NOOMANYA eshaara ei Yesu yaayegyeise abakuratsi be?— Waaba otarikugimanya, nitubaasa kugishoma omuri Baibuli, omuri Matayo 6:9-13. Eshaara ei baingi barikweta Eshaara ya Tataitwe, erimu ebigambo ebi: “Obukama bwawe bwije.” Obukama bwa Ruhanga niki?—

Ka tubanze twetegyereze eki. Omukama n’omutegyeki w’eihanga nari ekicweka. Kandi obutegyeki bwe nibwetwa obukama. Omu mahanga agamwe orikuba naategyeka eihanga naayetwa omwebembenzi w’eihanga. Omutegyeki omu butegyeki bwa Ruhanga naayetwa ata?— Naayetwa Omukama. Nikyo obutegyeki bwa Ruhanga burikweterwa Obukama.

Noomanya ou Ruhanga yaatooraine kuba Omukama w’Obutegyeki Bwe?— Ni Yesu Kristo Omwana we. Ahabw’enki Yesu n’omutegyeki murungi kukira ondiijo weena ou abantu barikubaasa kutoorana?— N’ahabw’okugira  ngu Yesu naakunda munonga Ishe, Yehova. Kandi butoosha naakora ebihikire.

Ira Yesu atakazairwe omuri Betelehemu, Baibuli ekagamba aha kuzaarwa kwe kandi ekagira ngu akaba naija kuba Omutegyeki otoorainwe Ruhanga. Ka tukishomeho, omuri Isaaya 9:6, 7. Nihagira hati: ‘Ahabw’okuba Omwana atuzaariirwe, omwana w’omwojo atuhairwe, obutegyeki buryaba aha mabega ge, n’eiziina rye aryayetwa . . . Omunyiginya w’obusingye. Okweyongyera kw’obutegyeki bwe n’obusingye tibirigira bugarukiro.’

Noomanya ahabw’enki Omutegyeki w’Obukama bwa Ruhanga omu kyahandiikirwe eki arikwetwa ‘Omunyiginya’?— Nikimanyisa ngu omunyiginya n’omwana w’omukama. Kandi Yesu n’Omwana w’Omukama Omukuru, Yehova. Kwonka Yehova yaaherize kwemeka Yesu nk’Omukama w’obutegyeki Bwe, oburikwija kutegyeka ensi kumara emyaka rukumi. (Okushuuruurwa 20:6) Yesu ku yaaherize kubatizibwa, akatandika ‘kubuurira naagira ati: Mweteise, bantu ’mwe, ahakuba obukama bw’omu iguru bwiriire haihi.’—Matayo 4:17.

Nooteekateeka, ahabw’enki, Yesu yaagizire ngu Obukama bwiriire haihi?— N’ahabw’okugira ngu Omukama owaabaire naija kutegyekyera omu iguru akaba ari hamwe nabo. Egyo niyo nshonga ahabw’enki yaagambiire abantu ati: ‘Obukama bwa Ruhanga buri naimwe.’ (Luka 17:21) Tokaashemererwa Omukama wa Yehova yaakwirira haihi okabaasa kumukwataho?—

Ninkushaba ongambire, ni murimo ki omukuru ogu Yesu yaizire kukora omu nsi?— Yesu akagarukamu ekibuuzo ekyo, arikugira ati: ‘Nshemereire kubuurira ebigambo ebirungi by’obukama bwa Ruhanga omuri tauni ezindi nazo; ahabw’okuba nikyo naatumiirwe.’ (Luka 4:43) Yesu akaba naamanya ngu tarikwija kubuurira wenka. Mbwenu shi nooteekateeka ngu akakora ki?—

 Yesu akatwara abantu baagyenda nawe kandi yaabooreka oku baine kubuurira. Abu yaabandize kutendeka 12 nibo yaatooraine nk’entumwa. (Matayo 10:5, 7) Kwonka shi Yesu akatendeka entumwa ze zonka kukora omurimo ogwo? Ngaaha, Baibuli neegira ngu Yesu akatendeka n’abandi baingi kubuurira. Bwanyima akoohereza abandi beegi 70 arikutuma babiri, babiri. Mbwenu shi bakegyesa ki abantu?— Yesu akagira ati: “Mubagambire muti, Obukama bwa Ruhanga bubairiire haihi.” (Luka 10:9) Omu muringo ogwo abantu bakeega aha bikwatiraine n’obutegyeki bwa Ruhanga.

Ira omuri Israeli, abakama abasya bakaba batemba aha mwana gw’endogoya bataaha omu rurembo kweyoreka abantu. Ekyo nikyo Yesu yaakozire arikutaaha omuri Yerusaalemu aha murundi gwe ogw’ahamuheru. Yesu n’Omutegyeki w’Obukama bwa Ruhanga. Mbwenu shi abantu nibenda ngu abe Omukama waabo?—

Ku yaabaire naagyenda, abantu baingi baayara ebijwaro byabo omu ruguuto ahu yaabaire naaraba. Abamwe bakatema amataagi g’ebiti kandi baagaara omu ruguuto. Bakakora ebi byona kworeka ngu nibenda ngu Yesu abe Omukama waabo. Bakagira bati: ‘Omugabe orikwija omu eiziina rya Yehova asiimwe!’ Kwonka ti buri omwe ngu akashemererwa. N’abeebembezi b’ediini abamwe bakagira bati, ‘Hana abeegi baawe bahuname.’​—Luka 19:28-40.

Bwanyima y’ebiro bitaano Yesu bakamukwata baamutwara omu kikaari omu maisho g’omutegyeki Pontio Pilaato. Abazigu ba Yesu bakagira ngu we naayeyeta omukama kandi ngu naahakanisa obutegyeki bw’Abarooma. N’ahabw’ekyo Pilaato akabuuza Yesu ebikwatiraine n’ekyo. Yesu akagira ngu akaba atarikwenda kutwara obutegyeki bwabo. Yesu akagambira Pilaato ati: “Obugabe bwangye ti bw’ensi egi.”—Yohaana 18:36.

Pilaato akashohora aheeru, yaagambira abantu ngu Yesu taine rubanja. Kwonka abantu bakaba batarikwenda ngu Yesu abe Omukama waabo. Bakaba batarikwenda ngu arekurwe. (Yohaana 18:37-40) Ku yaaherize kugamba na Yesu ogundi murundi, Pilaato yaahamya gye ngu Yesu taine  rubanja. Bwanyima, ku yaaherize kushohoza Yesu aheeru, Pilaato yaagira ati: “Reeba omugabe wanyu!” Abantu baagamba munonga nibagira bati: ‘Mutware! Mutware! Omuhanikye!’

Pilaato yaababuuza ati: ‘Mpanikye omugabe waanyu?’ Abanyamurwa abakuru bamugarukamu bati: “Titwine mugabe kureka Kaisaari.” Teekateeka ahari ekyo! Abanyamurwa ababi bakabaasa kureetera abantu kwanga Yesu.​—Yohaana 19:1-16.

N’omu bunaku obu abantu nikwo bari. Baingi omu bunaku obu buzima tibarikwenda Yesu ngu abe Omukama waabo. Nibabaasa kugira ngu nibaikiririza omuri Ruhanga, kwonka tibarikwenda Ruhanga nari Kristo  kubagambira eky’okukora. Nibenda obutegyeki bw’abantu kuba nibwo bwabategyeka.

Kandi shi itwe ekyo nitukiteekateekaho ki? Ku turikwega aha Bukama bwa Ruhanga n’ebirungi ebi burikwija kukora, ekyo nikitureetera kumukunda, tikwo?— Mbwenu shi nitubaasa kworeka Ruhanga tuta ngu nitumukunda kandi ngu nitwenda kutegyekwa Obukama bwe?—

Nitubaasa kworeka Ruhanga ngu nitumukunda turikukuratira eky’okureeberaho kya Yesu. Kandi shi we Yesu akakora ki kworeka ngu naakunda Yehova?— Yesu akashoboorora ati: “Obutoosha nkora ebimushemeza.” (Yohaana 8:29) Eego, Yesu akaija omu nsi kukora ebi Ruhanga akunda “n’okuhikiiriza omurimo gwe.” (Abaheburaayo 10:7; Yohaana 4:34) Ka tureebe eki Yesu yaakozire atakatandikire omurimo gwe gw’okubuurira.

Yesu akaija ahari Yohaana Omubatizi aha Mugyera Yorudani. Ku baagire omu maizi, Yohaana akaibika Yesu omu maizi kandi yaamwihayo. Noomanya ahabw’enki Yohaana yaabatiize Yesu?—

Yesu akashaba Yohaana ngu amubatize. Kwonka shi nitumanya tuta ngu Ruhanga akaba naayenda ngu Yesu abatiziibwe?— Nitumanya ekyo ahabw’okuba Yesu ku yaarugire omu maizi, yaahurira eiraka rya Ruhanga kuruga omu  iguru nirigira riti: “Niiwe Mwana wangye ou nkunda, kandi ou nshemerererwa munonga.” Kandi Ruhanga yaayohereza omwoyo gwe ogurikwera gwashuuma ahari Yesu guri nk’enkombe. N’ahabw’ekyo, arikubatizibwa, Yesu akooreka ngu naayenda kuheereza Yehova amagara gye goona, nibyo biro byona.—Mako 1:9-11.

Hati okiri omwana. Mbwenu shi ku oraakure noija kukora ki?— Noija kukuratira eky’okureeberaho kya Yesu kandi obatizibwe?— Oshemereire kumutooreza, ahakuba Baibuli neegira ngu akakutsigira ‘eky’okureeberaho, ngu obaase kugyendera omu bigyere bye.’ (1 Petero 2:21) Waabatizibwa, nooba nooyoreka ngu buzima nooyenda kutegyekwa Obukama bwa Ruhanga. Kwonka okubatizibwa tikirikumara.

Twine kworobera ebintu byona ebi Yesu yaayegyeise. Yesu akagira ngu titushemereire kuba “b’ensi.” Mbwenu nituba nitumworobera twaba nitwejwanzya omu bintu by’ensi? Yesu n’entumwa ze tibarayejwangize omu bintu by’ensi. (Yohaana 17:14) Kwonka shi bakakora ki?— Bakaba bagambira abantu ebirikukwata aha Bukama bwa Ruhanga. Ogwo nigwo gwabaire guri omurimo mukuru omu magara gaabo. Naitwe ekyo nitubaasa kukikora?— Eego nitubaasa, kandi nitwija kukikora twaba nitukorera aha bi turikugamba omu kushaba ngu Obukama bwa Ruhanga bwije.