YU DƆN ɛva yɛri we pɔsin de tɔk bɔt dis wɔl in dɔn wan?— Tide bɔku pipul dɛn kin tɔk bɔt am. Sɔm pipul dɛn fil se di wɔl go dɔn we mɔtalman ib dɛn bad bad bɔm dɛn we dɛn de fɛt wɔ. Yu tink se Gɔd go alaw pipul dɛn fɔ pwɛl dis wi fayn fayn wɔl, di skay, ɛn di sta dɛn we de shayn?—

As wi bin dɔn lan, di Baybul tɛl wi bɔt di wɔl in dɔn wan. I se: “Di wɔl . . . go dɔn.” (Jɔn In Fɔs Lɛta 2:17) Yu tink se dis min se na di grɔn nɔ go de igen?— Nɔ-o, di Baybul se Gɔd mek di wɔl fɔ lɛ ‘pipul dɛn de de’ ɛn ɛnjɔy.  (Ayzaya 45:18) Sam 37:29 se: “Udat dɛn de du wetin rayt go gɛt di land, ɛn dɛn go de de sote go.” Na dis mek di Baybul se di wɔl go de so te go.—Sam 104:5; Ɛkliziastis 1:4.

So if di wɔl in dɔn wan nɔ min se na di grɔn Gɔd go dɔnawe wit, wetin i min naw?— Wɛl, fɔ no di ansa lɛ wi si wetin bin apin insay Noa in tɛm. Di Baybul se: “Na wata [Gɔd] bin mek kɔba di dray grɔn we bin de lɔntɛm ɛn pwɛl am.”—Na wi mek am italiks; Pita In Sɛkɛn Lɛta 3:6.

Yu tink se ɛnibɔdi bin sev we da Ebi Ebi Ren bin kam insay Noa in tɛm?— Di Baybul se Gɔd “bin mek big big wata kɔba ɔl di pipul dɛn we nɔ bin de du wetin i tɛl dɛn fɔ du. Na Noa nɔmɔ we bin de tɛl pipul fɔ du wetin rayt wit sɛvin ɔda pipul, Gɔd nɔ bin mek di wata kɔba.”—Pita In Sɛkɛn Lɛta 2:5.

So, wetin yu tink se Gɔd bin dɔnawe wit, na di wɔl ɔ na di bad pipul dɛn?— Di Baybul se na “di pipul dɛn we nɔ bin de du wetin i tɛl dɛn fɔ du.” Ɛn di Baybul ivin tɔk se Noa “bin de tɛl pipul fɔ du wetin rayt” ɔ i bin de prich to dɛn. Wetin yu tink se i bin de prich bɔt?— Noa bin de wɔn di pipul dɛn se di wɔl we dɛn de gɛt fɔ dɔn.

We Jizɔs bin de tɔk bɔt di Ebi Ebi Ren, i bin tɛl in disaypul dɛn wetin di pipul dɛn bin de du jɔs bifo di ren kam. I se: “Bifo wata bin kɔba di wɔl, ɔlman bin de it ɛn drink; pipul bin de mared. Na dat dɛn bin de pan sote di tɛm we Noa go insay di big bot we i bil, ɛn dɛn nɔ bin no se ren go kam we go mek wata kɔba ɔl di wɔl, pas we di ren kam ɛn wata kam kɔba ɛn kil dɛn ɔl.” Jizɔs se na dis sem tin pipul dɛn go de du bifo di wɔl dɔn.—Na wi mek am italiks; Matyu 24:37-39.

 Dis tin we Jizɔs tɔk sho se lɛsin de we wi kin lan frɔm wetin di pipul dɛn bin du bifo di Ebi Ebi Ren bin kam. Frɔm wetin wi rid insay Chapta 10 na dis buk, yu mɛmba wetin dɛn pipul dɛn de bin de du?— Sɔm dɛn bin de du bad tin dɛn to pipul dɛn we nɔ gɛt trɛnk ɛn dɛn bin de fɛt-fɛt. Bɔt Jizɔs bin se bɔku ɔda pipul dɛn nɔ bin jɔs lisin we Gɔd sɛn Noa fɔ prich to dɛn.

So wande Jiova tɛl Noa se I go yuz wata fɔ kil ɔl di bad pipul dɛn. Di wata go kɔba di wan ol wɔl, ivin di mawnten dɛn. Jiova tɛl Noa fɔ bil wan big ak. I bin tan lɛk wan big lɔng bɔks, lɛk di wan we de na di pikchɔ na pej 238.

Gɔd tɛl Noa fɔ bil di ak big big wan so dat in ɛn in famili ɛn bɔku animal dɛn go go insay ɛn natin nɔ go du dɛn. Noa ɛn in famili bin wok tranga wan. Dɛn kɔt big stik dɛn, ɛn dɛn bigin yuz dɛn fɔ bil di ak. Dis bin tek lɔng tɛm bikɔs di ak bin rili big.

Yu mɛmba wetin Noa bin de du bak di tɛm we i bin de bil di ak?— I bin de prich, i bin de wɔn di pipul dɛn bɔt di Ebi Ebi Ren we gɛt fɔ kam. Yu tink se ɛni wan pan dɛn bin lisin? Nɔ. Nɔbɔdi nɔ bin lisin, pas Noa in famili nɔmɔ. Di ɔda wan dɛn bin rili bizi de du ɔda tin dɛn. Yu mɛmba wetin Jizɔs se dɛn bin de du?— Dɛn bin jɔs de it, drink, ɛn mared. Dɛn nɔ bin de tink se dɛn na bad pipul dɛn, so dɛn nɔ gri fɔ tek tɛm lisin to Noa. Lɛ wi si wetin bin apin to dɛn.

Afta we Noa ɛn in famili dɔn go insay di ak, Jiova lɔk di domɔt. Di pipul dɛn we bin de na do nɔ bin stil biliv se di Ebi Ebi Ren go kam. Bɔt i nɔ tu te, wata bigin kɔmɔt na di skay! Dis nɔto bin nɔmal ren. Dis na bin ebi ebi ren! I nɔ tu  te, na in di wata bɔku lɛk dɛn big big riva, ɛn i bin de mek bɔku nɔys. I ib dɛn big big stik dɛn, ɛn i rol dɛn big ston dɛn lɛk se na smɔl smɔl ston dɛn. Wetin apin to di pipul dɛn we bin de na do?— Jizɔs se: “Di ren kam ɛn wata kam kɔba ɛn kil dɛn ɔl.” Ɔl di pipul dɛn we nɔ bin de insay di ak bin day. Wetin mek?— Wɛl, Jizɔs bin se, “dɛn nɔ pe atɛnshɔn.” Dɛn nɔ bin lisin!—Matyu 24:39; NW; Jɛnɛsis 6:5-7.

Naw mɛmba se Jizɔs bin se wetin apin to dɛn pipul dɛn de na tin we wi fɔ lan frɔm tide. Us lɛsin wi go lan?— Wɛl, nɔto bikɔs di pipul dɛn bin bad mek dɛn day, bɔt na bikɔs dɛn nɔ bin tek tɛm fɔ lan bɔt Gɔd ɛn lan bɔt wetin i go kam du. Wi nid fɔ tek tɛm mek wi nɔ tan lɛk dɛn, nɔto so?—

Yu tink se Gɔd go yuz wata fɔ dɔnawe wit di wɔl igen?— Nɔ, Gɔd dɔn prɔmis se i nɔ go du dat. I se: ‘A de put mi renbo ɔp na di klawd we go bi di sayn.’ Jiova tɔk se di renbo go bi di sayn fɔ se i “nɔ go mek big big ren kam fɔ pwɛl ɔltin we gɛt layf.”—Jɛnɛsis 9:11-17.

So wi shɔ se Gɔd nɔ go ɛva yuz wata fɔ dɔnawe wit di wɔl igen. Jɔs lɛk wetin wi dɔn si, di Baybul tɛl wi bɔt aw di wɔl bin dɔn. We Gɔd go kam dɔnawe wit di wɔl, udat dɛn i go sev?— Yu tink se na pipul dɛn we so bizi de du ɔda  tin dɛn dat dɛn nɔ ɛva want fɔ lan bɔt Gɔd? Yu tink se i go bi pipul dɛn we bin bizi ɔltɛm ɛn nɔ gɛt tɛm fɔ stɔdi Gɔd in Wɔd?—

Wi want fɔ de wit di wan dɛn we Gɔd go sev, nɔto so?— Yu nɔ tink se i go fayn fɔ mek wi famili tan lɛk Noa in yon so dat Gɔd go sev wi ɔl?— If wi want fɔ sev di tɛm we Gɔd go kam dɔnawe wit dis wɔl, wi nid fɔ no gud wan aw Gɔd go kam dɔnawe wit dis wɔl, ɛn aw i go kam wit di nyu wɔl. Lɛ wi si aw i go du dis.

Di Baybul tɛl wi bɔt dis na Daniɛl chapta 2, vas 44. Dis skripchɔ de tɔk bɔt wi yon tɛm tide, we i se: ‘Dɛn tɛm dɛn de we di kiŋ dɛn go de rul, PAPA GƆD na ɛvin go briŋ in yon kiŋdɔm we nɔ go ɛva fɔdɔm, ɛn in pawa nɔ go go na ɔda pipul dɛn an; ɛn I go dɔnawe wit ɔl dɛn kiŋdɔm dɛn we bin dɔn de bifo am, ɛn in go tinap sote go.’

Yu ɔndastand wetin dis skripchɔ se?— Di Baybul se Gɔd in gɔvmɛnt go kam dɔnawe wit ɔl di gɔvmɛnt dɛn na di wɔl. Wetin mek?— Na bikɔs dɛn nɔ obe di wan we Gɔd dɔn mek kiŋ. Udat na da pɔsin de?— Na Jizɔs Krays!

Jiova Gɔd gɛt di rayt fɔ disayd uskayn gɔvmɛnt fɔ rul wi, ɛn i dɔn pik in Pikin, Jizɔs, fɔ bi Kiŋ. I nɔ go te igen, di wan we Gɔd dɔn pik fɔ rul di wɔl, we na Jizɔs Krays, go kam dɔnawe wit ɔl di gɔvmɛnt dɛn na di wɔl. Na Rɛvɛleshɔn chapta 19, vas 11 to 16, di Baybul sho wi aw i go kam du am, jɔs lɛk aw dis pikchɔ sho wi. Di Baybul kɔl di wɔ we Gɔd go kam wit fɔ dɔnawe wit ɔl dɛn gɔvmɛnt dɛn, Amagɛdɔn.

Naw, Gɔd tɔk se in Kiŋdɔm go dɔnawe wit mɔtalman gɔvmɛnt dɛn. Bɔt yu tink se na wi i tɛl fɔ du am?— Nɔ-o.  Di Baybul se Amagɛdɔn na ‘di wɔ we go bi da big de we Gɔd, we gɛt pawa pas ɔl, go sho in pawa.’ (Rɛvɛleshɔn 16:14, 16) Fɔ tru, Amagɛdɔn na Gɔd in wɔ, ɛn na Jizɔs i go yuz fɔ de bifo di enjɛl dɛn we go fɛt dis wɔ. Yu tink se Amagɛdɔn de nia? Lɛ wi si aw wi go no.