.’ (Yoane 8:29) Kwenene, Yesu mwasa okwa kihugho ‘erikolha erisonda lya Nyamuhanga’ ‘n’eribugha omubiiri wiwe.’ (Abaebrania 10:7; Yoane 4:34) Thulebaye ekya Yesu akolha athe atsuka omubiiri wiwe ow’erithulira.

Yesu mwaghenda eyiri Yoane Mubatizya okwa Lhusi Yorodani. Babere babiringira omw’amaghetse, Yoane mwalubba Yesu n’erimwimania kandi. Wunasi ekyaleka Yoane iniabatizya Yesu?—

Yesu yuwabwira Yoane athi amubatizaye. Aliriryo thukaminya thuthi ngoku Nyamuhanga abya anzire Yesu iniabatizibwa?— Thukaminya ekyo kundi Yesu  abere akalhua omw’amaghetse, mwowa omulenge wa Nyamuhanga akalhua elhubulha athi: ‘Wuli Mughalha waghe mwanze, namakutsemera ndeke.’ Nibya Nyamuhanga mwathuma n’omulimu wiwe abuyirire ng’akalikuku eriandaghalira oku Yesu. Neryo omw’ibatizibwa, Yesu mwakangania ngoku anzire erikolera Yehova omwa ngebe yiwe yosi, inga, erihika kera na kera.—Mariko 1:9-11.

Iwe wukine mwana mulere. Aliriryo ni kyahi ekya wukendi syakolha wabirikulha?— Nga Yesu, wune mwendi syabatizibwa?— Wutholere iwamugherererya, kundi e Biblia yikabugha yithi mwathusighira ‘olhughobe olho thwanga kwama.’ (1 Petero 2:21) Wukabya wukabatizibwa, wukakanganaya ngoku kwenene wanzire Obwami bwa Nyamuhanga ibwa kuthabalhako. Aliriryo eribatizibwa lisa siriri ghunza.

Thutholere ithwa kenga ebyosi ebya Yesu akangiriraya. Yesu mwabugha athi ‘sithubye b’ekihugho.’ Ithune mwendibya ithwa mamukenga thwamayingirya omwa myatsi ey’ekihugho? Yesu n’abigha biwe mubayihighulha okwa myatsi ng’eyo. (Yoane 17:14) Neryo ni kyahi ekya babya bakolire?— Mubabwira abandi oku Bwami bwa Nyamuhanga. Oyo w’owabya mubiiri mukulhu omwa ngebe yabu. Mbwino nethu thwangana kolha gho?— Ee, kandi thukendi kolha gho thwamabya ithukamanyisaya ebya thukabugha thukasaba thuthi Obwami bwa Nyamuhanga bwase.