အခန်း ၄၅
ဘုရားနိုင်ငံတော်ဆိုတာ ဘာလဲ။ နိုင်ငံတော်ကို လိုလားကြောင်း ဘယ်လို ပြမလဲ
နောက်လိုက်တွေကို ယေရှု သင်ပေးခဲ့တဲ့ ဆုတောင်းချက်ကို ကလေးတို့ သိကြသလား။— မသိရင် ကျမ်းစာမှာ မဿဲ ၆:၉-၁၃ ကို အတူတူ ဖတ်ကြည့်နိုင်တယ်။ သခင့်ဆုတောင်းချက်လို့ လူအတော်များများ ခေါ်ကြတဲ့ ဒီဆုတောင်းချက်ထဲမှာ “နိုင်ငံတော် လာပါစေ” ဆိုတဲ့ စကားပါတယ်။ ဘုရားသခင့် နိုင်ငံတော်ဟာ ဘာလဲ ဆိုတာ သိသလား။—
နိုင်ငံတော်ဆိုတာ အစိုးရအုပ်ချုပ်မှု ပုံစံတစ်မျိုး ဖြစ်တယ်။ တခြားအစိုးရပုံစံ အမျိုးမျိုးလည်းရှိပါတယ်။ တချို့အစိုးရအဖွဲ့ရဲ့ အကြီးအကဲကို သမ္မတလို့ ခေါ်ကြတယ်။ ဒါပေမဲ့ ဘုရားသခင် ကတိပေးထားတဲ့ အစိုးရကိုတော့ နိုင်ငံတော်လို့ ခေါ်ပြီး အုပ်ချုပ်သူကိုတော့ ဘုရင်လို့ ခေါ်တယ်။
ယေဟောဝါဘုရားက နိုင်ငံတော်ရဲ့ ဘုရင်အဖြစ် ဘယ်သူ့ကို ရွေးချယ်ထားတယ်ဆိုတာ ကလေးတို့ သိကြသလား။— သားတော် ယေရှုခရစ်ကိုပဲပေါ့။ ယေရှုဟာ လူသားတွေ ရွေးချယ်တဲ့ ဘယ်အုပ်ချုပ်သူထက်မဆို ဘာကြောင့် ပိုသာလွန်သလဲ။— ယေရှုဟာ ဖခင်ယေဟောဝါကို တကယ်ချစ်တဲ့အတွက်ကြောင့်ပါပဲ။ ဒါကြောင့်လည်း မှန်ရာကို ယေရှု အမြဲလုပ်ဆောင်တာပေါ့။
ဘက်သလီဟင်မြို့မှာ ယေရှု မမွေးခင် ရှေးရှေးကတည်းက သူမွေးမယ့်အကြောင်း၊ သူဟာ ဘုရားသခင် ရွေးချယ်တဲ့ အုပ်ချုပ်သူ ဖြစ်မယ့်အကြောင်း ကြိုပြောထားတယ်။ ဒီအကြောင်းကို ဟေရှာယ ၉:၆၊ ၇ မှာ ဖတ်ကြည့်ရအောင်။ “ငါတို့အတွက် ကလေးတစ်ယောက် မွေးဖွားလာတယ်။ ငါတို့အတွက် သားတစ်ယောက်ကို ပေးသနားတယ်။ အုပ်ချုပ်ခွင့်အာဏာက သူ့ပခုံးပေါ် ကျရောက်လာမယ်။ သူ့နာမည်ဟာ . . . ငြိမ်းချမ်းရေးမင်းသား ဖြစ်လိမ့်မယ်။ သူ့ရဲ့ အုပ်ချုပ်ခွင့်အာဏာနဲ့ ငြိမ်သက်ခြင်းဟာအဆုံးမရှိ တိုးများမယ်” လို့ဆိုထားတယ်။—
ကျမ်းစာထဲကဘုရားနိုင်ငံတော်ရဲ့ အုပ်စိုးသူကို “မင်းသား” လို့ ဘာကြောင့် ခေါ်သလဲဆိုတာ သိသလား။— မင်းသားဆိုတာ ဘုရင့်သားတော်ပေါ့။ ယေရှုဟာ ဘုရင်ကြီး ယေဟောဝါရဲ့ သားတော် ဖြစ်တယ်။ ယေဟောဝါဟာ မြေကြီးကို အနှစ်တစ်ထောင် အုပ်စိုးမယ့် အစိုးရရဲ့ ရှင်ဘုရင်အဖြစ် ယေရှုကို ခန့်အပ်ထားတယ်။ (ဗျာဒိတ် ၂၀:၆) ယေရှုက နှစ်ခြင်းခံပြီးနောက် “‘နောင်တရကြပါ။ ကောင်းကင်နိုင်ငံ နီးနေပြီ’ လို့ဟောပြောတယ်။”—မဿဲ ၄:၁၇။
နိုင်ငံတော် နီးပြီလို့ ယေရှု ဘာကြောင့် ပြောတယ် ထင်သလဲ။— အနာဂတ်မှာ ကောင်းကင်ကနေ အုပ်ချုပ်မယ့် ဘုရင်ဟာ ဒီလူတွေနဲ့အတူ လူ့လောကမှာ ရောက်ရှိနေလို့ပါပဲ။ ဒါကြောင့်လည်း ယေရှုက “ဘုရားသခင်ရဲ့ နိုင်ငံတော်ဟာ ခင်ဗျားတို့အလယ်မှာ ရှိနေတယ်” ဆိုပြီး ပြောခဲ့တယ်။ (လုကာ ၁၇:၂၁) ယေဟောဝါ ခန့်အပ်တဲ့ ရှင်ဘုရင်နဲ့ ဒီလိုနီးနီးကပ်ကပ် ထိတွေ့နိုင်တာမျိုး မလိုချင်ဘူးလား။—
ကဲ၊ ပြောပါဦး။ အရေးကြီးတဲ့ ဘယ်အလုပ်လုပ်ဖို့ ယေရှု ကမ္ဘာပေါ် လာခဲ့သလဲ။— အဲဒီ မေးခွန်းကို ယေရှုကိုယ်တိုင် ဒီလိုဖြေခဲ့တယ်– “ဘုရားသခင့်နိုင်ငံတော် သတင်းကောင်းကို တခြားမြို့ရွာတွေမှာလည်း ဟောရဦးမယ်။ အဲဒီအတွက် ကျွန်တော့်ကို စေလွှတ်လိုက်တာ။” (လုကာ ၄:၄၃) ယေရှုအနေနဲ့ ဒီဟောပြောခြင်းအလုပ်ကို သူတစ်ဦးတည်း လုပ်နိုင်မှာ မဟုတ်ဘူးဆိုတာ သိတယ်။ ဒါကြောင့် ယေရှု ဘာလုပ်တယ်လို့ ထင်သလဲ။—
ယေရှုဟာ ဘာအလုပ်လုပ်ဖို့ ဒီကမ္ဘာပေါ်ကို လာခဲ့တာလဲ
ယေရှုဟာ လူတွေကို သူနဲ့အတူခေါ်သွားပြီး ဟောပြောခြင်းလုပ်ငန်း ဘယ်လို လုပ်ရတယ်ဆိုတာ ပြပေးတယ်။ သူ ပထမဆုံး သင်ကြားလေ့ကျင့်ပေးသူတွေကတော့ တမန်တော်တွေအဖြစ် ရွေးချယ်ခံရတဲ့ ၁၂ ယောက် ဖြစ်တယ်။ (မဿဲ ၁၀:၅၊ ၇) တမန်တော်တွေကိုပဲ ဒီအလုပ်လုပ်ဖို့ လေ့ကျင့်ပေးခဲ့သလား။ မဟုတ်ဘူး။ တခြားလူ အများကြီးကိုလည်း ဟောပြောဖို့ လေ့ကျင့်ပေးခဲ့တယ်လို့ ကျမ်းစာက ဆိုတယ်။ နောက်တော့ ယေရှုဟာ တခြားတပည့် ၇၀ ကို နှစ်ယောက်စီ တွဲပေးပြီး သူ့ရှေ့မှာ ကြိုပြီး စေလွှတ်ခဲ့တယ်။ သူတို့ လူတွေကို ဘာအကြောင်း သင်ပေးသလဲ။— ယေရှုက “‘ဘုရားသခင့်နိုင်ငံတော် နီးနေပြီ’ လို့ဟောပါ” ဆိုပြီး ပြောတယ်။ (လုကာ ၁၀:၉) ဒီနည်းနဲ့ လူတွေက ဘုရားသခင့် အစိုးရအကြောင်း သိလာကြတယ်။
ဟိုးရှေးရှေးတုန်းက အစ္စရေးမှာ ဘုရင်သစ်တွေဟာ ပြည်သူလူထုရှေ့ ထွက်ပြဖို့ မြို့ထဲကို မြည်းကလေးစီးပြီး ဝင်တဲ့ထုံးစံ ရှိခဲ့တယ်။ ယေရှုဟာ နောက်ဆုံးအကြိမ် ဂျေရုဆလင်မြို့ကို သွားတဲ့အခါ အဲဒီအတိုင်းပဲ လုပ်ခဲ့တယ်။ ယေရှုက ဘုရားနိုင်ငံတော်ရဲ့ မင်းလောင်းပဲလေ။ သူ့ကို ရှင်ဘုရင်အဖြစ် လူတွေ လက်ခံကြသလား။—
ယေရှု မြည်းကလေးစီးပြီး ဝင်လာတဲ့အခါ လူအများစုက သူတို့ရဲ့ ဝတ်ရုံတွေကို ယေရှုရှေ့ လမ်းပေါ်မှာ ဖြန့်ခင်းကြတယ်။ တခြားလူတွေက သစ်ကိုင်းတွေကို ခုတ်ပြီး လမ်းပေါ်မှာ ချထားကြတယ်။ ဒီလိုလုပ်ခြင်းအားဖြင့် ယေရှုကို သူတို့ရဲ့ ရှင်ဘုရင်အဖြစ် လိုလားကြောင်း ပြကြတယ်။ “ယေဟောဝါရဲ့ နာမည်နဲ့ ရောက်လာတဲ့ဘုရင် ကောင်းချီးခံစားရပါစေ” လို့ ကြွေးကြော်ကြတယ်။ ဒါပေမဲ့ လူတိုင်းတော့ ကြိုက်တာ မဟုတ်ဘူး။ တကယ်ဆိုရင် ဘာသာရေးခေါင်းဆောင်တချို့က ယေရှုကို “တပည့်တွေကို တိတ်တိတ်နေဖို့ ပြောပါဦး” လို့တောင် ပြောခဲ့ကြတယ်။—လုကာ ၁၉:၂၈-၄၀။
ယေရှုကို ရှင်ဘုရင်အဖြစ် လိုလားကြပေမဲ့ နောက်ကျတော့ ဘာကြောင့် စိတ်ပြောင်းသွားကြတာလဲ
ငါးရက်ကြာတော့ ယေရှု အဖမ်းခံရပြီး ဘုရင်ခံ ပုန္တိပိလတ်မင်းရဲ့ရှေ့ နန်းတော်ထဲကို ခေါ်ဆောင်သွားခံရတယ်။ ယေရှုရဲ့ ရန်သူတွေက ယေရှုဟာ ကိုယ့်ကိုယ်ကိုယ် ဘုရင်ဖြစ်တယ်လို့ ပြောပြီး ရောမအစိုးရကို ဆန့်ကျင်ပုန်ကန်တယ်လို့ စွပ်စွဲကြတယ်။ ဒါနဲ့ ပိလတ်မင်းက ဒီစွဲချက်နဲ့ပတ်သက်ပြီး စစ်ဆေးမေးမြန်းတယ်။ ယေရှုက နိုင်ငံတော်အာဏာကို သိမ်းယူဖို့ မကြိုးစားကြောင်း ဖော်ပြပြီးနောက် “ကျွန်တော့်နိုင်ငံဟာ ဒီလောကနဲ့ မပတ်သက်ဘူး” လို့ ပိလတ်မင်းကို ပြောတယ်။—ယောဟန် ၁၈:၃၆။
အဲဒီနောက် ပိလတ်မင်းက အပြင်ထွက်ပြီး ယေရှုမှာ ဘာအပြစ်မှ မတွေ့တဲ့အကြောင်း လူထုကို ပြောတယ်။ ဒါပေမဲ့ လူထုက ယေရှုကို သူတို့ရဲ့ ဘုရင်အဖြစ် လက်မခံချင်ကြဘူး။ ယေရှုကို လွှတ်ပေးမှာကိုလည်း မလိုချင်ကြဘူး။ (ယောဟန် ၁၈:၃၇-၄၀) ပိလတ်မင်းက ယေရှုနဲ့ နောက်တစ်ခါ စကားပြောပြီးနောက် ယေရှုမှာ ဘာအပြစ်မှ မရှိဘူးဆိုတာ အသေအချာ သိသွားတယ်။ ဒါကြောင့် ယေရှုကို နောက်ဆုံးအနေနဲ့ အပြင်ကိုထုတ်ပြီး “မင်းတို့ရဲ့ ဘုရင်ကို ကြည့်ကြ” လို့ပြောတယ်။ ဒါပေမဲ့ လူထုက “သူ့ကို ရှင်းပစ်ပါ။ ရှင်းပစ်ပါ။ သစ်တိုင်ပေါ်တင်ပါ” လို့ အော်ဟစ်ကြတယ်။
ဒီနေ့လည်း အခြေအနေဟာ ယေရှုလက်ထက်ကနဲ့ ခပ်ဆင်ဆင်ပါပဲ။ လူအများစုဟာ ယေရှုကို ဘုရင်အဖြစ် တကယ် လက်မခံချင်ကြဘူး။ ဘုရားသခင်ကို ယုံကြည်တယ်လို့ ပြောကောင်းပြောကြမယ်။ ဒါပေမဲ့ ဘာလုပ်၊ ဘာမလုပ်နဲ့လို့ ဘုရားသခင် ဒါမှမဟုတ် ယေရှု ပြောလာရင် မကြိုက်ကြဘူး။ မြေကြီးပေါ်က လူ့အစိုးရကိုပဲ လိုချင်ကြတယ်။
တို့တစ်တွေကော ဘယ်လို သဘောထား ရှိသလဲ။ ဘုရားနိုင်ငံတော်အကြောင်း၊ နိုင်ငံတော် လုပ်ဆောင်ပေးမယ့် အံ့သြစရာကောင်းတဲ့ အရာတွေအကြောင်း သိလာတဲ့အခါ ဘုရားသခင်နဲ့ပတ်သက်ပြီး စိတ်ထဲမှာ ဘယ်လို ခံစားချက် ဖြစ်လာသလဲ။— ဘုရားသခင်ကို ချစ်လာတယ် မဟုတ်လား။— ဒီလိုဆိုရင် ဘုရားသခင်ကို ချစ်ကြောင်း၊ နိုင်ငံတော် အုပ်စိုးတာကို လိုချင်ကြောင်း ဘယ်လို ပြကြမလဲ။—
ယေရှု ဘာကြောင့် နှစ်ခြင်းခံခဲ့သလဲ။၊ ဘုရားသခင် နှစ်သက်ကြောင်း ဘယ်လို ပြခဲ့သလဲ
ယေရှုရဲ့ စံနမူနာကို လိုက်ခြင်းအားဖြင့် ဘုရားသခင်ကို နှစ်နှစ်ကာကာ ချစ်ကြောင်း ပြနိုင်တယ်။ ယေရှုက ယေဟောဝါကို ချစ်ကြောင်း ဘယ်လို ပြခဲ့သလဲ။— “သူနှစ်သက်တာကိုပဲ အမြဲလုပ်” တယ် လို့ ယေရှု ပြောခဲ့တယ်။ (ယောဟန် ၈:၂၉) ဟုတ်ပါတယ်။ ယေရှု ကမ္ဘာကို လာတာဟာ ‘ဘုရားသခင်ရဲ့ အလိုတော် ဆောင်ဖို့၊’ ဘုရား “ခိုင်းထားတဲ့ အလုပ်ကို ပြီးစီးအောင် လုပ်” ဖို့ဖြစ်တယ်။ (ဟီဘရူး ၁၀:၇။ ယောဟန် ၄:၃၄) ယေရှု ဟောပြောခြင်းလုပ်ငန်း စမလုပ်ခင် ဘာလုပ်ခဲ့တယ်ဆိုတာ သုံးသပ်ကြည့်ပါ။
ယေရှုဟာ ဂျော်ဒန်မြစ်မှာရှိတဲ့ ယောဟန်ဆီ သွားတယ်။ ရေထဲ အတူဆင်းသွားပြီး ယောဟန်က ယေရှုကို ရေထဲမှာ လုံးလုံး နှစ်မြှုပ်ပြီးနောက် ပြန်ထူပေးခဲ့တယ်။ ယေရှုကို ယောဟန် ဘာကြောင့် နှစ်ခြင်းပေးခဲ့တာလဲ သိသလား။—
ဘုရားသခင့် နိုင်ငံတော်အကြောင်း ဘယ်နေရာတွေမှာ လူတွေကို ပြောပြနိုင်သလဲ
ယေရှု တောင်းဆိုလို့ပါပဲ။ ယေရှုကို ဘုရားသခင် နှစ်ခြင်းခံစေချင်တယ်ဆိုတာ ဘယ်လိုသိရသလဲ။— ယေရှု ရေထဲက ပေါ်ထတဲ့အခါမှာ “မင်းဟာ ငါမြတ်နိုးတဲ့ ငါ့ရဲ့ချစ်သားပဲ” လို့ ကောင်းကင်က ဘုရားသခင်ရဲ့ အသံကို ကြားလိုက်ရလို့ ဖြစ်တယ်။ ဘုရားသခင်က သန့်ရှင်းသော မာကု ၁:၉-၁၁။
စွမ်းအားတော်ကို ချိုးငှက်အသွင်နဲ့ ယေရှုအပေါ် ဆင်းသက်စေခဲ့တယ်။ ဒါကြောင့် နှစ်ခြင်းခံခြင်းအားဖြင့် ယေရှုက ယေဟောဝါကို တစ်သက်လုံး၊ ထာဝစဉ် ဝတ်ပြုသွားလိုတယ်ဆိုတာ ပြလိုက်တာပဲ။—အခုချိန်မှာတော့ ကလေးတို့ဟာ ငယ်သေးတယ်။ ဒါပေမဲ့ ကြီးလာတဲ့အခါ ဘာလုပ်ကြမလဲ။— ယေရှုလုပ်ခဲ့သလို နှစ်ခြင်းခံကြမလား။— ယေရှုကို အတုယူသင့်တယ်။ ဘာကြောင့်လဲဆိုတော့ ယေရှုဟာ “သူ့ခြေရာကို ထက်ကြပ်မကွာ လိုက်လျှောက်စေဖို့ စံနမူနာထားခဲ့တယ်” လို့ ကျမ်းစာက ဆိုထားလို့ ဖြစ်တယ်။ (၁ ပေတရု ၂:၂၁) ကလေးတို့ နှစ်ခြင်းခံပြီဆိုရင် ဘုရားနိုင်ငံတော် အုပ်ချုပ်တာကို တကယ်လိုလားတယ်ဆိုတာ ပြရာရောက်မယ်။ ဒါပေမဲ့ နှစ်ခြင်းခံရုံနဲ့ မပြီးသေးဘူး။
ယေရှု သင်ပေးခဲ့သမျှကို လိုက်နာဖို့ လိုသေးတယ်။ ယေရှုက “ဒီလောကနဲ့ မပတ်သက်” ရဘူးလို့ မှာထားတယ်။ ဒီလောကရဲ့ အပြုအမူ၊ အကျင့်အကြံတွေကို လိုက်မယ်ဆိုရင် ယေရှုကို နာခံရာရောက်မလား။ ယေရှုနဲ့ တမန်တော်တွေဟာ အဲဒီလိုအရာတွေနဲ့ ကင်းကင်းရှင်းရှင်း နေခဲ့ကြတယ်။ (ယောဟန် ၁၇:၁၄) အဲဒီတော့ သူတို့ ဘာလုပ်ခဲ့ကြသလဲ။— သူတစ်ပါးကို ဘုရားနိုင်ငံတော်အကြောင်း ပြောခဲ့ကြတယ်။ ဒီအလုပ်ဟာ သူတို့ဘဝမှာ အရေးအကြီးဆုံးအလုပ် ဖြစ်ခဲ့တယ်။ တို့တစ်တွေလည်း ဒီလုပ်ငန်းမှာ ပါဝင်နိုင်မလား။— ပါဝင်နိုင်တာပေါ့။ ဘုရားနိုင်ငံတော် လာပါစေ ဆိုတဲ့ ဆုတောင်းချက်ကို တကယ်စိတ်ရင်းမှန်နဲ့ တောင်းမယ်ဆိုရင် ဒီအလုပ်ကို တို့တစ်တွေ တစ်တပ်တစ်အား ပါဝင်လုပ်ဆောင်ကြမယ်။
ဘုရားနိုင်ငံတော် လာတာကို လိုလားကြောင်း ပြသတဲ့အနေနဲ့ တို့တစ်တွေ ဘာလုပ်နိုင်တယ်ဆိုတာကို ဒီကျမ်းချက်တွေမှာ ဖတ်ကြည့်ပါ– မဿဲ ၆:၂၄-၃၃။ ၂၄:၁၄။ ၁ ယောဟန် ၂:၁၅-၁၇။ ၅:၃။