NANGNGEGMO kadin ti maipapan iti panungpalan ti lubong?— Pagsasaritaan dayta ti adu a tattao itatta. Dagiti dadduma ipagarupda a madadaelto ti lubong babaen iti gubat a pangusaranda kadagiti nuklear a bomba. Panagkunam ipalubos ngata ti Dios a dadaelen dagiti tattao ti nagpintas a dagatayo?—

Kas naammuantan, dinakamat ti Biblia ti maipapan iti panungpalan ti lubong. “Ti lubong aglabas,” kuna ti Biblia. (1 Juan 2:17) Panagkunam ti kadi panungpalan ti lubong kaipapananna ti pannakadadael ti daga?— Saan. Kuna ti Biblia nga inaramid ti Dios ti daga “tapno mapagnaedan.” Kayatna a sawen,  nairanta dayta a pagnaedan ken tagiragsaken dagiti tattao. (Isaias 45:18) Kuna ti Salmo 37:29: “Dagiti nalinteg tagikuaendanto ti daga, ket agtaengdanto nga agnanayon iti dayta.” Daytoy ti gapuna a kunaen met ti Biblia a ti daga agtalinaed iti agnanayon.​​—Salmo 104:5; Eclesiastes 1:4.

No saan a ti pannakadadael ti daga ti kaipapanan ti panungpalan ti lubong, ania ngarud ti kaipapananna?— Maammuanta ti sungbat no usigenta a naimbag ti napasamak idi kaaldawan ni Noe. Kuna ti Biblia: “Nagpasar iti pannakadadael ti lubong iti daydi a tiempo idi nalayus iti danum.”​​—2 Pedro 3:6.

Adda kadi nakalasat iti panungpalan ti lubong iti daydi a Layus idi kaaldawan ni Noe?— Kuna ti Biblia a ti Dios “inaywananna ni Noe, maysa a manangaskasaba iti kinalinteg, a sitatalged agraman ti pito a sabsabali pay idi nangyeg iti layus iti lubong dagiti di nadiosan a tattao.”​​—2 Pedro 2:5.

No kasta, ania ngarud a lubong ti nagpatingga? Ti kadi daga, wenno dagiti nadangkes a tattao?— Kuna ti Biblia a daydi “lubong dagiti di nadiosan a tattao.” Ken no nadlawmo, naawagan ni Noe a “manangaskasaba.” Panagkunam ania ngata ti inkaskasabana?— Pinakdaaran ni Noe dagiti tattao maipapan iti panungpalan “ti lubong iti daydi a tiempo.”

Idi dinakamat ni Jesus ti maipapan iti dakkel a Layus, imbagana kadagiti adalanna no ania ti inar-aramid dagiti tattao idi dandanin dumteng ti panungpalan. Kastoy ti kinunana kadakuada: “Kadagidi nga aldaw kasakbayan ti layus, [dagiti tattao] mangmangan ken umin-inum[da], mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida.” Kalpasanna kinuna ni Jesus a kastanto met laeng ti ar-aramiden dagiti tattao sakbay nga agpatingga daytoy a lubong.​​—Mateo 24:37-​39.

 Ipakita kadatayo ti sasao ni Jesus nga adda napateg a maadaltayo iti ar-aramiden idi dagiti tattao sakbay ti Layus. Kas nabasata iti Kapitulo 10 daytoy a libro, malagipmo kadi no ania ti inar-aramid dagidiay a tattao?— Addada lallaki a nauyong ken nakarangranggas. Ngem kinuna ni Jesus nga adu a sabsabali pay ti basta saan a nangipangag idi imbaon ti Dios ni Noe a mangasaba kadakuada.

Gapuna, dimteng ti tiempo nga imbaga ni Jehova ken Noe a dadaelenna dagiti nadangkes a tattao babaen iti layus. Malapunos ti intero a daga, uray dagiti bambantay. Imbaga ni Jehova ken ni Noe a mangibangon iti dakkel a daong. Kasla maysa dayta a dakkel ken atiddog a kahon, wenno lakasa, a kas ti makitam iti ladawan iti panid 238.

Imbaga ti Dios ken ni Noe a kadakkelenna ti daong nga ibangonna tapno natalged a pagyananna ken ti pamiliana ken ti adu nga animal. Impasnek ni Noe ken ti pamiliana ti nagtrabaho. Nagpukanda kadagiti dadakkel a kayo sa dagita ti inusarda idi aramidenda ti daong. Nagpaut daytoy iti adu a tawen gapu ta nakadakdakkel ti daong.

Malagipmo kadi no ania pay ti ar-aramiden idi ni Noe kabayatan dagidiay a tawen a panagibangonna iti daong?— Nangaskasaba ken pinakdaaranna dagiti tattao maipapan iti um-umay a Layus. Adda kadi nangipangag? Ti laeng pamilia ni Noe ti nangipangag. Dagiti sabsabali okupadoda unay iti nagduduma nga ar-aramidenda. Malagipmo kadi no ania ti kinuna ni Jesus nga ar-aramidenda idi?— Mangmangan ken umin-inum ken makias-asawada. Dida pinanunot a nakadakdakesda, ken dida kayat ti dumngeg ken ni Noe. Kitaenta ngarud no ania ti napasamak kadakuada.

Idi nakastreken ni Noe ken ti pamiliana iti daong, inrikep ni Jehova ti ruangan. Dagiti tattao iti ruar saanda latta a patien nga adda umay a Layus. Ngem pagammuan ta nangrugin nga agtinnag ti danum!  Saan a kas iti gagangay a tudo. Nakapigpigsa dayta a tudo! Di nagbayag, agay-ayusen ti kasla dadakkel a karayan, a dumaranudor. Tinulidna dagiti dadakkel a kayo ken inyanudna dagiti dadakkel a batbato, a kas man la graba ti kayariganna. Ket dagidiay ngay tattao nga adda iti ruar ti daong?— Kuna ni Jesus: “Immay ti layus ket inyanudna amin ida.” Natay amin a tattao nga adda iti ruar ti daong. Apay?— Kas kinuna ni Jesus, “saanda a nangikankano.” Saanda a dimngeg!​​—Mateo 24:39; Genesis 6:​5-7.

Ita, laglagipem a kinuna ni Jesus a ti napasamak kadagidiay a tattao ket pakaballaagantayo itatta. Ania a leksion ti maadaltayo?— Nadadael dagiti tattao saan laeng a gapu iti kinadakesda no di ket gapu ta napalalo ti pannakakumikomda isu nga awanen ti tiempoda nga agadal maipapan iti Dios ken maipapan iti aramidenna. Nasken nga agannadtayo tapno saantayo a maipada kadakuada, di ngamin?—

Panagkunam dadaelento kadi manen ti Dios ti lubong babaen iti layus?— Saan. Inkari ti Dios a saannan nga aramiden dayta. Kinunana: “Ti bullalayawko itedko iti ulep, ket agserbinto kas maysa a pagilasinan.” Kinuna ni Jehova a ti bullalayaw ket agbalin a pagilasinan a “ti dandanum saanton nga agbalin a layus a mangdadael iti isuamin a lasag.”​​—Genesis 9:​11-​17.

Masiguradotayo ngarud a saanton a dadaelen ti Dios ti lubong babaen iti layus. Ngem kas naammuantan, pudno nga adda imbaga ti Biblia a panungpalan ti lubong. Inton dadaelen ti Dios daytoy a lubong, siasinonto  dagiti isalakanna?— Dagidiay kadi interesado unay kadagiti sabali a banag isu a saandan a kayat ti agsursuro maipapan iti Dios? Dagidiay kadi kanayon nga awan panawenda nga agadal iti Biblia? Ania ti makunam?—

Kayattayo a maysatayo kadagidiay isalakan ti Dios, di ngamin?— Saan aya a nakaragragsak no ti pamiliatayo ket kas iti pamilia ni Noe tapno isalakannatayo amin ti Dios?— Tapno makalasattayo iti panungpalan ti lubong, masapul a matarusantayo no kasano a dadaelen ti Dios dayta ken no kasanona nga ipasdek ti nalinteg a baro a lubongna. Ammuenta no kasanona nga aramiden daytoy.

Ipaay ti Biblia ti sungbat iti Daniel kapitulo 2, bersikulo 44. Daytoy a teksto tuktukoyenna ti mismo a kaaldawantayo, a kunkunana: “Iti kaaldawan dagidiay nga ar-ari mangipasdekto ti Dios ti langit iti maysa a pagarian [wenno gobierno] a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”

Maawatam kadi dayta?— Kuna ti Biblia a ti gobierno ti Dios dadaelenna amin a gobierno ti tao. Apay?— Agsipud ta saanda nga ipangpangag Daydiay Ari a dinutokan ti Dios. Ket siasino dayta nga Ari?— Wen, ni Jesu-Kristo!

Kalintegan ni Jehova a Dios a pilien no ania a kita ti gobierno ti mangituray, ket pinilina ti Anakna a ni Jesus nga agbalin nga Ari. Din agbayag, ni Jesu-Kristo a pinili ti Dios nga Agturay idauluannanto ti pannakadadael amin a gobierno ditoy lubong. Kasta ti panangiladawan kenkuana ti Biblia iti Apocalipsis kapitulo 19, bersikulo 11 agingga iti 16, a kas met iti ipakita daytoy a ladawan. Iti Biblia, ti gubat ti Dios a mangdadael iti amin a gobierno ti lubong ket maawagan iti Har–​Magedon, wenno Armagedon.

 Ita, kuna ti Dios a ti Pagarianna ti mangdadael kadagiti gobierno ti tao. Ngem imbagana kadi a datayo ti mangaramid iti dayta?— Saan. Sigun iti Biblia ti Armagedon ket maawagan “iti gubat ti naindaklan nga aldaw ti Dios a Mannakabalin-amin.” (Apocalipsis 16:​14, 16) Wen, ti Armagedon ket gubat ti Dios, ken usarenna ni Jesu-Kristo a mangidaulo kadagiti anghel a makigubat. Asideg kadin ti gubat ti Armagedon? Ammuenta ti sungbat.