TIKA dong iwinyo ka ngat mo loko i kom agikki piny?— I kare-ni dano mapol giloko pi agikki piny. Jo mukene gitamo ni kibityeko lobo ki lweny ma dano bitic iye ki bom me nuclear. Mono itamo ni Lubanga biweko dano balo lobowa mamwonya-ni woko?—

Kit ma dong wapwonyo kwede, Baibul bene loko i kom agikki piny. Baibul waco ni “Lobo tum woko.” (1 Jon 2:17) Mono itamo ni agikki me lobo-ni tere ni agikki me lobo man ma ngom-mi?— Pe kumeno, Baibul waco ni Lubanga ocwe yo lobo nyo ngom ‘wek dano gubed iye,’ en oketo ni dano myero gubed iye kun ginongo iye yomcwiny. (Icaya 45:18) Jabuli 37:29 wacci: “Jo ma kitgi atir gibicamo lobo, dok gibibedo iye matwal.” Pi tyen lok man Baibul bene waco ni lobo bibedo matwal.—Jabuli 104:5; Latitlok 1:4.

Dong ka agikki me lobo pe tere ni agikki me lobo ma ngom-mi, ci dong te lokke ngo?— Watwero nongo lagamme ka wangiyo gin mutimme i kare pa Nua. Baibul tito ni: ‘Pii bene aye ma yam otyeko lobo me kare maca ka pii aluka ocorre omwonyo woko.’—2 Petero 3:6.

Tika ngat mo obwot ki i Pii Aluka ma otyeko lobo i kare pa Nua-ni?— Baibul waco ni Lubanga “ogwoko Nua keken, latit lok me kit ma atir, kacel ki jo mukene abiro, i kare ma yam en ocwalo pii aluka wek omwony lobo pa jo ma pe gilworo Lubanga woko.”—2 Petero 2:5.

Dong, lobo mene ma kityeko? Mono obedo lobo ma ngom-ni, kece jo ma kitgi raco?— Baibul wacci obedo “lobo pa jo ma pe gilworo Lubanga.” Nen kong kany, kilwongo Nua ni “latit lok me kit ma atir.” Mono itamo ni en obedo ka tito lok i kom ngo?— Nua obedo ka poyo wi dano pi agikki me “lobo me kare maca.”

I kare ma Yecu oloko i kom Pii Aluka, en otito bot lupwonnyene gin ma dano gubedo ka timone ma peya agikki obino. Man aye gin ma en owaco botgi: ‘I kare ca ma peya pii aluka ocorre i wi lobo [dano] onongo gicamo, gimato, dok awobe ki anyira ginyomme, nio wa i nino ma Nua odonyo kwede i yeya; pe gumedo ki ngeyo gin mo nio ka pii aluka opong, ci omologi woko ducu.’ Dong Yecu owacci dano gibibedo ka timo jami ma kit meno kikome ma peya agikki piny me kare-ni obino—Matayo 24:37-39.

 Lok pa Yecu nyuto botwa ni watwero nongo pwony i kom gin ma dano gubedo ka timone ma peya Pii Aluka obino. Ma lubbe ki kwanwa me Dul me 10 i buk man, wi mono po i kom gin ma jo meno gutimo?— Jo mukene onongo giger dok gutimo tim bwami. Dok Yecu owacci pol pa dano pe gubedo ki miti me winyo lok i kare ma Lubanga ooro Nua me tito lok me kit ma atir botgi.

Dong i nino mo Jehovah owaco bot Nua ni Ebityeko jo maraco kun etiyo ki pii aluka. Pii onongo bipong mwonyo lobo lung, wa ki godi ducu. Jehovah owacci Nua oyub yeya madit. Yeya-ni onongo obedo calo bok madit dok bor kit ma nen kwede i cal ka i dok i pot karatac 238.

Lubanga owacci Nua oyub yeya madit ma romo en ki jo me ode kacel ki lee mapol ma bibedo iye labongo ayela. Nua ki jo me ode gutiyo matek. Gutongo yadi madongo, gucako keto bao kacel me guro yeya. Man otero mwaki mapol pien yeya man onongo dit adada.

Wi tika po i kom gin mukene ma Nua obedo ka timone pi mwaki magi ducu ma en obedo ka yubo yeya?— En obedo ka tito kwena kun poyo wi dano i kom Pii Aluka ma onongo tye ka bino. Tika ngat mo i kingi owinyo lok pa Nua? Pe tye ngat mo nikwanyo jo me ot pa Nua keken. Jo mukene-ni gulungo wigi i tiyo tic mapat. Wi po i kom ngo ma Yecu owacci gubedo ka timone?— Gin gubedo ka cam ki mat dok bene gunyomme. Pe gutamo ni gin jo maraco dok bene pe gukwanyo cawa me winyo lok pa Nua. Dong kong wanen gin ma otimme i komgi.

I kare ma Nua ki jo me ode gudonyo i yeya, Jehovah oloro doggola. Jo ma gitye woko onongo pud pe giye ni Pii Aluka obibino. Ento pii ocako corre ki malo atura! Kit kot-te onongo pat. Obedo  twon kot madit adada! I nge cawa manok, pii opong calo kulu madit ma tye ka mol malongo. Pii obedo ka reto yadi madongo kun loro godi madito calo gubedo gweng matino. Ci ngo mutimme i kom dano ma pe gudonyo i yeya?— Yecu owacci: “Pii aluka opong, ci omologi woko ducu.” Dano ducu ma pe gudonyo i yeya guto woko. Pingo?— Kit ma Yecu owaco kwede, “pe gumedde ki ngeyo gin mo.” Pe guwinyo lok!—Matayo 24:39; Acakki 6:5-7.

Wi opo ni, Yecu owacci gin mutimme i kom jo meno tye me pwonyowa i kare-ni. Ngo ma watwero pwonyone ki iye?— Dano gire guto pe pi bedo jo maraco keken ento pien ni polgi onongo gulungo wigi i tiyo tic mapat ma pe gitwero kwanyo kare me pwonyo lok i kom Lubanga wa ki gin ma en bitimone. Myero wabed ma wagwokke wek pe wabed calo gin, pe kumeno?—

Itamo ni Lubanga dok aye bityeko lobo kun tiyo ki pii aluka?— Pe kumeno, Lubanga ocikke ni pe ebitimo meno doki. En owacci: “Aketo danyu mera i pol, ma bibedo lanyut me gicikkena.” Jehovah owacci danyu bibedo lanyut ma cimo ni “pii bene pe dok bidoko aluka ma romo tyeko gin makwo ducu.”—Acakki 9:11-17.

Dong watwero bedo labongo akalakala ni Lubanga pe bityeko lobo kun tiyo ki pii aluka. Kit ma waneno kwede, Baibul gire loko i kom agikki me lobo. Ka Lubanga bityeko lobo-ni, angagi ma en  bibwotogi ma kwo?— Tika bibedo jo ma onongo gitye ki miti matut i kom jami mukene, ma pe gimito pwonyo lok i kom Lubanga? Tika twero bedo jo ma onongo gipe ki cawa me kwano Baibul? Itamo ningo?—

Wamito bedo i kin jo ma Lubanga bigwokogi ma kwo, pe kumeno?— Mono pe bedo ber ka jo me odiwa gubedo calo jo me ot pa Nua wek Lubanga olar wan ducu?— Wek wabwot ki i agikki me lobo man, myero wange kit ma Lubanga bityeko kwede lobo man ki kit ma en bikelo kwede lobone manyen me kit matir-ri. Kong wanen kit ma en bitimo man kwede.

Baibul miniwa lagam man i buk pa Daniel cura 2, tyenge 44. Ginacoya man tye ka lok i kom kare wa-ni kun wacci: “Dok i kare pa luker meno Lubanga me polo biketo ker [gamente] mukene ma ri nakanaka ma pe gitwero balone, kadi dit me locce bene pe gibiweko i cing rok mukene. Ker meno manyen-ni bituro ker magi ducu ngidogi woko matitino, ci tyekogi woko ducu, en aye dong bicung bedo matwal.”

Tika iniang meno?— Baibul wacci Ker pa Lubanga bityeko gamente ducu me lobo-ni. Pingo?— Pien gamente me lobo-ni pe gitye ki winy bot ngat ma Lubanga oketo me bedo Kabaka. Dok meno obedo anga?— Obedo Yecu Kricito!

Lubanga Jehovah tye ki twero me yero gamente ma myero obed i loc, dok en oyero Wode, Yecu, me bedo Kabaka. Cokcok-ki, Yecu Kricito bitelo wi mony me turo gamente ducu me lobo man. I Niyabo cura 19, tyenge 11 nio 16, Baibul loko i kom kit ma en bitimo man kwede, kit ma cal-li nyutu kwede. Lweny pa Lubanga me tyeko gamente ducu-ni kilwongo ni Armagedon i Baibul.

 Lubanga owacci Ker-re bityeko gamente pa dano. Ento en mono wacciwa me turo gamente magi?— Pe kumeno, i Baibul Armagedon kilwongo ni “nino madit pa Lubanga Won Twer Ducu.” (Niyabo 16:14, 16) Armagedon obedo lweny pa Lubanga, dok en tiyo ki Yecu Kricito me telo wi lumalaika i lweny man. Tika ada ni lweny me Armagedon dong tye cok? Kong wanen kit ma watwero ngeyone kwede.