E TE iloa le tatalo na aʻoaʻo atu e Iesu i ona soo?— A leai, e mafai ona tatou faitau faatasi i ai i le Tusi Paia, i le Mataio 6:9-13. E taʻua e le toʻatele o tagata o le Tatalo a le Alii, ma o nisi nei o upu o lenā tatalo: “Ia oo mai lou malo.” E te iloa o le ā le Malo o le Atua?—

O le tupu o se tagata lea e pule i se nuu po o se atunuu. E taʻua lenā pulega o se malo. I nisi atunuu, e taʻua le pule o le malo o se peresitene po o se palemia. O le ā la le taʻu o le Pule o le malo o le Atua?— O le Tupu.

E te iloa o ai na filifilia e Ieova le Atua e avea ma Tupu o Lona malo?— O lona Alo, o Iesu Keriso. Aiseā e sili atu ai Iesu na i lo pule e filifilia e tagata?— Talu ai e alofa moni Iesu i lona Tamā, o Ieova. O lea la, e fai e Iesu le mea saʻo i taimi uma.

 A o leʻi taitai fanau mai Iesu i Peteleema, na taʻu mai e le Tusi Paia lona fanau mai ma faapea e avea o ia ma Pule filifilia a le Atua. Seʻi o tatou faitau i le manatu lenā i le Isaia 9:6, 7: “Auā ua fanau mai mo i tatou le tama, ua foaʻiina mai mo i tatou le atalii, e i lona ua le malo, e igoa foʻi o ia . . . o le Alii o le filemu. E leai se mea e gata mai ai ona tele o lona malo ma le filemu o lona malo.”

E te iloa le māfuaaga ua taʻu ai le Pule o le Malo o le Atua i inei “o le Alii”?— O lenei alii o le alo o se tupu. O Iesu la o le Alo o le Tupu Silisili, o Ieova. Ae ua filifilia foʻi e Ieova Iesu e fai ma Tupu o Lona malo, lea o le a puleaina le lalolagi mo tausaga e afe. (Faaaliga 20:6) Ina ua uma ona papatiso Iesu, na amata loa ona ʻtalaʻi atu ma faapea atu, Inā salamō ia outou, auā ua latalata mai le malo o le lagi.’​—Mataio 4:17.

O le ā sou manatu, aiseā na faapea atu ai Iesu ua latalata mai le Malo?— Talu ai o loo latou faatasi ma le Tupu, o lē o le a pule mulimuli ane i le lagi! O le māfuaaga lenā na fetalai ai Iesu i tagata: “Ua i ai lava iā te outou le malo o le Atua.” (Luka 17:21) Pe e te lē fiafia pe a faapea o lea e te tū latalata i le Tupu filifilia a Ieova, ma mafai ona e paʻi atu iā te ia?—

Seʻi fai mai sau tala, o le ā le galuega tāua na afio mai Iesu i le lalolagi e fai?— Na tali mai Iesu e faapea: “E tatau ona ou folafola le tala lelei o le malo o le Atua i nisi aai foʻi; auā o le mea lea na auina mai ai aʻu.” (Luka 4:43) Na silafia e Iesu e lē mafai ona ia faia na o ia le galuega talaʻi. O le ā la sou manatu, o le ā le mea a Iesu na fai?—

Na ō faatasi Iesu ma tagata, ma na ia faaali atu iā i latou le auala e talaʻi ai. O tagata muamua lava na ia aʻoaʻoina o ona aposetolo filifilia e toʻa 12. (Mataio 10:5, 7) Ae faamata  e na o le ʻauaposetolo na aʻoaʻoina e Iesu e faia le galuega? E leai, o loo taʻu mai e le Tusi Paia e toʻatele foʻi isi na aʻoaʻoina e Iesu i le talaʻiga. Mulimuli ane, na ia auina atu soo e 70 ma vaevaeina i latou ina ia tofu ma le paga. O le ā le feʻau na latou talaʻi atu i tagata?— Na faapea atu Iesu: “Ia fai atu iā te i latou, Ua latalata iā te outou le malo o le Atua.” (Luka 10:9) O le auala lenā na aʻoaʻoina ai e tagata tala e uiga i le malo o le Atua.

I aso a la i Isaraelu, e masani ona tiʻetiʻe se tupu fou i luga o se asini ma alu atu i le aai ina ia mafai ona vaai uma i ai tagata. O le mea lenā na fai e Iesu i lana asiasiga mulimuli i Ierusalema. O le a avea Iesu ma Pule o le Malo o le Atua. Faamata na mananaʻo tagata e avea Iesu ma o latou Tupu?—

A o tiʻetiʻe ane Iesu i le asini, na fofola e le toʻatele o tagata o latou ofu i le ala. Na tāina e isi lālā o laau ma fola i luga o le auala. Ua faaalia mai ai lo latou fiafia e avea Iesu ma o latou Tupu. Ua alalaga mai: “Ia manuia le tupu o loo maliu mai i le suafa o le Alii.” Peitaʻi, e leʻi fiafia isi tagata. Na oo ina faapea atu taʻitaʻi lotu iā Iesu, ʻFai atu i ou soo e soia le pisa.’​—Luka 19:28-40.

Ina ua mavae aso e lima, ona puʻeina lea o Iesu ma ave i le maota o le kovana o Ponotio Pilato. Na fai atu fili o Iesu, e tetee Iesu i le malo o Roma ma na ia taʻutino mai faapea, o ia o le tupu. O lea na fesili atu ai Pilato iā Iesu po o le ā sona manatu i nei tuuaʻiga. Na faaalia e Iesu e lē o taumafai e puleaina le malo. Na ia faapea atu iā Pilato: “E lē mai le lalolagi nei loʻu malo.”​—Ioane 18:36.

Ona alu atu lea o Pilato i fafo ma taʻu atu i tagata e na te lē o mauaina se mea sesē na fai e Iesu. Peitaʻi, ua lē toe mananaʻo tagata e avea Iesu ma o latou Tupu. E latou te lē o mananaʻo e faasaʻoloto Iesu. (Ioane 18:37-40) Ina ua uma ona toe talanoa atu iā Iesu, ua mautinoa ai e Pilato e leai se mea leaga na ia faia. O lea la, ina ua  aumai Iesu i fafo, na faapea atu Pilato: “Faauta i lo outou Tupu.” A ua alalaga atu tagata: “Ave ese ia, ave ese ia; inā faasatauro iā te ia.”

Ua fesili atu Pilato: “Ou te faasatauro ea i lo outou Tupu?” Ua tali atu le ʻauositaulaga sili: “E leai so matou tupu, na o Kaisara.” Seʻi manatu i lenā mea! Na teena Iesu e tagata ona o le amio leaga a le ʻauositaulaga!​—Ioane 19:1-16.

E faapena foʻi aso nei. E lē mananaʻo le toʻatele o tagata e avea Iesu ma o latou Tupu. Atonu latou te faapea mai e talitonu i le Atua, peitaʻi latou te lē mananaʻo e faatonutonu e le Atua ma Keriso a latou mea e fai.  E mananaʻo tagata e fai o latou lava malo i le lalolagi.

Ae ā i tatou? Pe a tatou aʻoaʻoina tala e uiga i le Malo o le Atua ma mea matagofie o le a na faia, o ā ni o tatou faalogona e faatatau i le Atua?— E tatou te alolofa i le Atua, a ea?— E faapefea ona tatou faaali atu i le Atua o loo tatou alolofa iā te ia, ma tatou te fia ola i lalo o le pulega o lona Malo?—

E mafai ona faaali atu i le Atua o tatou faalogona moni e ala i le mulimuli i le faataʻitaʻiga a Iesu. O le ā le mea na fai e Iesu e faaalia ai lona alofa iā Ieova?— Na faapea mai Iesu: “Ou te faia pea lava o mea e lelei iā te ia.” (Ioane 8:29) Ioe, na afio mai Iesu i le lalolagi ina ia ʻfai le finagalo o le Atua’ ma “faaiʻu lana galuega.” (Eperu 10:7; Ioane 4:34) Seʻi mafaufau i le mea na fai e Iesu a o leʻi amataina lana galuega talaʻi.

Na alu atu iā Ioane le Papatiso i le vai o Ioritana. A o la iai i le vai, na faatofuina atoa e Ioane Iesu i lalo i le vai ma toe faamānu aʻe i luga. E te iloa le māfuaaga na papatiso ai e Ioane Iesu?—

Na talosaga i ai Iesu iā Ioane. Ae e faapefea ona tatou iloa na finagalo le Atua e papatiso Iesu?— Auā foʻi ina ua toe alu aʻe Iesu nai le vai, na ia faalogo ai i le leo o le Atua mai le lagi o faapea mai: “O loʻu Atalii pele oe, ou te fiafia iā  te oe.” Na auina mai foʻi e le Atua lona agaga paia peiseaʻī o se lupe, i luga o Iesu. E ala la i lona papatisoga, na faaalia ai e Iesu lona naunau e auauna iā Ieova seʻia oo i le faavavau.​—Mareko 1:9-11.

O lenā o loo faasolosolo ina e matua. Ae o ā au mea e fai i le lumanaʻi?— Faamata o le a e faaaʻoaʻo iā Iesu ma e papatiso?— E lelei pe a e faataʻitaʻi iā Iesu, auā o loo fai mai le Tusi Paia na fai e Iesu ʻle faaaʻoaʻo mo outou, ina ia outou mulimuli ai.’ (1 Peteru 2:21) Pe afai e te papatiso, e faaalia ai lou naunau moni e ola i lalo o le pulega o le Malo o le Atua. Peitaʻi, e iai isi gaoioiga e moomia ona e faia.

E moomia ona tatou usiusitai i mea uma lava na aʻoaʻoina e Iesu. Na faapea mai Iesu e lē tatau ona avea i tatou ma ʻni tagata o le lalolagi.’ Faamata o tatou usitai iā Iesu pe afai o tatou aafia i mea a le lalolagi? Na faamamao ese Iesu ma ona aposetolo mai mea a le lalolagi. (Ioane 17:14) Ae o le ā na latou faia?— Na latou talanoa atu i tagata e faatatau i le Malo o le Atua. O le galuega lenā na faamuamua i o latou olaga. Pe mafai ona tatou faia lenā galuega?— Ioe e mafai, ma e tatou te faia lenā galuega pe afai e moni a tatou tatalo ia oo mai le Malo o le Atua.