LE UYUKILE lulombelo lwāfundije Yesu balondi bandi?—Shi kuyukile’lopo, tubwanya kutanga’lo pamo mu Bible, mu Mateo 6:9-13. Mu luno lulombelo, lwitanga bavule bu lwa “Tata Wetu,” mudi ne binenwa binena’mba: “Bulopwe bobe bufike.” Le uyukile Bulopwe bwa Leza i bika?—

Ivwana, mulopwe i muntu ubikadile ntanda nansha mwaba kampanda. Ne umbikalo wandi nao witwanga bu bulopwe. Mu matanda amo yewa wendeja umbikalo witwanga bu mwimaniji nansha pelejida. Le Muludiki wa Umbikalo wa Leza nandi witwa namani?—I Mulopwe. O mwanda mwine umbikalo wa Leza witwa bu Bulopwe.

Lelo uyukile i ani watongelwe na Yehova bu Mulopwe wa umbikalo Wandi?—I wandi Mwana, Yesu Kidishitu. I kika kinenenwa amba Yesu i mwendeji muyampe kupita’ko mulopwe ye-yense ukokeja kutongwa na bantu?—Yesu i mwendeji muyampe mwanda uswele  Shandi Yehova bya binebine. O mwanda mwine aye uloñanga enka byoloke.

Pa kalā kubajinji kwa Yesu kubutulwa mu Betelema, Bible wēsambīle pa kubutulwa kwandi ne kunena’mba aye ye ukekala Mulopwe mutongwe na Leza. Leka bidi tutange uno mwanda mu Isaya 9:6, 7. Unena’mba: “Mwana i mwitubutwilwe, mwana mwana-mulume i mwitupebwe po tudi; penepa buledi bwa ntanda bukekalanga pa kipuji kyandi; ino dijina dyandi dikenikwa bu . . . Mwana-mulopwe wa ndoe. Ntundubuko ya bubikadi bwandi ne ya ndoe mine, kekukekalapo mfulo nansha patyetye pene.”

Le uyukile kityilwa Mulopwe wa Bulopwe bwa Leza pano bu “Mwana-mulopwe”?—Eyo, mwana-mulopwe i muntu ubutwilwe na mulopwe. Ne Yesu nandi i Mwana wa Mulopwe Mukatampe, Yehova. Ino Yehova wābikikile ne Yesu nandi bu Mulopwe wa umbikalo wandi, ye ukabikadila ino ntanda mu myaka kanunu. (Kusokwelwa 20:6) Kupwa kwa Yesu kubatyijibwa, waālwile “kusapula myanda miyampe’mba: Alamukai bidi ku mityima ke-buntu bulopwe bwa Leza bubafwena pa bwipi.”—Mateo 4:17.

Molangila, i kika kyādi kinenena Yesu amba Bulopwe kebudi pabwipi?—I mwanda aye mwine Mulopwe wādi wa kukabikala mūlu, wādi kadi kala pamo nabo! O mwanda Yesu wāsapwidile bantu amba: “Bulopwe bwa Leza budi mu bukata bwenu.” (Luka 17:21, BB) Mwene nobe wadi wa kusangala shi Mulopwe utongelwe na Yehova udi pabwipi nobe pokokeja nansha kumutenga?—

Nsapwile’po bidi, i mwingilo’ka wa mvubu wāidile Yesu pano panshi?—Yesu mwine wālondolwele kino kipangujo, amba: “Mfwanyinwe kusapula Myanda Miyampe ya Bulopwe bwa Leza ne ku bibundi bikwabo monka, mwanda e kyo kyantumine Leza.” (Luka 4:43, MB) Yesu wādi uyukile amba kakokejapo kusapula buno busapudi bonso bunka bwandi. Penepa, molangila wālongele’po namani?—

 Yesu wāselele bantu bakwabo, wēbalombola mwa kwingidila uno mwingilo wa busapudi. Bantu babajinji baāfundije bādi 12, boba baātongele bu batumibwa bandi. (Mateo 10:5, 7) Ino le Yesu wāfundije’nka batumibwa bandi kete kwingila uno mwingilo? Ehe, Bible unena’mba Yesu wāfundije kadi ne bantu bakwabo bavule ba kusapula. Mwenda mafuku, wātuma bana ba bwanga bakwabo 70, wēbatuma babidi babidi. Ne le bādi bafundija bantu bika?—Yesu wānene’mba: “Mukebanena’mba: Bulopwe bwa Leza bubemufwenenena pa bwipi.” (Luka 10:9) Uno o muswelo wāyukile bantu Bulopwe nansha umbikalo wa Leza.

Pa kala mu Isalela, balopwe bapya pa kutwela mu kibundi dibajinji, bādi bakanda pa kana ka kimbulu mwanda wa kukelombola ku bantu. Pano, Yesu nandi wakanda pa kana ka kimbulu pa kukapempula Yelusalema musunsa wa mfulo. Ubamone pano, Yesu usa kwikala Mulopwe wa Bulopwe bwa Leza. Lelo bantu bamusaka ekale Mulopwe wabo?—

Ivwana, aye pa kwiya utentamine pa kana ka kimbulu, bantu bavule mu kibumbo abashilula kwala bisandi byabo mu dishinda kumeso kwaenda. Bakwabo baposola’nka ne bimuna bya mityi ne malala ne kwala’byo mu dishinda. Pobala namino’u, i kulombola kobalombola amba basaka Yesu ekale Mulopwe wabo. Kebela mabila amba: “Keye wadyese ne dyesepo! Mulopwe wakwiya mu dijina dya Yehova!” Ino ke bonsopo basepelela. Mwanda bakulumpe ba bipwilo bamo abanena Yesu amba: ‘Kanda bidi bana bobe ba bwanga.’—Luka 19:28-40.

Mafuku atano pa kupita’po, abakwata Yesu ne kukamutweja mu njibo mikata amba akasambe ku meso a mbikavu, Pontyusa Pilato. Balwana na Yesu kebanena amba Yesu witelanga aye mwine bu mulopwe ne amba unenenanga bulopwe bwa bene Loma bibibibi. Penepa Pilato waipangula Yesu pa uno mwanda. Yesu walombola amba aye kakimbengapo kuponeja bulopwe. Wasapwila Pilato amba: “Bulopwe bwami kebudipo bwa panopantanda, mhm.”—Yoano 18:36.

Kupwa Pilato watambe panja, wasapwila bantu amba nkimwenepo mwanda udi nao Yesu nansha umo. Ino pano bantu kebasakilepo  Yesu ekale Mulopwe wabo. Kebasakilepo bamukutulule ende. (Yoano 18:37-40) Pa kupwa kwisamba monka na Yesu, Pilato wamone amba na bubine Yesu kadipo na mwanda mubi walongele. Penepo, ke ku mfulo, Pilato watambijija Yesu panja musunsa wa mfulo, kanena’mba: “Monai bidi, Mulopwe wenu yao!” Ino bantu abaningija mawi amba: “Mutwalei! Mutwalei! Mukamwipaye”!

Pilato waipangula’mba: “Nemwipaile mulopwe wenu’ni a?” Babitobo bakulu nabo amba: “Bātwe ketudipo ne mulopwe mukwabo poso’nka Kesala.” Ulanga i biyampe namino? Bano babitobo ababwanya kwalamuna bantu kebapele Yesu!—Yoano 19:1-16.

 Dyalelo nadyo bidi enka muswelo umo. Bantu bavule kebasakepo Yesu kwikala Mulopwe wabo. Bakokeja kunena amba betabije Leza, ino koku bapela Leza nansha Kidishitu kwibalombola byobafwaninwe kulonga. Basaka enka malopwe a abo bene a pano pa ntanda.

Lelo batwe netu? Kitatyi kyotwifunda myanda ya Bulopwe bwa Leza ne bintu bya kutendelwa byobukalonga, lelo bitufikijanga ku kumona Leza namani?—Bitufikija ku kumuswa, mwene i amo?—Le penepa, tubwanya kulombola Leza namani amba tumuswele ne amba tusaka Bulopwe bwandi bwitubikadile?—

Tubwanya kulombola Leza malango etu na kulonda kimfwa kya Yesu. Le Yesu nandi wālongele namani mwanda wa kulombola amba uswele Yehova?—Yesu wānene amba: “Ami nami noñanga byonka bya kumutōkeja ku mutyima wandi mafuku onso.” (Yoano 8:29) Bine, kyāidile Yesu pano panshi i ‘kulonga kiswa-mutyima kya Leza’ ne “kumupwila mīngilo yandi.” (Bahebelu 10:7; Yoano 4:34) Tutale byālongele Yesu kubajinji kwa kushilula mwingilo wandi wa busapudi.

Yesu wāendele ku Munonga wa Yodano kudi Yoano Mubatyiji. Abo pa kwikila mu mema, Yoano wātokenya Yesu aye yense mu mema kupwa kadi wāmwabula’mo. Le uyukile Yoano kyaābatyijije Yesu?—

I Yesu wānene Yoano amubatyije. Ino le tuyukile namani amba Leza wāsakile Yesu  abatyijibwe?—Twi bekiyuke mwanda Yesu pa kwabuka’tu mu mema, wāivwene diwi dya Leza mūlu dinena’mba: ‘Abe wi wami Mwana wa kuswedibwa ontōkelwe pa mutyima.’ Leza wātuma ne mushipiditu sandu wandi mu kimfwa kya nkunda wātentama Yesu. Nanshi Yesu wālombwele kupityila ku lubatyijo amba usenswe kwingidila Yehova mu būmi bwandi bonso, nyeke.—Mako 1:9-11.

Pano nobe yeu wenda utama. Ino le ukalonga bika shi ubakule?—Lelo nobe ukefwana Yesu ne kubatyijibwa?—Ufwaninwe kumwiula, mwanda Bible unena amba aye “wemushia bu-kitompekejo kya kumulonda bānwe mu māyo andi.” (1 Petelo 2:21) Shi ubakabatyijibwa, nabya ukalombola amba usakanga binebine kubikalwa na Bulopwe bwa Leza. Ino kubatyijibwa konkakonka kekubwenepo.

Tufwaninwe kulonda byonso byāfundije Yesu. Yesu wānene amba ketufwaninwepo kwikala ‘ba ino ntanda.’ Lelo tukekala bamukōkele shi twikujije mu bintu bya ino ntanda? Yesu ne batumibwa bandi bādi betalule mu bya ino ntanda. (Yoano 17:14) Ino le abo bādi balonga bika?—Bādi basapwila bantu bakwabo myanda ya Bulopwe bwa Leza. Uno o wādi mwingilo mukatampe mu būmi bwabo. Lelo netu tubwanya kwiwingila?—Bine, tubwanya, ne tukewingila shi tulonga mungya byobya byotulombela amba Bulopwe bwa Leza bwiye.