ORAAHURIIRE omuntu naagamba aha mperu y’ensi?— Omu bunaku obu, abantu baingi nibagamba aha mperu y’ensi. Abantu abamwe nibateekateeka ngu ensi neija kucwekyerezibwa abantu barikukoresa zaabomu ez’amaani. Nooteekateeka ngu Ruhanga naija kureka abantu kucwekyereza ensi nungi egi?—

Nk’oku twegire, Baibuli neetugambira aha birikukwata aha mperu y’ensi egi. Baibuli neegira ngu “ensi egi neehwaho.” (1 Yohaana 2:17) Nooteekateeka ngu ensi egi ei turikutuuramu niyo eracwekyerezibwe?— Ngaaha, Baibuli neegira ngu Ruhanga akahanga ensi “kutuurwamu,” buzima ngu abantu babaase kutuuramu  baashemereirwe. (Isaaya 45:18) Zaaburi 37:29 nihagira hati: “Abahikiriire baryahungura ensi, bagituuremu ebiro byona.” Nikyo Baibuli erikugirira ngu ensi neija kugumaho ebiro byona.—Zaaburi 104:5; Omubuurizi 1:4.

Mbwenu emperu y’ensi ku kiraabe kitarikumanyisa emperu y’ensi ei turikutuuramu, nikimanyisa ki?— Nitubaasa kutunga eky’okugarukamu twashwijuma ebyabaireho omu biro bya Noa. Baibuli neegira eti: ‘Ensi eyaabaire eriho ekacwekyerezibwa amaizi g’omwegyemure.’—2 Petero 3:6.

Mbwenu hariho abaahonokireho obu Omwegyemure gwacwekyereza ensi omu bwire bwa Noa?— Baibuli neegira ngu Ruhanga “akakiza Noa omurangi w’okuhikiirira n’abandi mushanju, obu yaareeta omwegyemure gw’amaizi aha nsi ey’abatarikumutiina.”​—2 Petero 2:5.

Ni nsi ya muringo ki eyacwekyereziibwe? Mbwenu shi ekaba eri ensi egi ei tutwireho, nari bakaba bari abantu babi?— Baibuli neegira ngu ‘n’ensi ey’abatarikutiina Ruhanga.’ Kandi yetegyereze ngu Noa naayetwa “omurangi.” Nooteekateeka ngu akaba naaranga ki?— Noa akaba naarabura abantu aha bikwatiraine n’okucwekyerera ‘kw’ensi eyaabaire eriho.’

Yesu obu yaagamba aha Mwegyemure gw’amaani, akagambira abeegi be ebintu ebi abantu baabaire nibakora Omwegyemure gutakabaireho. Eki nikyo yaabagambiire: ‘Omu biro ebyo ebyabandiize omwegyemure gw’amaizi, [abantu bakaba] nibarya kandi nibanywa, nibashwera, nibahingira, okuhitsya aha kiro eki Noa yaataahiireho omu bwato; bakaba bari aho bataine ki barikumanya, okuhitsya obu omwegyemure gw’amaizi gwaizire, gukabatwara boona.’ Yesu akagira ngu abantu nikwo barikwija kuba nibatwaza emperu y’ensi egi etakabaireho.​—Matayo 24:37-39.

Ebigambo bya Yesu nibitworeka ngu haine eki turikubaasa kwegyera aha bi abantu baabaire nibakora, Omwegyemure gutakabaireho. Omu Shuura 10 ey’Ekitabo eki noijuka eki abantu abo baabaire  nibakora?— Abantu abamwe bakaba bari ebihanda kandi bakaba bakora ebikorwa by’obushaarizi. Kandi Yesu akagira ngu abantu abandi tibarahurikiize obu Ruhanga yaatuma Noa kubabuurira.

N’ahabw’ekyo eizooba rimwe Yehova akagambira Noa ngu akaba naija kucwekyereza abantu babi arikukoresa omwegyemure. Amaizi gakaba nigaija kushweka ensi yoona otwariiremu n’enshozi. Yehova akagambira Noa kwombeka obwato buhango. Bukaba buri nk’ekibokisi kihango kandi buringwa, nk’oku orikureeba omu kishushani aha rupapura 238.

Ruhanga akagambira Noa kwombeka obwato buhango munonga obwabaire nibabaasa kuzamu we n’eka ye hamwe n’enyamaishwa nyingi kugira ngu babaase kukiriramu. Noa hamwe n’eka ye bakakora n’amaani. Bakatema emiti mihango, kandi barikukoresa embaho baatandika kwombeka obwato. Eki kikatwara emyaka mingi ahabw’okuba obwato bukaba buri buhango munonga.

Noijuka ekindi eki Noa yaabaire naakora omu myaka egyo yoona ei yaaherize arikwombeka obwato?— Akaba naabuurira, arikurabura abantu aha Mwegyemure ogwabaire nigwija kubaho. Omuribo haine owaataire omutima aha kurabura okwo? Tihaine owaataireho omutima okwihaho ab’eka ya Noa bonka. Abantu abandi bakaba bahugiire aha kukora ebintu ebindi. Noijuka eki Yesu yaagambire ngu bakaba nibakora?— Bakaba bahugiire aha kurya n’okunywa n’okutaaha omu bushwere. Bakaba batarikuteekateeka ngu ni babi, kandi tibarataireho omutima kuhurikiza ebi Noa yaabaire naabagambira. Hati ka tureebe ekyababaireho.

Noa n’eka ye ku baaherize kutaaha omu bwato, Yehova yaakinga orwigi rwabwo. Na bwanyima y’ekyo abantu abaabaire bari aheeru yaabwo tibaraikiriize ngu Omwegyemure gukaba niguza kwija. Kwonka ahonaaho enjura ekatandika kugwa. Ekaba etari njura eya butoosha. Ekaba eri ey’amaani munonga. Bwanyima amaizi gakaba nk’emigyera mihango, garikuhoorera munonga. Amaizi gakahigura emiti mihango  gaahiringisa amabaare mahango waashusha ngu amabaare ago gakaba gari makye. Kandi niki ekyahikire aha bantu abaabaire bari aheeru y’obwato?— Yesu akagira ati: ‘Omwegyemure gw’amaizi gukaija, gwabatwara boona.’ Abantu boona abaabaire bari aheeru y’obwato bakafa. Ahabw’enki?— Nk’oku Yesu yaagambire, tibarafiireyo. Tibarataire omutima aha bi Noa yaabaire naabagambira!​—Matayo 24:39; Okutandika 6:5-7.

Ijuka, Yesu akagira ngu ekyabaire aha bantu abo haine eki kirikutwegyesa omu bunaku obu. Nikitwegyesa ki?— Abantu tibaracwekyereziibwe ahabw’okugira ngu bakaba bari babi kwonka, kureka n’ahabw’okugira ngu bakahugira aha bintu ebindi baabura obwire bw’okwega ebirikukwata ahari Ruhanga n’ebi yaabaire naija kukora. Twine kwegyendesereza kureeba ngu ti twaba nkabo, tikwo?—

Nooteekateeka ngu Ruhanga naija kugaruka kucwekyereza ensi arikukoresa omwegyemure?— Ngaaha, Ruhanga akaraganisa ngu tarigaruka kukikora. Akagira ati: “Naata omuhanganzima gwangye omu kicu, gugume guri akamanyiso.” Yehova akagira ngu omuhanganzima nigwija kuba akamanyiso ngu “amaizi tigarigaruka kuba omwegyemure gw’okuhwerekyereza ebiine omubiri byona.”​—Okutandika 9:11-17.

N’ahabw’ekyo nitubaasa kuhamya ngu Ruhanga tarigaruka kucwekyereza ensi arikukoresa omwegyemure. Nk’oku twaheza kureeba, Baibuli neetugambira aha mperu y’ensi. Ruhanga ku aracwekyereze ensi, n’oha  orahonokeho?— Mbwenu shi n’abo abahugiire aha bindi abatarikwenda kwega ebirikukwata ahari Ruhanga? Nari shi nibaija kuba abo abatarikukunda kwega Baibuli? Iwe nooteekateeka ki?—

Nitwenda kuba omuri abo abu Ruhanga arikwija kucungura, tikwo?— Tikikaabaire kirungi eka yaitu kuba nk’eya Noa kugira ngu Ruhanga abaase kutucungura twena?— Twaba turi ab’okuhonokaho aha mperu y’ensi, nitwetenga kwetegyereza oku Ruhanga arikwija kugicwekyereza kandi akareetaho ensi ye ensya ey’okuhikiirira. Ka tureebe oku arikora eki.

Baibuli neetuha eky’okugarukamu omuri Danieli eshuura 2, orunyiriri 44. Ekyahandiikirwe ekyo nikigamba aha bunaku bwaitu obu, kirikugira kiti: “Kandi omu busingye bw’abo bagabe Ruhanga w’omu iguru aryataho obundi bugabe, obutaricwekyerezibwa ebiro byona, kandi obutegyeki bwabwo tiburihungurwa rindi ihanga; kureka buryayatagura obwo bugabe bwona, bubumareho kandi bwo buryagumaho.”

Ekyo nookyetegyereza?— Baibuli neegira ngu obutegyeki bwa Ruhanga nibwija kucwekyereza obutegyeki bwona obw’omu nsi. Ahabw’enki?— Ahabw’okuba tiburikworobera Ogwo ou Ruhanga yaataireho kuba Omukama. Mbwenu n’oha ogwo?— Buzima ni Yesu Kristo.

Yehova Ruhanga aine obugabe kucwamu kutaho obutegyeki obushemereire kutegyeka, kandi atooraine Omwana we Yesu, kuba Omukama. Juba Omutegyeki ou Ruhanga atooraine, Yesu Kristo, naija kwebembera omu kucwekyereza obutegyeki bwona oburi omu nsi egi. Baibuli omu Okushuuruurwa eshuura 19, orunyiriri 11 kuhika 16, neemugambaho nk’oriyo naacwekyereza obutegyeki bwona, nk’oku ekishushani eki kirikworeka. Omuri Baibuli, orutaro rwa Ruhanga orw’okucwekyereza obutegyeki bwona obw’omu nsi nirwetwa Haramagedoni.

Ruhanga naagira ngu Obukama bwe nibwija kucwekyereza obutegyeki bw’abantu. Kwonka shi naagira ngu tube niitwe twacwekyereza  obutegyeki bw’abantu?— Ngaaha, omu Baibuli, Haramagedoni neeyetwa ‘orugamba orw’ekiro kikuru kya Ruhanga ow’Obushoboorozi bwona.’ (Okushuuruurwa 16:14, 16) Haramagedoni n’orutaro rwa Ruhanga, kandi naija kukoresa Yesu Kristo kwebembera amahe g’omu iguru kurwana. Mbwenu shi orutaro orwo ruri haihi kubaho? Ka tureebe oku turikubaasa kukimanya.