Kauhanyo 46

Mezi A Sinya Lifasi —Kana Ku Ka Ezahala Cwalo Hape?

KANA u kile wa utwa mutu ya bulela za ku fela kwa lifasi?— Kacenu, ba bañata ba bulelanga za teñi. Batu ba bañwi ba nahana kuli lifasi li ka sinyiwa mwa ndwa yeo ku yona batu ba ka itusisa limbomba ze buhali. Kana u bona kuli Mulimu muta o muñwi u ka sinya lifasi la luna le linde ni mahalimu a luna a mande ni linaleli ze benya ku ona?—

Sina ha se lu itutile, Bibele i lu bulelela ka za ku fela kwa lifasi. Bibele i bulela kuli: “Lifasi la fela.” (1 Joani 2:17)  Kana u nahana kuli ku fela kwa lifasi ku talusa ku felelela kwa lona luli?— Kutokwa, Bibele i bulela kuli Mulimu n’a ezize lifasi ‘ilikuli li yahiwe,’ ee, kuli batu ba pile ku lona ni ku ikola lona. (Isaya 45:18) Samu 37:29 i li: “Ba ba na ni niti ba ka yola sanda sa naha, ni ku yaha mwateñi ku ya ku ile.” Kabakaleo, Bibele hape i bulela kuli lifasi li ka ina ku ya ku ile.—Samu 104:5; Muekelesia 1:4.

Kacwalo, haiba mafelelezo a lifasi h’a talusi ku felelela kwa lona luli, kanti ku fela kwa lona ku talusañi?— Lwa kona ku fumana kalabo ha lu tatubisisa se ne si ezahezi mwa miteñi ya Nuwe. Bibele i talusa kuli: ‘Lifasi lani la shwa, kabakala Munda ku li kwahela.’—2 Pitrosi 3:6.

Kana ku na ni be ne ba bandukile mafelelezo a lifasi ka nako ya Munda o mutuna w’o wa mwa miteñi ya Nuwe?— Bibele i bulela kuli Mulimu “u pilisize Nuwe, yena [mukutazi, NW] wa Ku Luka, ni ba bañwi ba ba 7, nako y’a tisa Munda o bulaile lifasi la banyefuli.”—2 Pitrosi 2:5.

Kacwalo, ki lifi lifasi le ne li felile? Kana ne li lona lifasi luli, kamba kana ne li batu ba ba maswe?— Bibele i bulela kuli n’e li ‘lifasi la banyefuli.’ Mi u lemuhe kuli Nuwe n’a bizwa kuli “mukutazi.” Ka m’o bonela wena, n’a kutazangañi?— Nuwe n’a lemusanga batu ka za ku fela kwa ‘lifasi lani.’

Jesu ha n’a bulezi za Munda o mutuna w’o, n’a bulelezi balutiwa ba hae ka za ze ne ba ezanga batu mafelelezo a si ka fita kale. N’a ba bulelezi kuli: ‘Mwa mazazi ale, munda o mutuna u si ka bonahala kale, batu ne ba ca, ba nwa, ba nyala, ba nyalisa, mane la fita lizazi l’a kena Nuwe mwa aleka. Ha ba si ka lemuha se siñwi, mane munda wa kena, mi wa ba kukisa kaufela.’ Mi Jesu n’a ize batu ne ba ka ezanga honacwalo lifasi le li si ka fela kale.—Mateu 24:37-39.

Manzwi a Jesu a lu bonisa kuli lwa kona ku ituta lituto ku ze ne  ba eza batu Munda u si ka taha kale. Ha ne u balile mwa Kauhanyo 10 ya buka ye, kana wa hupula ze ne ba eza batu bao?— Batu ba bañwi ne ba li batolisi mi ne ba tisanga mifilifili. Kono Jesu n’a ize, ba bañata ba bañwi ne ba si ka utwa Mulimu ha n’a lumile Nuwe ku ba kutaza.

Kacwalo, lizazi la fita leo Jehova n’a bulelezi Nuwe kuli N’a ka bulaya batu ba ba maswe ka munda. Mezi ao n’a ka kwahela lifasi mutumbi, mane ni malundu. Jehova na’ bulelezi Nuwe ku yaha aleka. N’e li mukolo o mutuna, o mutelele, sina ha u kona ku bona ha n’o ka sikululela meto fa siswaniso se si fa likepe 238.

Mulimu n’a bulelezi Nuwe ku yaha aleka ye tuna hahulu ilikuli yena ni ba lubasi lwa hae ba kone ku punyuhela mwateñi, hamohocwalo ni lifolofolo ze ñata. Nuwe ni lubasi lwa hae ne ba sebelize ka t’ata. Ne ba lemanga likota ze tuna, mi ka ku itusisa likota zeo ba yaha aleka. Musebezi w’o n’o ngile lilimo ze ñata-ñata kakuli aleka yeo n’e li ye tuna hahulu.

Kana wa hupula se siñwi sa n’a eza Nuwe mwa lilimo zeo kaufela ha n’a nze a yaha aleka?— N’a sweli ku kutaza, ku lemusa batu ka za ku taha kwa Munda. Kana ne ba mu utwile? Ha ku na ni yo mukana ku bona ya n’a utwile, konji fela ba lubasi lwa Nuwe. Ba bañwi kaufela ne ba patehile hahulu ku eza lika ze ñwi. Kana wa hupula za n’a bulezi Jesu kuli ne ba eza?— Ne ba patehile ku ca ni ku nwa ni ku kena mwa manyalo. Ne ba sa iponi kuli ne ba li batu ba ba maswe, mi ne ba si ka ba ni nako ya ku teeleza ku Nuwe. Kacwalo, ha lu bone se ne si ezahezi ku bona.

Nuwe ni lubasi lwa hae ha se ba keni mwa aleka, Jehova a kwala munyako. Batu be ne ba li kwande ne ba sa lumeli ni ka nako yeo kuli Munda n’o ka taha. Kono ka sipundumukela, mezi a kalisa ku cuumuka ku zwa kwa lihalimu! N’e si pula-pula fela. N’e li ñundupula! Mwa nako ye nyinyani fela, mezi a ba a mañata hahulu, mi a  eza lilata le lituna. A kumaula likota ze tuna ni ku hoholola macwe a matuna inge kuli n’e li tucwe-cwe fela. Mi ku cwañi ka za batu be ne ba li kwande a aleka?— Jesu u li: “Munda wa kena, mi wa ba kukisa kaufela.” Batu kaufela be ne ba siyo mwa aleka ba shwa. Kabakalañi?— Sina Jesu ha n’a bulezi, “ne ba si ka lemuha se siñwi.” Ne ba si ka utwa!—Mateu 24:39; Genese 6:5-7.

Cwale, u si libali kuli, Jesu n’a ize se ne si ezahezi kwa batu bao ki tuto ye lu lukela ku ituta kacenu. Ki ifi tuto ye lu kona ku ituta?— Batu ne ba bulailwe isi fela kuli ne ba li ba ba maswe, kono ni kuli ne ba patehile hahulu mi ne ba si ka ba ni nako ya ku ituta ka za Mulimu ni ka za n’a ka eza. Lu tokwa ku tokomela kuli ha lu bi inge bona, nji cwañi?—

Kana u nahana kuli Mulimu u ka sinya lifasi hape ka munda?— Kutokwa, Mulimu u sepisize kuli h’a na ku eza cwalo. N’a ize: “Ni beile Nambwa-mutalati wa ka mwa malu, mi ki sona sisupo.” Jehova n’a ize nambwamutalati ne si ka ba sisupo sa kuli “mezi h’a sa na ku kutela ku eza munda o mutuna, ni ku feza ze pila kamukana.”—Genese 9:11-17.

Kacwalo, lwa kona ku kolwa kuli Mulimu h’a na ku sinya lifasi le ka munda hape. Kono, sina ha se lu boni, Bibele ya bulela za ku fela kwa lifasi. Mulimu h’a ka sinya lifasi, ki bomañi b’a ka pilisa?— Kana ikaba batu be ne ba tabela hahulu lika ze ñwi kuli mane  ne ba sa tabeli ku ituta za Mulimu? Kana ikaba batu be ne ba patehile hahulu kuli mane ne ba si na nako ya ku ituta Bibele? U bona cwañi wena?—

Lu bata ku ba mwahal’a batu b’a ka pilisa Mulimu, nji cwañi?— Kana ne ku si ke kwa tabisa lubasi lwa luna ha ne lu ka ba sina lwa Nuwe kuli mane Mulimu a lu pilise kaufel’a luna?— Kuli lu punyuhe mafelelezo a lifasi, lu tokwa ku utwisisa m’o Mulimu a ka li sinyeza ni m’o a ka tahiseza lifasi la hae le linca la ku luka. Ha lu bone mw’a ka ezeza cwalo.

Bibele i lu fa kalabo kwa Daniele kauhanyo 2, timana 44. Liñolo leo li bulela ka za nako ye lu pila ku yona ha li li: “Mwa mazazi a malena ao, Mulimu wa mwa lihalimu u ka tahisa mubuso [kamba mulonga] o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”

Kana wa utwisisa liñolo leo?— Bibele i bulela kuli mulonga wa Mulimu u ka sinya milonga kaufela ya fa lifasi. Kabakalañi?— Kakuli ha ba utwi Yena y’o Mulimu a ketile ku ba Mulena. Mi ki mañi yena Mulena y’o?— Ki Jesu Kreste!

Jehova Mulimu u na ni tukelo ya ku keta mulonga o lukela ku busa, mi u ketile Mwan’a hae, Jesu, kuli a be yena Mulena. Jesu Kreste, Mubusi ya ketilwe ki Mulimu, u ka tuha a etelela mwa ku sinya milonga kaufela ya lifasi le. Mwa Bibele, kwa Sinulo kauhanyo 19, litimana 11 ku isa 16, u taluswa ku ba ya eza cwalo, mane sina siswaniso seo ha si bonisa cwalo. Mwa Bibele, ndwa ya Mulimu ya ku sinya milonga kaufela ya lifasi le i bizwa kuli Harmagedoni, kamba Armagedoni.

Cwale, Mulimu u bulela kuli Mubuso wa hae u ka sinya milonga ya batu. Kono kana u lu bulelela ku eza cwalo?— Kutokwa,  mwa Bibele, Armagedoni i bizwa kuli “ndwa ya lizazi le lituna la Mulimu Ya-Mata-Kaufela.” (Sinulo 16:14, 16) Ee, Armagedoni ki ndwa ya Mulimu, mi u itusisa Jesu Kreste ku etelela limpi za kwa lihalimu mwa ndwa yeo. Kana ndwa ya Armagedoni i fakaufi? Ha lu bone mo lu kona ku zibela kalabo.

Ha lu bale hamoho ka za f’o Mulimu a ka feliseza bumaswe kaufela ni ku pilisa ba ba mu sebeleza, kwa Liproverbia 2:21, 22; Isaya 26:20, 21; Jeremia 25:31-33; ni Mateu 24:21, 22.

[Siswaniso se si fa likepe 238]

Ki lifi lifasi le ne li sinyizwe mwa mazazi a Nuwe?

[Siswaniso se si fa likepe 241]

Ki kabakalañi ha lu sa lukeli ku nahananga fela za ku itabisa?

[Siswaniso se si fa likepe 243]

Jesu Kreste, Mulena ya ketilwe ki Mulimu, u ka sinya lifasi le fa Armagedoni