HIHI nĩ ũrĩ waigua andũ makiuga atĩ thĩ nĩ ĩkaaninwo?— Andũ aingĩ nĩ maragia ũhoro ũcio. Andũ amwe meciragia atĩ thĩ nĩ ĩkaaninwo nĩ andũ makĩrũa na mbomu iria ciĩtagwo niukilia. Hihi nĩ ũrona ta Ngai angĩreka andũ maniine thĩ ĩno itũ?—

O ta ũrĩa twerutire, Bibilia nĩ ĩtwĩraga atĩ thĩ nĩ ĩkaaninwo. Bibilia yugaga ũũ: “Thĩ nĩ gũthira ĩrathira.” (1 Johana 2:17) Nĩ ũkuona ta arĩ thĩ ĩno tũtũũraga ĩgaathira?— Aca, Bibilia yugaga atĩ thĩ yombirũo  ‘ĩtũũragwo’ nĩ andũ na mamĩkenagĩre. (Isaia 45:18) Thaburi 37:29 yugaga ũũ: “Arĩa athingu nĩo makagaya thĩ, na gũtũũra mamĩtũũre o nginya tene.” Nĩkĩo Bibilia yugaga atĩ thĩ ĩgũtũũra tene na tene.—Thaburi 104:5; Kohelethu 1:4.

Kwoguo-rĩ, nĩ thĩ ĩrĩkũ ĩkaaninwo?— No tũmenye macokio ma kĩũria kĩu tũngĩrora ũrĩa gwathiire hĩndĩ ya Nuhu. Bibilia yugaga ũũ: ‘Thĩ ya kahinda kau nĩ yanangirũo na mũiyũro wa maĩ.’—2 Petero 3:6.

Hihi nĩ harĩ andũ maahonokire Mũiyũro ũcio wa hĩndĩ ya Nuhu?— Bibilia yugaga atĩ Ngai “nĩ aahonokirie Nuhu, mũhunjia wa ũthingu, hamwe na andũ angĩ mũgwanja hĩndĩ ĩrĩa aarehire mũiyũro igũrũ rĩa thĩ ya andũ mateetigĩrĩte Ngai.”—2 Petero 2:5.

Kwoguo-rĩ, nĩ kĩĩ kĩaniinirũo? Hihi nĩ thĩ ĩno tũtũũraga, kana nĩ andũ arĩa oru?— Bibilia yugaga atĩ “thĩ ya andũ mateetigĩrĩte Ngai” nĩyo yaniinirũo. Ningĩ tuona atĩ Nuhu aarĩ “mũhunjia.” Ũgwĩciria aahunjagia ũhoro ũrĩkũ?— Aamenyithagia andũ atĩ “thĩ ya kahinda kau” yarĩ hakuhĩ kũniinwo.

Hĩndĩ ĩrĩa Jesu aaririe ũhoro wa Mũiyũro, nĩ eerire arutwo ake maũndũ marĩa andũ meekaga mbere ya Mũiyũro ũcio. Aameerire ũũ: “Nĩ ũndũ o ta ũrĩa matukũ ma mbere ya Mũiyũro maatariĩ, andũ maarĩaga na makanyua, makahikania na makahika, nginya mũthenya ũrĩa Nuhu aaingĩrire thabina, na matiatindanĩire nginya rĩrĩa Mũiyũro wokire na ũkĩmaniina othe.” Jesu aacokire akiuga atĩ ũguo noguo andũ magaakorũo magĩka mbere ya thĩ ĩno kũniinwo.—Mathayo 24:37-39.

Ciugo icio cia Jesu ironania atĩ no twĩrute kuumana na maũndũ marĩa andũ meekaga mbere ya Mũiyũro ũcio. Thĩinĩ wa  Gĩcunjĩ gĩa 10 kĩa ibuku rĩrĩ-rĩ, twerutire nĩ maũndũ marĩkũ andũ acio meekaga?— Amwe ao maahũũraga arĩa angĩ na mageka maũndũ moru mũno. No Jesu oigire atĩ nĩ kũrĩ angĩ aingĩ maaregire gũthikĩrĩria ũhoro ũrĩa Nuhu aamahunjagĩria kuuma kũrĩ Ngai.

Nĩ ũndũ ũcio mũthenya ũmwe Jehova nĩ eerire Nuhu atĩ nĩ ekũniina andũ acio oru na maĩ. Oigire atĩ maĩ macio mangĩahumbĩrire thĩ yothe, nginya irĩma. Jehova eerire Nuhu ake thabina nene. Thabina ĩyo yahaanaga ta gĩthandũkũ kĩnene, o ta ũrĩa ũrona thĩinĩ wa mbica karatathi-inĩ ka 238.

Ngai eerire Nuhu ake thabina nene ĩngĩiganĩra famĩlĩ yake hamwe na nyamũ. Nuhu na famĩlĩ yake nĩ maarutire wĩra na kĩyo mũno. Maatemire mĩtĩ mĩnene na makĩambĩrĩria kũmĩhũthĩra gwaka thabina. Nĩ maarutire wĩra ũcio mĩaka mĩingĩ mũno tondũ thabina ĩyo yarĩ nene mũno.

Hihi nĩ ũraririkana wĩra ũngĩ ũrĩa Nuhu aarutaga hĩndĩ ĩyo aakaga thabina?— Aahunjagia akeera andũ atĩ nĩ gũkũgĩa na Mũiyũro wa maĩ. Hihi nĩ maamũthikĩrĩirie? Aca, no famĩlĩ yake tu yamũthikĩrĩirie. Andũ acio angĩ maathiire na mbere gwĩka maũndũ mao. Hihi nĩ ũraririkana Jesu oigire meekaga maũndũ marĩkũ?— Maarĩaga, makanyua, makahika na makahikania. Meeyonaga marĩ andũ ega, na kwoguo maationaga bata wa gũthikĩrĩria Nuhu. No ta reke tuone ũrĩa gwathiire.

Rĩrĩa Nuhu na famĩlĩ yake maatonyire thabina, Jehova no kũhinga aamĩhingire mũrango. No andũ arĩa maarĩ nja maationaga ta gũkũgĩa Mũiyũro. Mbura ĩgĩcoka ĩkĩambĩrĩria kuura o rĩmwe! No ndĩarĩ mbura ta ĩrĩa yuraga ũmũthĩ. Yaarĩ nene mũno! Yoirire nginya maĩ makĩambĩrĩria gũtherera ta njũũĩ nene mũno  makĩrutaga mũgambo mũnene. Yamunyaga mĩtĩ mĩnene na ĩkagaragaria mahiga manene mũno. Ĩ nao andũ arĩa maarĩ nja ya thabina maathiire kũ?— Jesu oigire ũũ: “Mũiyũro wokire na ũkĩmaniina othe.” Andũ acio othe nĩ gũkua maakuire. Maakuire nĩkĩ?— Jesu oigire atĩ “matiatindanĩire.” Nĩ maaregire kũigua!—Mathayo 24:39; Kĩambĩrĩria 6:5-7.

Ririkana atĩ Jesu oigire atĩ no twĩrute kuumana na ũrĩa andũ acio meekirũo. Tũreruta ũndũ ũrĩkũ?— Tũreruta atĩ, o na gũtuĩka andũ acio maarĩ oru, maaninirũo tondũ matiethire mahinda ma kwĩruta ũhoro wa Ngai, na ũrĩa aabangĩte gwĩka. Na githĩ tũtiagĩrĩirũo kwĩmenyerera tũtikahaane tao?—

Nĩ ũkuona ta Ngai akaanina andũ na maĩ rĩngĩ?— Aca, Ngai oigire atĩ ndageka ũguo rĩngĩ. Oigire ũũ: “Nĩndekĩra mũkũnga-mbura wakwa itu-inĩ, naguo ũgũtũũra wĩ kĩmenyithia.” Jehova oigire mũkũnga-mbura ũngĩatuĩkire wa kuonania atĩ “maĩ matigacoka gũtuĩka mũiyũro mũnene wa kũnina indo ciothe cia mwĩrĩ wa nyama.”—Kĩambĩrĩria 9:11-17.

Kwoguo no tũkorũo na ma atĩ Ngai ndakaanina andũ na maĩ rĩngĩ. No ningĩ nĩ tuona atĩ Bibilia nĩ yugaga atĩ thĩ nĩ ĩgaathira. Hihi Ngai akaahonokia andũ arĩkũ rĩrĩa akaanina thĩ?— Hihi akaahonokia andũ arĩa matũire mekaga  maũndũ mao na matiendaga kwĩruta ũhoro wa Ngai? Hihi nĩ akaahonokia arĩa maregaga gwetha mahinda ma kwĩruta Bibilia? Wee ũkuona atĩa?—

Ithuĩ no twende gũkaahonokio, kana tiguo?— Na githĩ to tũkene mũno famĩlĩ itũ yothe ĩngĩhonokio ta ũrĩa famĩlĩ ya Nuhu yahonokirio?— No nĩguo tũkaahonoka rĩrĩa thĩ ĩkaaninwo, no mũhaka tũmenye ũrĩa Ngai akaamĩniina, na ũrĩa akaarehe thĩ njerũ ya andũ athingu. Reke tuone ũrĩa ageka.

Rĩandĩko rĩa Danieli 2, mũhari wa 44 nĩ rĩtwĩraga ũrĩa ageka. Rĩandĩko rĩu rĩkĩaria ũhoro wa mahinda maya maitũ, riugaga ũũ: “Hĩndĩ ya athamaki acio-rĩ, nĩguo Ngai-wa-Igũrũ akahanda ũthamaki [kana, thirikari] ũrĩa ũtagacoka gũthario o rĩ, o rĩ, o na kana wathani waguo ũneanwo moko-inĩ ma andũ angĩ, no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.”

Hihi nĩ wanyita ũndũ ũcio?— Bibilia yugaga atĩ thirikari ya Ngai nĩ ĩkaanina thirikari ciothe cia andũ. Ikaaninwo nĩkĩ?— Nĩ tondũ itiathĩkagĩra Mũthamaki ũrĩa ũthuurĩtwo nĩ Ngai. Hihi Mũthamaki ũcio nĩ ũrĩkũ?— Nĩ Jesu Kristo!

Jehova arĩ na kĩhooto gĩa gũthuura thirikari ĩrĩa ĩgwathana, na nĩ athuurĩte Mũrũwe Jesu, atuĩke Mũthamaki. Kahinda gatarĩ haraihu, Jesu Kristo, Mũthamaki ũrĩa ũthuurĩtwo nĩ Ngai, nĩ arĩniina thirikari ciothe cia thĩ. Ũndũ ũcio nĩ ũtaarĩirio nĩ rĩandĩko rĩa Kũguũrĩrio 19, mũhari wa 11 nginya16, o ta ũrĩa mbica ĩno ĩronania. Thĩinĩ wa Bibilia, mbaara ya Ngai ĩrĩa ĩkaanina thirikari ciothe cia andũ ĩtagwo Hari–Magedoni.

Nĩ ma, Ngai oigĩte atĩ Ũthamaki wake nĩ ũkaanina thirikari cia andũ. No hihi oigĩte atĩ nĩ ithuĩ tũkaanina thirikari icio?—  Aca, Bibilia yugaga atĩ Hari–Magedoni nĩ “mbaara ya mũthenya ũrĩa mũnene wa Ngai Mwene Hinya Wothe.” (Kũguũrĩrio 16:14, 16) Kwoguo, Hari–Magedoni nĩ mbaara ya Ngai, na akaahũthĩra Jesu Kristo gũtongoria njeshi ya araika mbaara-inĩ ĩyo. Hihi Hari–Magedoni ĩrĩ hakuhĩ? Gĩcunjĩ kĩrĩa kĩrũmĩrĩire no gĩtũteithie kũmenya.