ជំពូកទី៤៦
ទឹកធ្លាប់ជន់លិចពិភពលោក តើនេះនឹងកើតឡើងម្ដងទៀតឬ?
តើកូនធ្លាប់ឮអ្នកណាម្នាក់និយាយអំពីទីបញ្ចប់នៃពិភពលោកឬទេ?— នៅសព្វថ្ងៃនេះ មនុស្សជាច្រើននិយាយអំពីរឿងនេះមែន។ មនុស្សខ្លះគិតថាពិភពលោកនឹងត្រូវបំផ្លាញ ដោយសារមនុស្សធ្វើសង្គ្រាមដោយប្រើគ្រាប់បែកនុយក្លេអ៊ែរ។ តើព្រះនឹងអនុញ្ញាតឲ្យមនុស្សបំផ្លាញផែនដីដ៏ស្រស់បំព្រងនេះទេ តើកូនគិតយ៉ាងណា?—
ដូចយើងបានរៀនហើយ គម្ពីរបានប្រាប់ទុកជាមុនអំពីទីបញ្ចប់នៃពិភពលោកនេះ។ គម្ពីរប្រាប់ថា៖ ‹ពិភពលោកនេះកំពុងឈានទៅរកការសាបសូន្យ›។ (យ៉ូហានទី១ ២:១៧) តើកូនគិតថាទីបញ្ចប់នៃពិភពលោកនេះ គឺជាទីបញ្ចប់នៃផែនដីឬទេ?— មិនមែនមានន័យដូច្នេះទេ។ គម្ពីរចែងថា ព្រះបានបង្កើតផែនដី«ជាទីអាស្រ័យនៅ» ដើម្បីឲ្យមនុស្សរស់នៅដោយសប្បាយរីករាយ។ (អេសាយ ៤៥:១៨) នៅសៀវភៅទំនុកតម្កើង ៣៧:២៩ ប្រាប់ថា៖ ‹ពួកអ្នកសុចរិតនឹងបានផែនដីជាមរដក ហើយនឹងនៅផែនដីជានិច្ច›។ ហេតុនេះ គម្ពីរក៏បានបញ្ជាក់ដែរថា ផែនដីនឹងស្ថិតស្ថេរជាដរាប។—ទំនុកតម្កើង ១០៤:៥; សាស្តា ១:៤
ដូច្នេះ បើទីបញ្ចប់នៃពិភពលោកនេះ មិនមែនជាទីបញ្ចប់នៃផែនដីទេ តើជាទីបញ្ចប់នៃអ្វីវិញ?— យើងអាចរកចម្លើយបាន ដោយពិចារណាមើលអំពីអ្វីដែលបានកើតឡើងនៅសម័យណូអេ។ គម្ពីរពន្យល់ថា៖ «ពិភពលោកនៅសម័យនោះបានត្រូវបំផ្លាញចោល ពេលដែលមានទឹកជំនន់»។—ពេត្រុសទី២ ៣:៦
ក្នុងពេលទឹកជន់លិចនៅសម័យណូអេ តើមានអ្នកណាខ្លះដែលបានរួចជីវិតពីទីបញ្ចប់នៃពិភពលោក?— គម្ពីរប្រាប់ថា ព្រះបាន«ធ្វើឲ្យទឹកជន់លិចពិភពលោកនៃមនុស្សទុច្ចរិតទាំងនោះ តែបានការពារណូអេ ដែលជាអ្នកផ្សព្វផ្សាយអំពីសេចក្ដីសុចរិត និងមនុស្សប្រាំពីរនាក់ទៀត»។—ពេត្រុសទី២ ២:៥
តើនៅសម័យណូអេព្រះបានបំផ្លាញចោលពិភពលោកបែបណា?
ដូច្នេះ តើទីបញ្ចប់នៃពិភពលោកនេះជាអ្វី? តើជាទីបញ្ចប់នៃផែនដី ឬក៏មនុស្សអាក្រក់?— គម្ពីរប្រាប់ថា គឺជាទីបញ្ចប់នៃ‹ពិភពលោករបស់មនុស្សទុច្ចរិត›។ សូមកត់សម្គាល់ថា គម្ពីរបានហៅណូអេថា«អ្នកផ្សព្វផ្សាយ»។ តើគាត់បានផ្សព្វផ្សាយអំពីអ្វី? តើកូនគិតយ៉ាងណា?— ណូអេបានផ្សព្វផ្សាយព្រមានមនុស្សអំពីទីបញ្ចប់នៃ«ពិភពលោកនៅសម័យនោះ»។
ពេលលោកយេស៊ូនិយាយអំពីទឹកជំនន់ដ៏ធំនោះ លោកក៏បានប្រាប់អ្នកកាន់តាមលោកដែរ អំពីរបៀបរស់នៅដែលមនុស្សមាន មិនយូរមុនមានទឹកជំនន់។ លោកយេស៊ូបានប្រាប់ថា៖ «នៅសម័យនោះ មុនទឹកជំនន់មកដល់ [មនុស្ស]កំពុងពិសាអាហារពិសាស្រា រៀបការប្ដីប្រពន្ធ រហូតដល់ថ្ងៃដែលណូអេចូលទៅក្នុងទូកធំនោះ ហើយពួកគេមិនបានយកចិត្តទុកដាក់សោះ រហូតដល់ទឹកជន់ឡើង កញ្ឆក់យកគេទាំងអស់គ្នាទៅ»។ រួចមក លោកយេស៊ូបានប្រាប់ថា មុនដែលទីបញ្ចប់មកដល់ មនុស្សនៅសព្វថ្ងៃនេះក៏នឹងមានរបៀបរស់នៅដូច្នោះដែរ។—ម៉ាថាយ ២៤:៣៧-៣៩
ពាក្យសម្ដីរបស់លោកយេស៊ូស្ដីអំពីការប្រព្រឹត្តរបស់មនុស្សនៅសម័យមុនទឹកជន់លិច ជួយឲ្យយើងដឹងថា យើងគួរទាញមេរៀនដ៏សំខាន់មួយ។ នៅជំពូកទី១០ យើងបានអានអំពីរឿងនេះម្ដងហើយ តើកូននៅចាំទេ មនុស្សនៅសម័យនោះបានធ្វើអ្វីខ្លះ?— អ្នកខ្លះបានធ្វើបាបអ្នកទន់ខ្សោយ ហើយពួកគេក៏បានធ្វើអំពើអាក្រក់ជាច្រើនដែរ។ ទោះជាយ៉ាងនោះក៏ដោយ លោកយេស៊ូបាននិយាយថា មនុស្សជាច្រើនមិនបានស្តាប់ដំណឹងដែលព្រះបានចាត់ឲ្យណូអេផ្សព្វផ្សាយប្រាប់ពួកគេទេ។
ដូច្នេះ ពេលថ្ងៃនោះមកដល់ ព្រះយេហូវ៉ាបានប្រាប់ណូអេថា លោកនឹងបំផ្លាញមនុស្សអាក្រក់ទាំងនោះដោយទឹកជំនន់។ ទឹកនឹងលិចកំពូលភ្នំទាំងអស់ រហូតដល់ពេញផែនដីទាំងមូល។ ហេតុនេះ ព្រះយេហូវ៉ាបានប្រាប់ណូអេឲ្យសង់ទូកធំមួយ។ ទូកនោះមានរាងដូចជាប្រអប់វែងធំមួយ។ បើកូនបើកទៅទំព័រ២៣៨ កូននឹងឃើញរូបភាពទូកនោះ។
ព្រះបានប្រាប់ណូអេឲ្យសង់ទូកធំ ដែលល្មមសម្រាប់ឲ្យក្រុមគ្រួសាររបស់គាត់ និងសត្វផ្សេងៗជាច្រើនទៀតរស់នៅ។ ណូអេនិងក្រុមគ្រួសារបានធ្វើការនឿយហត់ណាស់។ ពួកគាត់បានកាប់រំលំដើមឈើធំៗ ហើយប្រើឈើទាំងនោះដើម្បីធ្វើទូក។ ពួកគាត់បានចំណាយពេលអស់ជាច្រើនឆ្នាំដើម្បីសង់ទូកធំនោះ។
ក្នុងអំឡុងជាច្រើនឆ្នាំដែលណូអេសង់ទូកធំនោះ តើកូននៅចាំទេ គាត់បានធ្វើកិច្ចការអ្វីទៀត?— គាត់បានផ្សព្វផ្សាយព្រមានមនុស្សអំពីទឹកជំនន់។ តើមានអ្នកណាយកចិត្តទុកដាក់ស្តាប់ការព្រមាននោះឬទេ? គ្មានទេ មានតែក្រុមគ្រួសាររបស់ណូអេប៉ុណ្ណោះ។ ចំណែកអ្នកឯទៀតជាប់រវល់នឹងកិច្ចការផ្សេងៗ។ តើលោកយេស៊ូបានប្រាប់ថា ពួកគេកំពុងជាប់រវល់ធ្វើអ្វីខ្លះ? តើកូននៅចាំទេ?— ពួកគេជាប់រវល់ពិសាអាហារពិសាស្រា និងរៀបការប្ដីប្រពន្ធ។ ពួកគេមិនបានគិតថា ខ្លួនជាមនុស្សអាក្រក់ទេ ហើយពួកគេក៏មិនបានឆ្លៀតពេលដើម្បីស្តាប់ការព្រមានពីណូអេដែរ។ ដូច្នេះ សូមយើងស្តាប់អ្វីដែលបានកើតឡើងចំពោះមនុស្សទាំងនោះ។
ក្រោយពីណូអេនិងក្រុមគ្រួសារបានចូលក្នុងទូកហើយ ព្រះយេហូវ៉ាបានបិទទ្វារទូក។ មនុស្សនៅខាងក្រៅទូកនៅតែមិនជឿថា នឹងមានទឹកជន់លិចទេ។ ប៉ុន្តែ មេឃស្រាប់តែចាប់ផ្ដើមធ្លាក់ភ្លៀង! នេះមិនមែនជាភ្លៀងធ្លាក់ធម្មតាទេ គឺធ្លាក់យ៉ាងខ្លាំងឥតឈប់។ មិនយូរប៉ុន្មានទឹកចាប់ផ្ដើមហូរលិចគ្រប់ទីកន្លែង សូរទឹកគគ្រឹក លាន់ឮយ៉ាងខ្លាំង ហើយទឹកបានរំលើងដើមឈើធំៗ។ បន្ថែមទៀត ទឹកធ្វើឲ្យថ្មធំៗរមៀលចេញ ហាក់ដូចជាថ្មនោះជាគ្រាប់ក្រួស។ ចុះយ៉ាងណាវិញមនុស្សដែលនៅខាងក្រៅទូក?— លោកយេស៊ូនិយាយថា៖ «ទឹកជន់ឡើង កញ្ឆក់យកគេទាំងអស់គ្នាទៅ»។ មនុស្សទាំងអស់ដែលនៅខាងក្រៅទូកបានស្លាប់។ ហេតុអ្វីពួកគេស្លាប់?— លោកយេស៊ូបានប្រាប់ថា៖ «ពួកគេមិនបានយកចិត្តទុកដាក់សោះ»។ ដូច្នេះ ពួកគេមិនបានស្តាប់តាមការព្រមាននោះទេ!—ម៉ាថាយ ២៤:៣៩; លោកុប្បត្តិ ៦:៥-៧
ហេតុអ្វីយើងមិនគួរគិតតែពីការលេងសប្បាយ?
លោកយេស៊ូបាននិយាយថាអ្វីដែលបានកើតឡើងចំពោះមនុស្សទាំងនោះ គឺជាការព្រមានសម្រាប់យើងនៅសព្វថ្ងៃនេះ កូនច្បាស់ជានៅចាំអំពីពាក្យរបស់លោក។ ដូច្នេះ តើយើងអាចទាញមេរៀនអ្វី?— ទឹកបានជន់លិចបំផ្លាញមនុស្ស មិនគ្រាន់តែដោយសារពួកគេជាមនុស្សអាក្រក់ប៉ុណ្ណោះទេ តែដោយសារពួកគេជាប់រវល់ពេក មិនព្រមឆ្លៀតពេលរៀនអំពីព្រះ និងអំពីអ្វីដែលលោកនឹងធ្វើ។ ហេតុនេះ យើងត្រូវតែប្រុងប្រយ័ត្ន ដើម្បីកុំឲ្យយើងធ្វើដូចជាពួកគេដែរ មែនទេ?—
តើកូនគិតថា ព្រះនឹងបំផ្លាញពិភពលោកនេះម្ដងទៀតដោយទឹកជំនន់ឬទេ?— ព្រះបានសន្យាថា លោកនឹងមិនធ្វើឲ្យមានទឹកជន់លិចពិភពលោកម្ដងទៀតទេ។ លោកប្រាប់ថា៖ ‹ខ្ញុំដាក់ឥន្ទធនូរបស់ខ្ញុំនៅនាពពក នោះហើយជាទីសំគាល់នៃសេចក្ដីសញ្ញា›។ ព្រះយេហូវ៉ាបាននិយាយថា ឥន្ទធនូគឺជាសញ្ញាសម្គាល់ថា«នឹងគ្មានទឹកជន់ឡើងលិចផែនដី ដើម្បីបំផ្លាញគ្រប់ទាំងសាច់ទៀតឡើយ»។—លោកុប្បត្តិ ៩:១១-១៧
ដូច្នេះ យើងអាចប្រាកដថា ព្រះនឹងមិនធ្វើឲ្យមានទឹកជន់លិចបំផ្លាញផែនដីទៀតទេ។ ក៏ប៉ុន្តែ ដូចយើងដឹងហើយអំពីទំនាយដែលគម្ពីរបានប្រាប់ទុកជាមុនអំពីទីបញ្ចប់នៃពិភពលោកនេះ។ ពេលដែលព្រះនឹងបំផ្លាញពិភពលោកនេះ តើលោកនឹងជួយសង្គ្រោះអ្នកណា?— តើលោកនឹងសង្គ្រោះមនុស្សដែលចាប់អារម្មណ៍តែនឹងរឿងផ្សេងៗ រហូតដល់ពួកគេគ្មានពេលរៀនអំពីព្រះឬទេ? តើលោកនឹងសង្គ្រោះអ្នកដែលជាប់រវល់ពេក រហូតដល់គ្មានពេលរៀនគម្ពីរឬ? តើកូនគិតយ៉ាងណា?—
យើងចង់នៅក្នុងចំណោមអស់អ្នកដែលព្រះនឹងសង្គ្រោះ មែនទេ?— បើព្រះសង្គ្រោះយើងនិងក្រុមគ្រួសាររបស់យើង ដូចលោកបានសង្គ្រោះក្រុមគ្រួសាររបស់ណូអេ នោះពិតជាអស្ចារ្យណាស់ មែនទេ?— ដើម្បីយើងអាចរួចជីវិតនៅទីបញ្ចប់នៃពិភពលោកអាក្រក់នេះ យើងត្រូវយល់ដឹងអំពីរបៀបដែលព្រះនឹងបំផ្លាញចោលពិភពលោកនេះ និងរបៀបដែលលោកនឹងនាំឲ្យមានពិភពលោកថ្មីដែលមានតែសេចក្ដីសុចរិតវិញ។ សូមយើងស្តាប់ របៀបដែលលោកនឹងធ្វើដូច្នេះ។
គម្ពីរប្រាប់យើងនូវចម្លើយក្នុងសៀវភៅដានីយ៉ែល ជំពូកទី២ ខ៤៤។ ខគម្ពីរនេះប្រាប់អំពីគ្រានៅសព្វថ្ងៃនេះ ដោយចែងថា៖ «នៅគ្រានៃស្ដេចទាំងនោះ ព្រះនៃស្ថានសួគ៌ទ្រង់នឹងតាំងនគរ[ឬរដ្ឋាភិបាល]១ឡើង ដែលមិនត្រូវបំផ្លាញឡើយ ហើយអំណាចហ្លួងក៏មិនត្រូវផ្ទេរដល់សាសន៍ដទៃណាដែរ គឺនឹងបំបាក់បំបែក ហើយលេបបំបាត់នគរទាំងនោះវិញ នគរនោះនឹងស្ថិតស្ថេរនៅអស់កល្បជានិច្ច»។
តើកូនយល់ខគម្ពីរនោះទេ?— គម្ពីរប្រាប់ថា រដ្ឋាភិបាលរបស់ព្រះនឹងបំផ្លាញចោលរដ្ឋាភិបាលទាំងអស់របស់មនុស្ស។ ហេតុអ្វី?— ពីព្រោះរដ្ឋាភិបាលទាំងអស់នោះមិនធ្វើតាមស្ដេចដែលព្រះបានតែងតាំងទេ។ តើស្ដេចនោះជាអ្នកណា?— គឺលោកយេស៊ូគ្រិស្ដ!
ក្នុងនាមជាស្ដេចដែលព្រះបានតែងតាំង លោកយេស៊ូគ្រិស្ដនឹងបំផ្លាញចោលពិភពលោកដ៏អាក្រក់នេះនៅសង្គ្រាមហាម៉ាគេដូន
ព្រះយេហូវ៉ាមានសិទ្ធិសម្រេចថា រដ្ឋាភិបាលបែបណាដែលគួរគ្រប់គ្រងផែនដី ហើយលោកក៏បានជ្រើសរើសលោកយេស៊ូដែលជាបុត្ររបស់លោកឲ្យធ្វើជាស្ដេចនៃរដ្ឋាភិបាលដែរ។ មិនយូរទៀត លោកយេស៊ូគ្រិស្ដដែលជាអ្នកគ្រប់គ្រងដែលព្រះបានជ្រើសរើស នឹងដឹកនាំក្នុងការបំផ្លាញចោលរដ្ឋាភិបាលទាំងអស់របស់ពិភពលោកនេះ។ ក្នុងគម្ពីរនៅសៀវភៅការបើកបង្ហាញ ជំពូកទី១៩ ខ១១ដល់១៦ បានរៀបរាប់ថាលោកយេស៊ូនឹងធ្វើដូច្នោះ ដូចបង្ហាញក្នុងរូបភាពនេះ។ សង្គ្រាមនោះជាសង្គ្រាមរបស់ព្រះដែលនឹងបំផ្លាញចោលរដ្ឋាភិបាលទាំងអស់របស់ពិភពលោកនេះ។ ក្នុងគម្ពីរហៅសង្គ្រាមនោះថា ហាម៉ាគេដូន។
ព្រះបានប្រាប់ថា រាជាណាចក្ររបស់លោកនឹងបំផ្លាញចោលរដ្ឋាភិបាលទាំងអស់របស់មនុស្ស។ ប៉ុន្តែ តើលោកប្រាប់ថាយើងនឹងធ្វើសង្គ្រាមនោះឬទេ?— មិនមែនទេ។ ក្នុងគម្ពីររៀបរាប់ថា ហាម៉ាគេដូនជា«សង្គ្រាមដែលនឹងកើតឡើងនៅថ្ងៃដ៏ធំរបស់ព្រះដែលមានឫទ្ធានុភាពខ្លាំងក្លាបំផុត»។ (ការបើកបង្ហាញ ១៦:១៤, ១៦) ពិតមែនហើយ ហាម៉ាគេដូនគឺជាសង្គ្រាមរបស់ព្រះ ហើយលោកនឹងប្រើលោកយេស៊ូគ្រិស្ដឲ្យដឹកនាំកងទ័ពដ៏ខ្លាំងពូកែនៅស្ថានសួគ៌ឲ្យប្រយុទ្ធក្នុងសង្គ្រាមនោះ។ តើសង្គ្រាមហាម៉ាគេដូនជិតមកដល់ហើយឬ? សូមយើងស្វែងរកចម្លើយពីគម្ពីរចំពោះសំណួរនោះ។
ស្ដីអំពីគ្រាដែលព្រះនឹងកម្ទេចចោលមនុស្សអាក្រក់ទាំងអស់ ហើយសង្គ្រោះអ្នកដែលបម្រើលោក សូមអានជាមួយគ្នានៅ សុភាសិត ២:២១, ២២ អេសាយ ២៦:២០, ២១ យេរេមា ២៥:៣១-៣៣ និងម៉ាថាយ ២៤:២១, ២២។
