MAARAM ka ba han pag-ampo nga igintutdo ni Jesus ha iya mga sumurunod?— Kon diri ka maaram, mahimo naton basahon ito tikang ha Biblia, ha Mateo 6:9-13. An pag-ampo nga tinatawag han damu nga mga tawo nga Amay Namon, nag-uupod han mga pulong: “Kumanhi an imo ginhadian.” Maaram ka ba kon ano an Ginhadian han Dios?—

Isasaysay ko ini ha imo. An hadi amo an magmarando ha usa nga nasud o teritoryo. Ngan an iya gobyerno tinatawag nga ginhadian. Ha iba nga mga nasud an punoan ha gobyerno tinatawag nga presidente. Ano an tawag ha Magmarando han gobyerno han Dios?— Hadi. Salit an gobyerno han Dios tinatawag nga Ginhadian.

Maaram ka ba kon hin-o an pinili ni Jehova nga Dios nga magin Hadi han Iya gobyerno?— An iya Anak, hi Jesu-Kristo. Kay ano nga mas maopay hiya kay ha bisan hin-o nga magmarando nga pinipili han mga tawo?— Tungod kay hi Jesus tinuod nga nahigugma ha iya Amay, hi Jehova. Salit pirme husto an iya ginbubuhat.

 Maiha na antes pa matawo hi Jesus ha Betlehem, an Biblia nagsumat mahitungod han iya katawo ngan nag-unabi nga hiya magigin pinili nga Magmarando han Dios. Aton basahon an mahitungod hini, ha Isaias 9:​6, 7, tikang ha King James Version. Nasiring: “Ha aton natawo an usa nga bata, ha aton iginhatag an usa nga anak nga lalaki: ngan an gobyerno maaada ha iya sugbong: ngan an iya ngaran tatawagon nga . . . An Prinsipe han Kamurayawan. Mawawaray kataposan an pag-uswag han iya gobyerno ngan han kamurayawan.”​—Amon an italiko.

Maaram ka ba kon kay ano nga an Magmarando han Ginhadian han Dios tinatawag dinhi nga “An Prinsipe”?— Aw, ini nga prinsipe amo an anak han usa nga hadi. Ngan hi Jesus an Anak han Harangdon nga Hadi, hi Jehova. Kondi ginhimo liwat ni Jehova hi Jesus nga Hadi han Iya gobyerno, nga magmamando ha tuna hin usa ka yukot ka tuig. (Pahayag 20:6) Katapos mabawtismohan hi Jesus, nagtikang hiya ha ‘pagsangyaw ngan pagsiring: “Magbasol kamo, kay an ginhadian han langit tikahirani na.”’​—Mateo 4:17.

Ha hunahuna mo, kay ano nga nagsiring hi Jesus nga an Ginhadian tikahirani na?— Tungod kay an Hadi, nga ha urhi magmamando ha langit, nakada mismo kaupod nira! Salit hi Jesus nagsiring ha mga tawo: ‘An ginhadian han Dios aada ha butnga niyo.’ (Lukas 17:21) Diri ka ba maruruyag nga magin duok gud ha imo an Hadi ni Jehova nga mahimo mo pa ngani makaptan hiya?—

Salit sumati ako, tungod ha ano nga importante nga buruhaton kinanhi hi Jesus ha tuna?— Ginbaton ni Jesus iton nga pakiana, nasiring: “Kinahanglan gud, nga akon igwali an maopay nga sumat han ginhadian han Dios ha iba man nga mga bungto, kay tungod hini ako ginsugo.” (Lukas 4:43) Maaram hi Jesus nga diri niya mahihimo an pagsangyaw nga nag-uusahan la. Salit, ano ha hunahuna mo an iya ginbuhat?—

Nag-upod hi Jesus hin mga tawo ngan ipinakita ha ira kon paonan-o bubuhaton an pagsangyaw. An siyahan nga iya ginbansay amo an 12 nga iya ginpili sugad nga mga apostol. (Mateo 10:​5, 7)  Kondi mga apostol la ba niya an ginbansay ni Jesus ha pagbuhat hini nga buruhaton? Diri, an Biblia nasiring nga ginbansay liwat ni Jesus an damu nga iba pa ha pagsangyaw. Inabot an panahon, iya sinugo nga mag-una ha iya an 70 nga iba nga mga disipulo nga padis-padis. Ngan ano an ira igintutdo ha mga tawo?— Hi Jesus nagsiring: ‘Padayon nga sumiring kamo ha ira, “An ginhadian han Dios nagtitikahirani na ha iyo.”’ (Lukas 10:9) Hini nga paagi nahibaro an mga tawo mahitungod han gobyerno han Dios.

Maiha na an naglabay ha Israel, batasan han bag-o nga mga hadi nga sumakay ha asno ngadto ha siyudad basi ipakita an ira kalugaringon ha mga tawo. Ini an ginbuhat ni Jesus han binisita hiya ha Jerusalem ha ultimo nga panahon. Husto ini tungod kay hi Jesus an magigin Magmarando han Ginhadian han Dios. Karuyag ba han mga tawo nga hiya an magin ira Hadi?

Aw, samtang nasakay hiya ha asno, damu nga mga tawo an nagtikang magbutang han ira panggawas nga mga panapton dida ha dalan ha iya atubangan. An iba nag-utod hin mga sanga han mga kahoy ngan iginbutang ini dida ha dalan. Pinaagi han pagbuhat hini ipinakita nira nga karuyag nira hi Jesus nga magin ira Hadi. Hira nagsinggit: “Darayawon an hadi nga nakanhi ha ngaran han Ginoo!” Kondi diri an ngatanan nalilipay. Ha pagkamatuod, an iba han mga lider han relihiyon nagsiring pa ngani kan Jesus, ‘Sawaya an imo mga disipulo.’​—Lukas 19:28-40.

Paglabay hin lima ka adlaw gindakop hi Jesus ngan gindara ha palasyo ha atubangan han gobernador nga hi Ponsio Pilato. Siring han mga kaaway ni Jesus nga nag-aangkon hi Jesus nga usa hiya nga hadi ngan nakontra hiya ha gobyerno han Roma. Salit ginpakianhan ni Pilato hi Jesus mahitungod hini nga mga akusasyon. Siring ni Jesus nga diri hiya nagsasari ha pag-agaw han gobyerno. Hiya nagsiring kan Pilato: ‘An akon ginhadian diri bahin hini nga kalibotan.’​—Juan 18:36.

Katapos, ginawas hi Pilato ngan nagsumat ha mga tawo nga waray hiya nakita nga sayop kan Jesus. Kondi yana diri na karuyag han mga tawo nga magin ira Hadi hi Jesus. Diri nira karuyag nga buhian hiya. (Juan 18:37-40) Katapos makiistorya utro kan Jesus, sigurado na hi Pilato nga hi Jesus waray ginbuhat nga anoman nga sayop. Salit, ha kataposan, katapos dad-on hi Jesus  ha gawas ha ultimo nga panahon, hi Pilato siniring: “Kitaa, an iyo hadi!” Kondi an mga tawo nagsinggit: “Kuhaa hiya! Kuhaa hiya! Igraysang hiya!”

Hi Pilato nagpakiana: “Igraraysang ko ba an iyo hadi?” An punoan nga mga saserdote binaton: “Waray namon hadi, kondi hi Cesar.” Hunahunaa la ito! Nakombinse hadton magraot nga mga saserdote an mga tawo nga isalikway hi Jesus!​—Juan 19:1-16.

An kahimtang yana pariho gud han kahimtang ha panahon ni Jesus. Kadam-an nga mga tawo an diri gud naruruyag kan Jesus nga magin ira Hadi. Bangin nasiring hira nga natoo hira ha Dios, kondi diri nira karuyag nga an Dios o hi Kristo  magsumat ha ira kon ano an angay buhaton. Karuyag nira an ira kalugaringon nga mga gobyerno dinhi ha tuna.

Kumusta man kita? Kon hinbabaroan naton an mahitungod han Ginhadian han Dios ngan an ngatanan nga urusahon nga mga butang nga pagbubuhaton hito, ano an inaabat naton mahitungod han Dios?— Hinigugma naton hiya, diri ba?— Paonan-o, kon sugad, maipapakita naton ha Dios nga hinigugma naton hiya ngan karuyag naton nga pagmandoan han iya Ginhadian?—

Maipapakita naton ha Dios an aton kinasingkasing nga pagbati pinaagi han pagsunod ha susbaranan ni Jesus. Ngan ano an ginbuhat ni Jesus ha pagpakita nga hinigugma niya hi Jehova?— ‘Ginbubuhat ko pirme an mga butang nga nakakalipay ha iya,’ siring ni Jesus. (Juan 8:29) Oo, hi Jesus kinanhi ha tuna ‘ha pagbuhat han kaburut-on han Dios’ ngan “ha paghuman han iya buhat.” (Hebreo 10:7; Juan 4:34) Tagda an ginbuhat ni Jesus antes niya tikangan an iya pagsangyaw nga buruhaton.

Hi Jesus kinadto kan Juan Bawtista ha Salog Jordan. Pag-abot nira ha tubig, bug-os nga iginpailarom ni Juan hi Jesus ngan katapos iginbangon hiya utro tikang ha tubig. Maaram ka ba kon kay ano nga ginbawtismohan ni Juan hi Jesus?—

Ginhangyo ni Jesus hi Juan nga bawtismohan hiya. Kondi paonan-o kita nahibaro nga karuyag han Dios nga mabawtismohan hi Jesus?— Maaram kita hito tungod kay han binangon hi Jesus  tikang ha tubig, iya hinbatian an tingog han Dios tikang ha langit nga nasiring: “Ikaw amo an akon Anak nga hinigugma; ha imo nalilipay gud ako.” Sinugo pa ngani han Dios an iya baraan nga espiritu ha porma han usa nga sarapati nga lumusad ngada kan Jesus. Salit pinaagi han pagpabawtismo, ipinakita ni Jesus nga karuyag niya mag-alagad kan Jehova tubtob nga hiya buhi, oo, ha kadayonan.​—Markos 1:9-11.

Yana bata ka pa. Kondi ano an imo bubuhaton kon darodaku ka na?— Susubaron mo ba hi Jesus ngan magpapabawtismo?— Sadang subaron mo hiya, kay an Biblia nasiring nga nagbilin hiya hin “susbaranan, basi kamo magsunod ha iya mga pitad.” (1 Pedro 2:21) Kon magpabawtismo ka, ipinapakita mo nga tinuod nga karuyag mo mandoan han Ginhadian han Dios. Kondi diri igo na an basta mabawtismohan la.

Kinahanglan sugton naton an ngatanan nga igintutdo ni Jesus. Hi Jesus nagsiring nga diri kita sadang magin ‘bahin han kalibotan.’ Sinusugot ba naton hiya kon ginbubuhat naton an kalibotanon nga mga butang? Hi Jesus ngan an iya mga apostol nagpahirayo tikang ha mga butang han kalibotan. (Juan 17:14) Ano lugod an ira ginbuhat?— Ira iginsumat ha iba nga mga tawo an mahitungod han Ginhadian han Dios. Ito an importante nga buruhaton ha ira kinabuhi. Mahihimo ba liwat naton ito nga buruhaton?— Oo, ngan bubuhaton naton ito kon sinsero kita ha aton ginsisiring kon nag-aampo kita nga kumanhi an Ginhadian han Dios.