YU SABI a begi di Yesus ben leri den bakaman fu en?— Efu yu no sabi en, dan wi kan leisi en makandra na ini Bijbel, na Mateyus 6:9-13. A begi disi di furu sma e kari a Wi Tata Begi, abi den wortu: „Meki yu kownukondre kon.” Yu sabi san na Gado Kownukondre?—

We, wan kownu na wan tiriman fu wan kondre noso kontren. Èn a tirimakti fu en na wan kownukondre. Na ini wan tu kondre, a moro prenspari sma na ini a tirimakti na a presidenti. Fa den e kari na Edeman na ini a tirimakti fu Gado?— A Kownu. Fu dati ede den e kari a tirimakti fu Gado, a Kownukondre.

Yu sabi suma Yehovah Gado teki fu de Kownu na ini En tirimakti?— En Manpikin, Yesus Krestes. Fu san ede a bun moro iniwan tiriman di libisma ben kan teki?— Fu di Yesus lobi en Tata, Yehovah, trutru. Fu dati ede, ala ten a e du san bun.

 Wan langa ten bifo Yesus ben gebore na ini Betlehem, dan Bijbel ben taki kaba dati a ben o gebore èn taki Gado ben o poti en leki Tiriman. Meki wi leisi fu a tori disi na Yesaya 9:6, 7. A tekst e taki: ’Wan pikin gebore gi wi, wan manpikin den ben gi wi; èn a tirimakti sa kon na tapu en skowru; èn en nen sa de . . . A Granman fu Vrede. Wan kaba no sa kon na a bigi tirimakti fu en èn na vrede.’

A tekst disi e kari Yesus, a Tiriman fu Gado Kownukondre, wan „Granman”. Fu taki en leti, wan granman na wan sortu kownu. Yesus na a Manpikin fu a Bigi Kownu, Yehovah. Ma Yehovah meki Yesus tron Kownu tu fu En tirimakti, di sa tiri grontapu wán dusun yari langa (Openbaring 20:6). Baka di Yesus teki dopu, dan a bigin „preiki: ’Abi berow, bika a kownukondre fu hemel kon krosibei kaba.’”​—Mateyus 4:17.

Fu san ede yu denki Yesus ben taki dati a Kownukondre ben kon krosibei kaba?— Fu di a Kownu, di ben o tiri na ini hemel bakaten, ben de leti drape nanga den! Na fu dati ede Yesus ben taigi den sma: „A kownukondre fu Gado de na un mindri” (Lukas 17:21). Yu no ben o wani taki a Kownu fu Yehovah ben de so krosibei na yu taki yu ben kan fasi en srefi?—

Sobun, taigi mi, sortu prenspari wroko Yesus ben kon du na grontapu?— Yesus ben piki na aksi dati nanga den wortu: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon” (Lukas 4:43). Yesus ben sabi taki a no ben kan du a preikiwroko en wawan. Sobun, san yu denki a du?—

Yesus ben tyari sma go nanga en, èn a ben sori den fa den ben musu du a preikiwroko. Den fosi sma di a gi leri ben de den 12 man di a ben teki leki en apostel  (Mateyus 10:5, 7). Ma Yesus ben leri soso den apostel fu en fu du a wroko disi? Nôno, Bijbel e taki dati Yesus ben leri furu tra sma sosrefi fa fu du a preikiwroko. Baka wan pisi ten, a seni 70 tra disipel tu na tu fu go preiki. Èn san den ben e leri sma?— Yesus ben taki: „Taigi den: ’A kownukondre fu Gado kon krosibei na unu’” (Lukas 10:9). Na so den sma kon sabi fu a tirimakti fu Gado.

Langa ten pasa, a ben de so na ini Israel taki te wan sma ben tron kownu, dan a ben e rei go na ini a foto na tapu wan pikin buriki fu sori ensrefi na a pipel. We, na disi Yesus e du te a e go na Yerusalem fu a lasti leisi. Iya, Yesus o tron a Tiriman fu Gado en Kownukondre. Den sma wani en leki Kownu?—

We, te a e rei pasa, dan furu fu den sma e bigin poti den dyakti fu den na en fesi na tapu a pasi. Trawan fu den e koti taki fu den bon èn den e poti den na tapu a pasi. Den e du disi fu sori taki den wani Yesus leki a Kownu fu den. Den e bari: „Blesi fu a Sma di e kon leki Kownu na ini Yehovah nen!” Ma a no ala sma breiti. Fu taki en leti, wan tu kerki fesiman e taigi Yesus srefi: ’Taigi den disipel fu yu fu tan tiri.’​—Lukas 19:28-40.

Feifi dei baka dati, sma e grabu Yesus èn den e tyari en na ini a kownu-oso pe a musu go na fesi a tiriman, Pontius Pilatus. Den feanti fu Yesus e taki dati Yesus e fruteri sma taki a de wan kownu. Den e taki sosrefi dati a de teige a tirimakti fu Rome. Sobun, Pilatus e aksi Yesus efu dati tru. Yesus e taigi en taki a no e pruberi fu teki a tirimakti abra. A e taigi Pilatus: „Mi kownukondre no de wan pisi fu a grontapu disi.”—Yohanes 18:36.

Baka dati, Pilatus e go na dorosei èn a e taigi den sma taki a no feni taki Yesus du wan ogri. Ma now den sma no wani Yesus leki Kownu. Den no wani taki Pilatus lusu en (Yohanes 18:37-40). Baka te Pilatus e taki ete wan tron nanga Yesus, dan a de seiker taki  Yesus no du nowan ogri. Fu dati ede, Pilatus e tyari Yesus go baka na dorosei fu a lasti leisi, èn a e taki: „Luku! A kownu fu unu!” Ma den sma e bari: „Tyari en gowe! Tyari en gowe! Spikri en na wan postu!”

Pilatus e aksi: ’Mi sa spikri a kownu fu unu na wan postu?’ Na edeman fu den priester e piki en: ’Caesar wawan na wi kownu.’ Yu kan bribi dati? Den ogri-ati priester dati ben man kisi den sma so fara fu drai baka gi Yesus!​—Yohanes 19:1-16.

Na ini a ten disi a de leti so. Fu taki en leti, furu sma no wani Yesus leki a Kownu fu den. Kande  den e taki dati den e bribi na ini Gado, ma den no wani Gado noso Krestes fu taigi den san den musu du. Den wani den eigi tirimakti leti dyaso na grontapu.

Fa a de nanga wi? Te wi e leri fu a Kownukondre fu Gado èn fu ala den moi sani di a sa du, dan fa dati e meki wi denki fu Gado?— Wi lobi en, a no so?— Sobun, fa wi kan sori Gado taki wi lobi en èn taki wi wani en Kownukondre fu tiri wi?—

Wi kan sori Gado fa wi e denki fu a tori disi te wi e teki na eksempre fu Yesus. Èn san Yesus ben du fu sori taki a ben lobi Yehovah?— Yesus ben taki: „Ala ten mi e du san e plisi en” (Yohanes 8:29). Iya, Yesus ben kon na grontapu ’fu du a wani fu Gado’ èn „fu klari a wroko fu en” (Hebrewsma 10:7; Yohanes 4:34). Prakseri san Yesus ben du bifo a bigin nanga a preikiwroko fu en.

Yesus go na Yohanes a Dopuman di ben de na a Yordanliba. Baka di den waka go na ini a watra, dan Yohanes saka Yesus en heri skin go na ondro watra, èn a opo en komoto na ini a watra baka. Yu sabi fu san ede Yohanes ben dopu Yesus?—

Yesus ben aksi Yohanes fu du dati. Ma fa wi sabi taki Gado ben wani Yesus fu teki dopu?— Wi sabi dati, bika di Yesus komoto na ini a watra, dan a yere Gado sten e  taki komoto fu hemel: „Yu na mi Manpikin, a lobiwan; na yu mi feni bun.” Gado ben seni en santa yeye srefi, di saka kon na tapu Yesus leki wan doifi. Sobun, di Yesus teki dopu, dan a sori nanga dati taki a ben wani dini Yehovah en heri libi langa, iya, fu têgo.​—Markus 1:9-11.

We, now yu pikin ete. Ma san yu o du te yu kon bigi?— Yu o teki dopu neleki Yesus?— Yu musu teki na eksempre fu en, bika Bijbel e taki dati a libi ’wan eksempre gi yu, so taki yu kan waka soifri na en baka’ (1 Petrus 2:21). Te yu e teki dopu, dan yu sa sori nanga dati taki trutru yu wani Gado Kownukondre fu tiri yu. Ma fu teki dopu wawan no sari.

Wi musu gi yesi na ala den sani di Yesus ben leri wi. Yesus ben taki dati wi no musu de „wan pisi fu grontapu”. Wi ben o gi yesi na en te wi e du grontapu sani? Yesus nanga den apostel fu en no ben abi noti fu du nanga den sortu sani dati (Yohanes 17:14). San den ben du na presi fu dati?— Den ben e taki nanga tra sma fu Gado en Kownukondre. Dati ben de a moro prenspari wroko na ini den libi. Wi kan du dati tu?— Iya, èn wi sa du dati te wi e begi nanga wi heri ati taki Gado Kownukondre musu kon.