MAY nabatian ka na bala nga nagahambal tuhoy sa katapusan sang kalibutan?— Madamo nga tawo karon ang nagahambal tuhoy sini. Ginahunahuna sang iban nga malaglag ang kalibutan paagi sa isa ka inaway diin magagamit ang mga tawo sing mga bomba nuklear. Sa banta mo ayhan tugutan sang Diyos nga laglagon sang mga tawo ang aton matahom nga duta?—

Subong natun-an naton, ang Biblia nagasugid tuhoy sa katapusan sang kalibutan. “Ang kalibutan nagataliwan,” siling sang Biblia. (1 Juan 2:17) Sa banta mo ayhan ang katapusan sang kalibutan magakahulugan sing katapusan sang duta?—  Indi, ang Biblia nagasiling nga ginhimo sang Dios ang duta “agod puy-an,” huo, agod ang tawo magkabuhi sa sini kag magkalipay sa sini. (Isaias 45:18) Ang Salmo 37:29 nagasiling: “Ang mga matarong magapanag-iya sang duta, kag magapuyo sila sing dayon sa sini.” Amo kon ngaa ang Biblia nagasiling man nga ang duta magapabilin tubtob sa walay katubtuban.—Salmo 104:5; Manugwali 1:4.

Gani kon ang katapusan sang kalibutan wala nagakahulugan sang katapusan sang duta, ano ang buot silingon sini?— Mahibaluan naton ini kon usisaon naton sing maayo ang natabo sang panahon ni Noe. Ang Biblia nagapaathag: “Ang kalibutan sadto nga tion nalaglag sang ginlapawan [ukon, gin-anaw] ini sang tubig.”—2 Pedro 3:6.

May naluwas bala sang malaglag ang kalibutan sa tion sang Anaw sang panahon ni Noe?— Ang Biblia nagasiling nga “gintipigan [sang Dios] si Noe, isa ka manugbantala sang pagkamatarong, kaupod sang pito pa nga iban sang gin-anaw niya ang kalibutan sang di-diosnon nga mga tawo.”—2 Pedro 2:5.

Kon amo, ano nga kalibutan ang nalaglag sadto? Amo bala ang duta, ukon ang malain nga mga tawo?— Ang Biblia nagasiling nga amo ang “kalibutan sang di-diosnon nga mga tawo.” Kag talupangda nga si Noe gintawag nga “isa ka manugbantala.” Ano sa banta mo ang ginbantala niya sadto?— Ginpaandaman ni Noe ang mga tawo tuhoy sa katapusan sang “kalibutan sadto nga tion.”

Sang ginsambit ni Jesus ang daku nga Anaw, ginsugiran niya ang iya mga disipulo kon ano ang ginhimo sang mga tawo antes mag-abot ang katapusan. Amo ini ang ginsiling niya sa ila: “Sadtong mga adlaw sa wala pa ang anaw, [ang mga tawo] nagakaon kag nagainom, ang mga lalaki nagapangasawa kag ang mga babayi ginahatag sa pag-asawahay, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila nga tanan.” Nian nagsiling si Jesus nga amo man sini ang himuon sang mga tawo antes malaglag ang kalibutan karon.—Mateo 24:37-39.

 Ginapakita sang mga pulong ni Jesus nga makatuon kita sing mga leksion gikan sa ginahimo sang mga tawo antes sang Anaw. Gikan sa pagbasa sang Kapitulo 10 sini nga libro, madumduman mo bala kon ano ang ginhimo sang mga tawo sadto?— Ang iban nga mga tawo madaugdaugon kag naghimo sing masingki nga mga butang. Apang, siling ni Jesus, madamo ang wala gid mamati kay Noe nga ginpadala sang Dios agod magbantala sa ila.

Gani nag-abot ang tion nga ginsugiran ni Jehova si Noe nga laglagon Niya ang malaut nga mga tawo paagi sa anaw. Lapawan sang tubig ang bug-os nga duta, bisan ang mga bukid. Ginsugo ni Jehova si Noe nga magtukod sing isa ka daku nga arka. Kaangay ini sang isa ka daku kag malaba nga kahon subong sang makita mo sa laragway sa pahina 238.

Ginsugo sang Dios si Noe nga dakuon ang arka agod makaigo ang iya pamilya kag ang madamo nga sapat. Nagpangabudlay sing todo si Noe kag ang iya pamilya. Nagpulod sila sing dalagku nga mga kahoy, kag gingamit nila ini sa pagtukod sing arka. Mga tinuig antes natapos nila ang arka bangod tuman ini kadaku.

Madumduman mo bala kon ano pa ang ginhimo ni Noe sa sulod sang tinuig nga ginatukod niya ang arka?— Nagbantala sia agod paandaman ang mga tawo tuhoy sa nagapakari nga Anaw. May namati bala sa iya? Wala gid luwas lamang sa pamilya ni Noe. Masako sila sa paghimo sing iban nga mga butang. Madumduman mo bala kon ano ang ginsiling ni Jesus nga ginahimo nila?— Masako sila sa pagkaon kag sa pag-inom kag sa pagminyo. Wala nila ginhunahuna nga malain sila, kag wala sila mamati kay Noe. Gani tan-awon naton kon ano ang natabo sa ila.

Sang makasulod na si Noe kag ang iya pamilya sa arka, ginsirhan ni Jehova ang ganhaan. Wala gihapon magpati ang mga tawo sa guwa nga maabot ang Anaw. Apang sa hinali lamang, nagtupa ang ulan gikan sa langit! Indi yadto kinaandan nga ulan. Mabunok gid yadto nga  ulan! Wala madugay, ang tubig nangin subong sang daku nga mga suba nga nagahuganas. Gingabot sini ang dalagku nga mga kahoy kag ginpaligid ang dalagku nga mga bato nga daw holen lamang. Kag ano ang natabo sa mga tawo sa guwa sang arka?— Si Jesus nagsiling: “Nag-abot ang anaw kag nag-anod sa ila nga tanan.” Napatay ang tanan nga tawo sa guwa sang arka. Ngaa?— Subong sang ginsiling ni Jesus, “wala sila magsapak.” Wala sila mamati!—Mateo 24:39; Genesis 6:5-7.

Dumduma nga si Jesus nagsiling nga ang natabo sa sadto nga mga tawo isa ka leksion para sa aton karon. Ano nga leksion ang matun-an naton?— Bueno, ginlaglag ang mga tawo indi lamang bangod malaut sila kundi bangod madamo ang wala sing tion sa pagtuon tuhoy sa Dios kag tuhoy sa kon ano ang iya buot himuon sadto. Dapat kita maghalong nga indi kita mangin subong sa ila, indi bala?—

Sa banta mo ayhan laglagon liwat sang Dios ang kalibutan paagi sa anaw?— Indi, nanaad ang Dios nga indi na niya ini paghimuon. Sia nagsiling: “Ginahatag ko ang balangaw sa panganod, kag mangin tanda ini.” Si Jehova nagsiling nga ang balangaw mangin tanda nga “indi na mangin anaw ang mga tubig sa paglaglag sang tanan nga unod.”—Genesis 9:11-17.

Gani mapat-od naton nga indi na liwat paglaglagon sang Dios ang kalibutan paagi sa anaw. Apang, subong sang nahibaluan na naton, ang Biblia nagasugid tuhoy sa katapusan sang kalibutan. Kon laglagon na  sang Dios ang kalibutan karon, sin-o ang iya luwason?— Amo bala ang mga tawo nga interesado lamang sa iban nga mga butang amo nga indi gid nila luyag magtuon tuhoy sa Dios? Amo bala sila nga wala pirme sing tion sa pagtuon sang Biblia? Ano sa banta mo?—

Luyag naton nga malakip kita sa luwason sang Dios, indi bala?— Indi bala mangin makalilipay kon ang aton pamilya mangin kaangay sang pamilya ni Noe amo nga luwason kita tanan sang Dios?— Agod maluwas kita sa katapusan sang kalibutan, dapat naton mahangpan kon paano ini laglagon sang Dios kag kon paano niya paluntaron ang iya matarong nga bag-ong kalibutan. Tan-awon naton kon paano niya ini himuon.

Ginahatag sa aton sang Biblia ang sabat sa Daniel kapitulo 2, bersikulo 44. Ginapatuhuyan sini nga teksto ang aton adlaw sang ini nagasiling: “Sa mga adlaw sadto nga mga hari ang Dios sang langit magapatindog sing ginharian [ukon, gobierno] nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian, kag magapadayon ini tubtob sa walay katubtuban.”

Nahangpan mo bala ini?— Ang Biblia nagasiling nga laglagon sang gobierno sang Dios ang tanan nga gobierno sa duta. Ngaa?— Bangod wala nila ginatuman ang Isa nga gintangdo sang Dios nga Hari. Kag sin-o ini?— Huo, amo si Jesucristo!

May kinamatarong si Jehova nga Dios sa pagdesisyon kon ano nga sahi sang gobierno ang magagahom, kag ginpili niya ang iya Anak nga si Jesus nga mangin Hari. Sa indi madugay, si Jesucristo, ang Manuggahom nga gintangdo sang Dios, magadumala sang paglaglag sa tanan nga gobierno sining kalibutan. Ginalaragway sang Biblia, sa Bugna kapitulo 19, bersikulo 11 tubtob 16, nga himuon niya ini, subong sang ginapakita sang laragway diri. Sa Biblia, ang inaway sang Dios agod laglagon ang tanan nga gobierno sang kalibutan ginatawag nga Har–Magedon, ukon Armagedon.

 Nagsiling ang Dios nga laglagon sang iya Ginharian ang mga gobierno sang tawo. Apang kita bala ang ginasugo niya nga maghimo sini?— Indi, sa Biblia, ang Armagedon ginatawag nga “inaway sang daku nga adlaw sang Dios nga Labing Gamhanan.” (Bugna 16:14, 16) Huo, ang Armagedon inaway sang Dios, kag gamiton niya si Jesucristo nga manguna sa langitnon nga mga hangaway. Malapit na bala ang inaway sang Armagedon? Tan-awon naton kon paano naton mahibaluan ini.