BO A yega di tende hende papia di fin di mundu?— Tin hopi hende ta papia di e kos ei awendia. Tin hende ta kere ku mundu ta bai kaba dor di un guera ku bòm nuklear. Bo ta kere ku un dia Dios ta bai laga hende kaba ku nos bunita tera?—

Manera nos a siña, Beibel ta bisa ku lo tin un fin di mundu. E ta bisa: “E mundu ta pasa bai.” (1 Juan 2:17) Abo ta kere ku fin di mundu kier men ku tera lo no eksistí mas?— Nò, Beibel ta bisa ku Dios a traha tera “pa e wòrdu habitá.” (Isaias 45:18) Sí, el a trah’é pa hende  biba ariba i gosa di dje. Salmo 37:29 ta bisa: “E hustunan lo heredá e tera, i lo biba den dje pa semper.” Ta p’esei Beibel ta bisa tambe ku tera lo keda pa semper.—Salmo 104:5; Eklesiastés 1:4.

Pero si fin di mundu no kier men ku e tera aki no ta bai eksistí mas, ta kiko e kier men antó?— Nos por haña sa si nos paga bon tinu na loke a pasa den tempu di Noe. Beibel ta bisa: “E mundu di e tempu ei a wòrdu destruí, siendo inundá [òf, tapá] ku awa.”—2 Pedro 3:6.

Tin hende ku a skapa e fin di e mundu ei, e gran Diluvio den tempu di Noe?— Beibel ta bisa ku Dios a ‘skapa Noe, un predikadó di hustisia, huntu ku shete otro hende mas, ora ku el a trese un diluvio riba e mundu di mal hende.’—2 Pedro 2:5.

Pero ta kua mundu a kaba antó? Tera, òf e mal hendenan?— Beibel ta bisa ku ta e ‘mundu di mal hende’ a kaba. Anto wak: E ta bisa ku Noe tabata “un predikadó.” Kiko bo ta kere ku Noe a prediká?— El a spièrta hende tokante e fin di “e mundu di e tempu ei.”

Ora Hesus a papia di e gran Diluvio, el a konta su disipelnan kiko e hendenan tabata hasiendo nèt promé ku e fin a yega. Esaki ta loke el a bisa nan: “Den e dianan ei ku tabata promé ku e diluvio, nan tabata kome i bebe, nan tabata kasa i duna pa kasa, te dia ku Noe a bai den e arka, i nan no a komprondé [“hasi kaso,” NW] te ora ku e diluvio a bin i a bai ku nan tur.” E ora ei Hesus a bisa ku promé ku e mundu aki kaba, hende lo ta hasiendo meskos.—Mateo 24:37-39.

Loke Hesus a bisa ta laga nos komprondé ku nos por siña un lès for di e kosnan ku e hendenan tabata hasi promé ku e  Diluvio. Den Kapítulo 10 di e buki aki nos a lesa kiko nan tabata hasi. Bo ta kòrda ta kiko?— Tabatin hòmber abusador, i nan tabata hasi kos violento. Pero Hesus a bisa ku tabatin hopi otro hende ku gewon no a skucha ora Dios a manda Noe prediká na nan.

Awèl, un dia Yehova a bisa Noe ku E ta bai manda un diluvio pa kaba ku e mal hendenan. Awa tabata bai tapa tera tur-tur; asta e serunan lo a tapa. Yehova a bisa Noe pa e traha un arka grandi, un kos manera un kaha grandi i largu. Bo por wak e riba e plachi na página 238.

Dios a bisa Noe traha un arka sufisiente grandi pa Noe, su famia i yen di bestia por a bai aden, pa nada no pasa nan. Noe ku su famia a traha hopi duru riba dje. Nan a kap palu grandi, anto nan a kuminsá traha e arka ku nan. Nan a tarda hopi, hopi aña pa kaba e arka, pasobra e tabata masha grandi mes.

Bo ta kòrda kiko mas Noe a hasi tur e añanan ku e tabata trahando e arka?— El a prediká. El a spièrta hende ku un Diluvio ta bini. Tabatin hende ku a hasi kaso di Noe? Nò, niun hende. Su famia so. E otro hendenan tabata muchu drùk hasiendo otro kos. Bo ta kòrda kiko Hesus a bisa ku nan tabata hasi?— Nan tabata kome, bebe i kasa, i nan tabata laga e kosnan aki tuma tur nan tempu. Nan no a haña ku nan ta dje malu ei, i nan no a tuma tempu pa skucha Noe. Awèl, ban wak kiko a pasa ku nan.

Despues ku Noe i su famia a bai den e arka, Yehova a sera e porta. Ainda e hendenan pafó di e arka no a kere ku e Diluvio ta bini. Ma diripiente awa a kuminsá kai for di shelu! E no tabata un gewon áwaseru. Awa tabata basha mes! Promé ku nan ke sa, e awa a kuminsá kore manera riu grandi i hasi hopi  boroto. Awa tabata tumba palu grandi i lastra baranka bai kuné manera piedra chikitu. Anto kiko a pasa ku e hendenan ku tabata pafó di e arka?— Hesus a bisa: “E diluvio a bin i a bai ku nan tur.” Tur hende pafó di e arka a muri. Dikon?— Hesus mes a bisa ku nan no a “komprondé,” i esei ta pasobra nan no a hasi kaso. Nan no kier a tende!—Mateo 24:39; Génesis 6:5-7.

Pero kòrda esaki: Hesus a bisa ku loke a pasa e hendenan ei ta un lès pa nos ku ta biba awendia. Ki lès nos por saka?— Wèl, no ta dor ku nan tabata mal hende so e hendenan ei a bai destruí. Hopi di nan a bai destruí dor ku nan tabata gewon muchu drùk pa nan tuma tempu pa siña tokante Dios i tokante loke e tabata bai hasi. Nos mester paga bon tinu pa nos no ta manera nan, bo no ta haña?—

Bo ta kere ku Dios lo bolbe kaba ku mundu dor di un diluvio?— Nò, Dios a primintí ku e no ta hasié. El a bisa: “Mi ta pone mi regenbog den e nubianan, i esaki lo ta un señal.” Yehova a bisa ku e regenbog ta un señal di ku “nunka mas e awa lo no bira un diluvio pa destruí tur karni.”—Génesis 9:11-17.

Kier men, nos por tin sigur ku nunka mas Dios lo no bolbe kaba ku mundu dor di un diluvio. Pero manera nos a mira, Beibel ta bisa ku lo bin un fin di mundu sí. Ken Dios ta bai skapa ora e kaba ku e  mundu aki?— E ta bai skapa hende ku ta asina interesá den otro kos, ku nunka nan no ke siña tokante Dios? E ta bai skapa hende ku tur ora ta muchu drùk pa studia Beibel? Kiko bo ta kere?—

Nos sí ke ta un di e hendenan ku Dios ta bai skapa. Òf nò?— Bo no ta kere ku lo ta hopi dushi si nos famia por ta manera e famia di Noe, anto Dios skapa nos tur?— Pa nos skapa fin di mundu, nos mester komprondé ta kon Dios ta bai kaba kuné i bini ku su mundu nobo di hustisia. Laga nos wak kon e ta bai hasié.

Beibel ta bisa nos kon, na Daniel kapítulo 2, versíkulo 44. E teksto aki ta papia di nos tempu, i e ta bisa: “Den e dianan di e reinan ei e Dios di shelu lo lanta un reino [un gobièrnu] ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.”

Bo a komprondé loke e teksto ta bisa?— Beibel ta bisa ku e gobièrnu di Dios ta bai kaba ku tur gobièrnu na tera. Dikon?— Dor ku nan no ta obedesé Esun ku Dios a hasi Rei. Anto ta ken esei ta?— Sí, Hesukristu!

Yehova Dios tin derecho di disidí ta ki sorto di gobièrnu ta bai goberná, i el a skohe su Yu Hesus pa bira Rei. Pronto Hesukristu, e Gobernante ku Dios a skohe, lo dirigí Dios su angelnan pa kaba ku tur gobièrnu di e mundu aki. Na Revelashon kapítulo 19, versíkulo 11 pa 16, Beibel ta konta nos kon e ta bai hasié. E plachi aki ta mustra nos loke e teksto ei ta bisa. Beibel ta yama e guera di Dios pa kaba ku tur gobièrnu di mundu “Armagedón.”

 Dios ta bisa ku su Reino ta bai kaba ku e gobièrnunan di hende. Pero, ta nos e ta manda pa kaba ku e gobièrnu nan?— Nò, Beibel ta bisa ku Armagedón ta “e guera di e gran dia di Dios Todopoderoso.” (Revelashon 16:14, 16) Sí, Armagedón ta e guera di Dios, i e ta usa Hesukristu pa guia su ehérsito di angel den shelu pa bringa. E guera di Armagedón ta serka? Ban wak kon nos por haña sa.