အခန်း ၄၆
လောကတစ်ခုကို ရေလွှမ်းမိုး ဖျက်ဆီးခဲ့တယ်—နောက်တစ်ခါ ဖျက်ဆီးဦးမလား
ကမ္ဘာကုန်မယ့်အကြောင်း လူတွေ ပြောတာ ကြားဖူးသလား။— ဒီနေ့ လူအတော်များများ ဒီအကြောင်း ပြောလာကြတယ်။ တချို့လူတွေက ကမ္ဘာဟာ နျူကလီးယားစစ်ပွဲမှာ ပျက်စီးသွားမယ်လို့ ယူဆကြတယ်။ လှပတဲ့ ဒီကမ္ဘာမြေကို လူတွေ ဖျက်ဆီးပစ်ဖို့ ဘုရားသခင် ခွင့်ပြုမယ် ထင်သလား။—
တို့သိခဲ့ရတဲ့အတိုင်း ဒီလောကရဲ့ အဆုံး အကြောင်းကို ကျမ်းစာမှာ ပြောထားတယ်။ ‘ဒီလောက ရွေ့သွားကွယ်ပျောက်နေတယ်’ ဆိုပြီး ကျမ်းစာ ဆိုတယ်။ (၁ ယောဟန် ၂:၁၇) လောကကုန်ဆုံးတာဟာ ကမ္ဘာမြေကြီး ကုန်ဆုံးတာကို ဆိုလိုတာလား။— မဟုတ်ပါဘူး။ မြေကြီးကို ဘုရားသခင် ဖန်ဆင်းတာဟာ လူတွေ “နေထိုင်ဖို့၊” ပျော်မွေ့ဖို့ ဖြစ်တယ်လို့ ကျမ်းစာ ဆိုထားတယ်။ (ဟေရှာယ ၄၅:၁၈) ဆာလံ ၃၇:၂၉ ကလည်း “ဖြောင့်မတ်သူတွေဟာ ကမ္ဘာမြေကို ပိုင်ဆိုင်ပြီး ထာဝစဉ် နေထိုင်ရလိမ့်မယ်” လို့ ပြောထားတယ်။ ဒါကြောင့် ကမ္ဘာမြေ အစဉ်အမြဲ တည်မယ်လို့ ကျမ်းစာဆိုထားတာ။—ဆာလံ ၁၀၄:၅။ ဒေသနာ ၁:၄။
ဒီတော့ လောကရဲ့အဆုံးဟာ ကမ္ဘာမြေကြီး ကုန်ဆုံးတာကို မဆိုလိုဘူးဆိုရင် ဘာကို ဆိုလိုသလဲ။— နောဧလက်ထက်က အဖြစ်အပျက်ကို အသေအချာ လေ့လာကြည့်မယ်ဆိုရင် အဖြေရနိုင်ပါတယ်။ ‘ရေလွှမ်းမိုးတုန်းက အဲဒီခေတ်ကလူတွေ ပျက်စီးခဲ့’ တယ်ဆိုပြီး ကျမ်းစာက ရှင်းပြထားတယ်။—၂ ပေတရု ၃:၆။
နောဧလက်ထက် ရေလွှမ်းမိုးဘေးကြီးမှာ လောကကုန်ဆုံးတုန်းက အသက်မသေဘဲ ကပ်ကျော်တဲ့သူတွေ ရှိခဲ့သလား။— ဘုရားသခင်က “ဘုရားတရားမဲ့တဲ့ လူ့လောကကို ရေလွှမ်းမိုးချိန်မှာ ဖြောင့်မတ်ခြင်းတရား ဟောပြောတဲ့ နောဧနဲ့ လူခုနစ်ယောက်ကို ကယ်တင်ခဲ့တယ်” ဆိုပြီး ကျမ်းစာ ဆိုတယ်။—၂ ပေတရု ၂:၅။
နောဧလက်ထက်မှာ ဖျက်ဆီးခံလိုက်ရတဲ့ လောကဟာ ဘာလဲ
ဒီလိုဆိုရင် ကုန်ဆုံးသွားတဲ့လောကဟာ ဘာလဲ။ ကမ္ဘာမြေလား၊ ဆိုးတဲ့လူတွေလား။—ကျမ်းစာက “ဘုရားတရားမဲ့တဲ့ လူ့လောက” လို့ဆိုတယ်။ ပြီးတော့ နောဧကို ‘ဟောပြောသူ’ ဆိုပြီး ခေါ်ထားတာ သတိပြုပါ။ သူ ဘာအကြောင်း ဟောခဲ့မယ် ထင်သလဲ။—နောဧက “အဲဒီခေတ်” ကုန်ဆုံးမယ့်အကြောင်း လူတွေကို သတိပေးခဲ့တယ်။
ရေလွှမ်းမိုးဘေးကြီးအကြောင်း ယေရှု ပြောတုန်းက ရေမလွှမ်းမိုးခင် လူတွေ ဘာလုပ်နေကြတယ်ဆိုတာလည်း တပည့်တွေကို ပြောခဲ့တယ်။ ယေရှု ဒီလိုပြောခဲ့တယ်– “ရေလွှမ်းမိုးဘေး မတိုင်ခင်တုန်းက လူတွေဟာ နောဧ သင်္ဘောထဲဝင်တဲ့နေ့အထိ စားလိုက်၊ သောက်လိုက်၊ ထိမ်းမြားပေးစားလိုက် လုပ်နေကြတယ်။ ရေလွှမ်းမိုးဘေး ရောက်ပြီး အားလုံးကို သုတ်သင်ပယ်ရှင်းလိုက်ချိန်အထိ သတိမဲ့နေကြတယ်။” အဲဒီနောက် လက်ရှိလောက မကုန်ဆုံးမီ လူတွေလည်း အဲဒီအတိုင်းပဲ ပြုမူကြမယ်လို့ ယေရှု ပြောခဲ့တယ်။—မဿဲ ၂၄:၃၇-၃၉။
ရေမလွှမ်းမိုးခင်က လူတွေ လုပ်ကိုင်ခဲ့တာကနေ အရေးကြီးတဲ့သင်ခန်းစာ ယူနိုင်တယ်ဆိုတာ ယေရှုရဲ့စကားက ပြတယ်။ ဒီစာအုပ်ရဲ့ အခန်း ၁၀ ကိုဖတ်ခဲ့တုန်းက အဲဒီလူတွေ ဘာလုပ်ခဲ့ကြတယ်ဆိုတာ မှတ်မိသေးသလား။— လူတချို့က ကြီးနိုင်ငယ်ညှဉ်း လုပ်ကြတယ်၊ ရက်စက် ကြမ်းကြုတ်တာတွေ လုပ်ကြတယ်။ ကျန်တဲ့လူအများကျတော့ မကောင်းတာ မလုပ်ပေမဲ့ ဘုရားသခင် စေလွှတ်တဲ့ နောဧ ဟောပြောတာကို နားမထောင်ကြဘူးလို့ ယေရှု ပြောတယ်။
ဒါကြောင့် လူဆိုးတွေကို ရေလွှမ်းမိုးဘေးနဲ့ ဖျက်ဆီးပစ်မယ်လို့ နောဧကို ယေဟောဝါ ပြောတဲ့အချိန် ရောက်လာတယ်။ ရေဟာ မြေကြီးတစ်ပြင်လုံးမက တောင်တွေကိုတောင် ဖုံးလွှမ်းသွားမယ်။ ဒါကြောင့် ယေဟောဝါက နောဧကို သင်္ဘောကြီး ဆောက်ခိုင်းတယ်။ စာမျက်နှာ ၂၃၈ ကပုံကို ပြန်ကြည့်မယ်ဆိုရင် သင်္ဘောဟာ ရှည်လျားတဲ့ ဧရာမ သေတ္တာကြီးနဲ့ တူတယ်။
နောဧကို ဘုရားသခင်က သူနဲ့ မိသားစုရယ်၊ တိရစ္ဆာန်အများကြီးရယ် လုံလုံခြုံခြုံ နေနိုင်လောက်တဲ့ သင်္ဘောကြီးကို ဆောက်ခိုင်းတယ်။ နောဧနဲ့ မိသားစုဟာ ပင်ပင်ပန်းပန်း လုပ်ကိုင်ခဲ့ရကြတယ်။ သစ်ပင်ကြီးတွေ ခုတ်လှဲပြီး အဲဒီသစ်သားနဲ့ သင်္ဘောကြီးကို ဆောက်ကြတယ်။ သင်္ဘောက ကြီးလွန်းလို့ နှစ်ပေါင်းများစွာ ဆောက်ခဲ့ရတယ်။
သင်္ဘောဆောက်နေတဲ့ အဲဒီနှစ်တွေမှာ နောဧ တခြားဘာလုပ်ခဲ့သလဲ မှတ်မိသေးသလား။—သူ တရားဟောခဲ့တယ်။ ရောက်လာမယ့် ရေဘေးကြီးအကြောင်း လူတွေကို သတိပေးတယ်။ နားထောင်တဲ့သူတွေ ရှိခဲ့သလား။ နောဧရဲ့ မိသားစုကလွဲလို့ တစ်ယောက်မှ နားမထောင်ခဲ့ဘူး။ ကျန်တဲ့လူတွေကတော့ ကိုယ့်အလုပ်နဲ့ကိုယ် အလုပ်များနေကြတယ်။ သူတို့ ဘာတွေနဲ့ အလုပ်များနေတယ်လို့ ယေရှု ပြောခဲ့သလဲ။ မှတ်မိသေးသလား။— စားလိုက်၊ သောက်လိုက်၊ ထိမ်းမြားပေးစားလိုက်နဲ့ပဲ အလုပ်များနေခဲ့ကြတယ်။ ကိုယ့်ကိုယ်ကိုယ် လူဆိုးတွေ ဖြစ်တယ်လို့ မထင်ကြတဲ့အပြင် နောဧရဲ့စကားကို နားထောင်ဖို့လည်း အချိန်မပေးကြဘူး။ ဒီတော့ သူတို့ ဘာဖြစ်သွားကြသလဲ ကြည့်ရအောင်။
နောဧနဲ့ မိသားစု သင်္ဘောထဲ ဝင်ပြီးတဲ့နောက် ယေဟောဝါက သင်္ဘောတံခါးကို ပိတ်လိုက်တယ်။ ဒါတောင် အပြင်မှာရှိတဲ့ လူတွေက ရေလွှမ်းမိုးမယ်ဆိုတာ မယုံကြည်ကြသေးဘူး။ ဒါပေမဲ့ ဗြုန်းကနဲ မိုးရွာချပါလေရော။ ပုံမှန်ရွာတဲ့မိုးမျိုး မဟုတ်ဘူးကွဲ့။ သည်းသည်းမည်းမည်း ရွာတဲ့မိုးမျိုးဖြစ်တယ်။ သိပ်မကြာပါဘူး။ ရေတွေဟာ မြစ်ကြီးတွေ ဖြစ်လာပြီး တဝေါဝေါနဲ့ အသံမြည်လာတော့တယ်။ ရေတွေဟာ သစ်ပင်ကြီးတွေကို အမြစ်ကနေ ကျွတ်ထွက်စေတဲ့အပြင် ကျောက်တုံးကြီးတွေကိုလည်း ကျောက်စရစ်ခဲလေးတွေလို တိုက်စားသွားတယ်။ သင်္ဘောမဿဲ ၂၄:၃၉။ ကမ္ဘာဦး ၆:၅-၇။
အပြင်မှာရှိတဲ့ လူတွေကော ဘာဖြစ်သွားကြသလဲ။— “ရေလွှမ်းမိုးဘေး ရောက်ပြီး အားလုံးကို သုတ်သင်ပယ်ရှင်း” လိုက်တယ်လို့ ယေရှု ပြောတယ်။ သင်္ဘောအပြင်မှာရှိတဲ့ လူတွေအားလုံး သေကုန်ကြတယ်။ ဘာကြောင့်လဲ။— ယေရှု ပြောသလိုပါပဲ။ သူတို့ ‘သတိမဲ့နေကြတယ်။’ သတိပေးစကားကို နားမထောင်ခဲ့ကြဘူး။—တစ်ချိန်လုံး ပျော်ဖို့ပါးဖို့လောက်ပဲ ဘာကြောင့် မစဉ်းစားသင့်သလဲ
အဲဒီလူတွေပေါ်မှာ ဖြစ်ပျက်ခဲ့တာတွေဟာ ဒီကနေ့ တို့အတွက် သင်ခန်းစာ ဖြစ်တယ်လို့ ယေရှု ပြောခဲ့တာကို သတိရပါ။ ဘာသင်ခန်းစာ ယူနိုင်သလဲ။— လူတွေ ဖျက်ဆီးခံရတာဟာ ဆိုးတာတစ်ခုတည်းကြောင့် မဟုတ်ဘူး။ လူအများဟာ ဘုရားသခင်နဲ့ ဘုရားသခင် လုပ်မယ့်အရာတွေအကြောင်း လေ့လာဖို့အချိန် မပေးနိုင်လောက်အောင် အလုပ်များနေခဲ့ကြလို့ပဲ။ သူတို့နဲ့ မတူအောင် သတိထားကြရမယ် မဟုတ်လား။—
ဘုရားသခင်ဟာ ရေလွှမ်းမိုးဘေးကြီးနဲ့ လောကကို နောက်တစ်ခါ ဖျက်ဆီးဦးမလား။— မဖျက်ဆီးတော့ဘူးလို့ ဘုရားသခင် ကတိပေးခဲ့တယ်။ ‘မိုးတိမ်မှာ ငါထားတဲ့ သက်တံဟာ ကမ္ဘာမြေကို ပေးထားတဲ့ ကတိအတွက် အထောက်အထား ဖြစ်လိမ့်မယ်’ လို့ ဘုရားသခင် ပြောခဲ့တယ်။ သက်တံက “သက်ရှိတွေဟာ ရေလွှမ်းမိုးဘေးကြောင့် ဘယ်တော့မှ မပျက်စီးရတော့ဘူး” ဆိုတဲ့ အထောက်အထား ဖြစ်ရမယ်လို့ ယေဟောဝါ ပြောခဲ့တယ်။—ကမ္ဘာဦး ၉:၁၁-၁၇။
ဒါကြောင့် ဘုရားသခင်ဟာ ကမ္ဘာကို နောက်တစ်ခါ ဘယ်တော့မှ ရေဘေးနဲ့ ဖျက်ဆီးတော့မှာ မဟုတ်ဘူးဆိုတာ သေသေချာချာ သိနိုင်တယ်။ ဒါပေမဲ့ တို့တစ်တွေ သိတဲ့အတိုင်း ကျမ်းစာက လောကရဲ့အဆုံးအကြောင်း ပြောထားတယ်။ ဒီလောကကို ဘုရားသခင် ဖျက်ဆီးတဲ့အခါမှာ ဘယ်သူတွေကို ဘုရားသခင် အသက်ချမ်းသာပေးမလဲ။— တခြား
အရာတွေကိုပဲ စိတ်ဝင်စားပြီး ဘုရားသခင်အကြောင်းကိုတော့ လုံးဝမသိချင်တဲ့လူတွေကိုလား။ ကျမ်းစာလေ့လာဖို့ အချိန်မပေးနိုင်တဲ့အထိ အမြဲတမ်း အလုပ်များနေတဲ့သူတွေကိုလား။ ကလေးတို့ ဘယ်လိုထင်သလဲ။—တို့တစ်တွေဟာ အသက်ရှင်ဖို့ ဘုရားသခင် ကာကွယ်စောင့်ရှောက်ပေးတဲ့ လူတွေထဲမှာ ပါချင်ကြတယ် မဟုတ်လား။— တို့ရဲ့မိသားစုဟာ နောဧရဲ့မိသားစုလို ဖြစ်ပြီး ဘုရားသခင်ရဲ့ ကယ်တင်ခြင်းခံရရင် သိပ်ကောင်းမှာပဲ မဟုတ်လား။— လောက ကုန်ဆုံးတဲ့အခါမှာ ကပ်ကျော်နိုင်ဖို့ဆိုရင် ဒီလောကကို ဘုရားသခင် ဘယ်လို ဖျက်ဆီးမယ်၊ ဖြောင့်မတ်တဲ့ ကမ္ဘာသစ်ကို ဘယ်လို တည်ထောင်မယ်ဆိုတာကို သိဖို့လိုတယ်။ ဘုရားသခင် ဘယ်လို လုပ်မယ်ဆိုတာ ကြည့်ရအောင်။
ဒံယေလ အခန်းကြီး ၂၊ အခန်းငယ် ၄၄ မှာ ကျမ်းစာက အဖြေပေးထားတယ်။ ဒီကျမ်းချက်က တို့ခေတ်နဲ့ပတ်သက်ပြီး ဒီလိုပြောထားတယ်– “ဘယ်တော့မှ မပျက်စီးမယ့် နိုင်ငံတစ်ခုကို တည်ထောင်လိမ့်မယ်။ အဲဒီနိုင်ငံဟာ တခြားလူတွေလက်ထဲ ရောက်မှာ မဟုတ်ဘူး။ အထက်မှာပြောခဲ့တဲ့ နိုင်ငံအားလုံးကို ခြေမွှဖျက်ဆီးလိမ့်မယ်။ ပြီးတဲ့နောက် အဲဒီနိုင်ငံတစ်ခုပဲ ထာဝစဉ် တည်တံ့နေမယ်။”
ဒီကျမ်းချက်ရဲ့ အဓိပ္ပာယ်ကို နားလည်သလား။— ဘုရားနိုင်ငံတော်အစိုးရက လူ့အစိုးရအားလုံးကို ဖျက်ဆီးပစ်မယ်လို့ ကျမ်းစာက ဆိုတယ်။ ဘာကြောင့်လဲ။— ဘုရင်အဖြစ် ဘုရားသခင် ခန့်အပ်တဲ့အရှင်ကို မနာခံလို့ ဖြစ်တယ်။ အဲဒီအရှင်ဟာ ဘယ်သူလဲ။— ဟုတ်ပါတယ်၊ ယေရှုခရစ်ပဲပေါ့။
ဘုရားသခင် ရွေးချယ်တဲ့ဘုရင် ယေရှုခရစ်ဟာ အာမဂေဒုန်မှာ ဒီလောကကို ဖျက်ဆီးပစ်မယ်
ယေဟောဝါဘုရားမှာ အုပ်ချုပ်မယ့်အစိုးရကို ရွေးချယ်ပိုင်ခွင့် ရှိတဲ့အတွက် သားတော် ယေရှုကို ရှင်ဘုရင်အဖြစ် ရွေးချယ်ခဲ့တယ်။ မကြာခင်မှာ ဘုရားသခင် ရွေးချယ်တဲ့မင်း၊ ယေရှုခရစ်ဟာ ဒီလောကရဲ့ အစိုးရအားလုံးကို ဖျက်ဆီးရာမှာ ဦးဆောင်သွားမယ်။ ကျမ်းစာက ဗျာဒိတ်ကျမ်း အခန်းကြီး ၁၉၊ အခန်းငယ် ၁၁ ကနေ ၁၆ မှာ ယေရှုခရစ် အဲဒီလိုလုပ်မယ့်အကြောင်း သရုပ်ဖော်ထားတယ်။ ဒီပုံမှာ ဖော်ပြထားတဲ့အတိုင်းပါပဲ။ ကျမ်းစာထဲမှာ ဒီလောကအစိုးရအားလုံးကို ဖျက်ဆီးမယ့် ဘုရားသခင့်စစ်ပွဲကို အာမဂေဒုန်လို့ ခေါ်ထားတယ်။
ဗျာဒိတ် ၁၆:၁၄၊ ၁၆) ဟုတ်တယ်။ အာမဂေဒုန်ဟာ ဘုရားသခင် တိုက်မယ့်စစ်ပွဲ ဖြစ်တယ်။ အဲဒီတိုက်ပွဲမှာ ကောင်းကင်ဗိုလ်ခြေတွေကို ဦးဆောင်ဖို့ ယေရှုခရစ်ကို ဘုရားသခင် သုံးမှာဖြစ်တယ်။ အာမဂေဒုန်စစ်ပွဲ နီးပြီလား။ အဖြေ ရှာကြည့်ရအောင်။
ဘုရားနိုင်ငံတော်က လူ့အစိုးရများကို ဖျက်ဆီးပစ်မယ်လို့ ဘုရားသခင် ပြောထားတဲ့အတွက် လူ့အစိုးရတွေကို ဖျက်ဆီးဖို့ တို့တစ်တွေကို ဘုရားသခင် ခိုင်းမှာလား။— ခိုင်းမှာ မဟုတ်ဘူး။ ကျမ်းစာထဲမှာ အာမဂေဒုန်ကို ‘အနန္တတန်ခိုးရှင် ဘုရားသခင်ရဲ့ နေ့ကြီးမှာ တိုက်မယ့်စစ်ပွဲ’ လို့ခေါ်ထားတယ်။ (လူဆိုးတွေကို ပယ်ရှင်းပြီး ဘုရားသခင်ကို ဝတ်ပြုတဲ့သူတွေကို ကယ်တင်မယ့်အချိန်နဲ့ ပတ်သက်ပြီး ပညာအလိမ္မာ ၂:၂၁၊ ၂၂။ ဟေရှာယ ၂၆:၂၀၊ ၂၁။ ယေရမိ ၂၅:၃၁-၃၃။ မဿဲ ၂၄:၂၁၊ ၂၂ မှာ အတူတူ ဖတ်ကြည့်ရအောင်။