¿A KʼAJ óol wa le oración tu kaʼansaj Jesús tiʼ u disipuloʼoboʼ?... Wa maʼeʼ jeʼel u páajtal k-múul xokik teʼ Bibliaoʼ, tu libroil Mateo 6:9 tak 13. Le oracionaʼ yaʼab máax kʼaj óoltmil bey padrenuestroeʼ, junjaatseʼ ku yaʼalik: «Taalak a Reino». ¿A wojel wa baʼax u Reino Dios?...

² Le reino ku chʼaʼchiʼitik le Bibliaoʼ, junpʼéel gobierno. Bejlaʼeʼ yaan jejeláas gobiernoʼob. Yaan tiʼ letiʼobeʼ letiʼe presidente nuʼuktik le luʼumiloʼ. Baʼaleʼ le gobierno wa Reino ku yaʼalik Dios u tsʼáaikoʼ, u gobernanteileʼ letiʼ le Reyoʼ.

³ ¿A wojel wa máax tu yéeyaj Jéeoba Dios utiaʼal ka u beet u Reyil tiʼ u gobierno?... Jesucristo, u Hijo. ¿Baʼaxten Jesuseʼ letiʼe maas maʼalob gobernanteoʼ?... Tumen jach u yaabiltmaj u Taata yéetel mantatsʼ ku beetik baʼax maʼalob.

 ⁴ Táanil tiʼ u síijil Jesús tu kaajil Beleneʼ, le Bibliaoʼ tu yaʼalaj yaan u taal way Luʼumeʼ yéetel yaan u tsʼaʼabal gobernar tumen Dios. Koʼox xokik Isaías 9:6 yéetel 7: «Tsʼoʼok u síijil juntúul chan xiʼipal, [Dioseʼ], tsʼoʼok u tsʼáaik tiʼ toʼon juntúul paal, tiʼ máax tsʼoʼok u tsʼaʼabal u páajtalil u méekʼtáan. Bíin tsʼaʼabak le [kʼaabaʼ] tiʼaʼ: [...], [u principeil jeetsʼel]. [...] U páajtalil u [reinoeʼ], bíin kʼiʼitpajak tuláakal tuʼux[,] maʼ xan bíin xuʼuluk u jeetsʼeliliʼ».

⁵ ¿A wojel wa baʼaxten ku yaʼalaʼal Príncipe tiʼ u Gobernanteil u Reino Dios?... Tumen juntúul principeeʼ u hijo juntúul rey, Jesuseʼ u Hijo le maas Nojoch Reyoʼ, Jéeoba. Baʼaleʼ Jéeobaeʼ tsʼoʼok u tsʼáaik Jesús u beet u Reyil tiʼ u Reino, yéetel yaan u gobernartik le Luʼum ich mil jaʼaboʼoboʼ (Apocalipsis 20:6). Ka tsʼoʼok u yokjaʼeʼ «Jesuseʼ káaj u kʼaʼaytik yéetel u yaʼalik: ‹Kʼex a tuukuleʼex, tumen u Reinoil kaʼaneʼ tsʼoʼok u náatsʼal›» (Mateo 4:17).

⁶ ¿Baʼaxten a tuklik tu yaʼalaj Jesús tiʼ le máakoʼob tsʼoʼok u náatsʼal le Reinooʼ?... Tumen le Rey, kun reinar teʼ kaʼanoʼ, tiaʼan ichiloʼobeʼ. Le oʼolal aʼalaʼabtiʼob tumen Jesús: «U Reino Dioseʼ chúumuk tiʼ teʼex yaan» (Lucas 17:21). ¿Maʼ wa uts ta tʼaan ka yanakech naatsʼ tiʼ le Rey yéeyaʼan tumen Jéeoba yéetel ka béeyak tak a machikiʼ?...

⁷ ¿A wojel wa baʼax nojoch meyajil taal u beet Jesús way Luʼumeʼ?... Letiʼeʼ ku núukik le kʼáatchiʼaʼ: «Kʼaʼabéet xan in kʼaʼaytik u maʼalob péektsilil u Reino Dios tiʼ uláakʼ kaajoʼob, tumen le beetik túuxtaʼaben» (Lucas 4:43). Baʼaleʼ Jesuseʼ u yojel maʼ tu páajtal u kʼaʼaytik le maʼalob péektsil chéen tu juunaloʼ. Le oʼolaleʼ, ¿baʼax a tuklik tu beetaj?...

⁸ Jesuseʼ tu kaʼansaj uláakʼ máakoʼob utiaʼal u beetkoʼob xan le meyajaʼ. Le máaxoʼob tu yáax kaʼansoʼ u doce apostoloʼob (Mateo 10:5, 7). Baʼaleʼ ¿chéen wa letiʼob tu  kaʼansaj? Maʼatech, le Bibliaoʼ ku yaʼalikeʼ yaʼab uláakʼ máakoʼob tu kaʼansaj. Ka máan kʼiineʼ tu túuxtaj kʼaʼaytaj kaʼakaʼatúulil setenta máakoʼob. ¿Baʼax tu kʼaʼaytoʼob tiʼ le máakoʼoboʼ?... Jesuseʼ tu yaʼalajtiʼob: «Maʼ u xuʼulul a waʼalikeʼextiʼob: ‹U Reino Dioseʼ tsʼoʼok u náatsʼal ta wiknaleʼex›» (Lucas 10:9). Bey úuchik u kaanbal le máakoʼob tiʼ u gobierno Diosoʼ.

⁹ Tu kʼiinil le israelitaʼoboʼ, le túumben reyoʼoboʼ suuk u yookloʼob ichil le kaaj yóokʼol juntúul chan burro utiaʼal ka ilaʼakoʼoboʼ. Jesuseʼ bey úuchik u beetik ka bin tu tsʼook juntéen tu kaajil Jerusalenoʼ. Toʼoneʼ k-ojel Jesús ken u beet u Gobernanteil tiʼ u Reino Dios, baʼaleʼ ¿u kʼáat wa le máakoʼob ka u beet u reyil Jesús tu yóokʼoloʼoboʼ?...

¹⁰ U maas yaʼabil le máakoʼoboʼ káaj u jayik u nookʼoʼob teʼ bej tuʼux kun máanoʼ. Uláakʼoʼobeʼ tu chʼakoʼob u leʼ xaʼaneʼ ka tu jayoʼob yóokʼol le bejoʼ. Bey úuchik u yeʼeskoʼob u kʼáatoʼob ka u beet u Reyil Jesús tu yóokʼoloʼoboʼ. Joʼopʼ u yaʼalikoʼob: «¡Kiʼikiʼtʼantaʼak le Máax ku taal bey Rey tu kʼaabaʼ Jéeobaoʼ!». Baʼaleʼ maʼ tuláakal le máakoʼob kiʼimakchaj u yóoloʼoboʼ. Yaan tak tiʼ u nuuktakil le religionoʼoboʼ tu yaʼaloʼob tiʼ Jesús: «Aʼal tiʼ a disipuloʼob ka u mak u chiʼob» (Lucas 19:28-40).

¹¹ Cinco kʼiinoʼob úuchuk lelaʼ, Jesuseʼ maʼacheʼ ka bisaʼab tu palacio le gobernador Poncio Pilatooʼ. U enemigoʼob Jesuseʼ joʼopʼ u yaʼalikoʼob tsʼoʼok u líikʼil tu contra u gobiernoil Roma, tumen letiʼeʼ rey. Pilatoeʼ tu kʼáataj tiʼ Jesús wa jaaj, baʼaleʼ tu yeʼeseʼ maʼ u kʼáat u chʼaʼ le gobiernooʼ. Tu yaʼalajtiʼ: «In reinoeʼ maʼ tiʼ le yóokʼol kaab u taalaʼ» (Juan 18:36).

¹² Pilato túuneʼ jóokʼeʼ ka tu yaʼalaj tiʼ le máakoʼob mix baʼal kʼaas u beetmaj Jesusoʼ. Baʼaleʼ letiʼobeʼ maʼ u kʼáatoʼob ka u beet u reyil Jesusiʼ, mix ka chaʼabak (Juan 18:37-40). Ka tsʼoʼok u kaʼa tʼaan Pilato yéetel Jesuseʼ, tu tsʼáaj cuentaeʼ jach mix baʼal kʼaas u beetmaj,  le oʼolal tu kaʼa jóoʼsaj Jesuseʼ ka tu yaʼalaj: «¡Ileʼex! ¡A reyeʼex!». Baʼaleʼ le máakoʼoboʼ tu yawtoʼob: «¡Kíimse! ¡Kíimse! ¡Baj tiʼ cheʼ!».

¹³ Pilatoeʼ tu kʼáataj: «¿A kʼáateʼex ka in baj a reyeʼex tiʼ junpʼéel cheʼ?», u nuuktakil le sacerdoteʼoboʼ tu núukoʼob: «Chéen juntúul rey yaantoʼon, chéen César». ¡Chéen tukulte! Le j-kʼasaʼan sacerdoteʼoboʼ tsʼoʼok u beetkoʼob u tsʼáaikuba le kaaj tu contra Jesusoʼ (Juan 19:1-16).

¹⁴ Bejlaʼa xaneʼ láayliʼ bey u yúuchloʼ. U maas yaʼabil le máakoʼoboʼ maʼ u kʼáatoʼob ka u beet u  Reyil Jesusiʼ. Maʼ xaaneʼ ku creertikoʼob Dios, baʼaleʼ maʼ u kʼáatoʼob ka aʼalaʼaktiʼob baʼax unaj u beetkoʼob tumen Dios mix tumen Cristoiʼ. Letiʼob u kʼáat u yéeyoʼob máax kun gobernartikoʼob.

¹⁵ ¿Kux túun toʼon? Ken kaanbalnakoʼon tiʼ u Reino Dios yéetel tiʼ le bukaʼaj baʼaloʼob jatsʼutstak u beetmoʼ, ¿baʼax k-uʼuyik tu yoʼolal Dios?... Yaabilaj, ¿máasaʼ?... Bey túunoʼ, ¿bix jeʼel k-eʼesik k-yaabiltmaj yéetel k-kʼáat ka gobernartaʼakoʼon tumen u Reinoeʼ?...

¹⁶ K-beetik jeʼex úuchik u beetik Jesuseʼ. ¿Bix úuchik u yeʼesik Jesús u yaabiltmaj Jéeoba?... Letiʼeʼ tu yaʼalaj: «Mantatsʼ kin beetik le baʼaxoʼob uts tu tʼaanoʼ» (Juan 8:29). Beyoʼ, Jesuseʼ taal way Luʼum utiaʼal u beet baʼax uts tu tʼaan Dioseʼ yéetel utiaʼal u «tsʼoʼoksik le meyaj» kʼubéentaʼabtiʼoʼ (Hebreoʼob 10:7; Juan 4:34). Koʼox ilik baʼax tu beetaj táanil tiʼ u káajal u kʼaʼaytaj.

¹⁷ Jesuseʼ bin tu áalkab jaʼil le Jordán utiaʼal ka tsʼaʼabak u yokjaʼ tumen Juan Bautistaoʼ. Ka tsʼoʼok u yookloʼob tu kaʼatúulaloʼob ichil le áalkab jaʼoʼ, Juaneʼ tu láaj tʼubaj u wíinklil Jesús ichil le jaʼoʼ, tsʼoʼoleʼ ka tu jóoʼsaj. ¿A wojel wa baʼaxten tsʼaʼab u yokjaʼ tumen Juan?...

¹⁸ Jesús aʼaltiʼ ka u beete. Baʼaleʼ ¿bix k-ojéeltik wa u kʼáat Dios ka okjaʼanak kaʼach Jesús?... Tumen ka  jóokʼ ichil le jaʼoʼ, tu yuʼubaj u tʼaan Dios desde teʼ kaʼan ku yaʼalikoʼ: «Techeʼ in Paalech, máax in yaabiltmaj; teneʼ jach kiʼimak in wóol ta woʼolal». Dioseʼ tu túuxtaj u kiliʼich muukʼ bey paloma tu yóokʼol Jesuseʼ. Úuchik u yokjaʼeʼ, Jesuseʼ tu yeʼeseʼ u kʼáat u meyajt Jéeoba tuláakal u kʼiiniloʼob u kuxtal (Marcos 1:9-11).

¹⁹ Techeʼ beoraaʼ chichnech, baʼaleʼ ¿baʼax ken a beet ken nojochchajkech?... ¿Yaan wa a wokjaʼ jeʼex tu beetil Jesusoʼ?... Unaj a beetik, tumen le Bibliaoʼ ku yaʼalikeʼ ‹unaj k-xíimbal jeʼex úuchik u beetik letiʼoʼ› (1 Pedro 2:21). Ken okjaʼanakecheʼ ka weʼesik a kʼáat ka u gobernartech u Reino Dios. Baʼaleʼ maʼ chéen unaj a wokjaʼiʼ.

²⁰ Kʼaʼabéet k-beetik tuláakal baʼax tu kaʼansaj Jesús. Letiʼeʼ tu yaʼaleʼ maʼ unaj u yantal mix baʼal k-il yéetel le «yóokʼol kaaboʼ». Wa k-táakpajal tiʼ le baʼaxoʼob ku beetaʼal teʼ yóokʼol kaabaʼ, ¿máasaʼ maʼ táan k-uʼuyik u tʼaan Jesusiʼ? Jesús yéetel u apostoloʼobeʼ maʼ táakpajoʼob tiʼ le baʼaxoʼob yaan teʼ yóokʼol kaabaʼ (Juan 17:14). ¿Baʼax túun tu beetoʼob?... Tu kʼubaj u yóoloʼob u kʼaʼaytoʼob u Reino Dios. Lelaʼ letiʼe baʼax tu tsʼáaʼob táanil ichil u kuxtaloʼoboʼ. ¿Jeʼel wa u páajtal k-beetik xan beyoʼ?... Jeʼeleʼ, yéetel jeʼel xan u páajtal k-kʼáatik tu jaajil k-óol ka taalak u Reino Dioseʼ.