Ibuot 46

Mmọn̄ Osobo Ererimbot—Nte Emi Ayafiak Etịbe?

NDI akanam afo omokop owo ekededi etịn̄de aban̄a utịt ererimbot?— Mfịn ediwak owo ẹsitịn̄ ẹban̄a emi. Ndusụk owo ẹkere ke ererimbot editre ke ekọn̄ emi mme owo ẹkamade bọmb nuclear ẹn̄wana. Nte afo emekere ke Abasi ayayak mme owo ẹsobo ediye isọn̄ ye heaven nnyịn ye nyayama ntantaọfiọn̄ esie?—

Nte nnyịn ikekpepde, Bible etịn̄ aban̄a utịt ererimbot. Enye ọdọhọ ete: “Ererimbot ke ebebe efep.” (1 John 2:17) Nte afo ekere ke utịt ererimbot ediwọrọ utịt isọn̄?— Baba, Bible ọdọhọ ke Abasi okobot isọn̄ “man ẹdụn̄ ke esịt,” ih, man  mme owo ẹdụn̄ ke esịt ẹnyụn̄ ẹkop inemesịt. (Isaiah 45:18) Psalm 37:29 ọdọhọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” Ke ntak emi Bible n̄ko ọdọhọ nte ke isọn̄ eyebịghi ke nsinsi.—Psalm 104:5; Ecclesiastes 1:4.

Ntre edieke utịt ererimbot mîwọrọke utịt isọn̄, nso ke enye ọwọrọ?— Nnyịn imekeme ndifiọk edieke nnyịn idụn̄ọrede se iketịbede ke eyo Noah. Bible anam an̄wan̄a ete: ‘Edi mmọn̄ [m̀mê, ukwọ] ke ẹkeda ẹfụk ẹnyụn̄ ẹsobo ererimbot emi okodude adan̄aoro.’—2 Peter 3:6.

Ndi owo ndomokiet ama ọbọhọ utịt ererimbot ke ini akwa Ukwọ oro ke eyo Noah?— Bible ọdọhọ ke Abasi ‘ama ekpeme Noah, ọkwọrọ edinen ido, ye owo itiaba en̄wen, ke ini Enye anamde ukwọ ọtọ ofụk ekondo eke mîbakke Abasi.’—2 Peter 2:5.

Mmọdo, nso ikedi ererimbot oro ekesịmde utịt? Nte enye ekedi isọn̄, m̀mê ekedi ndiọi owo?— Bible ọdọhọ ke enye ekedi “ekondo eke mîbakke Abasi.” Ndien tịm fiọk, ẹkot Noah ‘ọkwọrọikọ.’ Afo ekere ke enye ọkọkwọrọ aban̄a nso?— Noah ọkọtọt mme owo aban̄a utịt “ererimbot emi okodude adan̄aoro.”

Ke ini Jesus eketịn̄de aban̄a akwa Ukwọ, enye ama etịn̄ ọnọ mme mbet esie aban̄a se mme owo ẹkesinamde mbemiso utịt ekedide. Enye ọkọdọhọ mmọ ete: ‘Nte mmọ [mme owo] ẹdiade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ndọ ke mme usen eke ẹkebemde ukwọ iso, tutu esịm usen emi Noah odụkde ke ubom, mînyụn̄ ifiọkke tutu ukwọ edi edimen mmọ kpukpru efep.’ Ekem Jesus ama ọdọhọ ke mme owo ẹdinam kpasụk ntre mbemiso ererimbot emi esịmde utịt.—Matthew 24:37-39.

Mme ikọ Jesus ẹwụt nte ke nnyịn imekeme ndikpep n̄kpọ nto se  mme owo ẹkenamde mbemiso Ukwọ. Nte ikokotde ke Ibuot 10 ke n̄wed emi, nte afo emeti se mme owo oro ẹkenamde?— Ndusụk irenowo ẹkedi mbon n̄kanubọk ẹnyụn̄ ẹnam n̄kpọ afai afai. Edi Jesus ọkọdọhọ ke ediwak mbon eken ikakam ikpan̄ke utọn̄ ke ini Abasi ọkọdọn̄de Noah ọkọkwọrọ ikọ ọnọ mmọ.

Ntre usen ama edikem emi Jehovah ọkọdọhọde Noah ete ke Imọ imọn̄ ida Ukwọ isobo ndiọi owo. Mmọn̄ oyofụk ofụri isọn̄, idem ye ikpọ obot. Jehovah ama ọdọhọ Noah ọkọn̄ akamba ubom. Enye eketie nte akamba anyan ekebe, nte afo ekemede ndikụt ke ndise emi odude ke page 238.

Abasi ama ọdọhọ Noah ọkọn̄ ubom oro enen̄ede okpon man enye ye ubon esie ye ediwak unam ẹkeme ndidụn̄ ke esịt. Noah ye ubon esie ẹma ẹnam utom ọkpọsọn̄. Mmọ ẹma ẹsịbe ikpọ eto, ẹnyụn̄ ẹda mme eto emi ẹtọn̄ọ ndikọn̄ ubom oro. Emi ama ada ata ediwak isua koro ubom oro ama enen̄ede okpon.

Nte afo emeti n̄kpọ efen oro Noah akanamde ke ofụri isua oro enye ọkọkọn̄de ubom oro?— Enye ọkọkwọrọ ikọ, ọtọtde mme owo aban̄a Ukwọ oro edide. Ndi owo mmọ ndomokiet ama akpan̄ utọn̄? Owo mmọ ndomokiet ikakpan̄ke utọn̄ ibọhọke ubon Noah. Mbon eken ẹkekam ẹnen̄ede ẹsịn idem ke ndinam mme n̄kpọ en̄wen. Ndi afo emeti se Jesus ọkọdọhọde ke mmọ ẹkenam?— Mmọ ẹkedia udia ẹnyụn̄ ẹn̄wọn̄ n̄kpọ ẹnyụn̄ ẹdọ ndọ. Mmọ ikekereke nte ke mmimọ idi ndiọi owo, ikonyụn̄ ikpan̄ke utọn̄ inọ Noah. Ntre yak ise se iketịbede inọ mmọ.

Ke Noah ye ubon esie ẹma ẹkedụk ubom, Jehovah ama eberi usụn̄. Mbon oro mîkodụkke ubom ikosụk inịmke ke akpanikọ ite ke Ukwọ eyedi. Edi inikiet inikiet, edịm ama ọtọn̄ọ ndidep! Enye ikakam idịghe ekpri edịm emi esidepde kpukpru ini. Enye ekedi ata akamba edịm! Ikebịghike mmọn̄ oro ama akabade  etie nte akwa akpa mmọn̄, anamde ọkpọsọn̄ uyom. Enye ama onụk ikpọ eto ọduọn̄ọ onyụn̄ atan̄ ikpọ itiat nte n̄kpọ eke mmọ ẹkedide n̄kpri itiat. Ndien nso kaban̄a mme owo oro mîkodụkke ubom oro?— Jesus ọdọhọ ete: “Ukwọ edi edimen mmọ kpukpru efep.” Kpukpru owo oro mîkodụkke ubom oro ẹma ẹkpan̄a. Ntak-a?— Nte Jesus ọkọdọhọde, ‘mmọ ikọfiọkke.’ Mmọ ikakpan̄ke utọn̄!—Matthew 24:39; Genesis 6:5-7.

Idahaemi, ti, Jesus ọkọdọhọ ke se iketịbede inọ mbon oro edi ukpepn̄kpọ ọnọ nnyịn mfịn. Nso n̄kpọ ke nnyịn ikeme ndikpep?— Ọfọn, nsobo ikesịmke mme owo oro n̄kukụre koro mmọ ẹkediọkde edi koro ediwak mmọ ikenyeneke ini inọ edikpep n̄kpọ mban̄a Abasi ye se enye okoyomde ndinam. Oyom nnyịn ikpeme man nnyịn ikûbiet mmọ, nte iyomke?—

Nte afo emekere ke Abasi ayafiak ada Ukwọ osobo ererimbot?— Baba, Abasi ama ọn̄wọn̄ọ ete ke imọ idinamke oro. Enye ọkọdọhọ ete: “Mmenịm akpara mi ke idiọk enyọn̄, enye oyonyụn̄ edi idiọn̄ọ.” Jehovah ọkọdọhọ ke akpara edidi idiọn̄ọ nte ke “mmọn̄ idikabakede aba ukwọ isobo kpukpru obụkidem.”—Genesis 9:11-17.

Ntre nnyịn imekeme nditịm nnịm ke akpanikọ nte ke tutu amama Abasi idifiakke ida ukwọ isobo ererimbot. Edi, nte nnyịn ikụtde, Bible etịn̄ aban̄a utịt ererimbot. Anie ke Abasi edinyan̄a ke ini enye edisobode ererimbot emi?— Ndi edinyan̄a  mme owo oro ẹkenen̄erede ẹnyene udọn̄ ke n̄kpọ en̄wen tutu mmọ idehede iyom ndikpep n̄kpọ mban̄a Abasi? Ndi edinyan̄a mbon oro ẹkenanade ini ẹkaha ndikpep Bible? Afo ekere didie?—

Nnyịn iyom ndidu ke otu mbon oro Abasi edinyan̄ade, nte nnyịn iyomke?— Nte ikpọfọnke edieke ubon nnyịn ekpetiede nte eke Noah man Abasi akpanyan̄a kpukpru nnyịn?— Edieke nnyịn iyomde ndibọhọ utịt ererimbot emi, oyom nnyịn ifiọk nte Abasi edisobode enye onyụn̄ ada edinen obufa ererimbot esie edi. Yak ise nte enye edinamde emi.

Bible ọnọ nnyịn ibọrọ ke Daniel ibuot 2, ufan̄ikọ 44. Itie N̄wed Abasi emi etịn̄ aban̄a eyo nnyịn ke ini enye ọdọhọde ete: “Ke eyo ndidem oro, Abasi enyọn̄ ayanam ubọn̄ [m̀mê ukara] eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.”

Ndi an̄wan̄a fi?— Bible ọdọhọ ke ukara Abasi oyosobo kpukpru ukara isọn̄. Ntak-a?— Koro mmọ mîsụkke ibuot inọ Enye emi Abasi emekde nte Edidem. Ndien anie edi oro?— Ih, Jesus Christ!

Jehovah Abasi enyene unen ndibiere orụk ukara emi okpodude, ndien enye emek Eyen esie, Jesus, ndidi Edidem. Ibịghike Andikara emi Abasi emekde, Jesus Christ, oyosobo kpukpru ukara ererimbot emi. Ke Ediyarade ibuot 19 ufan̄ikọ 11 esịm 16, Bible etịn̄ aban̄a enye nte anamde emi, nte ndise emi akam owụtde. Ke Bible, ẹkot ekọn̄ emi Abasi edidade isobo kpukpru ukara ererimbot Har–Magedon, m̀mê Armageddon.

Idahaemi, Abasi ọdọhọ ete ke Obio Ubọn̄ imọ oyosobo mme ukara owo efep. Edi nte enye ọdọhọ nnyịn inam oro?— Baba,  ke Bible, ẹkot Armageddon “ekọn̄ akwa usen Abasi, Andikara kpukpru n̄kpọ.” (Ediyarade 16:14, 16) Ih, Armageddon edi ekọn̄ Abasi, ndien Abasi emek Jesus Christ ndida udịmekọn̄ eke heaven usụn̄ ke en̄wan oro. Ndi ekọn̄ Armageddon ekpere? Yak ise nte nnyịn ikemede ndidiọn̄ọ.

Yak ikot ọtọkiet iban̄a ini oro Abasi edisiode kpukpru ndiọi owo ifep inyụn̄ inyan̄a mbon oro ẹnamde n̄kpọ esie ke Mme N̄ke 2:21, 22; Isaiah 26:20, 21; Jeremiah 25:31-33; ye Matthew 24:21, 22.

[Ndise ke page 238]

Nso ikedi ererimbot oro ẹkesobode ke eyo Noah?

[Ndise ke page 241]

Ntak emi nnyịn mîkpakam ikereke iban̄a ndikop inemesịt kpọt?

[Ndise ke page 243]

Jesus Christ, kpa Edidem emi Abasi emekde, oyosobo ererimbot emi ke Armageddon