Cibalo 45

Ino Bwami Bwa Leza Ninzi? Mbotukonzya Kutondezya Kuti Tulabulangila

SENA uluuzyi mupailo Jesu ngwaakayiisya basikumutobela bakwe?— Ikuti kotauzyi, tulakonzya kuubala antoomwe mu Bbaibbele kuli Matayo 6:9-13. Imupailo ooyo ibanji ngobaamba kuti Mmupailo wa Mwami ubikkilizya majwi aakuti: “Abuze Bwami bwako.” Sena Bwami bwa Leza ulibuzyi kuti ninzi?—

Imwami mmweendelezi wacisi naa cooko cacisi. Alimwi ibweendelezi bwamwami bwiitwa kuti mbwami. Muzisi zimwi imuntu uulemekwa kapati mumfwulumende wiitwa kuti mmusololi. Ino Mweendelezi wamfwulumende ya Leza wiitwa buti?— Wiitwa kuti Mmwami. Nkekaambo kaako imfwulumende ya Leza nceyiitwa kuti Mbwami.

Sena ulimuzyi ooyo Jehova Leza ngwaakasala kuti abe Mwami wamfwulumende Yakwe?— Mmwanaakwe, Jesu Kristo. Ino nkaambo nzi Jesu ncali mweendelezi mubotu kwiinda mweendelezi uuli woonse bantu  ngobanga basala?— Nkaambo Jesu ulabayanda ncobeni Bausyi, nkokuti Jehova. Aboobo lyoonse ucita zintu ziluleme.

Ikaindi Jesu katanazyalwa ku Betelehemu, Ibbaibbele lyakasinsima kujatikizya kuzyalwa kwakwe akuti wakali kuyooba Mweendelezi ngwasalide Leza. Atucibale eeci kuli Izaya 9:6, 7. Lyaamba kuti: “Twazyalilwa mwana, twapegwa mwana mulombe, bwami boonse buyooba alinguwe. Uyooitwa kuti, . . . ‘Mwami waluumuno.’ Nguzu zyabwami bwakwe aluumuno ndwaleta tazikamani.” (BT)—Ndiswe twaasendeka mabala.

Aawa, Jesu mbwali Mweendelezi wa Bwami bwa Leza, wiitwa kuti ‘Mmwami.’ Alimwi Mmwanaa Mwami Mupati, Jehova. Pele alimwi Jehova wabikka Jesu kuba Mwami wamfwulumende Yakwe, eeyo iiyooyendelezya nyika kwamyaka iili cuulu. Alimwi mbubwenya mbotwakaiya mu Cibalo 36, ibambi bali 144,000 bayooendelezya limwi a Jesu mumfwulumende eeyi. (Ciyubunuzyo 14:1, 4; 20:6) Naakazwaa kubbapatizyigwa Jesu, wakatalika “kukambauka, wakati, Amweempwe, nkaambo Bwami bwakujulu buli afwiifwi.”—Matayo 4:17.

Ino uyeeya kuti nkaambo nzi Jesu ncaakaamba kuti Bwami bwakali afwaafwi?— Nkaambo Imwami, ooyo kumbele wakali kuyooendelezya kujulu wakali ambabo! Nkakaambo Jesu ncaakaambila bantu kuti: “Bwami bwa Leza buli akati kanu.” (Luka 17:21, NW) Sena inga tiiwayanda kuti Mwami ngwabikkide Jehova abe afwaafwi kapati anduwe cakuti inga kocikonzya kumuguma?—

Aboobo kondaambila, ino mmulimo nzi uuyandika ngwaakaboolela kuzyoocita Jesu?— Jesu wakawiingula mubuzyo ooyo, naakati: ‘Ayalo minzi iimbi ndileelede kwiikambaukila makani mabotu aa bwami bwa Leza, nkaambo ncencico ncindakatuminwa.’ (Luka 4:43) Jesu wakalizyi kuti kwiina naakali kunga wacikonzya kukambauka alikke. Aboobo, ino uyeeya kuti ncinzi ncaakacita?—

Jesu wakatamba bantu kweenda anguwe alimwi wakabayiisya mbuucitwa  mulimo wakukambauka. Ibakusaanguna mbaakayiisya bakali baabo ibali 12 mbaakasala kuba baapostolo. (Matayo 10:5, 7) Pele sena Jesu wakayiisya buyo baapostolo bakwe kucita mulimo ooyu? Peepe, Ibbaibbele lyaamba kuti Jesu wakayiisya abambi banji ikukambauka. Muciindi, wakatuma basikwiiya bambi kumbele lyakwe ibali 70 kabeenda bobile-bobile. Alimwi ino ncinzi ncobakali kuyiisya bantu?— Jesu wakati: “Mukabaambawide kuti, Bwami bwa-Leza buli afwaafwi kulindinywe.” (Luka 10:9) Munzila eeyi ibantu bakayiya zyamfwulumende ya Leza.

Ikaindi mu Israyeli, ibami bapya bakali kunjila mumunzi kabatantide aambongolo ikutegwa balitondezye kubuleya. Eeci ncaakacita Jesu naakaswaya munzi wa Jerusalemu ciindi camamanino. Ee, Jesu wakali kuyooba Mweendelezi wa Bwami bwa Leza. Sena bantu bakali kumuyanda kuti abe Mwami wabo?—

Naakali kweenda katantide ambongolo, ibunji bwabantu bakatalika kuyala zisani zyabo zyaatala mumugwagwa kumbele lyakwe. Ibamwi bakatema mitabi yazisamu akwiibikka mumugwagwa. Kwiinda mukucita boobo, bakatondezya kuti bakali kuyanda kuti Jesu abe Mwami wabo. Bakoongolola ategwa: “Uli acoolwe uuboola [kali Mwami] muzina lya-Jehova.” Pele tabali bantu boonse ibakakkomene. Mubwini, ibeendelezi bazikombelo bamwi mane bakaambila Jesu kuti, ‘Baambile basikwiiya bako baumune.’—Luka 19:28-40.

Nokwakainda mazuba aali osanwe, Jesu wakaangwa akutolwa muŋanda yabwami yamweendelezi Ponto Pilato. Basinkondonyina Jesu bakali kwaamba kuti Jesu ulyaamba kuti mmwami akuti ukazya bweendelezi bwamfwulumende yaba Roma. Aboobo Pilato wakabuzya Jesu kuti aambe mbwalimvwa kujatikizya makani aayo. Jesu wakatondezya kuti tanaakali kusola kwaatula mweendelezi wamfwulumende pe. Wakaambila Pilato kuti: “Bwami bwangu tabuli bwaansi ano.”—Johane 18:36.

Mpoonya Pilato wakaunka aanze akwaambila bantu kuti kunyina mulandu ngwaakajana muli Jesu. Pele bantu kunyina nobakali kuyanda kuti Jesu abe Mwami wabo. Tiibakali kuyanda pe kuti alekwe buyo. (Johane 18:37-40) Naakamana kubandika a Jesu alimwi, Pilato  wakasinizya kuti ncobeni Jesu tanaakajisi mulandu uuli woonse. Aboobo, naakamugwisya anze Jesu ciindi camamanino, Pilato wakati: “Amubone, ngooyu Mwami wanu.” Pele bantu bakoongolola ategwa: “Azwe, azwe, mumubambule.”

Pilato wakabuzya kuti: “Sena nkabambule Mwami wanu?” Bapaizi bapati bakaingula kuti: “Tatujisi Mwami pele Kaisara walo.” Elo cilagambya kapati kaka eeco! Ibapaizi aabo babi bakacikonzya kuyunga bantu kuti bamukake Jesu!—Johane 19:1-16.

Sunu, zintu zileelene kapati ambozyakabede kuciindi ca Jesu. Ibunji bwabantu kunyina mubwini nobayanda kuti Jesu kali Mwami wabo. Balakonzya  kwaamba kuti balamusyoma Leza, pele tabayandi kuti Leza naa Kristo abaambile ncobeelede kucita. Balombozya buyo mfwulumende zyabo zyaanyika.

Ino swebo tuyeeya buti? Ino tulimvwa buti kujatikizya Leza eelyo notwiiya makani aajatikizya Bwami bwa Leza alimwi azintu zibotu zyoonse nzyobuyoocita?— Tulamuyanda, tee kayi?— Aboobo ino mbuti mbotunga twatondezya Leza kuti tulamuyanda walo alimwi akuti tulombozya kweendelezyegwaa Bwami bwakwe?—

Tulakonzya kumutondezya Leza mbotulimvwa mumoyo kwiinda mukutobela cikozyanyo ca Jesu. Alimwi ino ncinzi Jesu ncaakacita kutegwa atondezye kuti wakali kumuyanda Jehova?— Jesu wakapandulula kuti: “Ndacita lyoonse zintu izimubotela.” (Johane 8:29) Inzya, Jesu wakaboola anyika ‘kuzyoocita kuyanda kwa Leza’ alimwi ‘akumanizya mulimo wakwe.’ (Ba-Hebrayo 10:7; Johane 4:34) Koyeeya ncaakacita Jesu katana kutalika mulimo wakwe wakukambauka.

Jesu wakaunka kuli Johane Mubapatizi ku Mulonga wa Jordano. Nobakanjila mumaanzi, Johane wakamubbizya cakumaninina mumeenda Jesu alimwi akumununa. Sena ulikazyi kaambo Johane ncaakamubbapatizya Jesu?—

Jesu nguwakalomba Johane kuti amubbapatizye. Pele ino tuzyi buti kuti Leza wakali kuyanda kuti Jesu abbapatizyigwe?— Tulizyi oobo akaambo kakuti eelyo Jesu naakaimpuka kuzwa  mumeenda, wakamvwa jwi lya Leza kuzwa kujulu kalyaamba kuti: “Nduwe Mwanaangu ngwenjandisya, alimwi ulandibotezya.” Alimwi mane Leza wakatuma muuya wakwe uusalala muciimo canziba kuti ube aa Jesu. Aboobo, kwiinda mukubbapatizyigwa, Jesu wakatondezya kuti wakali kuyanda kubelekela Jehova mubuumi bwakwe boonse, inzya lyoonse mane kukabe kutamani.—Maako 1:9-11, Ci.

Lino yebo ucili mwana. Pele ino ncinzi ncoyoocita kumbele waakukomena?— Sena uyootobela cikozyanyo ca Jesu akubbapatizyigwa?— Weelede kumwiiya, nkaambo Ibbaibbele lyaamba kuti wakatusiila ‘cibonesyo kuti tukatobele mumikondo yakwe.’ (1 Petro 2:21) Waakubbapatizyigwa, uyootondezya kuti ncobeni uyanda kweendelezyegwaa Bwami bwa Leza. Pele tacigoleli buyo aakubbapatizyigwa pe.

Tweelede kuzitobela zintu zyoonse Jesu nzyaakayiisya. Jesu wakati ‘tatweelede kuba banyika.’ Sena inga katumumvwida ikuti naa twajatikizyigwa muzintu zyanyika? Jesu alimwi abaapostolo bakwe bakazitantamuka zintu zyamunyika. (Johane 17:14) Ino ncinzi ncobakacita muciindi cakucita boobo?— Bakaambila bantu bambi kujatikizya Bwami bwa Leza. Ooyo ngowakali mulimo uuyandika kapati mubuumi bwabo. Sena aswebo tulakonzya kucita oobo?— Inzya tulakonzya, alimwi tuyooucita mulimo ooyo ikuti katusinizyide muzintu nzyotwaamba notupaila kuti Bwami bwa Leza buboole.

Langa-langa magwalo aaya aambi aatwaambila ncotweelede kucita kutegwa tutondezye kuti tulabulombozya kuti buboole Bwami bwa Leza: Matayo 6:24-33; 24:14; 1 Johane 2:15-17 alimwi a 5:3.

[Cifwanikiso icili apeeji 232, 233]

Ino mmulimo nzi ngwaakaboolela anyika Jesu kuti azyooucite?

[Zifwanikiso izili apeeji 235]

Ino nkaambo nzi bantu ncobakacinca mizeezo yabo yakuyanda kuti Jesu abe Mwami wabo?

[Cifwanikiso icili apeeji 236]

Ino nkaambo nzi Jesu ncaakabbapatizyigwa, alimwi mbuti Leza mbwaakatondezya kuti wakakuzuminizya?

[Cifwanikiso icili apeeji 237]

Ino nkuukuli nkotunga twaambila bamwi kujatikizya Bwami bwa Leza?