KAPU 46

Keti Inza Tafwa Dyaka na Masa na Bilumbu Kekwisa?

KETI nge mewaka dezia bantu ketubila nsuka ya inza?— Bantu mingi ketubilaka yo bubu yai. Bantu mingi keyindulaka nde inza tafwa na bitumba yina bantu tasadila babombe nikleyere. Keti nge keyindula nde Nzambi tabebisa ntoto na beto ya kitoko mpi zulu na beto ya beto kezolaka mingi ti bambwetete na yo yina kepesaka nsemo?—

Mutindu beto monaka yo dezia, Biblia ketubila nsuka ya inza. Yo ketuba nde: “Inza kele na kuluta.” (1 Yoane 2:17, NW) Keti nge keyindula nde nsuka ya inza tatendula nsuka ya ntoto?— Ve, Biblia ketuba nde Nzambi kusalaka ntoto sambu “bantu kuzinga muna,” ee, sambu bantu kuzinga muna mpi kubakila yo kyese. (Yezaya 45:18) Nkunga 37:29 ketuba nde: “Bantu ya mbote ta zinga na ngemba na ntoto yina ya  Mfumu Nzambi tubaka na kupesa bo; yo ta vanda ya bo tii kuna.” Yo yina Biblia ketuba dyaka nde ntoto tavanda kimakulu.—Nkunga 104:5; Longi 1:4.

Ebuna, kana nsuka ya inza ketendula ve nsuka ya ntoto, yo ketendula inki?— Beto le baka mvutu kana beto tadila mbotembote mambu yina kusalamaka na bilumbu ya Noa. Biblia ketendula nde: “Nzambi fwaka [inza] ya ntama kaka na masa yina fulukaka na ntoto yonso.”—2 Piere 3:6.

Keti kele ti bantu kugulukaka na nsuka ya inza na ntangu ya Mvula yina ya Ngolo na bilumbu ya Noa?— Biblia ketuba nde Nzambi “tindilaka bantu yina ya mbi masa, ebuna yo fulukaka na ntoto; yandi gulusaka kaka Noa yina vandaka [nsamuni ya, NW] malongi ya Nzambi, ti bantu ya nkaka nsambwadi.”—2 Piere 2:5.

Ebuna, inki kuvandaka inza yina ya kusukaka? Keti yo vandaka ntoto mpenza, to bantu ya mbi?— Biblia ketuba nde yo vandaka inza ya ‘bantu ya mbi.’ Mpi Biblia kebinga Noa nde “nsamuni.” Nge keyindula nde yandi vandaka kulonga inki?— Noa vandaka kukebisa bantu sambu na yina metala nsuka ya “inza ya ntangu yina.” (NW).

Ntangu Yezu kutubilaka Mvula ya Ngolo, yandi zabisaka balongoki na yandi mambu yina bantu tasalaka na ntwala nde nsuka kukwisa. Yandi zabisaka bo nde: “Na bilumbu yina, ntangu masa vandaka me fuluka mingi ntete ve na ntoto, bantu vandaka kudia, kunwa, kukwelana tii na kilumbu yina ya Noa kotaka na maswa. Bo vandaka kuzaba kima ve tii kuna masa fulukaka mingi na ntoto yonso; masa yina nataka bo yonso na lufwa.” Yo yina Yezu tubaka nde na ntwala nde nsuka ya inza yai kukwisa, bantu tasala mambu kaka mutindu mosi.—Matayo 24:37-39. Beto bantu metengimisa bisono.

Bangogo ya Yezu kemonisa beto nde beto le baka dilongi ya mfunu na mambu yina bantu vandaka kusala na ntwala ya Mvula ya Ngolo. Kana nge tanga Kapu 10 ya mukanda yai, keti nge keyibuka  nki mambu bantu yango vandaka kusala?— Bantu mingi vandaka kusala mambu ya mbi mpi ya nku. Kansi, Yezu kutubaka nde bantu yankaka mingi kuwaka ve ntangu Nzambi kutindaka Noa na kulonga bo.

Ebuna kilumbu yango kulungaka ntangu Yehowa kusongaka Noa nde Yandi kezola kufwa bantu ya mbi na Mvula mosi ya Ngolo. Masa tafika ntoto ya mvimba, ti bangumba mpi. Yehowa kusongaka Noa na kutunga maswa mosi ya nene. Yo vandaka bonso sanduku mosi ya nene mpi ya nda, mutindu nge le mona yo na kifwanisu na lutiti 238.

Nzambi kusongaka Noa na kutunga maswa ya nene mpenza sambu yandi, dibuta na yandi, ti bambisi mingi kuvanda na lutaninu na kati. Noa ti dibuta na yandi kusalaka kisalu ya ngolo mpenza. Bo zengaka banti ya nene, mpi bo sadilaka mabaya na yo sambu na kuyantika kutunga maswa. Bo salaka bamvula mingi kibeni sambu maswa kuvandaka nene mpenza.

Keti nge keyibuka kima yankaka yina Noa vandaka kusala na bamvula yonso yina ya yandi vandaka kutunga maswa?— Yandi vandaka kusamuna, kukebisa bantu sambu na Mvula ya Ngolo yina tanoka. Keti bo wilaka Noa? Ata muntu mosi ve kuwilaka yandi, katula kaka dibuta na yandi. Bantu yankaka vandaka kulutisa ntangu na bo yonso na mambu yankaka. Keti nge keyibuka mambu yina Yezu tubaka nde bo vandaka kusala?— Bo vandaka kudipesa kaka na kudya, kunwa mpi na kukwelana. Bo vandaka kuyindula ve nde bo vandaka bantu ya mbi, mpi bo bakaka ve ntangu ya kuwa mambu Noa vandaka kutuba. Yo yina, beto tala mambu yina kukuminaka bo.

Ntangu Noa ti dibuta na yandi kukotaka na kati ya maswa, Yehowa kukangaka kyelo. Bantu yina kubikalaka na nganda vandaka kundima kaka ve nde Mvula ya Ngolo tanoka. Kansi na kintulumukina, masa yina vandaka kukatuka na zulu yantikaka na kubwa na  ntoto! Yo vandaka ve bonso mvula yina beto kemonaka bubu yai. Yo vandaka mvula mosi ya ngolo mpenza! Ntama mingi ve, masa kumaka mingi bonso banzadi ya nene, yo vandaka kusala makelele mingi mpenza. Yo bwisaka banti ya nene mpi yo vandaka kubalula matadi ya nene bonso nde yo vandaka matadi ya fyoti. Inki kukuminaka bantu yina kukotaka ve na maswa?— Yezu ketuba nde: “Masa yina nataka bo yonso na lufwa.” Bantu yonso yina kuvandaka na nganda ya maswa kufwaka. Sambu na inki?— Mutindu Yezu kutubaka, “Bo vandaka kuzaba kima ve.” Bo waka ve!—Matayo 24:39; Kuyantika 6:5-7.

Ntangu yai, yibuka nde, Yezu kutubaka nde mambu yina kukuminaka bantu yina kele dilongi sambu na beto bubu yai. Inki dilongi beto le baka?— Bantu kufwaka kaka ve sambu bo vandaka bantu ya mbi kansi bo fwaka mpi sambu mingi na kati na bo kuvandaka na mambu mingi ya kusala, bo bakaka ve ntangu ya kulonguka mambu ya metala Nzambi mpi yina yandi zolaka kusala. Beto fwe keba na kuvanda ve bonso bo, mpidina ve?—

Keti nge keyindula nde Nzambi tafwa dyaka inza na mvula mosi ya ngolo?— Ve, Nzambi kusilaka nde yandi tasala yo dyaka ve. Yandi tubaka nde: “Mono ke tula nkongolo na mono yai na zulu sambu na kusongaka [kidimbu, NW].” Yehowa kutubaka nde nkongolo zolaka kuvanda kidimbu yina kesonga nde “mvula ya ngolo ta fwa diaka ve bima yonso yina ke zinga.”—Kuyantika 9:11-17.

 Yo yina beto le tula ntima nde Nzambi tafwa dyaka ve inza yai na masa. Kansi, mutindu beto yitaka kumona yo, Biblia ketubila nsuka ya inza. Ntangu Nzambi tafwa inza yai, yandi tagulusa banani?— Keti yo tavanda bantu yina kupesaka ntangu na bo yonso na mambu yankaka, kansi yina kezolaka ve ata fyoti kulonguka mambu ya Nzambi? Keti yo tavanda bayina vandaka kupesa ntangu na bo na kulonguka Biblia ntangu yonso? Nge keyindula inki?—

Beto kezola kuvanda na kati ya bantu yina Nzambi tagulusa, mpidina ve?— Keti yo tavanda ve kyese kana dibuta na beto kuvanda bonso dibuta ya Noa sambu Nzambi kugulusa beto yonso?— Kana beto kezola kuguluka na nsuka ya inza, beto fwe bakisa mutindu Nzambi tafwa yo mpi mutindu yandi tatula inza na yandi ya mpa ya lunungu. Beto tala mutindu yandi tasala yo.

Biblia kepesa beto mvutu na Daniele kapu 2, verse 44. Verse yai ketubila bilumbu na beto ntangu yo ketuba nde: “Kansi ntangu ya bantotila yina ta yala, Nzambi ya zulu ta tula ntotila [to guvernema] mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.”

Keti nge kebakisa dyambu yai?— Biblia ketuba nde guvernema ya Nzambi tafwa baguvernema yonso ya ntoto. Sambu na inki?— Sambu bo kezitisaka ve Muntu yina Nzambi metulaka Ntotila. Muntu yango nani?— Yezu Kristu!

Yehowa Nzambi kele ti nswa ya kupona nki guvernema fwe yala, yo yina yandi meponaka Mwana na yandi, Yezu, sambu na kuvanda Ntotila. Kubika fyoti, Mfumu yina Nzambi meponaka, Yezu Kristu, tatwadisa bitumba yina tafwa baguvernema yonso ya inza yai. Na Kusonga kapu 19, baverse 11 tii 16, Biblia kezabisa mutindu yandi tasala yo, kaka mutindu kifwanisu yai kemonisa. Biblia kebinga bitumba ya Nzambi yina tafwa baguvernema yonso ya inza nde Armagedoni.

 Ntangu yai, Nzambi ketuba nde Kimfumu na yandi tafwa baguvernema ya bantu. Kansi, keti yandi kesonga beto na kusala yo?— Ve, Biblia kebinga Armagedoni nde ‘bitumba ya kilumbu ya nene ya Nzambi Nkwa Ngolo Yonso.’ (Kusonga 16:14, 16) Ee, Armagedoni kele bitumba ya Nzambi, mpi yandi kesadila Yezu Kristu sambu na kutwadisa basoda ya zulu na bitumba yango. Keti bitumba ya Armagedoni mekuma penepene? Beto tala mutindu ya beto le zaba yo.

Beto tanga mambu ya metala ntangu yina Nzambi takatula bantu yonso ya mbi mpi tagulusa bayina kesadilaka yandi, na Bingana 2:21, 22; Yezaya 26:20, 21; Yeremia 25:31-33; mpi Matayo 24:21, 22.

[Kifwanisu ya kele na lutiti 238]

Inki inza kufwaka na bilumbu ya Noa?

[Kifwanisu ya kele na lutiti 241]

Sambu na nki beto fwe yindulaka ve kaka na kusakana?

[Kifwanisu ya kele na lutiti 243]

Yezu Kristu, Ntotila yina Nzambi meponaka, tafwa inza yai na Armagedoni