ACHKA runakunam ninku kay pacha chinkachisqa kananmanta, ¿haykapipas chayta uyarirqankichu?... Wakinkum ninku hatun bombakunawan guerrapi runakuna chayta ruwanankumanta. Ichaqa, ¿Diosqa saqinqachu kay sumaq allpa pachanchikta runakuna chinkachinankuta?...

Bibliaqa ninmi kay pachapi mana allin runakuna ‘chinkachisqa’ kanankumanta (1 Juan 2:17). Hinaptinqa, ¿kay pachapas chinkanqachu?... Manam, Jehova Diosqa kay pachataqa unancharqa ‘runakuna chaypi yachanankupaqmi’ (Isaias 45:18). Chaymi Salmo 37:29 nin: ‘Allin ruwaq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku’, nispa.  Chaynaqa, bibliapa nisqanman hinaqa wiña-wiñaypaqmi kay pachaqa kanqa (Salmo 104:5; Eclesiastes 1:4).

Noeypa tiemponpi ima pasakusqanmantayá rimasun. Bibliam nin: ‘Noeypa tiemponpi runakunam chinkachisqa karqaku kay allpa pachata yaku pamparuptin’, nispa (2 Pedro 3:6).

¿Lliw runakunachu wañurqaku allpa pachata yaku pamparuptin?... Manam, bibliaqa ninmi ‘mana allin runakunaman sinchi parata Dios kachaykamuptin Noeywan qanchis runakuna salvakusqankumanta’. Noeyqa karqa ‘allin ruwaq Diosmanta willakuqmi’ (2 Pedro 2:5).

Hinaptinqa, ¿kay allpa pachachu icha mana allin runakunachu chinkachisqa karqa?... Arí, mana allin runakunam. ¿Yuyachkankichu Noeyqa Diosmanta willakuq kasqanta?... Payqa chay tiemponpi mana allin runakuna chinkachisqa kanankumantam willakurqa.

Jesusmi manaraq chay sinchi para chayamuchkaptin runakuna imayna kasqankumanta rimaspan qatiqninkunata nirqa: “Chay punchawkunapim manaraq sinchi para chayamuchkaptin runakuna mikuchkarqaku, tomachkarqaku hinaspa qarikunapas chaynataq warmikunapas casarakuchkarqaku Noey buqueman yaykunan punchawkama. Manam kasukurqakuchu sinchi para chayaramuspa llapallanta chinkarachinankama”, nispa. Jesusqa nirqataqmi kay tiemponchikpi mana allin runakuna manaraq chinkachisqa kachkaspanku Noeypa tiemponpi hina kanankumantapas (Mateo 24:37-39).

Chunka kaq yachachikuypim rimamurqanchik Noeypa tiemponpi runakuna imayna kasqankumanta, ¿imaynataq  karqaku?... Wakin runakunaqa runamasinta waqachiq llumpay mana allin runakunam karqaku. Ichaqa yaqa llapallankum Jesuspa willakusqanman hina Noeypa willakusqantaqa mana uyarirqakuchu.

Chay tiempopi llumpay mana allin runakuna kasqanraykum Jehova Diosqa Noeyman willarqa chay runakunata sinchi parawan wañuchinanmanta. Yakuqa enteron kay pachatam pampanan karqa, chaymi Jehova Diosqa Noeyta nirqa hatu-hatun buqueta ruwananpaq. Chay buqueqa suytunpaman ruwasqa hatu-hatun caja hinam karqa. Chaytam qawawaq 238 kaq paginapa dibujonpi.

Chay buqueqa hatu-hatunmi kanan karqa chaypi runakuna hinaspa tukuy rikchaq animalkuna yaykuspa salvakunankupaq. Chaymi Noeywan ayllunqa anchata llamkarqaku sachakunata kuchuspa chaywan buqueta ruwanankupaq. Chay buque hatu-hatun kasqanraykum achka watapi ruwayta tukururqaku.

Buqueta ruwaspanpas, ¿imatawantaq Noeyqa ruwarqa?... Runakunamanmi willarqa sinchi para chayamunanmanta. Runakunaqa, ¿uyarirqakuchu? Manam. ¿Yuyachkankichu imanasqa mana uyarisqankuta?... Jesuspa nisqanpi hina chay runakuna mikukuyllapi, tomakuyllapi hinaspa qarikunapas chaynataq warmikunapas casarakuyllapi kakusqankuraykum. Paykunaqa allin runakuna kasqankupaq hapikuspankum Noeytaqa mana uyariqkuchu. ¿Imapitaq tukururqaku?

Noeywan ayllun buqueman yaykuruptinkum Jehova Diosqa punkuta wichqarurqa. Chaywanpas runakunaqa hinallaraqmi rumi sunqu karqaku. Chayllamanmi paraqa mana haykapipas paramunanta hina chayamuyta qallaykurqa. Hinaptinmi  mayukuna rikuriruspan hatun sachakunata, rumikunata apayta qallaykurqa. ¿Imataq karqa buqueman mana yaykuq runakunawan?... Jesusmi nirqa: ‘Sinchi para chayaramuspanmi llapallanta chinkarachirqa’, nispa. Arí, llapallankum wañururqaku. ¿Imanasqa?... Willasqa kachkaspankupas ‘mana kasukusqankuraykum’ (Mateo 24:39; Genesis 6:5-7).

Chay runakunamanta wakinqa wañurqakutaqmi ruwayllankupi umayuq kaspa Diosmanta yachanankupaq mana tiempochakusqankuraykupas. ¿Imatataq kayqa yachachiwanchik?... Ñuqanchikpas paykuna hina mana wañunapaqqa Diosmanta yachananchikpaq tiempochakuytam ¿aw?...

Chaynaqa, ¿kaqmantachu Diosqa sinchi parawan mana allin runakunata chinkachinqa?... Manam, Jehova Diosmi nirqa: “Chirapaytam churani puyupi, chay chirapam kay pachapi kawsaqkunawan contratoypa señalnin kanqa”, nispa. Chay chirapawanmi Jehova Dios nirqa: ‘Manañam sinchi paraqa kanqañachu llapallan kawsaqkuna wañunanpaqqa’, nispa (Genesis 9:11-17).

Jehova Diosqa manañam sinchi parawanqa kay pachapi mana allin runakunataqa chinkachinqachu. Chayna kaptinpas bibliaqa willakunmi kunanpas mana allin runakuna chinkachisqa kanankumanta. ¿Pikunataq  chaypiqa salvakunqaku?... ¿Yaqachu salvakunmanku ruwayllankupi afanakuspa Diospaq mana tiempochakuqkuna? ¿Ima niwaqtaq?...

Ñuqanchikqa munachwanmi salvakuyta ¿aw?... Munachwantaqmi ayllunchikpas salvakunanta ¿aw?... Chaypaqqa puntatam yachananchik imaynata Jehova Dios mana allin runakuna chinkachinanmanta. Chaymantayá yachaykusun.

Bibliam Daniel 2 kaq capitulopa 44 versiculonpi nin: ‘Chay hamuq reykuna gobiernachkaptinmi hanaq pacha Dios hatarichinqa mana tuñichiy atina gobiernota, chay gobiernoqa huk runamanqa manam qusqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq’, nispa.

¿Ima ninantaq chayqa?... Bibliapa nisqanman hinaqa Diospa gobiernonmi utaq munaychakuyninmi kay pachapi gobiernokunata chinkachinqa. ¿Imanasqa?... Diospa churasqan kamachiqta mana kasukusqankuraykum. ¿Pitaq payqa?... Jesucristom.

Jehova Diosllam yachan pi allin kamachiq kananta, chaymi payqa churin Jesusta akllarqa kamachiq kananpaq. Jesusqa ñam kay pachapi gobiernokunataqa chinkachinqaña. Apocalipsis 19 kaq capitulopa 11 versiculonmanta 16 versiculonkamam niwanchik imaynata chayta ruwananmanta. Chaytam kay dibujopipas qawachichkan. Chaytam biblia sutichan “Armagedon” nispa. Chaypim llapallan gobiernokunata Jehova Dios chinkachinqa.

¿Ñuqanchikqa yanapakusunchu?... Manam, bibliaqa ninmi Armagedonqa ‘tukuy atiyniyuq Diospa piñakuynin punchaw guerra’ kasqanta (Apocalipsis 16:14, 16). Arí, Armagedonqa  Diospa guerranmi, chaypim payqa Jesucristota kamachinqa angelkunawan kuska kay pachapi mana allin runakunata chinkachinankupaq. ¿Haykapitaq chayqa kanqa? Chaymantam qatiqninpi yachasunchik.