UKADIKU mumvue muntu wakula bua nshikidilu wa bukua-panu anyi?​— Lelu’eu bantu ba bungi badi bakula bua nshikidilu. Bamue bantu badi bela meji ne: bukua-panu nebubutuke mu mvita ikala bantu mua kuenza ne bombe idibu babikila ne: bombe ya nikleere. Udi wela meji ne: Nzambi nealekele bantu bua babutule buloba buetu buimpe ebu anyi?​—

Anu bu mutuvua balonge, Bible udi wakula bua nshikidilu wa buloba. Bible udi wamba ne: “Buloba budi bujimina.” (1 Yone 2:17) Udi wela meji ne: nshikidilu wa bukua-panu neikale nshikidilu wa buloba anyi?​— Tòo, Bible udi wamba  ne: Nzambi wakafuka buloba bua ‘bantu bashikamepu,’ eyowa, bua bantu basombepu ne bikala ne disanka pa buloba apa. (Yeshaya 45:18) Musambu wa 37:29 udi wamba ne: ‘Bantu bakane nebapiane buloba, nebashikamemu tshiendelele.’ Ke bualu kayi Bible udi kabidi wamba ne: buloba nebushale kashidi.​—Musambu 104:5; Muambi 1:4.

Nunku bikala nshikidilu wa bukua-panu kayi muikale nshikidilu wa buloba, udi umvuija tshinyi?​— Tudi mua kupeta diandamuna tuetu bakonkonone bimpe tshivua tshienzeke mu matuku a Noa. Bible udi wamba ne: ‘Buloba buakadiku mu tshikondo atshi buakabuikidibua ne mâyi, buakajimina.’​—2 Petelo 3:6.

Kuvuaku muntu uvua mupanduke ku nshikidilu wa bukua-panu abu munkatshi mua Mvula wa kabutu mu matuku a Noa anyi?​— Bible udi wamba ne: Nzambi ‘wakalama Noa, muambi wa malu mimpe ne bantu bakuabu muanda mutekete pakatumaye mâyi manene pa buloba bua bantu babi.’​—2 Petelo 2:5.

Nunku, mbukua-panu kayi buakajimina? Buloba buetu ebu ke buakajimina anyi peshi bantu babi ke bakajimina?​— Bible udi wamba ne: buvua “buloba bua bantu babi.” Tangila ne: badi babikila Noa ne: “muambi.” Udi wela meji ne: uvua uyisha bantu pa tshinyi?​— Noa uvua udimuija bantu bua nshikidilu wa ‘buloba bua tshikondo atshi.’

Pavua Yezu muakule bua Mvula wa kabutu, wakambila bayidi bende tshivua bantu benza kumpala kua nshikidilu kuluaye. Wakabambila ne: ‘Matuku avua mvula wa kabutu kayi muanji kuloka, bantu bavua badia, banua, baselangana, baselesha bana babu ba bakaji, too ne dituku divua Noa mubuele mu buatu. Bantu kabavua bamanye bualu too ne pakalua mvula kubabutula bonso.’ Pashishe Yezu kuambaye ne: bantu nebikale benda benza anu nunku kumpala kua bukua-panu ebu kujiminabu.​—Matayo 24:37-39, MMM.

 Mêyi a Yezu aa adi aleja ne: tudi mua kulongela malu a bungi ku bivua bantu benza kumpala kua Mvula wa kabutu. Udi uvuluka malu avua bantu abu benze atuvua bamone mu nshapita wa 10 wa mukanda eu anyi?​— Bakuabu bavua ne tshikisu ne benza malu a tshinyangu. Kadi Yezu wakamba ne: bakuabu ba bungi kabavua bateleje Noa pavua Nzambi mumutume bua kubayisha to.

Nunku dituku divua Yehowa muambile Noa ne: uvua ukeba kubutula bantu babi ku mvula diakafika. Mâyi avua ne bua kubuikila buloba bujima, kubuikila too ne mikuna. Yehowa wakambila Noa bua kuenza buatu bunene. Buvua anu bu mushete munene, anu muudi mua kumona mu tshimfuanyi tshidi mu dibeji dia 238.

Nzambi wakambila Noa bua kuenzaye buatu bua bunene bukumbane bua yeye ne bena mu dîku diende ne nyama ya bungi basombe bimpe munda muabu. Noa ne dîku diende bakenza mudimu mukole menemene. Bakatapa mitshi minene ne bakatuadija kuenza buatu ne mabaya avuabu bapete. Mudimu eu wakangata bidimu ne bidimu bualu buatu buvua bunene be!

Udi muvuluke bualu bukuabu buvua Noa wenza munkatshi mua bidimu bionso bivuaye wenza buatu anyi?​— Uvua uyisha, udimuija bantu bua Mvula wa kabutu uvua ne bua kulua kuloka. Kuvuaku muntu nansha umue wakamuteleja anyi? Muntu nansha umuepele kavua mumuteleje to, pa kumusha anu dîku diende nkayadi. Bantu bakuabu bavua benza anu malu makuabu. Udi uvuluka tshivua Yezu muambe ne: bavua benza anyi?​— Bavua badia, banua, basela ne baseleshangana. Kabavua bela meji ne: bavua bantu babi to, ne kabavua badiakaje bua kuteleja Noa to. Tumone mpindieu tshiakabafikila.

Kunyima kua Noa ne dîku diende bamane kubuela munda mua buatu, Yehowa wakakanga tshiibi tshia buatu. Bantu bavua bashale pambelu kabavua anu bitaba ne: Mvula wa kabutu nealoke to. Kadi diakamue edi, mâyi adi atuadija kumata afumina mu diulu! Katshivua mvula bu mvula wetu utu uloka pa tshibidilu eu to. Uvua mvula mukole be! Mu katupa kîpi mâyi akalua misulu minene, yenza  mutoyi wa bungi. Mâyi akakulula mitshi minene ne akabunguluja mabue manene bienze anu bu tumabue tukese. Ntshinyi tshiakenzekela bantu bavua pambelu pa buatu?​— Yezu udi wamba ne: ‘Mvula wakalua kubabutula bonso.’ Bantu bonso bavua pambelu pa buatu bakafua. Bua tshinyi?​— Anu muvua Yezu muambe, “kabavua bamanye bualu.” Kabavua beteleje!​—Matayo 24:39; Genese 6:5-7.

Mpindieu, vuluka ne: Yezu wakamba ne: tshivua tshifikile bantu abu tshivua dilongesha buetu tuetu lelu. Ndilongesha kayi ditudi tupetelaku?​— Bushuwa, bantu bavua babutuke ki ng’anu bualu bavua babi, kadi bualu ba bungi bavua badifile bikole anu mu malu abu kabayi bakebaku dîba dia kulonga malu a Nzambi ne malu avuaye ne bua kuenza. Bidi bikengela tuikale badimuke bua katuikadi bu buobu to, ki mmuomu anyi?​—

Udi wela meji ne: Nzambi neabutule kabidi bukua-panu ku mvula anyi?​— Tòo, Nzambi wakalaya ne: kakuenza kabidi nanku to. Wakamba ne: “Ndi muteke muanzankongolo wanyi mulu, newikale bu tshimanyinu.” Yehowa wakamba ne: muanzankongolo uvua ne bua kuikala tshimanyinu tshia se: ‘mâyi kaena avulangana kabidi bua kujimijawu bintu bionso.’​—Genese 9:11-17.

Nunku tudi ne bua kuikala batuishibue ne: Nzambi kakubutula kabidi bukua-panu ku mvula to. Kadi anu bu mutudi bamone, Bible udi wakula bua nshikidilu wa bukua-panu. Pikala Nzambi ne bua kubutula bukua-panu ebu, nganyi wikalaye mua kupandisha?​— Bantu bavua baditue  anu mu malu makuabu kabayi basue nansha kulonga bualu bua Nzambi anyi? Bantu bavua ne bia bungi bia kuenza kabayi bakebaku nansha dîba dia kulonga Bible anyi? Udi wela meji kayi?​—

Tudi basue kuikala munkantshi mua bantu bikala Nzambi ne bua kupandisha, ki mmuomu anyi?​— Kabiakuikalaku bimpe bikala dîku dietu mua kuikala bu dia Noa bua Nzambi kutupandishaye tuetu bonso anyi?​— Bua tuetu kupanduka ku nshikidilu wa bukua-panu, bidi bikengela tumanye muikala Nzambi mua kububutula ne kujadika bukua-panu buende bupiabupia bua buakane. Tumone mpindieu muikalaye mua kuenza bualu ebu.

Bible udi utupesha diandamuna mu Danyele nshapita 2, mvese wa 44. Mvese eu udi wakula bua matuku etu aa padiye wamba ne: ‘Mu matuku a bakalenge aba Nzambi wa mu diulu neajadike bukalenge bukuabu [anyi mbulamatadi] budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’

Udi mumvue bualu ebu anyi?​— Bible udi wamba ne: mbulamatadi wa Nzambi neabutule mbulamatadi yonso ya pa buloba. Bua tshinyi?​— Bualu kayena itumikila Eu udi Nzambi muteke Mukalenge to. Nganyi udi Nzambi muteke mukalenge?​— Yezu Kristo!

Yehowa Nzambi udi ne bukenji bua kusungula mbulamatadi udi ne bua kukokesha, ne mmusungule Muanende Yezu bua kuikalaye Mukalenge. Mu katupa kîpi emu Yezu Kristo Mukokeshi udi Nzambi muteke neaditue mu dibutula mbulamatadi yonso ya pa buloba. Mu Buakabuluibua nshapita wa 19, mvese wa 11 too ne ku wa 16, Bible udi uleja Yezu munkatshi mua dibutula mbulamatadi, anu mudi tshimfuanyi etshi tshileja kabidi. Mu Bible, badi babikila mvita ya Nzambi ikala mua kubutula mbulamatadi yonso ya pa buloba ne: Armagedone.

Nzambi mmuambe ne: Bukalenge buende nebubutule mbulamatadi ya bantu. Kadi mmutuambileku tuetu bua kubutula mbulamatadi  eyi anyi?​— Tòo, mu Bible badi babikila Armagedone ne: ‘mvita ya dituku dinene dia Nzambi wa Bukole Buonso.’ (Buakabuluibua 16:14, 16) Eyowa, Armagedone mmvita ya Nzambi ne udi utuma Yezu Kristo bua kulombolaye biluilu bia mu diulu mu mvita eyi. Mvita ya Armagedone idi pabuipi anyi? Tumone mutudi mua kupeta diandamuna.