JESUSQA yachachisqasninman Diosmanta mañakuyta yachacherqa. Chay mañakuyta, ¿rejsinkichu?... Mana rejsinki chayqa, Bibliapi Mateo 6:9-13 leerisunman. May chhika runas, chay mañakuyta padrenuestro sutiwan rejsinku. Uj cheqapitaj nin: “Reinoyki jamuchun”, nispa. ¿Yachankichu imachus Diospa Reinon kasqanta?...

Biblia nin jina, uj reinoqa uj gobiernowan ninakun. Kay tiempopi, imaymana gobiernos tiyan. Wakin gobiernospi, suyuta kamachejtaqa presidente ninku. Diospa gobiernonpitajrí, kamachejtaqa Rey nikun.

¿Pitataj Jehová gobiernonpi kamachinanpaj ajllarqa?... Wawan Jesucristota ajllarqa. ¿Imaraykutaj Jesús runaspa ajllasqanku kamachejkunamanta aswan sumaj?... Jesusqa Tatanta cheqamanta munakun, chayraykutaj allin kajtapuni ruwan.

 Jesús Belén llajtitapi nacekunanpaj may unayraj kashajtin, Bibliaqa Jallpʼaman jamunanta, Diospa ajllasqan kamachejtaj kananta nerqaña. Isaías 9:6, 7 leerina. Chaypi nin: ‘Uj wawa nacepuwanchej; Dios uj wawata qowanchej. Paywan kanqa jatun atiy kamachinanpaj. Sutikonqataj, Allin Kawsayta Apamoj Rey. Kamachisqanqa, chantá allin kausayta qosqanpis manapuni tukukonqachu’, nispa.

Jesusqa Jatun Rey Jehovaj Wawan. Jehovataj Jesusta Reyta jina churarqa, Gobiernonpi waranqa watasta Jallpʼata kamachinanpaj (Apocalipsis 20:6). Jesusqa bautizakusqantawan, willayta qallarerqa: “Diosman kutirikuychej, imaraykuchus janaj pacha reinoqa qayllaykamunña”, nispa (Mateo 4:17).

¿Imaraykutaj Jesús Reino “qayllaykamunña” nerqa?... Imaraykuchus pay cielomanta kamachimunan karqa, chay tiempopitaj paykunawan kasharqa. Chayrayku Jesús nerqa: “Diospa reinonqa qankuna ukhupiña kashan”, nispa (Lucas 17:21). ¿Munawajchu Jehovaj ajllasqan reypa qayllanpi kayta, paywantaj parlariyta?...

Ujta niway: ¿Ima sumaj ruwaypajtaj Jesús Jallpʼaman jamorqa?... Payllataj nerqa: “Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani”, nispa (Lucas 4:43). Jesustajrí, sapallan chayta mana ruwayta atinmanchu karqa. Chayrayku, ¿imatá ruwarqa?...

Jesusqa waj runastapis willaj pusarqa, willaytataj yachacherqa. Qallariypeqa 12 apostolesninta yachacherqa (Mateo 10:5, 7). ¿Paykunallatachu yachacherqa?... Mana. Bibliaqa wajkunatapis yachachisqanta nin. Aswan qhepamantaj, 70 yachachisqasninta iskaymanta iskay willajta kacharqa. ¿Imamantá parlaj kanku?... Jesús  kamacherqa: “Niychejtaj: Qankunaman Diospa reinon qayllamunña”, nispa (Lucas 10:9). Ajinamanta runasqa Diospa gobiernonmanta yachakorqanku.

Jesús niraj nacekushajtin, Israelpi ajllasqa reyesqa runas rikunankupaj, llajtaman malta burritupi yaykoj kanku. Jesuspis chay kutillataña Jerusalenman yaykushaspa, kikillantataj ruwarqa. Payqa Diospa Gobiernonpi Kamachej kananpaj ajllasqa karqa. Runasrí, ¿munarqankuchu Reyninku kananta?...

Ashkha runasqa, ropasninkuta ñanman mastʼarqanku Jesús chayninta pasananpaj. Wakintaj sachʼa ramasta kʼutuspa mastʼallarqankutaj. Ajinamanta, Jesús Reyninku kananta munasqankuta rikucherqanku. Qhaparerqankutaj: ‘Bendecisqa kachun Jehovaj sutinpi jamoj Reyqa’, nispa. Wakin runastajrí mana kusisqachu kasharqanku. Religionta kamachejkunamanta wakintaj Jesusman nerqanku: ‘Chʼinyachiy yachachisqasniykita’, nispa (Lucas 19:28-40).

Phishqa diasninman, Jesusta presocharqanku, kamachej Poncio Pilatomantaj aparqanku. Jesuspa enemigosnenqa, “rey kani nishan” nispa juchacharqanku. Chantapis Romaj gobiernonpa contranpi oqharikusqanta nerqanku. Pilatoqa Jesusta taporqa. Jesustaj mana jinachu kasqanta sutʼincharqa. Nerqataj: “Reinoyqa mana kay pachamantachu”, nispa (Juan 18:36).

Chantá Pilatoqa llojsispa, runasman nerqa: “Kay runapeqa mana ima juchatapis tarinichu”, nispa. Paykunatajrí niña Jesús reyninku kananta munarqankuchu, ni kacharisqa kanantapis (Juan 18:37-40). Pilatoqa Jesuswan ujtawan parlarqa, nipunitaj paypi ima juchatapis tarerqachu. Chayrayku jawaman ujtawan orqhospa, nerqa: “Kayqa Reyniykichej”, nispa. Runastajrí qhaparerqanku:  ‘¡Orqhollayña! ¡Orqhollayña! ¡Jatun kʼaspiman clavasqa kachun!’, nispa.

Pilatotaj tapurerqa: ‘¿Reyniykichejtachu kʼaspiman clavachisaj?’, nispa. Kuraj sacerdotestaj kuticherqanku: “Mana waj reyniyku kanchu Cesarmanta astawanqa”, nispa. Chay nisqanku, ¿manacharí allinchu? Chay sajra sacerdotesqa, llajtantinta Jesuspa contranpi churarqanku (Juan 19:1-16).

Kunanpis runasqa kikillantaj kanku. Casi tukuy runas, Jesús reyninku kananta mana munankuchu. Ichapis Diospi creesqankuta ninku.  Nitaj Diostapis, ni Cristotapis kasukuyta munankuchu. Astawanpis paykunalla gobiernosta sayachikuyta munanku.

¿Noqanchejrí? Diospa Gobiernonmanta, chay Gobierno tʼukuna imasta ruwananmantawan yachakuspa, ¿imaynatá Diosta qhawanchej?... Payta munakunchej, ¿icharí?... Chantá, ¿imaynatá payta munakusqanchejta, Gobiernon kamachinanta munasqanchejta ima rikuchisunman?...

Jesús jina ruwaspa. ¿Imaynatá Jesús Jehovata munakusqanta rikucherqa?... Pay nerqa: “Paypa munaynillanta ruwani”, nispa (Juan 8:29). Arí, Jesusqa Jallpʼaman jamorqa, ‘Diospa munayninta ruwaj’, ‘ruwanantataj tukuchaj’ (Hebreos 10:7; Juan 4:34). Jesús niraj willayta qallarishaspa imatachus ruwasqanta qhawarina.

Jesusqa Jordán mayuman rerqa. Chaypitaj Juan Bautista kasharqa. Chantá iskayninku mayuman yaykorqanku. Juantaj Jesuspa tukuy cuerponta yaku ukhuman chinkaykucherqa, chantataj orqhomorqa. ¿Yachankichu imaraykuchus Jesusta Juan bautizasqanta?...

Jesús bautizachikuyta munarqa. Diosrí, ¿Jesús bautizakunanta munarqachu?...  Arí. Imaraykuchus Jesús yakumanta llojsimojtin, Diosqa cielomanta nimorqa: ‘Qanmin munasqa Waway kanki; qanwanqa sonqo juntʼasqa kani’, nispa. Chantapis Diosqa, espíritu santonta palomata jina Jesuspa patanman uraykuchimorqa. Jesusqa bautizakuspa, Diosta wiñaypaj sirviyta munasqanta rikucherqa (Marcos 1:9-11).

Qanqa juchʼuyllaraj kanki. Jinapis, ¿imatá ruwanki wiñarqospa?... ¿Jesús jinachu bautizakunki?... Allin kanman chayta ruwanayki. Bibliaqa Jesús jinallataj ruwananchejta nin (1 Pedro 2:21). Bautizakuspaqa, Diospa Gobiernonpa kamachiyninpi kayta munasqaykita rikuchinki. Jinapis mana bautizakunallachu tiyan.

Jesuspa tukuy ima kamachisqanta kasukuna tiyan. Jesusqa “mana kay pachajpatachu” kananchej kasqanta nerqa. Kay pachapi runas jina kausakuspa, ¿Jesusta kasukushasunmanchu? Jesuswan apostolesninwanqa, mana kay pachamanta runas jinachu kausarqanku (Juan 17:14). Chantá, ¿imatá ruwaj kanku?... Paykunaqa Diospa Gobiernonmanta willaj kanku. Chayta kausayninkupi ñaupajman churarqanku. ¿Kikinta ruwayta atisunmanchu?... Arí. Chaypajqa Diospa Reinon jamunanta tukuy sonqo mañakuna.