EILOA ne koe a te ‵talo ne fakaakoako ne Iesu ki ana soko?— Kafai e se iloa ne koe, e mafai o fai‵tau fakatasi tatou ki ei mai i te Tusi Tapu, i te Mataio 6:9-13. E aofia i te ‵talo, telā e taku ne tino e tokouke ki te ‵Talo a te Aliki, a pati konei: “Ke oko mai tou Malo.” E iloa ne koe me se a te Malo o te Atua?—

Ia, a te tupu ko te pule o se fenua io me se kogā koga. Kae ne taku tena pulega ki se malo. I nisi fenua, a te ulu o te malo e taku ki te pelesitene. Se a te igoa o te Pule o te Malo o te Atua?— Ko te Tupu. Tenā eiloa te pogai e taku ei te pulega a te Atua ki te Malo.

E iloa ne koe me ko oi ne filifili ne Ieova te Atua ke fai mo Tupu i Tena pulega?— Ko tena Tama, ko Iesu Keliso. Kaia e ‵lei atu ei a ia i lō so se isi pule telā e mafai o filifili aka ne tino?— Ona ko te mea e alofa tonu eiloa a Iesu ki tena Tamana, ko Ieova. Tela la, e fai faeloa ne ia a te mea tonu.

 A koi tuai eiloa o fanau mai a Iesu i Peteleema, ne ‵valo mai te Tusi Tapu e uiga ki tena fanaumaiga kae fai mai me ka fai a ia mo Pule ne filifili ne te Atua. Ke onoono aka tatou ki te mea tenei, i te Isaia 9:6, 7. E fai mai penei: “E isi se tamaliki ko fanau! Se tamaliki tagata tenei ko aumai ki a tatou! Ko ia ka fai mo takitaki o tatou. Ka fakaigoa a ia ko . . . Te Pelenise o te Filemu. A tena malosi fakatupu e gasolosolo eiloa o lasi; a tena malo ka tumau faeloa i ei te filemu.”—I a matou a mataimanu ‵kese.

E iloa ne koe a te pogai e taku ei te Pule o te Malo o te Atua ki “Te Pelenise”?— Ia, a te pelenise ko te tama a te tupu. Kae ko Iesu ko te Tama a te Tupu Sili, ko Ieova. Kae ko oti foki ne fai ne Ieova a Iesu mo Tupu i Tena pulega, telā ka pule ifo ki te lalolagi mō te afe tausaga. (Fakaasiga 20:6) Mai tua o te papatisoga a Iesu, ne kamata ei “te galuega talai a Iesu, ana muna: ‘Sala‵mo, me ko pili mai te Malo o te lagi.’”—Mataio 4:17.

Se a tau faka‵tau, kaia ne fai mai ei a Iesu me ko pili mai te Malo?— Ona ko te Tupu, telā ka pule fakamuli mai i te lagi, ko nofo atu i a latou! Tenā eiloa te pogai ne fai atu ei a Iesu ki tino: “A te Malo o te Atua tenā eiloa e nofo i otou tafa.” (Luka 17:21) E a, e se fiafia koe ke fakapilipili atu te Tupu a Ieova ki a koe ko te mea ke mafai o patele atu koe ki a ia?—

Tela la, fai mai aka, se a te galuega tāua ne vau a Iesu ki te lalolagi nei o fai?— Ne tali ne Iesu te fesili tenā, ana muna: “E ‵tau foki o folafola atu ne au te tala ‵lei o te Malo o te Atua ki nisi fa‵kai, me tenā eiloa te mea ne uga mai ei au.” (Luka 4:43) Ne iloa ne Iesu me ne seki mafai ne ia o fai tokotasi te galuega talai. Tela la, se a tau faka‵tau, ne a ana mea ne fai?—

Ne olo fakatasi a Iesu mo tino kae ne fakaasi atu ne ia ki a latou te auala ke fai ei te galuega talai. A tino muamua ne fakamasani ne ia ko te toko 12 kolā ne filifili ne ia mo fai  apositolo. (Mataio 10:5, 7) Kae e mata, ne fakamasani fua ne Iesu ana apositolo ke fai te galuega tenei? Ikai, e fai mai te Tusi Tapu me ne fakamasani foki ne Iesu a nisi tino e tokouke ke talai atu. I se taimi e tasi, ne uga atu ne ia a nisi soko e toko 70 i taki lua ke ‵mua atu i a ia. Kae se a te mea ne akoako atu ne latou ki tino?— Ne fai atu a Iesu: “Fai atu ki a latou: ‘A te Malo o te Atua ko pili atu ki a koutou.’” (Luka 10:9) I te auala tenei, ne tauloto ei a tino e uiga ki te pulega a te Atua.

I aso mua i Isalaelu, ne ‵tau o ‵tele atu a tupu ‵fou i luga i se tamā asini ki loto i te fa‵kai ke fakaasi atu ei latou ki tino. Tenei eiloa te mea ko fai ne Iesu i te taimi ne āsi atu ei a ia ki Ielusalema mō te ‵toe taimi. E lavea ne koe, a Iesu ka fai mo Pule i te Malo o te Atua. E mata, ne ma‵nako a tino ke fai a ia mo Tupu?—

Ia, i te taimi ne tele atu ei a ia, ne kamata o ‵fola ne te tokoukega i te vaitino olotou gatu i te auala i ana mua. Ne ‵kati ne nisi tino a lau o lakau kae tuku atu ki luga i te auala. Mai i te faiga penei, e fakaasi atu ei ne latou me e ma‵nako latou ke fai a Iesu mo Tupu. Ne paka‵laga atu latou: “Ke manuia a Ia telā e vau e pelā me se Tupu i te igoa o Ieova!” Kae e se ko tino katoa e fia‵fia. A te ‵tonuga loa, ne fai atu a nisi takitaki lotu ki a Iesu, ‘‵Liko atu ou soko ke filemu.’—Luka 19:28-40.

I te lima o aso mai tua ifo, ne puke fakapagota ei a Iesu kae ne avatu ki loto i se palesi ke tu atu i mua o te kovana, ko Ponitio Pilato. Ne fai atu a fili o Iesu me ne fai atu a Iesu i a ia ko te tupu kae tenā te pogai e ‵teke atu ei a ia ki te pulega a Loma. Tela la, ne fesili atu a Pilato ki a Iesu e uiga ki te mea tenei. Ne fakaasi atu ne Iesu me e se taumafai a ia ke ‵teke atu ki te pulega. E fai atu a ia ki a Pilato: “A toku Malo e sē se vaega o te lalolagi.”—Ioane 18:36.

Ne fanatu a Pilato ki tua kae fai atu ki tino me e seai se mea ‵se ne maua ne ia i a Iesu. Kae nei la, ko se ma‵nako a tino ke fai a Iesu mo fai te lotou Tupu. Ne seki ma‵nako latou ke fakasaoloto tou tagata. (Ioane 18:37-40) Mai tua o te toe fai‵patiga mo Iesu, ko mautinoa eiloa i a Pilato me e seai se mea ‵se ne fai ne ia. Tela la, i te otiga ne aumai ne ia a Iesu ki tua mō te ‵toe taimi, ne fai atu a Pilato: “Kiloke! Tenei te otou  tupu!” Kae ne paka‵laga atu a tino: “Ave keatea a ia! Ave keatea a ia! ‵Tuki atu a ia ki te lakau!”

Ne fesili atu a Pilato: “E a, ka ‵tuki ne au ki luga i te lakau te otou tupu?” Ne tali atu a faitaulaga pule: “E seai se motou tupu kae na ko Kaisala.” E a, e mafai o fakaataata ne koe i tou mafaufau a te mea tenā? Ne mafai o ‵fuli ne faitaulaga ma‵sei konā a tino ke ‵teke atu ki a Iesu!—Ioane 19:1-16.

E ‵pau eiloa te tulaga i aso nei mo aso o Iesu. E se ma‵nako tonu eiloa a te tokoukega o tino ke fai a Iesu mo fai te lotou Tupu. Kāti e fai mai latou me e tali‵tonu latou ki te Atua, kae e se ma‵nako latou ke fai  atu ne te Atua io me ko Keliso a mea e ‵tau o fai ne latou. E ma‵nako eiloa latou ki olotou pulega i te lalolagi nei.

Kae e a tatou? Kafai e tauloto tatou e uiga ki te Malo o te Atua mo mea ‵gali katoa ka fai ne ia, e pefea ‵tou lagonaga e uiga ki te Atua?— E a‵lofa tatou ki a ia, ne?— Kae e mafai pefea o fakaasi atu ne tatou ki te Atua me e a‵lofa tatou ki a ia kae e ma‵nako tatou ki te pulega a tena Malo?—

 

E mafai o fakaasi atu ne tatou ki te Atua a ‵tou lagonaga mai i te tau‵tali atu ki te fakaakoakoga a Iesu. Kae ne a mea ne fai ne Iesu ke fakaasi atu me e alofa a ia ki a Ieova?— “Me fai faeloa ne au a mea kolā e fiafia a ia ki ei,” ko muna a Iesu. (Ioane 8:29) Ao, ne vau a Iesu ki te lalolagi o ‘fai te loto o te Atua’ kae “fakapalele foki tena galuega.” (Epelu 10:7; Ioane 4:34) Mafaufau ki mea ne fai ne Iesu a koi tuai o kamata tena galuega talai.

Ne fanatu a Iesu ki a Ioane te Papatiso i te Vaitafe o Iolitana. Mai tua o te oloatuga ki loto i te vai, ne ufi ne Ioane a Iesu ki lalo i te vai kae toe sau aka foki ne ia ki luga. E iloa ne koe me se a te pogai ne papatiso ei ne Ioane a Iesu?—

Ne fai atu a Iesu ki a Ioane ke fai penā. Kae e iloa pefea ne tatou me ne manako te Atua ke papatiso a Iesu?— E iloa ne tatou me i te taimi ne fanaka ei a Iesu mai te vai, ne lagona ne ia te leo o te Atua mai te lagi penei:  “A koe ko taku Tama, ko taku fagasele; ko oti ne talia ne au a koe.” Ne uga mai foki eiloa ne te Atua tena agaga tapu telā e foliga pelā me se lupe ki luga i a Iesu. Tela la, mai i tena papatisoga, ne fakaasi atu ne Iesu me ne manako a ia ke tavini atu ki a Ieova i tena olaga kātoa, ao, ki te se-gata-mai.—Maleko 1:9-11.

Nei la, koi tupu aka eiloa a koe. Kae ne a mea ka fai ne koe māfai ko matua koe?— E mata, ka fai koe e pelā mo Iesu kae papatiso?— E ‵tau o fakaakoako koe ki a ia, me e fai mai te Tusi Tapu, ne tuku mai ne ia “se fakaakoakoga mō koutou ke tau‵tali faka‵lei atu i ana kalafaga.” (1 Petelu 2:21) Kafai e papatiso koe, ka fakaasi atu ne koe me e manako tonu eiloa koe ke pule atu te Malo o te Atua ki a koe. Kae e se lava fua i te papatisoga.

E ‵tau o faka‵logo tatou ki mea katoa ne akoako mai ne Iesu. Ne fai mai a Iesu me e se ‵tau o fai tatou mo “vaega o te lalolagi.” E mata, e faka‵logo tatou ki a ia māfai e aofia tatou i mea o te lalolagi? Ne tumau eiloa a Iesu mo ana apositolo i te ‵kalo keatea mai i vaegā mea penā. (Ioane 17:14) Kae ne a la olotou mea ne fai?— Ne fai‵pati atu latou ki nisi tino e uiga ki te Malo o te Atua. Tenā eiloa te ‵toe galuega tāua i te lotou olaga. E mata, e mafai foki o fai ne tatou te mea tenā?— Ao, kae ka fai eiloa ne tatou māfai e fakamaoni tatou ki ‵tou pati e fai i te taimi e ‵talo atu ei tatou mō te Malo o te Atua ke oko mai.