Kauhanyo 45

Mubuso Wa Mulimu Ki Nto Mañi? Mwa Ku Boniseza Kuli Lwa U Bata

KANA wa ziba tapelo yeo Jesu n’a lutile balateleli ba hae?— Haiba ha u i zibi, lwa kona ku i bala hamoho mwa Bibele, kwa Mateu 6:9-13. Tapelo yeo, ye ba biza ba bañata kuli Tapelo ya Mulena, i na ni manzwi a’ li: “Ku tahe mubuso wa hao.” Kana Mubuso wa Mulimu wa u ziba?—

Mubuso ki mufuta wa puso. Ku na ni mifuta ye miñwi ya lipuso, mi ku ye miñwi ya zona, mubusi u bizwa kuli prezidenti. Kono puso ya sepisize Mulimu i bizwa kuli Mubuso mi mubusi wa ona u bizwa kuli Mulena.

Kana wa mu ziba y’o Jehova Mulimu a ketile ku ba Mulena wa mubuso wa Hae?— Ki Mwan’a hae, Jesu Kreste. Ki kabakalañi h’a li mubusi yo munde ku fita mutu ufi kamba ufi ya n’a ka ketiwa ki batu?—  Libaka kikuli Jesu luli wa lata Ndat’ahe, Jehova. Kacwalo, kamita u ezanga ze lukile.

Kale-kale pili Jesu a si ka pepiwa mwa Betelehema, Bibele ne i bulezi za ku pepwa kwa hae mi ne i bulezi kuli n’a ka ba Mubusi ya ketilwe ki Mulimu. Ha lu bale ka za teñi, kwa Isaya 9:6, 7. I li: ‘Lu pepezwi mwana, lu filwe wa mushimani: Bulena bu ka bewa fa liheta la hae; mi u ka bizwa Ya Babazwa, Muelezi, Mulimu ya Mata, Ndate wa kamita, [Nabi ya Kozo, NW]. U ka hulisa mubuso, ni ku tiisa kozo ye sa feli.’

Kana wa ziba libaka Mubusi wa Mubuso wa Mulimu h’a bizwa kuli “Nabi”?— Nabi y’o ki mwan’a mulena. Mi Jesu ki Mwan’a Mulena yo Mutuna, Jehova. Kono Jehova hape u beile Jesu ku ba Mulena wa mulonga wa Hae, ona o ka busa lifasi ka lilimo ze 1,000. (Sinulo 20:6) Jesu ha s’a kolobelizwe, “a kala ku luta batu, a li: Mu bake, kakuli mubuso wa kwa lihalimu u sutelezi fakaufi.”—Mateu 4:17.

Ka m’o bonela wena, Jesu n’a buleleziñi kuli Mubuso n’o li fakaufi?— Kakuli Mulena, y’o hasamulaho n’a ka busa kwa lihalimu, n’a li mwahal’a bona luli! Ki kabakaleo Jesu ha n’a bulelezi batu kuli: “Mubuso wa Mulimu u mwahal’a mina.” (Luka 17:21, NW) Kana wa tabela kuli Mulena ya ketilwe ki Jehova a be bukaufi hahulu ni wena kuli mane wa kona ku mu swala?—

Cwale ha ku ni bulelele, Jesu n’a tile fa lifasi ku t’o eza musebezi mañi wa butokwa?— Jesu n’a alabile puzo yeo, ka ku bulela kuli: ‘Ni minzi ye miñwi ni swanezi ku i bulelela taba ye munati ya mubuso wa Mulimu; kakuli ki sona se ni lumezwi.’ (Luka 4:43) Jesu n’a ziba kuli n’a sa koni ku eza musebezi kaufela wa ku kutaza a nosi. Kacwalo, ki sifi s’o bona wena kuli n’a ezize?—

Jesu n’a yanga ni batu ba bañwi ni ku ba bonisa mwa ku ezeza musebezi wa ku  kutaza. Ba pili ba n’a lutile n’e li ba 12 ba n’a ketile ku ba baapositola. (Mateu 10:5, 7) Kono kana Jesu n’a lutile fela baapositola ba hae kuli ba eze musebezi w’o? Kutokwa, Bibele i bulela kuli Jesu hape n’a lutile ba bañata ba bañwi kuli ba kutaze. Ku zwa f’o, a luma kwapil’a hae balutiwa ba bañwi ba 70 kuli ba ye ka bubeli ka bubeli. Mi ne ba lutileñi batu?— Jesu n’a ize: “Mu ba bulelele, mu li: Mubuso wa Mulimu u sutelezi fakaufi ni mina.” (Luka 10:9) Ka ku eza cwalo, batu ne ba itutile za mulonga wa Mulimu.

Kale-kale mwa Isilaele, malena ba banca ne ba pahamanga fa kambongolo ni ku kena mwa munzi kuli ba iponahaze kwa batu. Jesu cwale u eza honacwalo h’a potela Jerusalema lwa mafelelezo. Wa bona, Jesu u ka ba Mubusi wa Mubuso wa Mulimu. Kana batu ba tabela kuli a be Mulena?—

H’a nze a pahami cwalo fa kambongolo, buñata bwa batu ba kalisa ku yala liapalo za bona mwa nzila fapil’a hae. Ba bañwi ba lema mitai kwa likota ni ku i yala mwa nzila. Ka ku eza cwalo, ba bonisa kuli ba bata kuli Jesu a be Mulen’a bona. Ba huweleza, ba li: “Ku lumbwe Muywandi ya taha ka Libizo la Mulena!” Kono batu ba bañwi ha ba si ka taba. Mane, ba bañwi ku ba bahulu ba bulapeli ba bulelela Jesu, ba li, ‘U bulelele balutiwa ba hao ba kuze.’—Luka 19:28-40.

Mazazi a ketalizoho hasamulaho, Jesu wa tamiwa mi wa isiwa mwa lapa kuli a yo zekiswa ki mubusisi Ponse Pilato. Lila za Jesu li bulela kuli Jesu u ikunga ku ba mulena ni kuli u lwanisa mulonga wa Maroma. Kacwalo Pilato u buza Jesu ka za teñi. Jesu u bulela kuli h’a liki ku ikwameka mulonga. U bulelela Pilato, u li: “Mubuso wa ka hasi wa lifasi le.”—Joani 18:36.

Pilato cwale u ya kwande ni ku bulelela batu kuli ha ku na mulatu ni o mukana wa fumani ku Jesu. Kono cwale batu ha ba lati kuli Jesu a be Mulen’a bona. Ha ba lati kuli a lukululwe. (Joani 18:37-40) Ha s’a bulezi hape ni Jesu, Pilato wa iponela hande kuli ha ku na ni se sikana  s’a fosize Jesu. Kacwalo, ha s’a isize Jesu kwande lwa mafelelezo, Pilato u li: “Mulen’a mina ki yo!” Kono batu ba huweleza, ba li: “Mu zwise, mu zwise, mu kokotele!”

Pilato u buza kuli: “Ni kokotele Mulen’a mina?” Baprisita ba bahulu ba alaba, ba li: “Ha lu na mulena u sili, konji Sesare.” Nahana fela ka za teñi! Baprisita ba ba maswe bao ba konile ku fulalelisa batu ku Jesu!—Joani 19:1-16.

Ni kacenu ku swana fela ni mo ne ku inezi mwa miteñi yeo. Batu ba bañata ha ba lati luli kuli Jesu a be Mulen’a bona. Ba kana ba bulela kuli ba lumela  ku Mulimu, kono ha ba lati kuli Mulimu kamba Kreste a ba bulelele za ku eza. Ba bata milonga ya bona ona fa lifasi fa.

Luna bo? Ha lu ituta ka za Mubuso wa Mulimu ni lika ze nde kaufela ze u ka eza, taba yeo i lu susueza ku ikutwa cwañi ka za Mulimu?— Lwa mu lata, nji cwañi?— Kacwalo, lu kona ku bonisa cwañi Mulimu kuli luli lwa mu lata ni kuli lu bata ku busiwa ki Mubuso wa hae?—

Lwa kona ku bonisa Mulimu mo lu ikutwela ka ku latelela mutala wa Jesu. Mi Jesu n’a ezizeñi kuli a bonise kuli n’a lata Jehova?— Jesu n’a talusize kuli: “Kamita ni eza ze mu tabisa.” (Joani 8:29) Ee, Jesu n’a tile fa lifasi kuli a t’o ‘eza se si latwa ki Mulimu’ ni kuli a “feleleze musebezi wa hae.” (Maheberu 10:7; Joani 4:34) Ha ku nyakisise sa n’a ezize Jesu pili a si ka kalisa musebezi wa hae wa ku kutaza.

Jesu n’a shetumukezi ku Joani Mukolobezi mwa Nuka ya Jordani. Ha se ba puwile mwa mezi, Joani a nweliseleza Jesu mwa mezi ni ku mu tumukisa hape. Kana wa ziba libaka Joani ha n’a kolobelize Jesu?—

Jesu n’a kupile Joani ku eza cwalo. Kono lu ziba cwañi kuli Mulimu n’a bata kuli Jesu a kolobezwe?— Lu ziba cwalo kakuli Jesu ha n’a ombokile  mwa mezi, n’a utwile linzwi la Mulimu li bulela ku zwelela kwa lihalimu kuli: ‘Ki wena Mwan’a ka ya latwa, ye ni katelwa hahulu.’ Mane Mulimu n’a lumile moya o kenile mwa sibupeho sa liiba kuli u shulumukele ku Jesu. Kacwalo, ka ku kolobezwa, Jesu n’a bonisa kuli n’a bata ku sebeleza Jehova mwa bupilo bwa hae kaufela, ee, ku ya ku ile.—Mareka 1:9-11.

Cwale wena u sa hula. Kono u ka ezañi ha s’o hulile?— Kana u ka ba sina Jesu ni ku kolobezwa?— U lukela ku mu likanyisa, kakuli Bibele i bulela kuli n’a ku siyezi ‘mutala, kuli u hate mw’a n’a hatile.’ (1 Pitrosi 2:21) Ha u kolobezwa, u ka bonisa kuli luli u bata ku busiwa ki Mubuso wa Mulimu. Kono ku kolobezwa fela ha ku si ka likana.

Lu tokwa ku utwa lika kaufela za n’a lutile Jesu. Jesu n’a ize ha lu swaneli ku ba “ba lifasi.” Kana ne lu ka mu utwa ha ne lu ka ikenya mwa lika za lifasi? Jesu ni baapositola ba hae ne ba si ka ikenya mwa lika ze cwalo. (Joani 17:14) Kono ne ba ezizeñi?— Ne ba bulelezi batu ba bañwi ka za Mubuso wa Mulimu. W’o ne li musebezi o mutuna mwa bupilo bwa bona. Kana ni luna lwa kona ku eza cwalo?— Ee, mi lu ka eza cwalo haiba lu bonisa kuli kaniti luli lu lapela kuli Mubuso wa Mulimu u tahe.

Ha ku bone mañolo a mañwi a lu bulelela ze lu kona ku eza ze bonisa kuli lu bata kuli Mubuso wa Mulimu u tahe: Mateu 6:24-33; 24:14; 1 Joani 2:15-17; ni 5:3.

[Siswaniso se si fa likepe 232]

Jesu n’a tile fa lifasi ku t’o eza musebezi mañi?

[Maswaniso a fa likepe 235]

Ki kabakalañi batu ha ba cinca mihupulo ya bona ka za ku bata Jesu kuli a be Mulena?

[Siswaniso se si fa likepe 236]

Jesu n’a kolobelelizweñi, mi Mulimu n’a bonisize cwañi kuli n’a mu katelwa?

[Maswaniso a fa likepe 237]

Ki kai ko lu kona ku bulelela ba bañwi ka za Mubuso wa Mulimu?