O SA bau rogoca ni vakamacalataki na ivakataotioti kei vuravura se na kena vakarusai?— E levu ena gauna oqo era dau vakamacala kina. So era nanuma ni na vakarusai na vuravura ena ivalu era na vakayagataka kina na tamata na bomu niukilia. Cava o nanuma, ena vakarusa beka na Kalou na noda vuravura kei na lomalagi totoka kei na kena veikalokalo serau?—

Me vaka daru sa vulica, e vakaraitaka na iVolatabu ni na rusa na vuravura. E kaya na iVolatabu: “Ko vuravura sa lako tani yani.” (1 Joni 2:17) Ena vakarusai beka na noda vuravura qele oqo ni rusa o vuravura?— Sega, e kaya na iVolatabu ni a bulia na vuravura qele na Kalou “me  tawa,” io, mera bula marau kina na tamata. (Aisea 45:18) E kaya na Same 37:29: “Era na taukena na vanua ko ira na yalododonu, ka tiko kina ka sega ni mudu.” Oqo na vuna e kaya tale ga kina na iVolatabu ni na tu ga na vuravura ka sega ni mudu.​—Same 104:5; Dauvunau 1:4.

Ke sega ni rusa na vuravura qele ena gauna e rusa kina na vuravura, na cava ga ena rusa?— E rawa nida kila kevaka eda vakasamataka na ka e yaco ena gauna i Noa. E kaya na iVolatabu: “Sa vakarusai kina na vuravura sa tu e na gauna ko ya, e na waluvu.”​—2 Pita 3:6.

E bau dua beka e bula ena gauna e vakarusa kina na vuravura na waluvu ena gauna i Noa?— E kaya na iVolatabu ni Kalou e “a vakavuna ga me yaco na waluvu me luvuci kina na nodra vuravura na tamata ivalavala ca. E a qai vakabulai ga ko Noa o koya ka vunautaka tiko na ivalavala dodonu, kei na lewe vitu tale.”​—2 Pita 2:5, VV.

O koya gona, na cava na vuravura e rusa? Na vuravura qele, se o ira na tamata ca?— E kaya na iVolatabu na “nodra vuravura na tamata ivalavala ca.” E vakatokai tale ga o Noa me ‘dauvunau.’ Na cava o nanuma e vunautaka?— O Noa e vakasalataki ira na tamata me baleta na vakarusai ni “vuravura sa tu e na gauna ko ya.”

Ni vakamacalataka o Jisu na Waluvu levu oya, e tukuna vei iratou na nona tisaipeli na ka era cakava voli na tamata ni bera na veivakarusai. E kaya: “Ni bera tiko na waluvu era a kana na tamata, ka gunu, ka vakawati ka veimusumusuki me ra vakawati, ka yacova na siga sa vodo kina ki waqa ko Noa. Era sega voli ga ni kila me yacova ni sa qai yaco sara na waluvu ka carai ira kece yani.” Sa qai tukuna o Jisu nira na vaka tale ga oya na tamata ni bera ni rusa na vuravura oqo.​—Maciu 24:37-39, VV.

 Na vosa oqo i Jisu eda raica rawa kina ni dodonu me ka ni vuli vei keda na veika era cakava voli na tamata ni bera na Waluvu. Ni o wilika na Wase 10 ni ivola oqo, o se nanuma tiko na ka era cakava na tamata ena gauna oya?— E so era tamata voravora, ra qai dau veivakasaurarataki. Ia e kaya o Jisu ni levu ga vei ira era sega ni via vakarorogo ni talai Noa na Kalou me vunau vei ira.

Mani tukuna vei Noa o Jiova ni na vakarusai ira na tamata ca ena dua na waluvu. Ena luvuci na vuravura kei na veiulunivanua. E tukuna o Jiova vei Noa me taya e dua na waqa vakaitamera. E vaka e dua na kato vakaitamera qai balavu, me vaka o raica ena iyaloyalo ena tabana e 238.

E tukuna na Kalou vei Noa me taya e dua na waqa vakaitamera me rawa ni ratou vodo kina vakavuvale kei na levu tale na manumanu. Eratou cakacaka vakaukaua sara o Noa kei na nona vuvale. Eratou musu kau lelevu, ratou qai vakayagataka me ta kina na waqa. E ta tiko na waqa oqo ena vica vata na yabaki, baleta ni rui vakaitamera.

O se nanuma na ka e cakava tale tiko ga o Noa ena vica na yabaki e ta tiko kina na waqa?— E vunau tiko, ni vakasalataki ira na tamata ena vuku ni Waluvu. E bau dua e kauai? Sega, o iratou ga na nona vuvale. Era rui ogaoga na vo ni tamata. O se nanuma tiko na ka e kaya o Jisu era cakava voli?— Era oga ena kana, gunu, kei na vakawati. Era sega ni nanuma nira tamata ca, ra mani sega kina ni kauaitaka na veika e tukuna o Noa. Daru raica mada se cava era qai sotava.

E sogota o Jiova na katuba ni waqa ni ratou sa curu i loma o Noa kei na nona vuvale. Era se sega ga ni vakabauta na tamata ni na yaco na waluvu. Sega ni dede sa tasova mai lomalagi na wai! Oqo e sega ni uca me vaka eda kila. E uca bi dina! Sega ni dede sa vaka  na irorogo ni uciwai levu na kui ni wai. E babale na veikau lelevu ra qai vaqiqici na veivatu lelevu me vaka ga era qereqere. Vakacava o ira kece na tamata era sega ni vodo i waqa?— E kaya o Jisu: “Sa qai yaco sara na waluvu ka carai ira kece yani.” Era mate kece. Baleta?— Me vaka e kaya o Jisu, “era sega voli ga ni [via] kila.” Era sega ni vakarorogo!​—Maciu 24:39, VV; Vakatekivu 6:5-7.

Ia, nanuma ni kaya o Jisu ni ka e yaco oya e dodonu meda vuli kina. Na cava eda vulica kina?— Era sega ni vakarusai ga na tamata baleta ni ca na nodra itovo, ia e baleta tale ga nira rui osooso ra qai sega ni vulica na veika e baleta na Kalou kei na ka ena vakarau vakayacora. Meda qarauna meda kua ni vakataki ira, se vakaevei?—

Ena vakarusa tale beka na Kalou na vuravura ena waluvu?— Sega, sa yalataka na Kalou ni na sega. E kaya: “Au sa lesia na noqu drodrolagi me tu e na o, ia sa na kenai vakatakilakila.” E kaya o Jiova ni drodrolagi e ivakatakilakila ni kena “sega tale ni muduki laivi na ka bula kecega e na waluvu.”​—Vakatekivu 9:11-17.

Eda rawa gona ni vakadeitaka ni na sega tale ni vakarusa na Kalou na vuravura ena waluvu. Ia, me vaka daru sa raica, e vakaraitaka na iVolatabu ni na rusa dina na vuravura. O cei ena vakabula o Jiova ni vakarusa na vuravura oqo?— O ira beka na ogaoga ena veika tale e so ra qai sega ni via vulica na veika e baleta  na Kalou? Se o ira beka era rui osooso ra qai sega ni vulica na iVolatabu? Na cava o nanuma?—

Eda vinakata meda okati kei ira ena vakabula na Kalou, se vakaevei?— Eda na sega beka ni marau ke rawa ni vaka na vuvale i Noa na noda vuvale me vakabulai keda kece na Kalou?— Me rawa nida bula ena gauna e vakarusa kina na Kalou na vuravura, e vinakati meda kila se ena vakarusa vakacava na Kalou na vuravura, ena sosomitaka vakacava ena dua na vuravura vou. Daru raica mada se ena cakava vakacava.

E sauma vei keda na iVolatabu ena Taniela wase 2, tikina e 44. E dusia tiko na noda gauna na tikinivolatabu oqo ni kaya: “Ia e na nodra gauna na tui ko ya ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.”

E matata vei iko oya?— E kaya na iVolatabu ni na vakarusa na veimatanitu kece era veiliutaki tiko e vuravura na Matanitu ni Kalou. Baleta?— Era sega ni talairawarawa vua e sa lesia na Kalou me Tui. O cei oya?— Io, o Jisu Karisito!

E tu na dodonu vua na Kalou o Jiova me lewa se mataqali matanitu vakacava me veiliutaki, sa digitaka tale ga na Luvena o Jisu, me Tui. Sa voleka na gauna me liutaka kina o Jisu Karisito, na Tui sa digitaka na Kalou, na kena vakarusai na veimatanitu era veiliutaki tiko. Oqo e vakamacalataka na iVolatabu, ena Vakatakila wase 19, tikina e 11 ina 16, me vaka e vakaraitaki ena iyaloyalo oqo. Ena iVolatabu, e vakatokai me Amaketoni na ivalu ni Kalou ena vakarusai ira na veimatanitu era veiliutaki tiko.

E kaya na Kalou ni na vakarusa na matanitu ni tamata na nona  Matanitu. Ia e bau tukuna vei keda meda vakaitavi kina?— Sega, e vakamacalataka na iVolatabu ni Amaketoni e “[i]valu ni siga dina ko ya ni Kalou Kaukauwa.” (Vakatakila 16:14, 16) Io, na Amaketoni e ivalu ni Kalou, ena vakayagataki Jisu Karisito kina me liutaka na mataivalu agilosi mera vala. Sa voleka beka na ivalu levu na Amaketoni? Daru vaqaqa mada.